Lan̄lōn̄ eo an Jerbal in Jipan̄ Ejjab Lōmņak Kōn E Make
Jān Cristina B. Franco
Rikakpilōklōk eo Kein Karuo ilo Būreejtōnji eo Eutiej an Būraimere
Jekar kallim̧uri Jemed ilo Lan̄ bwe jenaaj jerbal n̄an E im ro jet kōn iakwe im kōm̧anm̧an Ankilan ilo aolep men ko.
Ālkin kweilo̧k eo eļap ļo̧k, elōn̄ armej ro raar jibadōktok eō kōn ejja kajjitōk eo wōt: “Em̧m̧an ke kōjeiōm̧ ilo jea ko?” Uwaak eo aō eaar jab oktak aolep iien: “Jea ko relukkuun in em̧m̧an eļan̄n̄e kwojjab aikuj ekōnono.” Em̧ool, ejim̧we ke? Ejjan̄in de em̧m̧an kōjeiō ilo jea eo aō ilo kweilo̧k in, bōtaab ij lukkuun in kam̧m̧oolol kōn kōjeraam̧m̧an eo im uteij eo n̄an ekōnono n̄an kom̧ joteen in.
Jet iien ilo ad jerbal, jej jerbal ilo kūr ko rooktak. Jet ebwe aer em̧m̧an im ko jet rejjab, bōtaab jaar kallim̧uri Jemed ilo Lan̄ bwe jenaaj jerbal n̄an E im ro jet kōn iakwe im kōm̧anm̧an Ankilan ilo aolep men ko.
Jet iiō ko remootļo̧k, jodikdik ro ilo Kabun̄ in raar ekkatak bwe “N̄e kwoj ‘jino ilo jerbal in an Anij’ [Katak im Bujen ko 4:2], kom̧ij kobatok ilo em̧m̧akūt in eaorōk tata. Kom̧ij jipan̄ Anij libjerjere jerbal eo An, im ej juon en̄jake eļap, elem̧ōņōņō, im kabwilōn̄lōn̄.”1 Ej juon em̧m̧akūt ej pād n̄an aolep—jekdo̧o̧n ewi dettam̧—im ej barāinwōt juon em̧m̧akūt me ej bōkļo̧k kōj ilo ta eo rikanaan eo ad ejitōn bōro eaar ekōnono kake āinwōt “iaļ in bujen eo.”2
Ejerata, mekarta, jej mour ilo juon laļ ekūbboņ ijo ejjab m̧ūjkōk an armej kajjitōk, “Ta eo ij bōk jān menin?” ijello̧kin kajjitōk, “Wōn ro imaron̄ jipan̄ er rainin?” ak “Ekōjkan aō maron̄ kōkōm̧anm̧anļo̧k aō jerbal n̄an Irooj ilo kūr eo aō?” ak “Ij ke leļo̧k aolepān aō n̄an Irooj?”
Juon waanjon̄ak em̧m̧an ilo mour eo aō kōn jerbal in jipan̄ ejjab ļōmņak kōn e make ej Sister Victoria Antonietti. Victoria eaar juon iaan rūkaki in Būraimere ro ilo branch eo aō ke iaar rūttoļo̧k ilo Argentina. Kajjojo ālkin rālep in Juje, n̄e kōmij aiin doon n̄an Būraimere, liin ekar bōktok kijem keek jo̧kleej. Aolep raar iakwe keek—ekwe, aolep ijello̧kin wōt n̄a. Iaar dike keek jo̧kleej! Im men̄e liin eaar kajjieon̄ in letok kijō keek, iien otemjej iaar jab bōke.
Juon raan ālkin an kar ajej keek jo̧kleej eo ippān aolepān ajri ro, iaar kajjitōk ippān, “Etke kwojjab bōktok bar juon kain keek—ko āinwōt oraan ak peniļa?”
Ālkin an ettōn̄ jidik, liin eaar kajjitōk ippa, “Etke kwoj jab baj edjon̄e jidik bukōn? Keek in ej kōm̧m̧an jān juon iiōk āinjuon, im ij kallim̧ur bwe eļan̄n̄e kwoj edjon̄e, kwonaaj kōņaan!”
Iaar reitok reitak, im ikar ilbōk, āinwōt aolep raar m̧ōņōņō kōn keek eo. Iaar errā n̄an baj kajjieon̄. Komaron̄ ke kajidede ta eo eaar waļo̧k? Eaar enno̧ ippa! Ekar kein kajuon in aō kar m̧ōņōņo̧ kōn juon keek.
Eaar jab m̧ae elōn̄ iiō ko tokālik me iaar lo āinjuon ilo iiōk in keek jo̧kleej eo an Sister Antonietti. Ajri ro nejū im n̄a kar loļo̧k jinō kajjojo wiik. Ilo juon iaan loļo̧k ko, jinō im n̄a kar m̧ōņōņō kōn juon bukōn in keek jo̧kleej, im iaar kwaļo̧k n̄an e kōn wāween aō kar kōņaan keek eo kein kajuon jino in tata. Innām eaar kwaļo̧k ilo tipdik in bwebwenato eo n̄an n̄a.
