Erom̧ Riwaanjon̄ak ro rej Armej ro Rekwojarjar ilo Raan-ko Āliktata
Jān Būreejtōn Russell M. Nelson
Ij likūt aō iakwe im kōjeraam̧m̧an ioomi, bwe kom̧win maron̄ kwojkwoj ioon naan ko an Irooj im mour kōn katak ko An ilo mour ko ami make.
Kweilo̧k in ekar juon eo ekar im̧we im kabwilōn̄lōn̄. Jej reim̧aanļo̧k n̄an ilju im jekļaj kōn laudin̄din̄. Em̧ōj kareel kōj n̄an kōm̧m̧an em̧m̧anļo̧k im n̄an erom̧ em̧m̧anļo̧k. Ennaan ko rekabwilōn̄lōn̄ kar kwaļo̧ki jān jikin kōnnaan in im̧aan jān Ritōl ro Routiej an Kabun̄ in im Opiija ro Routiej im al ko rekar im̧we! Ij rōjan̄ kom̧ bwe kom̧win katak ennaan kein, jino ilo wiik in.1 Rej kwaļo̧k ļōmņak im ankilaan Irooj n̄an armej ro An, rainin.
Pedped wōt ilo m̧weo, kein katak in ekāāl im Kabun̄ in ej rie ewōr ippān maron̄ eo n̄an jab kabōjrak kajoor an baam̧le ko, āinwōt kajjojo baam̧le kajjieon̄ ilo aolepān iien in kijejeto im kōjparok n̄an ukōt m̧ōko m̧weer n̄an juon jikin kone an tōmak. Ij kallim̧ur bwe ilo ami tiljek jerbal n̄an bar kōkāāl m̧weo im̧ōmi n̄an juon jikin ekkatak gospel eo, ilo m̧ool raan in Jabōt ko ami renaaj em̧ool erom̧ juon men elan̄lōn̄. Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo, im kareel ko an rikapo eo ilo moureo ami im ilo m̧weo imōmi enaaj dikļo̧k. Oktak ko ilo baam̧le eo ami renaaj em̧m̧an im kajoorļo̧k.
Ilo kweilo̧k in jekar kōkajoorļo̧k pepe ko ad n̄an kōm̧m̧ani kijejeto eo eaorōk n̄an kautiej Irooj Jisōs Kraist aolep iien jej kōnono kōn Kabun̄ eo An. Ij kallim̧uri kom̧ bwe ilo ad tiljek ļōmņak n̄an kōjerbal et eo ejim̧we an Kabun̄ eo an Rilo̧mo̧o̧r eo im membōr ro An enaaj tōlļo̧k n̄an tōmak eo ej eddōkļo̧k im maron̄ būki kajoor ko reļļapļo̧k ilo jetōb n̄an membōr ro an Kabun̄ in.
Kiiō jen oktakļo̧k n̄an unin kōnono eo an tampeļ ko. Jej jeļā bwe iien ko ad ilo tampeļ eo eaorōk n̄an lo̧mo̧o̧r eo ad im ad mour ijo ilōn̄tata im n̄an baam̧le ko ad.
Ālkin ad bōk kain̄i ko an tampeļ ko ad make im kōm̧m̧ani bujen ko rekwojarjar ippān Anij, kōj kajjojo ej aikuj kōkajoor in jetōb eo ejjab bōjrak im ekkatak eo me emaron̄ wōt kōm̧m̧an ilo m̧weo im̧ōn Irooj. Im rūtto ro jibūd im jim̧aad rej aikuji ad jerbal āinwōt jerbali men kein n̄an er.
