“Ukōt Wāween Aō Kepaak n̄an Bōk juon Naan in Kam̧ool,” Liaona, Juļae 2023.
Rūm̧m̧an Ded ro
Ukōt Wāween Aō Kepaak n̄an Bōk juon Naan in Kam̧ool
Ekar iien eo kein kajuon ekar wōr juon aō ine in tōmak eļem waan me ekar lukkuun in.
Ikar rūttoļo̧k ilo Kabun̄ in—Ikar etal n̄an m̧akūtkūt ko, im ikar bōk kuņaō ilo jar an baam̧le im ekkatak jeje ko rekwojarjar. Bōtaab ekar jab lukkuun wōr aō juon naan in kam̧ool. Ikar jab jeļā eļan̄n̄e ikar tōmak ilo Anij im Nejin. Ikar jab jeļā eļan̄n̄e Bok in Mormon ekar m̧ool.
Ikar kōņaan juon naan in kam̧ool, bōtaab en̄jake inepata ālkin jar elōn̄ alen ilo jab en̄jake āinwōt ikar bōk juon uwaak. Ikar jinoe ļōmņak, “Eļan̄n̄e Anij ej lukkuun m̧oolin, etke E ejjab kwaļo̧k n̄an n̄a? Etke Ej kōtļo̧k aō jijet ijin im ļōmņak?”
Reilikļo̧k, imaron̄ lo ilo alikkar etke ikar jab bōk juon uwaak: ikar jab lukkuun wujlepļo̧k. Ikōn riiti jeje ko rekwojarjar aō ium̧win ļalem minit ko juon alen juon wiik im kōtmene jet en̄jake in revelesōn kōnke ikar kajjitōk kake.
Ikar jab meļeļe bwe tōmak ej juon pedped in katak in m̧akūtkūt.
Juon Ine in tōmak
Jabdewōt eo ej lale jān itulik enaaj kar kūr eō “niknik” ilo Kabun̄ in, bōtaab ikar kab de jab jeļā eļan̄n̄e Kabun̄ in ekar m̧ool. Bōtaab ikar kōņaan jeļā.
Kōn menin ikar kāālet n̄an jerbale juon mijen. Ekar bōd aō bōklōke bwe āinwōt juon mijenede, inaaj kar kajju ļapļo̧k aō bōk uwaak ko jān Anij. Ikar kab de jab leļo̧k eļap kijejeto n̄an jar ak ekkatak, bōtaab ejjab tok ikar bōk juon ijjitōn̄.
Ilo jinoin mijen eo aō, ikar kakkōt n̄an en̄jake Jetōb eo ke ikar kaminene ilo online ilo iien ajeeded in nan̄inmej eo kōnke ejimettan wōt kijejeto eo aō. Bōtaab innām ikar etal n̄an jikin kaminene eo an mijenede. Im iien eo aō ijo ekar juon en̄jake in jetōb eo eļap tata an mour eo aō. Ekar iien eo kein kajuon ekar wōr juon aō ine in tōmak eļem waan me ekar lukkuun in m̧oolin.
Kōm̧m̧ane juon Oktak
Āliktata deļo̧n̄e jikin mijen eo ekar pen. Ikar en̄jake āinwōt naan in kam̧ool eo edik ikar bōk ekar jako.
Juon raan ikar jan̄, innām juon ememļo̧kjeņ ekar waļo̧k ilo bōra. Jema ekōn kajjitōk ippa ejiet raan eo aō ilo jikuuļ, im ikōn aolep iien ba ekar ejālimo. Im ekōn ba, “Ekwe, ej kōnke kwar kōm̧m̧ane bwe en jālimo. Eļan̄n̄e kwoj kōņaan bwe jikuuļ en kalimomo, kwon kōm̧m̧ane bew en limo.” Ikar kile bwe imaron̄ kōm̧mane bwe en iien eo aō ilo mijen eo aō en wejepedik kōn ekkatak im eddōkļo̧k ak imaron̄ kōm̧m̧ane bwe en nana.
Kōn menin ikar jar kōn eļapļo̧k m̧ool jān m̧okta n̄an jiron̄ Jemedwōj Ilan̄ bwe inaaj kajjieon̄ im ukōt m̧wiļū. Ālkin, ikar ellowetak n̄an likūt juon kijejeto kāāl. Ikar jino m̧ool in ekkatak im jar im kejekļo̧kjeņ, im ilo iien ko naan in kam̧ool eo edik im m̧ōjņo̧ ekar bar ro̧o̧ltok—im wōnm̧aanļo̧k wōt im eddōk. Ekar dikļo̧k aō inepata, im ikar jino lo lan̄lōn̄ ilo gospel eo.
Ta eo Jej Leļo̧k Ej Ta eo Jej Bōk
N̄e kom̧ij inepata im en̄jake āinwōt tōmak eo am̧ ejjab eddōkļo̧k, kom̧ maron̄ ļōmņak eļan̄n̄e Anij ej pād im eļan̄n̄e E ej kea. Bōtaab ikar ekkatak bwe E ej aolep iien pād ippād im naaj jipan̄ kōj kōkajoorļo̧k ad tōmak, im naan in kam̧ool eo eļan̄n̄e jej bōk eddo in im wijlepļo̧k kijejeto eo (lale Moronai 10:4).
Elder Robert D. Hales (1932–2017) jān Doulul eo an Rijilōk ro Jon̄oulruo ekar ba, “Ilo an āinwōt ejjeļo̧k lukkuun juon kōl me kajjojo iaad ej bōk juon naan in kam̧ool, ewōr āinwōt juon jon̄ak in kile.”1 Jon̄ak jab in ekoba juon ikdeelel em̧ool n̄an jeļā m̧ool eo, jar, m̧ōņōņō in jerbal ijo jej kūr n̄an e, kajjieon̄ in pokake, ekkatak jeje ko rekwojarjar im kōjerbali ilo mour ko ad, im wōr juon m̧wil ettā.
Ijjamin naaj kar kōkajoorļo̧k tōmak eo aō ilo jab ukōt m̧wilū, ļoor jon̄ak in, im ajeļo̧k aolepān būruō n̄an kobaik Jemedwōj Ilan̄ im Jisōs Krasit. Ke ikar kōm̧m̧ane oktak ko, ikar jino bōk uwaak ko im tōmak m̧ool ko.
Sister Rebecca L. Craven, Rikakpilōklōk eo Kein Karuo ilo Būreejtōnji eo Eutiej an Doulul eo an Jiron̄ ro, jidik iien emootļo̧k, ekar ba: “Erom̧ āinwōt juon rikaļoor an Jisōs Kraist ekūtbuuj eļapļo̧k jān kōjatdikdik im tōmak. … Ej aikuji bwe jen kōm̧m̧ane juon men”2 Ikar ekkatak kōn n̄a make bwe menin ej m̧ool, ta eo ij likūt n̄an gospel eo ej ta eo ij bōk jāne.
N̄an ro rej kalimjōk m̧wilū, jon̄ak in niknik eo aō ilo Kabun̄ in bōlen ejjab oktak jān an kar aolep iien. Bōtaab ikar ukōt kallim̧ur eo aō n̄an gospel eo ilo būruō. Im menin ekar kōm̧mane aoelp oktak.
Rijeje eo ej jokwe ilo Washington, USA.