“Kwoj lo, Cris,” jinō eaar ba, “Victoria im baam̧le eo an eaar jab ļap aer jāān, im kajjojo wiik liin eaar aikuj kālet ikōtaan kōļļā wōņāān an im ajri ro emen nejin iuwe lo baj eo n̄an Būraimere ak wiaiki kein iiōk ko n̄an kōm̧m̧ane keek jo̧kleej eo n̄an Būraimere kūlaaj eo an. Iien otemjej liin eaar kālet n̄an wiaik kein iiōk ko n̄an kōm̧m̧an keek jo̧kleej ijello̧kin baj, im e im ajri ro nejin raar etetal laļļo̧k aitokļo̧k jān ruo m̧aiļ ko [3 km] etal im itok, jekdo̧o̧n mejatoto rōt eo.”
Raan eo eaar ļapļo̧k an em̧m̧an aō kam̧m̧oolol kōn keek jo̧kleej eo an. Eo eaorōk tata, iaar katak bwe iiōk eo āinjuon ilo keek eo an Victoria eaar iakwe eo an n̄an ro eaar jerbal n̄an er im kaarmejete eo an ejjab kūbboņ ilo etām.
Ļōmņak kōn keek eo an Victoria ej jipan̄ eō keememej juon kaarmejete ejjab kūbboņ kwaļo̧k jān juon katak ko indeeo kar katakin jān Irooj n̄an rikaļoor ro An ke Eaar etetalļo̧k n̄an jikin kakkoņ eo an tampeļ eo. Kwojeļā bwebwenato eo. Elder James E. Talmage eaar katakin bwe eaar wōr 13 bo̧o̧k ko, “im ilowaan bo̧o̧k kein armej ro raar āti jāān in leļo̧k ko aer kōn un ko [rokkoktaktak] kwaļo̧k jān jeje [eo] ko ioon bo̧o̧k ko.” Jisōs eaar lale ļain in ro rej leļo̧k, eo ekoba aolep jekjek in armej ro. Jet raar leļo̧k menin leļo̧k ko aer kōn “un eo em̧ool” ilo an ro jet likūt ilo bo̧o̧k eo “eļap jelba im kooļ,” kōjatdikdik renaaj lo er likūti, kile, im nōbar menin jipan̄ ko aer.
“IIubwilijin elōn̄ eaar juon kōrā emej pāleen ejeram̧ōl, eo … āti ilowaan juon iaan bo̧o̧k in kakkoņ ko ruo jāān dekā būraan jiddik kar jeļā kaki āinwōt mite ko; menin leļo̧k eo an edikļo̧k jān juon jāān ilo jāān in Amedka. Irooj ej ān̄inn̄intok rikaļoor ro An n̄an Ippān, kōm̧m̧an bwe ren lale kōrā eo emej pāleen ejeram̧ōl im jerbal eo an, im ba: ‘E m̧ool Ij ba n̄an kom̧, Kōrā in e jeram̧ōl e jako pāleen ear āti eļap, jān er otemjej raar āti ņa ilowaan nien m̧ani: Bwe er otemjej raar āti wōt jet jān elōn̄ m̧weier; a lio kōn an jeram̧ōl ear āti men ko an otemjej, aaet aolepān men in mour an’ [Mark 12:43–44].”3
Kōrā eo emej pāleen eaar jab āinwōt kabwijer juon jerbal eo ebun̄bun̄ ilo jukjuk in pād ilo tōre eo an. Liin eaar lukkuun in wōr juon men ippān eļapļo̧k an aorōk: kōttōpar ko an raar erreo, im eaar leļo̧k aolep men ko ewōr ippān. Bōlen liin eaar leļo̧k edikļo̧k jān ro jet, ilo jab kōmājāje jān ro jet, oktak jān ro jet. Jet remaron̄ ļōmņak, ta eo liin eaar leļo̧k eaar jab ļap, bōtaab ilo an Rilo̧mo̧o̧r eo kalimjōke, “rijeļā ļōm̧ņak ko im kōttōpar ko an bōro,”4 liin eaar leļo̧k men otemjej ewōr ippān.
Sister ro, jej ke leļo̧k aolep kijejeto eo jemaron̄ in leļo̧k n̄an Irooj ilo ejjeļo̧k pere? Jej ke karmejete iien ko ad im kapāāl ko bwe diktak in epepen eo en maron̄ ekkatak n̄an iakwe Irooj im kōjparok kein ko An? Jej ke jerbal in karejar n̄an jim̧or ro ipeļaakid im n̄an ro em̧ōj kar kappeik kōj kōn kōjparok im kōn niknik—kaarmejete iien im kajoor eo ad bwe ren maron̄ jerbal ilo wāween ko jet? Jej ke mour kōn kein ko ruo reļļap—n̄an iakwe Anij im n̄an iakwe ajri ro Nejin?5 Emakijkij an iakwe jab in waļo̧k āinwōt jerbal in jipan̄.
