Tōmak, Iakwe, Kōm̧m̧an
Jān Elder Dieter F. Uchtdorf
Jān Doulul eo an Jon̄oulruo Rijilōk ro
Jej bōk mour jeraam̧m̧an jān erom rikaļoor m̧ool an Jisōs Kraist—kōn ļoor wāween ko An im bōk kuņaad ilo jerbal eo An.
Ro jeiū im jatū, ej juon iien aiboojoj n̄an ioon kom̧ ilo m̧wein̄anin kweilo̧k in eļap ekabwilōn̄lōn̄ rainin n̄an ron̄jake ennaan ko reim̧we; n̄an ron̄jake kumi in al an mijenede ro ekabwilōn̄lōn̄, ekōbaļbaļ jutak ilo etan elōn̄ mijenede ro ipeļaakin laļ in—leddik ro nejiid, ļaddik ro nejiid—im eļap tata n̄an erom ippān doon ilo tōmak in ad rainin bar juon alen rejtake Būreejtōn im rikanan eo ad ejitōn bōro, Būreejtōn Russell M. Nelson, Būreejtōnji eo Kein Kajuon, im opija ro Reutiej an Kabun̄ in. Juon raan elem̧ōņōņō n̄an pād ippāmi rainin.
Kiin̄ Solomon eo etto eaar juon iaan armej ro ealikkar an jeraam̧m̧aan ilo bwebwenato.1 Eaar āinwōt ewōr an aolep men—jāān, kajoor, nōbar, utiej. Bōtaab ālkin n̄oul iiō in kōbab laļ an ikdeelel ko an, men ko reļļap wōņaer, ekōjkan an Kiin̄ Solomon kwaļo̧k kōn mour eo an?
“Men pata otem pata,”2 eaar ba.
Em̧m̧aan in, eo eaar wōr an men otemjej, ilo jem̧ļo̧kin en̄jake būrom̧ōj, pere, im jab m̧ōņōņō, jekdo̧o̧n aolep men ko raar etal n̄an e.3
Ewōr juon naan ilo kajin Jāmne, Weltschmerz. Kōmeļeļeik ilo jab alikkar, ej meļeļe in būrom̧ōj eo me ej itok jān ļōmņak ilo jab m̧ōņōņō kōn ekōjkan an laļ in kadikļo̧k ekōjkan ad ļōmņak ej aikuj en̄e eo.
Bōlen ewōr juon Weltschmerz edik ilo aolepād wōj.
N̄e jej jino en̄jake būrom̧ōj ilo jab kile. N̄e jej en̄jake būrom̧ōj ekajoor ilo aolepān raan ko im bon̄ōn ko. N̄e jet iien jorrāān ak jab wānōk ej waļo̧k n̄an kōj, ekoba ilo mour ko an ro jej iakwe er. N̄e jej en̄jake bwe men ko rejerata eļap aer waļo̧k ilo mour ko, im bwe elōn̄ļo̧k wōt ad apan̄ ko jān armej ro jet ekōm̧m̧an bwe jān en̄jake illu n̄e jej aikuj in kar en̄jake aenōm̧m̧an—jemaron̄ in po n̄an errā ippān Solomon bwe mour epata otem pata im ejjeļo̧k tokjān.
Kōjatdikdik Eo Eļap
Ennaan eo em̧m̧an ej, ewōr kōjatdikdik. Ewōr juon uwaak n̄an meļeļe eo ejjeļo̧k meļeļe in, epata otem pata, ekabūrom̧ōjm̧ōj, im Weltschmerz kōn mour. Ewōr juon uwaak n̄an em̧ool mour eo komaron̄ in en̄jake ekanooj ejjeļo̧k kōjatdikdik ie im ekabweerer.
Kōjatdikdik in pād ilo kajoor in ukook eo an gospel eo an Jisōs Kraist im ilo kajoor in pinmuur eo an Rilo̧mo̧or n̄an kōmour kōj jān mālijjon̄ in jetōb ko ad.
