“Iaļ eo Ad Make n̄an Emmaus,” Liaona, Juļae 2023.
Itok, Ļoor Eō
Iaļ eo Ad Make n̄an Emmaus
Ļalem m̧akūtkūt ko reļem waan remaron̄ jipan̄ kōj jeļā bwe Rilo̧mo̧o̧r ej aolep iien epaak.
Iaļ eo n̄an Emmaus, jān Wendy B. Keller, jipan̄ an Havenlight
Jema ekar mej jān kāānjōr ke ekar 4 aō iiō. Ikar rūttoļo̧k ļōmņak etke ekar aikuj in mej. Ikar kajjitōkin Anij im kar kajjitōk etke mour eo aō ekar kanooj jetjet. Jon̄oul iiō ko tokālik, ke ekar 14 aō iiō ikar ioon mijenede eo. Ke raar katakin eō, jinō ekar en̄jake bwe raar katakin m̧ool eo im bwe kōmij aikuj ron̄jake. Ke kōm kar kobatok ilo Kabun̄ in, gospel eo an Jisōs Kraist im juon meļeļe kōn karōk in lo̧mo̧o̧r eo raar itok n̄an mour eo aō ilo juon iien ke ikar lukkuun aikuji.
Tokālik, ke ikar liāp n̄an ro jinō im jema ilo tampeļ eo, jinō ekar unoojdikdiktok n̄an n̄a, “Ij en̄jake an̄ūn jemam̧ ijin.” Ke ikar ļōmņak kōn kōjeraam̧m̧an ko an liāp, ikar jeļā bwe Irooj ekar jeļā kōn baam̧le eo am im bwe E emakijkij an kōn pād ippām, emool jekdoon iien eo ke kōm̧ kar jab jeļā.
Kwonan̄in ke kar ļōmņak eļan̄n̄e Rilo̧mo̧o̧r ej ļōmņak kōn kwe? E ejeļā ke kōn apan̄ ko im n̄ūrbōktak ko am̧? Ta eo E enaaj kar ba n̄an kwe eļan̄n̄e kwomaron̄ kar etetal im kōnono Ippān?
E ekar Etetal Ippāer
Jilu raan ālkin mej eo an Jisōs Kraist, ruo iaan rikaļoor ro An raar etetal ilo iaļ eo ļo̧k n̄an bukōn eo Emmaus, eo emaron̄ in jiljilimjuon m̧aiļ ko (12 km) jān Jerusalem Raar jakoļo̧k ilo ļōmņak ko im inepata ko aer make, ke juon ruwaimejet ekar kobaļo̧k ippāer.
Ruwaimejet eo ekar kajjitōk, “Ta men ko kom̧ ro kōnono n̄an doon, ke kom̧ etal, im rej bōjrak im būrom̧ōj mejeir?”
Rikaļoor ro raar kōnono kōn iien ko rekāāl “kōn Jisōs ri Nazeret.” Raar tōmak bwe Jisōs ekar itok n̄an lo̧mo̧o̧ren Israel, bōtaab kar jab jim̧we liakeļo̧k im debwāāl E. Raar barāinwōt ba bwe ro me ekar em̧m̧an tata aer jeļā kajjien Kraist rar ba E emōj an jerkake jān rimej.
Ruwaimejet eo ekar jiron̄ er bwe raar “rum̧wij būruemi kōn tōmak men ko otemej ri kanaan raar kōnono kaki.” E ekar etale ta eo jeje ko rekwojarjar raar katakin im ekōjkan an Kraist kar kakūrm̧ool kanaan eo. Menin ekar kobrak rikaļoor ro kōn lan̄lōn̄.
Ke raar tōkeakļo̧k lo Emmaus, rikaļoor ro raar kajjitōk ippān ruwaimejet eo n̄an “pād [ippāer].” Ilo kōjota eo ruwaimejet eo ekar kōjeraam̧m̧an pilawe eo im ruje. Ejjab to, rikaļoor ro raar kile bwe ruwaimejet eo ekar jab juon ruwaimejet n̄an jidik ak Rilo̧mo̧o̧r E Make! (Lale Luk 24:13–33).
