Likūt Pedped in juon Jerbal Eļap

Jān Elder Steven R. Bangerter

Jān Jiljilimjounn̄oul eo

Katak ko kar katakin jān iminene in manit ko jej ejaaki ilo m̧ōko im̧ōd, men̄e reddik im reļam waan, eļapļo̧k aorōkier ilo laļ in rainin.

Āinwōt ro jined im jemād ilo Zaion, ewōr ad eddo ekwojarjar n̄an jipan̄ ajri ro nejid bōk juon ikdeleel ekajoor im kallim̧ur n̄an lan̄lōn̄, meram, im m̧ool ko an gospel eo an Jisōs Kraist. Ilo ad karūttoļo̧k ro nejid, jej ejaake iminene in manit ko ilowaan m̧ōko im̧ōd im jej ejaake jon̄ak in wāween ekōnono im m̧wil ilowaan jem̧jerā ko an baam̧le ko ad. Ilo ad kōm̧m̧ane āindein, manit ko jej ejaaki paaktok in m̧wil ko rem̧m̧an im repen reban oktak ippān ro nejid me enaaj kobrak er kōn kajoor n̄an jelm̧ae apan̄ ko an mour in.

Elōn̄ iiō ko baam̧le eo am kar m̧ōņōņō kōn iminene in manit eo in camping kajjojo iiō ilo toļ ko ilo Uintah ilo northeastern Utah. Kōm kar etetal 20 maeļ (32km) ioon juon iaļ erekāke im pedkat bwe kōm en maron̄ tōpar ilo juon meļaaj eaiboojoj im maroro im iaļen kom̧laļ eo eutiej eo me reba eo ej toorļo̧k eobrak kōn dān mōļo, im erreo. Kajjojo iiō, kōmij kōjatdikdik n̄an bar katakin kōn aorōkin katak ko an gospel im tōmak ko me repād ilo buruōn ajri ro nejid im ro jibūd, Susan im n̄a kom̧ro kar kajjitōkin ajri ro jibūm̧ro jiljino im baam̧le ko aer n̄an kōpooj e juon enaan ekadu kōn juon unin kōnono me rej en̄jake ej juon men eaorōk n̄an juon kapijuknen-eo ej pedped ioon Kraist. Innām jej kuk ippān doon n̄an juon nokon an baam̧le ilo juon jikin ejenolo̧k, im kajjojo rej kwaļo̧k enaan ko aer.

Iiō in ajri ro jibūm̧ro rekar je juon unin kōnono kōn enaan ko aer ioon dekā innām, juon ļo̧k juon, rekar kalibwini iturin eo juon, ej bōk jikin juon pedped epen eo ijo mour elem̧ōņōņō ej ejaak ie. Mōttanļo̧k aolepān enaan ko aer jiljino kar m̧ool ko reban oktak im n̄an indeeo bwe Jisōs Kraist ej dem̧an em̧ an pedped eo.

Ilo naan ko an Aisea, “Kōn men in, āindein, Irooj ej ba, Ij likūt ilo Zaion juon dekā n̄an ļo̧n̄tak dekā em̧ōj mālejjon̄e, dekā in dem̧an em̧ e aorōk n̄an ļon̄tak e pen.”¹ Jisōs Kraist ej dem̧an em̧ eo eaorōk ilo pedped eo an Zaion. E eo ekar waļo̧k n̄an Rikanaan Josep Smith: “Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.”²

Katak ko kar katakin jān iminene in manit ko jej ejaaki ilo m̧ōko im̧ōd, men̄e reddik im reļam waan, eļapļo̧k aorōkier ilo laļ in rainin. Ta ko reddik im reļam waan me, n̄e ejaake, enaaj kwaļo̧k juon jerbal em̧m̧an ilo mour ko an ajri ro nejid?

Būreejtōn Russell M. Nelson āliktata ekar kwaļo̧k n̄an juon jarlepju eļap ilo Toronto, Canada, im būrom̧ōj ilo an kakeememej ro jined im jemād kōn eddo ko aer rekwojarjar me rej aikuj katakin ajri ro nejid. Ilubwijlin eddo kein remenin aikuj me ej kwaļo̧ki, Būreejtōn Nelson ekar kwaļo̧k jerbal ko me kōj ro jined im jemād rej aikuj katakin ro nejier n̄an meļeļe etke jej bōk kwojkwoj, aorōk in ļōtak ilo bujen, im aorōk in m̧aanjabpopo n̄an im bōk kōjeraam̧m̧an eo an Petriak, im ekar rōjan̄ ro jined im jemād n̄an tōl ilo riit jeje ko rekwojarjar ippān doon āinwōt juon baam̧le.³ Kōn kijejeto kein, rikanaan eo ad ejitōnbōro ej rōjan̄ kōj bwe jen kōm̧m̧ane bwe m̧ōko m̧ōd “jikin jokoņe kōn tōmak.”⁴