“N̄a ij itok,” Jisōs ear kean̄, “bwe ren bōk mour, im bwe ren bōk elōn̄.”4
Bwe jān bōk mour ejeraam̧m̧an ejjab jān pedped ioon aikuj ko ad make ak ioon tōprak ko ad make bōtaab jān erom̧ rikaļoor ro rem̧ool an Jisōs Kraist—jān ļoor iaļ ko An im bōk kuņaad ilo jerbal eo An. Jej lo mour eo ejeraam̧m̧an jān meļo̧kļo̧k kōj make im bōk kuņaad ilo jerbal eo eļap an Kraist.
Im ta jibadbad eo an Kraist? Ej n̄an tōmak ilo E, iakwe āinwōt An kar iakwe, im kōm̧m̧an āinwōt An kar kōm̧m̧an.
Jisōs eaar “etetal im kōm̧anm̧an em̧m̧an.”5 Eaar etetal ilubwilijin rijeram̧ōl, ro joļo̧k er, rinan̄inmej, im ro kowaan er. Eaar jerbal in karejar n̄an ro ejjeļo̧k aer maron̄, m̧ōjņo̧, im ejjeļo̧k m̧ōttaer. Eaar joļo̧k iien ippāer; Eaar kōnono ippāer. “Ej kemour er otemjej.”6
Aolep jikin Eaar etal ie ļo̧k, Rilo̧mo̧o̧r eo eaar katakin “naan em̧m̧an”7 an gospel eo. Eaar kwaļo̧k m̧ool ko indeeo me rej kanemkwoj armej ilo jetōb barāinwōt ilo kanniōk.
Ro me rej ajeļo̧k er make n̄an jibadbad eo an Kraist rej lo m̧ool eo an kallim̧ur eo an Rilo̧mo̧o̧r eo: “Jabdewōt eo mour enaaj jako jān e kōn n̄a enaaj lo e.”8
Solomon eaar bōd, ro jeiū im jatū jitōn bōro—mour ejjab “pata.” N̄an keidi, emaron̄ in obrak kōn jibadbad, meļeļe, im aenōm̧m̧an.
Kajoor in kōmour eo an Jisōs Kraist ej pād n̄an aolep ro rej kappukōt E. Iaar itok n̄an jeļā ilo ejjeļo̧k pere bwe tōmak im iakwe Anij im kajjieon̄ n̄an ļoor Kraist emaron̄ in ukōt būruwōd,9 kōmeraik ad metak, im kobrak ad jetōb kōn “eļap otem ļap lan̄lōn̄.”10
Tōmak, Iakwe, Kōm̧m̧an
Aaet, jej aikuj kōm̧m̧an eļapļok jān wōt bōk juon meļeļe kōn gospel eo bwe ej n̄an bōk kareel in kōmour eo ilo mour ko ad. Jej aikuj kobaiktok n̄an mour ko ad—kōm̧m̧an bwe en m̧ōttan wōn kōj im ta eo jej kōm̧m̧ane.
Imaron̄ ke kwaļo̧k bwe rikaļoor ej jino kōn jilu naan ko reļem waan:
Tōmak, iakwe, im kōm̧m̧an.
Tōmak ilo Anij ej tōlļo̧k n̄an tōmak ilo E im kōļapļo̧k lōke eo ilo An in naan. Tōmak ej kōm̧m̧an an būruwōd eddōkļo̧k ilo ad iakwe Anij im ro jet. Ilo an iakwe in eddōkļo̧k, jej im̧we n̄an anōk Rilo̧mo̧or eo im jino em̧m̧akūt eo ad make eaorōk ilo iaļ in rikaļoor.
