Rejtake Membōr ro Rej Ioon Jepel
Jemedwōj Ilan̄ enaaj jipan̄ kōj jeļā ekōjkan kōm̧m̧ane juon mejatoto eruwainene im ineem̧m̧an em̧m̧an tata ilo ward ko im branch ko ad n̄an ro me rejepel ak rej dibuk juon jepel.
Ruo em̧m̧aan ro ilo juon ward rej erom ejjeļo̧k pālerro ilo enan̄in juon wōt iien, ālkin iiō ko in aerro kar m̧are n̄an limaro pālerro. Ke em̧m̧aan eo kein kajuon ekar erom ejjeļo̧k pāleen, ward eo ekar emakijkij aer pukōtļo̧k, kōmatļo̧k m̧ōn̄ā ko, im lo wāween ko n̄an kanooj lale bwe ekar jab en̄jake ajimakeke. N̄an em̧m̧aan eo kein karuo, kain jerbal in karejar in ekar jab bok jikin, im ļein ekar en̄jake ettolok im jab aorōk.
Ta kar oktak eo ikōtaan em̧m̧aan ro ruo? Eo kein kajuon ekar mej pāleen im eo kein karuo ekar jepel. Āinwōt an kar em̧m̧aan eo ekar jepel kwaļo̧k en̄jake in ippa, akweļap eo an ekar ļam waan: jemaron̄ ke jipan̄ ro uwaan Kabun̄ in em̧m̧anļo̧k aer meļeļe ewi wāween jerbal in karejar n̄an ro me rejepel im n̄an kile bwe ej wōr wōt aer aorōk, jikin aorōk ilo ward ko im branch ko?
Elōn̄ ward ko rej kōm̧m̧ane juon jerbal em̧m̧an an jerbal in karejar n̄an ro me rej ioon kilaan ko an jepel, ijo wōt akweļap eo an em̧m̧aan in maron̄ tōlļo̧k kōj aolep n̄an kajjitōk eļan̄n̄e ej wōr wōt men jemaron̄ kōm̧m̧ane em̧m̧anļo̧k. Aikuj in n̄an en̄jake ruwainene im rejtak rej iookļo̧k kūr eo ejjab bōjrak jān ritōl ro an Kabun̄ in—n̄an iakwe aolep ilowaan worwor eo an Anij im n̄an jipan̄ er en̄jake ruwainene im ineem̧m̧an ilo stake ko ad an Zaion.1
“Jabdewōt iien jej kotak bar juon armej jej pād ilo loļātāt eo n̄an ejake jikin ko an ineem̧m̧an n̄an er.”2 Ward im branch ko ad rej aikuj in ibwilijin jikin ko ilo ad pukōt n̄an kōjparok kien ko ruo reļļap n̄an iakwe Anij im n̄an iakwe ro jet āinwōt kōj make (lale Matu 22:37–39). Ļoor pedped in katak ko emaron̄ jipan̄ kōj jeļā ekōjkan an em̧m̧anļo̧k ad rejtake ro ilo ward im branch ko ad me raar ioon ak rej ioon jepel.
Keememej Bwe Jepel Ekitbuuj Elōn̄ En̄jake ko
Kōnke jejeļā pedped eo an katak eo an m̧are indeeo im kajoor eo an bujen liāp eo ilo karōk in lo̧mo̧o̧r eo an Anij, jepel emaron̄ in kwaļo̧k eļap būrom̧ōj. Kōn menin ejjab aolep remaron̄ en̄jake ilo juon wōt wāween kōn jepel eo aer. Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar katakin bwe jepel “ej juon unin kōnono eļap kōnke ebōktok en̄jake ko rekajoor jān armej ro ekar jepet er ilo wāween ko roktak jān doon. Jet rej kalimjōk er make ak ro rejitōnbōro āinwōt riļanotot ro an jepel. Ro jet rej kalimjōk er make āinwōt ro rejeraam̧m̧an. Jet rej kalimjōk jepel āinwōt kein kam̧ool an likjab. Ro rej watōk menin āinwōt iaļ in ko emenin aikuj jān juon m̧are.”3
Ijello̧kin ļōmake ekōjkan an juon eo ej en̄jake jepel kalimjōk jekjek ko aer, m̧ōņōņō in ron̄jake jabdewōt iien ak jabdewōt wāween armej eo ej pojak. Ļōmņak in baj kajjitōk, “Ekōjkan aō maron̄ juon jipan̄ ilo iien in?” ak “Ilo wāween ta ko jemaron̄ rejtake eok ilo im em̧ool ālkin am̧ jepel?”