Būreejtōn Dallin H. Oaks eaar katakin: “Ad Rilo̧mo̧o̧r eaar ajeļo̧k E make ilo jerbal in jipan̄ ejjab ļōmņak kōn e make. Eaar katakin bwe kajjojo iaad aikuj ļoor E kōn likūt iturejetiid itok limo ko an ļōmņak kōn e make n̄an maron̄ jerbal n̄an ro jet.”
Ekar wōnm̧aanļo̧k wōt:
“Juon waanjon̄ak eo jeļā kake kōn joļo̧k ad make ilo jerbal in jipan̄ an ro jet … ej kaarmejet eo ro jined im jemed rej kōm̧m̧ane n̄an ajri ro nejier. M̧am̧a ro rej en̄taan kōn metak im luuji aorōk ko aer make im kaenōm̧m̧an ko n̄an keotak im lale kajjojo ajri. Baba ro rej ukukōt mour ko aer im aorōk ko aer n̄an rejtake baam̧le eo. …
“… Jej barāinwōt m̧ōņōņō ippān ro me rej kea kōn ro uwaan baam̧le eo rōjipikpik im ro jinen im jemen rōbwij wōļāļo̧k. Ejjeļo̧k iaan jerbal in jipan̄ in ej kajjitōk, ta eo imaron̄ bōk jān menin? Aolepān ej aikuji likūt iturejetid meeoeo an juon make n̄an jerbal in jipan̄ eo ejjab ļōmņak kōn e make. …
“[Im] aolepān menin ej kwaļo̧k pedped in katak eo indeeo bwe jej m̧ōņōņōļo̧k im ļapļo̧k an kūrm̧ool n̄e jej m̧akūtkūt im jerbal n̄an ta eo jej leļo̧k, ejjab kōn ta eo jej bōk.
“Ad Rilo̧mo̧o̧r ej katakin kōj n̄an ļoor E kōn kōm̧m̧ani kaarmejete ko remenin aikuj n̄an leļo̧k ad make ilo jerbal in jipan̄ jab ļōmņak kōn e make n̄an ro jet.”6
Būreejtōn Thomas S. Monson eaar barāinwōt katakin bwe “bōlen n̄e jej kōm̧m̧ani jelm̧ae doon ko ippān ad Rikōm̧anm̧an, eban kajjitōk ippād, ‘Ewi lōn̄ in jerbal ko kwaar kabwijeri?’ bōtaab ijello̧kin, ‘Ewōr jete armej ro kwar jipan̄ er?’ Ilo m̧ool, kwojjab maron̄ in iakwe Irooj m̧ae iien eo kwoj jerbal n̄an E kōn jerbal n̄an armej ro An.”7
Ilo bar juon wāween, sister ro, ejjamin naaj aorōk eļan̄n̄e jej jijet ilo jea ko em̧m̧an kejied ie ak eļan̄n̄e ejjab em̧m̧an kejied ilo ad jijet ilo kweilo̧k eo ioon juon jea ejeļā nokjōk ilo alen row eo itulik. Em̧ool eban aorōk eļan̄n̄e jej, kōn an menin aikuj, ilo̧k jān juon kweilo̧k eo ilo jidik iien n̄an kaenōm̧m̧an nin̄nin̄ eo ejan̄. Ta eo enaaj aorōk ej bwe jaar itok kōn juon ikdeelel n̄an jerbal, bwe jaar kile ro me jej jerbal in karejar n̄an er im karuwaineneik er kōn lan̄lōn̄, im bwe jaar kwaļo̧k kadkadiid n̄an ro me rej jijet iturid—pukōtļo̧k er kōn jem̧jerā jekdo̧o̧ņ n̄e kar jab kappeik kōj n̄an jerbal in karejar n̄an er. Im enaaj ilo m̧ool aorōk bwe jej kōm̧m̧ane aolep ijo jej kōm̧m̧an kōn iiōk eo ejeno̧lo̧k an jerbal in jipan̄ koba ippān iakwe im kaarmejete.
Iaar bōk juon jeļāļo̧kjeņ bwe jejjab aikuj in kōm̧m̧ane juon keek bwe jen erom̧ juon rūkaki in Būraimere ewājabdik ak ekijejeto, kōnke ejjab kōn keek eo. Eaar iakwe eo ej pād ilo m̧akūtkūt eo.
Ij kam̧ool bwe iakwe jab in eaar kōm̧m̧an bwe en ekwojarjar kōn karmejete—karmejete eo an juon rūkaki im em̧ool eļapļo̧k kōn karmejete eo eļap tata im indeeo an Nejin Anij. Ij kwaļo̧k kam̧ool bwe E emour! Ij iakwe E im ikdeelel n̄an likūt iturejet ikdeelel ko aō make n̄an maron̄ iakwe im jerbal in karejar āinwōt An kar. Ilo etan Jisōs Kraist, amen.