Ekōjkan an Anij Tōl Eō n̄an Kōm̧m̧ane Jerbal eo An?

N̄e jej riiti bwebwenato in oktak eo an Saul, jej im̧we kōn uwaak eo an n̄an Rilo̧mo̧o̧r: “Irooj, ta eo kwoj kōņaan bwe in kōm̧m̧ane?” (Jerbal 9:6). Āinwōt rikaļoor ro an Jisōs Kraist, emakijkij ad kajjitōk ejja kajjitōk in wōt ilo ad pukot bōk koņaad ilo jerbal eo an Irooj.

Bōtaab ta eo ej waļo̧k ālkin ad kajjitōk kajjitōk eo? Ekōjkan ad bōk tōl eo n̄an jeļā ankilaan Anij n̄an jerbal ko ad?

M̧ōņōņō n̄an Jerbal

N̄an uwaake kajjitōk eo an Saul kōn ta eo ej aikuj kōm̧m̧ane, em̧ōkaj an Irooj kar uwaak kōn naan in kōmeļeļe ko n̄an e n̄an etal n̄an Damascus. Jet iien jej kōjatdikdik Irooj enaaj letok n̄an kōj ejja kain unin tōl in ejenolo̧k. Bōtaab jej aikuj in kōttar n̄an naan in kōmeļeļe ko bun̄tōn kōn bun̄tōn m̧okta jen ad bōk koņaad ilo jerbal eo an Anij.

Elder Dieter F. Uchtdorf jān Doulul eo an Jon̄oulruo Rijilōk ro ekar katakin, “Emakijkij, uwaak eo n̄an jar eo ad ejjab itok ilo iien eo jej bukwelōlō ak ilo ad jutak n̄an jerbal n̄an Irooj im jerbal n̄an ro ipeļaakid” (“Waiting on the Road to Damascus,” Liahona, May 2011, 76).

Ļōmņak kōn ekōjkan an Irooj kar tōl jim̧or armej rein n̄an iien ko rem̧m̧an an jerbal in jipan̄ kōnke raar m̧ōņōņō in jerbal:

Saul ilo Jerbal 9:20
Piter ilo Jerbal 9:32–42