Kajjitōk ko n̄an Watūki:
-
Ekōjkan an kajjojo armej ro maron̄ en̄jake elōn̄ kain en̄jake ko ilo iien ko rooktak jān doon kajjojo raan, wiik ak allōn̄? Ekōjkan aō maron̄ akjoketok im jipan̄ ilo kajjojo en̄jake ko?
-
Ekōjkan aō maron̄ dāpij wōt aō bōk revelesōn kōn ekōjkan jipan̄ ilo iien ko rooktak jān doon?
-
Ta men ko tōmak rem̧ool imaron̄ kōm̧m̧ani me imaron̄ aikuj julo̧k n̄an pukōt em̧m̧anļo̧k im jerbale revelesōn eo kōn ekōjkan jipan̄?
Pedped ioon Iakwe Ijello̧kin Ekajet
Ilo jekjek ko an jepel, ejakutkut ad, eļan̄n̄e jab, naaj jeļā aolep tipdik in meļeļe ko me kar tōlļo̧k n̄an an juon ripālele jepel—im jejjab aikuj in. “N̄e jepel ej waļo̧k, kajjojo armej ewōr an eddo n̄an jeorļo̧k bōd, kotak, im jipan̄ ijello̧k in liaakeļo̧k”;4 menin em̧ool n̄an jim̧or ripālele ro im ro ipeļakier. Jej aikuj lukkuun pepded ioon iakwe ro jet, ejjab ekajete er, jekdo̧o̧n ta ewi wōt eo pālele ewōr juon ad jemjerā ekajoor ippān.
Ijello̧kin in pedped ioon ekajet, jemaron̄ pedped ioon iakwe im bōro kuk, āinwōt kar katakin jān Sister J. Anette Dennis, Rikakpilōklōk eo Kein Kajuon ilo Būreejtōnji eo Eutiej an Doulul eo an Kōrā:
“Ewi emakijkij in ad ekajet ro jet pedped ioon kōm̧m̧an im jerbal ko aer, ak ejjeļo̧k jerbal, n̄e, jej lukkuun meļeļe, jen kar em̧m̧akūt kōn tiriam̧o im wōr ikdeleel n̄an jipan̄ ijelo̧kin likūt bar eddo iooer jen ad ekajet? …
“Kar kakien kōj n̄an iakwe ro jet, jab ekajete er. Jen joļo̧k eddodo ko; ejjab ad n̄an ineeki. Ijoke, jemaron̄ bōk ine eo an Rilo̧mo̧o̧r kōn iakwe im tūriam̧o. …
“… Kajjojo raikuj en̄jake ke rej lukkuun kōm̧m̧an kobatok im rej aikuj ilo ānbwin Kraist.”19
Kajjitōk ko n̄an Watūki:
-
Ta eo imaron̄ kōm̧m̧ane n̄an pedped eļap ioon iakwe ro jet āinwōt an Jisōs Kraist kar kōm̧m̧ane?
-
Ewōr ke wāween ko ij ekajete juon eo, ekoba kappukōt ak ņa ruon, me emaron̄ in dāpij eō jān maron̄ leļok rejtake eo aikuji?