E ej Pād Ippād
Jemaron̄ ļōmņak etke ruo rikaļoor ro raar jab jeļā ke ekar Rilo̧mo̧o̧r ekar etetal ippāer. Im aaet ewi emakijkij in ad likjab n̄an meļeļe bwe E ej etetal ippād? Emakijkij ad kanooj kalimjōk apan̄ ko, im em̧ool jekdo̧o̧n lan̄lōn̄ ko, ilo mour ko ad raan otemjej me jejjab lo bwe Rilo̧mo̧o̧r ej pād ikōjaad.
Jemaron̄ jab lo ekōjkan An pād ippād, kajjieon̄ pād ippād, jerbal ippād, im jan̄ ippād. Em̧ool jekdo̧o̧n ilo iiien ko ad rekabūrom̧ōjm̧ōj tata ippād, eļan̄n̄e jej kile, jemaron̄ en̄jake An pād ippād im ron̄ naan ko An: “Kom̧win pād wōt bwe N̄a ami Anij” (Sam Ko 46:10, kōmejaja kab kobaitok, lale barāinwōt Katak im Bujen ko 101:16).
Iaļ eo Ad Make
Kōj kajjojo ewōr juon an mejānkajjik n̄an tōpare ilo mour in. Ilo iien ko ilo iaļ eo ad, jemaron̄ jelm̧ae nan̄inmej ak jemaron̄ apan̄ kōn m̧ōjņo̧ ko ad make. Emaron̄ wōr ad jorrāān ko ikkijien jāān ak apan̄ ko me rej itok jān tōprak ko, m̧weie, im uteej.
Ilo ad etal ilo iaļ eo ad make n̄an Emmaus, jej aikuj jejjamin naaj etetal make iaad. Jemaron̄ kajjitōk ippān Rilo̧mo̧o̧r n̄an an pād ippād. Erkein rej m̧akūtkūt ko ļalem reļem waan me renaaj jipan̄ kōj epakeļo̧k E.
Kōmeļeļe ko jān Lovetta Reyes-Cairo
1. Jar Kajjojo Raan
Jar aikuj itok m̧oktata ilo raan in mour ko ad aolep raan. Emaron̄ jipan̄ kōj bōk jemjerā eo an im tōl eo an Jemedwōj Ilan̄. Jemaron̄ kajjitōk kōn kajoor n̄an ļoor Nejin im kōn kajoor eo an Jetōb, eļap tata ilo iien ko n̄e ļōmņak ko remaron̄ tōlļo̧k kōj n̄an jerawiwi.
Josep Smith eo edik, ke ekar akweļap ippān Anij ilo jar kōn juon uwaak, ekar lo rikapo eo ej kajjieon̄ in kabōjrak e (lale Josep Smith—Bwebwenato 1:16). Āinwōt Josep, jej aikuj kiliddāp ilo jar im lōke bwe Jemedwōj Ilan̄ ejjamin ļo̧k wōt n̄an jidik m̧ōk in ron̄jake kōj. E enaaj jipan̄ kōj meļeļe iien eo An im uwaak ko An.
2. Kwojkwoj ioon Jeje Ko Rekwojarjar
Rilo̧mo̧o̧r ej kōm̧m̧ane juon waanjon̄ak n̄an kōj kōn ekkatak jeje ko rekwojarjar. E ekar emakijkij an kout jān jeje ko rekwojarjar ke E ekar katakin: Ekkatak jeje ko rekwojarjar aolep iien ej jipan̄ kōj bōk juon kōļmenļo̧kjeņ ealikkar im peļļo̧k, juon bōro epidodo an kaorōk naan an Anij, im pā ko repojak n̄an jerbal.
Ilo ad ekkatak jeje ko rekwojarjar, Jetōb Kwojarjar emaron̄ koobrak kōj kōn ikdeelel eo n̄an kōm̧m̧an em̧m̧an. Enaaj kōkkan̄ļo̧k erreilo̧k eo ad n̄an lo ta eo me māj ko rejjab joi. Enaaj jipan̄ kōj jeļā kōn aikuj ko an ro riaikuj. Jenaaj jeraam̧m̧an n̄an ļoor waanjon̄ak eo an Rilo̧mo̧o̧r an kaenōm̧m̧an ro rej pād ilo aikuj kaenōm̧m̧an (lale Mosaia 18:8–9). Innām ilo ad jelm̧ae jerbal ko an raan eo, jejjamin naaj etetal make. Rilo̧mo̧o̧r enaaj etetal ippād juon iien ilo juon iien.