“Bōtaab,” kom̧ij ba, “ak āinwōt kwoj kapidodoikļo̧k jekjek eo. Jorrāān ko an mour, em̧ool rej inepata ko aō, ekanooj ļap aer kaipokpok n̄an juon kōmeļeļe eļem waan. Kom̧ jab maron̄ kōmour Weltschmerz eo kōn jilu naan ko reļem waan: Tōmak, iakwe, kōm̧man.”
Ejjab jabōn kennaan ko me rej kōmour. En̄in ej iakwe Anij me ej lo̧mo̧o̧ren, kōjepļaaktok, im kōro̧o̧ltok.
Anij ejeļā kajiemi. Kom̧ij Nejin. Ej iakwe kom̧.
Jekdoon n̄e kom̧ij ļōmņak bwe jab maron̄ iakwe kom̧, Ej pukōtwaj kom̧.
Lukkuun ilo rainin—aolep raan—Ej pukōtwaj kom̧, ikdeelel n̄an kōmour kom̧, n̄an kotak kom̧, im n̄an bōk jikin jeļo̧k kobban ko ilo būruwōmi kōn juon lan̄lōn̄ indeeo. Ej ikdeelel n̄an pookļo̧k jabdewōt marok lep me ej katinaad mour eo ami im kobrake kōn meram kwojarjar im jeļāļo̧kjeņ an aiboojoj eo An ejjeļo̧k jem̧ļo̧k in.
Em̧ōj aō en̄jake menin n̄a make.
Ej aō kam̧ool āinwōt juon Rijilōk an Irooj Jisōs Kraist bwe aolep ro rej itok n̄an Anij—aolep ro rej m̧ool in tōmak, iakwe im kōm̧m̧an maron̄ en̄jake ejja āinwōt.
Jej Tōmak
Jeje ko rekwojarjar rej katakin kōj bwe “eļan̄n̄e ejjeļo̧k tōmak armej re ban kabun̄būruon [Anij]: bwe eo ej itok n̄an Anij ej aikuj tōmak kōn an Anij pād.”11
N̄an jet, jerbal in tōmak epen. Jet iien ad utiej bōro ej kabōjrak kōj jān tōmak. Bōlen jej ļōmņak bwe kōnke jej māletlet, jeļāļo̧kjeņ, ak tijem̧ļo̧k ilo elōn̄ men, jejjab maron̄ tōmak ilo Anij. Im jej jino ļōmņak kabun̄ ej āinwōt iminene bwebwe.12
Ilo en̄jake eo aō, tōmak ejjab lukkuun in kōn en̄jake eo kōn juon pija me jej kalimjōke im nōbare im kōn ta eo jej kōnono kake im ļōmņak kake. Eļapļo̧k an āinwōt juon kein jerbal me jej bōke n̄an jikin jerbal ko im, jān menokadu in turin mejān, ej ejaake ļain ko ilo bwirej me katōk ine ko im rej kalle leen.13
Ruwaakļo̧k n̄an Anij, im Enaaj ruwaakwaj n̄an kom̧.14 En̄in ej kallim̧ur eo n̄an aolep ro rej kappukōt n̄an tōmak.
Jej Iakwe
Jeje ko rekwojarjar rej kwaļo̧k bwe ad ļapļo̧k ad iakwe, eļapļo̧k ad m̧ōņōņō.15 Iakwe eo Jisōs eaar kōnono kake, mekarta, ejjab juon kaat in leļo̧k, ejjab kain iakwe eo me jemaron̄ meļo̧kļo̧ke, ejjab kain iakwe eo me jej kile im etal jān e. Ejjab kain iakwe eo me kōnono kake innām meļo̧kļo̧ke. Ejjab kain iakwe eo me “leļo̧k n̄an juon armej ilo jab m̧ool kake” ilo jab lukkuun kōm̧m̧ane.