-
Ta eo imaron̄ kōm̧m̧an n̄an em̧m̧anļo̧k aō en̄jake iakwe eo an Anij n̄an ro jet?
Pukōt Wāween ko Ekitbuuj Er
Kōn jepel, kajjojo armej emakijkij aer luuji jemjerā ko me raar jarjar jān ro m̧ōttan ro kar pāleer ak baam̧le Im ta eo ej waļo̧k n̄e jemjerā ko raar ejaki ilo iien m̧are eo, im ro m̧ōttaer maron̄ jako aer maron̄ karuwaineneik jim̧or kar ro kar pāleer n̄an m̧akūtkūt ko ilo ejja iien eo wōt?
Juon sister ekar kwaļo̧k bwe liin im ļeo pāleen emakijkij aer kōn etal n̄an joten ikkure ko aolep wiik ippān ro m̧ōttaer ilo ward eo an. Ālkin jepel eo, liin ekar būrom̧ōj ke kūr ko n̄an bon̄in ikkure ko raar bōjrak aer itok kōnke ekar wōt an ripālele ro me raar kobaļo̧k. Bar juon sister ekar kwaļo̧k ta eo elōn̄ iaan ro uwaan ward eo raar ļōmņak bwe kōnke liin ekar kiiō juon m̧am̧a ejjeļo̧k rejetan, liin eban kar lōn̄ an iien n̄an kobaļo̧k ilo m̧akūtkūt ippān ro m̧ōttan āinwōt an kōn m̧oktaļo̧k, kōn menin, raar jab kūr ļo̧k bwe en jab en̄jake būrom̧ōj ilo an jab maron̄ etal. Ijo wōt ke, menin ekar kōm̧m̧an menin an en̄jake eļapļo̧k makeļo̧k im ajimakeke. Sister in ekar kwaļo̧k bwe enaaj kar em̧m̧an n̄an baj wōnm̧aanļo̧k n̄an kūrļo̧k (jekdo̧o̧n eļan̄n̄e liin ekar jab maron̄ kobaļo̧k)—n̄an jeļā bwe ro jet raar kōņaan bwe en pād.
Aolep jekjek eoktak, bōtaab “en̄jake okmāņāān in pein jem̧jerā eo im ron̄jake kōmlet eo epen an tōmak.”6
Kajjitōk ko n̄an Watūki:
-
Ta okoktak ko n̄an m̧akūtkūt ko imaron̄ kōm̧m̧ani n̄an jipan̄ membōr ro me ejjeļo̧k pāleer en̄jake ilo aer pād ejja wōt āinwōt rim̧are ripālele ro.
-
Ekōjkan an ward eo ad letok dam̧oļo̧k in iien ko rem̧m̧an n̄an kobaiktok ippān m̧akūtkūt ko me rejetjet n̄an aikuj kok an membōr ro me rejepel?
-
Ta m̧akūtkūt ko remaron̄ jipan̄ eo m̧ōtta jerbal ak jipan̄ļo̧k, eļap tata eļan̄n̄e lōke eo an ej aikuj in bar jepļaak ālkin juon jemjerā epen?
“M̧okta Lale, Innām Jerbal”7
Ro rej ioon jepel rej jejenijnij n̄an oktak ko ilo jāān ko, jikejuuļ ko, en̄jake ko, iminene ko raan otemjej im iiō otemjeļo̧k, karōkan mour, im elōn̄. Menin em̧ool n̄an rūtto ro barāinwōt ajri ro nejier, ro remaron̄ barāinwōt bōk eļōn̄ļo̧k eddo ko ilo im̧ōko im̧weer.