Ļōmņak kōn tūriamo̧ eo eļap im jim̧we eo an Anij eo, m̧okta jān pedped ko an laļ, ekar kōpooje juon iaļ n̄an bōk kōjeraam̧m̧an ko an tampeļ n̄an ro rekar mej ilo an ejjeļo̧k aer jeļāļo̧kjeņ kōn gospel eo. M̧akūtkūt kein rekwojarjar an tampeļ rej jān etto. N̄an n̄a wāween ko rekarbōb jān etto rekam̧ōņōņō im bar juon kallim̧ur in aer m̧ool.2
Ro jeiū im jatū, jodik ko an rikapo eo rej ļapļo̧k im ļapļo̧k, ilo kajoor im lōn̄ wāweer.3 Ad aikuj pād ilo tampeļ eo ilo kajjojo iien ej jan̄in kar ļapļo̧k. Ij akweļap n̄an kom̧ bwe kom̧win bōk juon lale eo ekajoor kōn wāween ami joļo̧k iien ko ami. Kōwōrļo̧k ami iien ilo ilju im jekļaj eo ami im ilo menin kōn baam̧le eo ami. Eļan̄n̄e ewōr ami un ko n̄an deļo̧n̄e juon tampeļ, ij rōjan̄ kom̧ n̄an pukot juon wāween kōm̧m̧ane juon iien aolep raan ippān Irooj—n̄an pād ilo m̧weo ekwojarjar im̧ōn Irooj—innām kōjparok iien ņe kōn jejjet im lan̄lōn̄. Ij kallim̧ur kom̧ bwe Irooj enaaj bōktok kabwilōn̄lōn̄ ko Ejeļā ke kom̧ij aikuji ilo ami kōm̧m̧an kaarmejete ko n̄an jerbal im kabun̄jar ilo tampeļ ko An.
Kiiō ewōr ad 159 tampeļ ko emōj aji. Kōjparoki im kōkōm̧anm̧anļo̧ki tampeļ kein relukkuun in aorōk n̄an kōj. Ilo iien in, tampeļ ko rej lukkuun in aikuj kaiboojoji im kōkāāli. Kōn un in, karōk ko kiiō em̧ōj kōm̧m̧ani n̄an kōkōm̧anm̧anļo̧k im kōkāāle Salt Lake Temple im tampeļ ko jet jān epepen ko m̧okta. Meļeļe ko kōn jerbal kein naaj kwaļo̧ki ilo aer naaj ejaaki.
Rainin jej m̧ōņōņō in kōjjeļļā kōn karōk ko n̄an bar 12 tampeļ ko. Tampeļ kein renaaj ekkal ilo jikin kein rej ellaajrak: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; im Washington County, Utah.
Kalōk im kōm̧m̧anļo̧k tampeļ ko emaron̄ jab ukōt mour eo am̧, ak joļo̧k am̧ iien ilo tampeļ eo em̧ool enaaj. N̄an kom̧ ro rekar to aer jab pād ilo tampeļ eo, ij rōjan̄ kom̧ n̄an m̧aanjabpopo im ro̧o̧ltok iien eo em̧ōkajtata. Innām ij karuwaineneikto kom̧ n̄an kabun̄jar ilo tampeļ eo im jar n̄an en̄jake m̧wilaļ in iakwe eo eļap an Rilo̧mo̧o̧r eo n̄an kom̧, bwe kom̧ kajjojo en maron̄ bōk naan in kam̧ool eo an make bwe E ej tōl jerbal in ekwojarjar im ejjeļo̧k jem̧ļo̧kin.4
Ro jeiū im jatū, ij kam̧m̧olol kom̧ kōn tōmak eo ami im kijejeto in rejtake ko ami. Ij likūt aō iakwe im kōjeraam̧m̧an ioomi, bwe kom̧win maron̄ kwojkwoj ioon naan ko an Irooj im mour kōn katak ko An ilo mour ko ami make. Ij kallim̧uri kom̧ bwe wōnm̧aanļo̧k in revelesōn ilo Kabun̄ in im enaaj wōnm̧aanļo̧k m̧ae “jibadbad ko an Anij renaaj tōprak, im Jeova eo Eļap enaaj ba jerbal in ededeļo̧k.”5
Ij kōjeraam̧m̧an kom̧ kōn ļapļo̧k in tōmak ilo E im ilo jerbal in An ekwojarjar, kōn tōmak im kijenmej n̄an niknik i apan̄ ko ami make ilo mour. Ij kōjeraam̧m̧an kom̧ n̄an erom̧ riwaanjon̄ak ro rej Armej ro Rekwojarjar ilo Raan-ko Āliktata. Ij kōjeraam̧m̧an kom̧ im kwaļo̧k an naan in kam̧ool bwe Anij ej mour! Jisōs ej RiKraist eo! En̄in ej Kabun̄ eo An. Jej Armej ro An, ilo etan Jisōs Kraist, amen.