4. Ļoor Rikanaan ro Remour
Jej aikuj ļoor kapilōk eo an rikanaan eo ad ejitōnbōro, Būreejtōn Russell M. Nelson, im rikanaan ro, rilolo ro im ribōk revelesōn ro jet. Innām jenaaj lo bwe iaļ eo ad n̄an Emmaus enaaj ineem̧m̧an im alikkar. Renaaj tōlļo̧k kōj ilo ejjeļo̧k jorrāān im jipan̄ kōj n̄an jeļā bwe Rilo̧mo̧o̧r ej ippād.
4. Karuwaineneik E n̄an Pād
Ilo ad ekkatak kōn Jisōs Kraist im ilo ad pokake kien ko An, jej karuwaineneik Rilo̧mo̧o̧r n̄an pād ippād. Jej ekkatak n̄an kile kareel eo An ilo mour ko ad.
Rikaļoor ro ruo ilo iaļ eo n̄an Emmaus raar etetal ippān Rilo̧mo̧o̧r, kar kōnono Ippān, im kar en̄jake an buruwier bwil ilowaer (lale Luk 24:32). Akweļap eo aer n̄an E, “Kwōn pād ippem” (Luk 24:29), en aikuj barāinwōt akweļap eo ad in.
Ke rikaļoor ro raar kile Rilo̧mo̧or, ejidimkij An kar jakoļo̧k jān m̧aan mājeer. Ejjab to rikaļoor ro raar bar ro̧o̧l n̄an Jerusalem im kam̧ool n̄an Rijilōk ro bwe Rilo̧mo̧o̧r em̧ōj an jerkakpeje. Ke rekar kam̧ool, Irooj ej bar “jutak eoļōpeir” (Luk 24:36). Jemaron̄ barāinwōt en̄jake E n̄e E ej pād ioļapāād.
5. Bar Kōkāāl Bujen ko Iien Otemjej
Kain̄i ko im bujen ko an gospel eo an Jisōs Kraist remaron̄ ukōt lukkuun paotokid. Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar ba, “Kabun̄ jar ko ad im jerbal ko ad kōn katak ko n̄an indeeo ej kepaake kōj n̄an Anij im kōlapļo̧k im kadebakabk jon̄an ad iakwe.”1 N̄an waanjon̄ak, peptaij ej kōtļo̧k bwe Irooj en karreoik kōj. Im eļan̄n̄e jej tiljek im pokake, bujen ko im kain̄i ko an tampeļ rej kōpooj kōj n̄an mour juon raan ilo im̧aan mejān jim̧or Jemen im Nejin.
Kwojkwoj eo ej jipan̄ kōj keememej im kōtļo̧k ad bar kōkāāl bujen ko ad, n̄an ukweļo̧k, im n̄an bar kajjieon̄. N̄e je bōk kwojkwoj eo, jej kwaļo̧k ad kōņaan bōk etan Jisōs Kraist iood im bar kallim̧ur n̄an keememej E im kōjparok kien ko An. Innām jej kallim̧ur bwe Jetōb eo An enaaj pād ippād iien otemjej. (Lale Katak im Bujen Ko 20:77, 79). Jej aikuj iien otemjej keememej kain̄i ko im bujen ko jaar kōm̧m̧ani.
Rilo̧mo̧o̧r Enaaj Epak
Ilo iaļ eo ad ļo̧k n̄an Emmaus, Rilo̧mo̧o̧r ej karuwaineneik kōj n̄an itok n̄an Ippān im lem̧ōņōņō ilo E. Ilo ad jar kajjojo raan, kwojkwoj ioon jeje ko rekwojarjar, ļoor rikanaan ro remour, karuwaineneik E n̄an pād ippād, im bar kōkāāl im kautiej bujen ko ad, E enaaj epake kōj. Innām jenaaj itok n̄an jeļā, āinwōt rikaļoor ro ilo iaļ eo n̄an Emmaus ekar jeļā, bwe Jisōs Kraist ekar jerkak im bwe E em̧ool emour im iakwe kōj.
Ij kamo̧o̧l bwe Jisos Kraist ej ad Rilo̧mo̧o̧r im Ripinmuur. E ej kijooror in pād ippād im tōl kōj ilo ejjeļo̧k jorrāān ilo iaļ eo ad.