Ward im branch ko̧o̧njeļ ko remaron̄ ļōmņak kōn ekōjkan rejtake kajjojo membōr an baam̧le eo, ekoba ajri ro. Āinwōt kajjojo armej ro, ebarāinwōt lōn̄ ad iien ko rem̧m̧an n̄an lo aikuj ko innām jar ilo jerbale revelesōn eo an juon make n̄an jipan̄ kakūrm̧ooli
Juon sister ekar jeraam̧m̧an ke juon eo rūturin ekar kile bwe ļoe kar pāleen ekōn kōm̧m̧ane karreo meļan eo ilo fall aolep iiō, ekoba kōpooj kein utdikdik n̄an iien m̧ōļo, im kōņaan kōm̧m̧ane n̄an liin ak kwaļo̧k n̄an liin ta eo n̄an kōm̧m̧ane. Juon baba eo ejjeļo̧k rejetan ekar jeraam̧m̧an ke ro rūturin raar leļo̧k aitia ko n̄an rikōkajiriri maron̄ pedped ioer ilo eria eo an ekāāl.
Erkein rej bar jet wāween ko ro uwaan ward eo raar jipan̄ baam̧le ko:
-
Ritōl ro an jodikdik ro, Būraimere an ward eo rej kōm̧m̧ani waanjon̄ak ko an karrel an ro ejjeļo̧k jemeer ak jinieer ilo an jetjet ilo mour ko an ajri ro.
-
Menin leļo̧k ko an Kūrijmōj kar liļo̧k, āinwōt n̄e ekar jāān n̄an jipan̄ kōn wōņāān ko an mijen.
-
Dam̧oļo̧k in m̧ōn̄ā ko jān kweilo̧k ko reļlap ak m̧akūtkūt ko kar būkilo̧k n̄an m̧weo n̄an baam̧le eo.
-
Ro uwaan ward eo raar pād ilo m̧akūtkūt in ikkure ko an ajri ro.
-
Ko̧o̧njeļ ko an rūkaki raar ekōnono kōn ekōjkan ļōmņak kōn ajri ro jān juon m̧weo ewōr jepel ie, eļap tata kōn katak ko kōn baam̧le ak n̄e ajri ro rej kobaļo̧k ilo ward eo ālkin aolep wiik n̄e raar pād ippān eo jinen ak eo jemen.
-
Juon ripālele eo erūttoļo̧k ekar lolorjake juon baam̧le ejjeļo̧k pāleen ium̧win aer kōjparok.
Jemaron̄ barāinwōt likūt wōt ilo ļōmņak bwe kajjojo armej im baam̧le ko renaaj aikuj iien n̄an kōm̧m̧an okoktak n̄an jekjek ko aer rekāāl. Jouj im kōtļo̧k bwe ren mour im wōnm̧aanļo̧k ilo iien eo aer im an Anij, ejjab ko ad.
Kajjitōk ko n̄an Watūki:
-
Ekōjkan aō maron̄ kōkajoorļo̧k jemjera eo ej wōnm̧aanļo̧k bwe ro rej dibuk juon jepel renaaj en̄jake aenōm̧m̧an ilo bōk jipan̄ n̄e rej aikluji, jekdo̧o̧n̄ eļan̄n̄e ejjab kiiō?
-
Ta “m̧oktata ko” remaron̄ eļap tata pen n̄an baam̧le eo, ko āinwōt ej kab kein kajuon in an ajri ro jab koba ippān doon ippān eo jinen ak jemen ilo juon iien kakkije? Ekōjkan aō maron̄ leļo̧k eļapļo̧k jemjerā ilo iien ko reppen?
-
Ta kein jipan̄ ko baam̧le eo emaron̄ aikuji me imaron̄ jipan̄ kake, ak ekōjkan aō maron̄ ejake juon ekkejel n̄an ro jet kōn kapeel ko n̄an jipan̄?
Ilo ad jar in kappukōt n̄an em̧m̧anļo̧k ad meļeļe im jerbal in karejar n̄an ro me rej jepel, ippā baam̧le ko aer, jemaron̄ en̄jake im kwaļo̧k m̧ōttan iakwe eo an Anij n̄an aolep ajri ro Nejin.