Ilo Bok in Mormon, Inōs ej je an kam̧m̧olool ekabwilōn̄lōn̄ ekar en̄jake kōn waanjon̄ak eo an jemān, eo me “eaar katakin [e] ilo kajin eo an, im barāinwōt ilo kōkaajriri im katak ko an Irooj.” Kōn en̄jake in eļap Inōs ekar kwaļo̧k, “Im en jeraam̧m̧an etan aō Anij kōn menin.”⁵

Ij jolete manit ko reddik im reļam waan me em̧ōj am ejaaki ilo baamle eo am̧ro ium̧win 35 iiō in am̧ro mare. Elōn̄ iaan manit ko ad reddik ak elōn̄ meļeļeier. N̄an waanjon̄ak:

Ilo jota ko ke ikar pād ettoļo̧k jān kapijukneņ eo aō, ikar jeļā aolep iien bwe iumin tōl eo an Susan ilo an ļaddik eo nejim̧ro erūttotata pād m̧weo enaaj bōk ioon make n̄an tōl baam̧le eo ilo riit jeje ko rekwojarjar im nokon an baam̧le.⁶
Iminene in manit eo juon––jejamin etal jān m̧ōko im̧ōm̧ ak kōjem̧ļo̧k ekōnono ilo taļboon ilo am jab ba, “Ij iakwe eok.”
Mour ko am em̧ōj kōjeraam̧m̧ani ilo am kōjenoļo̧k juon iien ilo juon raan n̄an intōrpiu ippān kajjojo iaan ļaddik ro nejim̧ro. Ilo juon iien intōrpiu ikar kajjitōkin ļaddik eo nejim̧ kōn ikdeleel ko an im kōpopo n̄an jerbal in mijenede. Ālkin jet iien arto artak, ekar wōr juon iien elūr n̄an kejōkļo̧kjeņ kake, innām ekar m̧al m̧aanļo̧k im kwaļo̧k ilo an lukkuun ļōmņake, “Baba, keememej ke ikar dik im jekar jino kōm̧m̧an iien intōrpiu ippam?” Ikar ba, “Aaet.” “Ekwe,” ekar ba, “Ikar kallim̧uri eok bwe inaaj kōm̧m̧ane jerbal in mijenede, im kwaar ba n̄a bwe kwe im Mama komiro naaj jerbal in mijenede n̄e komiro rūttoļo̧k.” Innem ekar ejjeļo̧k keroro. “Ewōr ke amiro būraabļōm me enaaj kōpōjrak komiro jān amiro jerbal in mijenede—kōnke bōlen imaron̄ jipan̄?”

Emakijkij in iminene in manit ko rem̧m̧an an baam̧le ekitbuuj jar, riit jeje ko rekwojarjar, nokon in jota an baam̧le, im pād ilo kweilo̧k ko an Kabun̄ in, men̄e ilo kalimjōke e dik im eļam waan, ejaake juon manit in iakwe, kautiej, bōro kuk, im jokoņe. Kōn jetōb eo ej itok ippān kijejeto kein, ajri ro nejid rej jokone jān m̧ade kijeek otemjej an rinana eo me rej m̧ōttan ko rellap ilo manit ko an laļ in raan kein ad.

Em̧ōj kakeememej kōj kōn kapilōk eo ewājepdik an Hilamōn n̄an ļaddik eo nejin: “Keememej bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami; bwe n̄e devil enaaj jilkintok kōto ko an rekajoor, aaet, m̧ade ko an ilo aire, aaet, n̄e aolep wōt dekā im lan̄ rekajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄.”⁷

Iiō ko rem̧ootļo̧k, ke ikar jerbal āinwōt juon bisop eo edik, juon em̧m̧aan erūtto ekar kajjitōkin eō n̄an bwebwenato ippa. Ekar kōmeļeļeik an kar jāniknik ilo Kabun̄ in im iminene in manit ko rekwojarjar an ro jinen im jemān ke ekar juon rūm̧m̧an ded. Ekar kōmeļeļeik ilo tipdikin an kar en̄jake metak bar ilo mour eo an ke ej pere ilo an kappukōt m̧ōņōņō eo ejjeļo̧k jem̧ļo̧kin ilubwiljin m̧ōņōņō eo an jidik wōt iien me ej en̄jake ilo mour in. Kiiō, ilo iiō in mour ko an tokālik, ekar en̄jake jouj, jet iien en̄jake unoojdikdik an Jetōb an Anij ej bōk e likļo̧k n̄an katak ko, tōmak ko, en̄jake ko, im jokoņe eo ilo mour in jetōb ke ekar juon jodikdik. Ekar kwaļo̧k an kam̧m̧oolol kōn iminene in manit eo an ro jinen im jemān, im ilo naan in raan kein, ekar keememej kean̄ eo an Inōs: “Im en jeraam̧m̧an etan aō Anij kōn menin.”