Iakwe eo Anij ej kōnono kake ej kain eo me ej deļo̧n̄ ilo būruwōd n̄e jej ruj ilo jibbon̄, ej pād wōt ippād ilo aolepān raan eo, im jiōbtok ilo būruwōd ilo ad kwaļo̧k jar in kam̧m̧oolol ko ad ilo jem̧ļo̧k in juon raan.
En̄in ej iakwe eo epen kōmeļeļeik epād ippān Jemedwōj Ilan̄ n̄an kōj.
En̄in ej meanwōd eo ejjeļo̧k jem̧ļo̧kin me ej kōm̧m̧an bwe en alikkarļo̧k ad lo ro jet kōn wōn er. N̄e jej kalimjōk kōn ļōmņak an iakwe erreo, jej loe armej ro rejjab wānōk eļap jibadbad im aorōk eo aer im ļaddik im leddik ro nejin Anij Ekajoor Pōtata.
N̄e jej ļōmņak kōn armej ro ilo wāween in, jejjab maron̄ ļōmņak nana, jab kauteij, ak kōjeno̧lo̧k jabdewōt.
Jej Kōm̧m̧an
Ilo jerbal eo an Rilo̧mo̧or, emakijkij an jān men ko reddik im reļam waan bwe “men ko reļļap[rej] kūrm̧ool.”16
Jejeļā bwe ej menin aikuj n̄an ālij kaminene n̄an erom̧ m̧ōkade ilo jabdewōt men. Men̄e ej kōjan̄jan̄ clarinet, bwijļo̧ke bo̧o̧ļ eo n̄an lowaan ok eo, kōm̧m̧ane juon waan ettōr, ak em̧ool keļo̧k kōn juon paļuun, ej bwe kōn kaminene bwe jej erom em̧m̧anļo̧k im em̧m̧anļo̧k.17
Doulul eo an ad Rilo̧mo̧or eaar ejaake ioon laļ in—Kabun̄ eo an Jisōs Kraist im Armej ro Rekwojarjar ilo Raan ko-Āliktata—ej jipan̄ kōj n̄an kōm̧m̧ane ejja āinwōt. Ej letok juon jikin kōjerbal mour ilo wāween mour Eaar katakin im kōjeraam̧m̧an ro jet ilo wāween eo Eaar kōm̧m̧ane.
Āinwōt ro uwaan Kabun̄ in, kūr ko ad im eddo ko kar litok n̄an kōj me rej menin aikuj bwe jān kappukōtļo̧k ilo meanwōd im jerbal in karejar n̄an ro jet.
Ejjab to, Kabun̄ in eaar likūt juon bar kōkāāl an kōmejajaik kōn jerbal in karejar, ak jerbal ak iakwe ro jet. Ļōmņak eļap eaar bōk jikin n̄an kālet ta eo jej aikuj in ņa etan kōmejaja in eaorōk.
Juon iaan āt ko kar ļōmņak kake eaar rilale sip, juon kōļmānļo̧kjeņ ejejjet n̄an kūr eo an Kabun̄ in: “Kwōn naajdik aō sip.”18 Mekarta, ewōr juon an men ekaipokpok: kōjerbal naan eo enaaj kōm̧m̧an bwe in (im ro jet āinwōt n̄a) juon kidu German shepherd. Kōn menin, ebwe aō m̧ōņōņō kōn naan eo jerbal in karejar.
Jerbal In Ej n̄an Aolep
Aaet, kōmejaja in ejjab kāāl. Eļam waan an letok juon iien em̧m̧an n̄an bar kōkāāl im kōkōm̧anm̧anļo̧k n̄an kōj n̄an kamineneik kien eo an Rilo̧mo̧o̧r eo n̄an “yokwe doon”19 juon iaļ in kōkōm̧anm̧anļo̧k n̄an kōjerbale im kaminene jibadbad eo an Kabun̄ in.
Baj ļōmņak kōn jerbal in mijenede; peran eo, ettā eo, im lōke kwaļo̧k gospel eo ej juon waanjon̄ak in jerbal in karejar em̧m̧an n̄an aikuj ko ilo jetōb an ro jet, jekdo̧o̧n wōn er.