Ilo en̄jake eo aō, em̧m̧aan in ejitōnbōro ekar jepļaak n̄an gospel eo ej āinwōt ļo̧k en̄jake an elōn̄ im ekkā an waļo̧k ilubwiljin ajri ro nejin Anij ro rej jebwābwe ilo jidik wōt iien, n̄an an jepļaak wōt n̄an katak ko an im tōmak ko an jodikdik ro nejier. Ilo iien ko, jej kam̧ool mālōtlōt an ri jeje an jabōn kōnnaan, eo ekar katakin ro jined im jemād, “Kwōn katakin juon ajri ilo iaļ eo en etal ie, im n̄e e rūtto e jāmin ilo̧k jān e.”⁸

Kajjojo jinen im jemān rej jelm̧ae iien inepata rōt kein im lābōļ in kōttōpar ko reokkotaktak im kajoor ilo iien karūttotak ajri ro nejier. Ijoke, n̄e jined im jemād rej kōjerbal tōmak ilo aer katakin ajri ro, ilo m̧ool, ilo iakwe im kōm̧m̧an aolep men remaron̄e n̄an jipan̄ er m̧aanļo̧k, rej bōk eļapļo̧k kōjatdikdik bwe katak ko em̧ōj katakin er kaki renaaj mour kaki ilo aer rūttoļo̧k.

Moses ekar lukkuun meļeļe kōn aikuj eo eaorōk n̄an katakin aolep iien. Ekar kapilōk, “Im kwōn kanooj katakin [naan kein] ro nejim̧ kaki, im kwōn kōnono kaki n̄e kwōj jijet ilo m̧weo im̧ōm̧, im n̄e kwōj etetal ilo iaļ, im n̄e kwōj babu, im n̄e kwōj jerkak.”⁹

Jej bukwelōlō iturin ajri ro nejid ilo iien nokon an baam̧le, jej kea kōn er kōn kijejeto ko aer n̄an dāpij meļeļein riit jeje ko rekwojarjar ippān doon, jej kijenmej, iakwe im kea kōn er ippān doon ilo ad bōk koņaad ilo nokon in jota an baam̧le, im jej buromōj kōn er ilo iien jar ko rettino ad make. O, jelukkun kōņaan bwe ajri ro nejid ren mour kaki katak ko rejim̧we me em̧ōj katakin er kaki.

Ij tōmak bwe edik ad inepata n̄e ajri ro nejid rej “meļeļe aolep men” ilo iien ad katakin, āinwōt ilo ad kajjieon̄ riit jeje ko rekwojarjar ak n̄an kōm̧m̧ane nokon in jota an baam̧le ak etal n̄an m̧akūtkūt iiaio ko im kweilo̧k ko jet an Kabun̄ in. Edik ad inepata n̄e ilo iien ko rej meļeļe kōn aorōk in m̧akūtkūt ko im eļapļo̧k ad inepata men̄e kōj, āinwōt jet jined im jemān ro, rej kōjerbal tōmak ebwe n̄an ļoor kapilōk an Irooj n̄an tiljek ilo mour, katakin, ekkatak, im kōm̧m̧ani kōttōpar ko me rej im̧we kōn gospel eo an Jisōs Kraist. Ej juon kijejeto kōn tōmak ko ad––ad tōmak bwe juon raan katak ko em̧ōj katakin er ke rej jodikdik wōt renaaj mour kaki n̄e rerūttoļo̧k.

Men ko jej kōnono kaki, men ko jej kwaļo̧k im katakin rej ļōme men ko me renaaj bōk jikier ilubwiljid. Ilo ad ejaake iminene in manit ko rem̧m̧an me rej katakin kōn katak ko an Kraist, Jetōb Kwojarjar ej kam̧ool kōn m̧ool ko an enaan ko ad im kwaļo̧k katak ko me em̧ōj kar katakin ajri ro nejid kōn kijejeto ko ad m̧aanļo̧k. Āindein ij kam̧ool ilo etan Jisōs Kraist, amen.