Ak kōm̧m̧an jerbal in tampeļ—kappukōt āt ko etan rūtto ro ad im leļo̧k n̄an er kōjeraam̧m̧an eo an mour indeeo Ej juon wāween ekwojarjar an jerbal in karejar.
Ļōmņak in kōm̧m̧an jerbal in pukōtļo̧k rijeram̧ōl im riaikuj ro, kotak lōn̄ļo̧k pā ko rej allitoto, ak kōjeraam̧m̧an ro rej nan̄inmej im ban. Ta ejjab lukkuun jerbal ko kein an jerbal in karejar eo erreo Irooj eaar kōm̧m̧ane ke Eaar etetal ioon laļ in?
Eļan̄n̄e kom̧ij jab juon uwaan Kabun̄ in, ij kūr kom̧ n̄an “itok im lale.”20 Itok im kobatok ippām. Eļan̄n̄e kwoj juon uwaan Kabun̄ in bōtaab ilo tōre in ejjab niknik, ij kūr eok: jouj im ro̧o̧ltok. Kōmij aikuj kom̧!
Itok, kobaiktok kajoor ko ami n̄an ko am.
Kōnke kōn tōļan ko ami, maron̄ ko, im paotokimi ejej uwaer, kom̧ naaj jipan̄ kōm erom em̧m̧anļo̧k im m̧ōņōņōļo̧k. Eļan̄n̄e kom̧ij kōm̧m̧ane menin, kōm naaj jipan̄ kom̧ erom em̧m̧anļo̧k im m̧ōņōņōļo̧k barāinwōt.
Itok, jipan̄ kōm kalōk im kōkajoorļo̧k juon mejatoto in kemour, jouj, im meanwōd n̄an aolep ajri ro nejin Anij. Bwe jej aolep kajieon̄ n̄an erom menin kōm̧anm̧an ko rekāāl ijo “men ko m̧okta rej ļotļo̧k” im “men in kōm̧anm̧an … erom ekāāl.”21 Rilo̧mo̧o̧r eo ej kwaļo̧k n̄an kōj iaļ eo n̄an ilo̧k—m̧aanļo̧k im lōn̄ļo̧k. Ej ba, “Eļan̄n̄e kom̧wij yokwe eō, kom̧ naaj kōjparok kien ko aō.”22 Jān aolep jerbal ippān doon n̄an erom armej ro an Anij eaar karōke bwe jān erom.
En̄in ej kain mejatoto in gospel eo jej ikdeelel n̄an rejtake ilo aolepān Kabun̄ eo an Jisōs Kraist. Jej pukōt n̄an kōkajoorļo̧k Kabun̄ eo āinwōt juon jikin ijo jej jeorļo̧k an doon bōd. Ijo jej jum̧ae kapo n̄an lo ņotaan doon, ruruwe, im kōnanaik an ro jet mour. Ijo, ijello̧kin kōnono kōn bōd ko, jej kotak im jipan̄ doon n̄an ad erom em̧m̧an tata eo jemaron̄e.
In karuwaineneik kom̧ bar juon alen. Itok im lale. Kobatok ippām. Kōmij aikuj kom̧.
Armej ro Rejjab Wānōk
Kom̧ naaj lo bwe Kabun̄ in eobrak kōn jet iaan armej ro rem̧m̧an tata laļ in emaron̄ kwaļo̧ki. Rej karuwainene, iakwe, jouj, im m̧ool. Rej kūttare jerbal, m̧ōņōņō in kaarmejete, im em̧ool ilo iien ko bun̄bun̄.
Im rej barāinwōt ļon̄tak kōn jab wānōk.
Rej kōm̧m̧ani bōd ko.
Jān iien n̄an iien rej ba men ko rejjab aikuj in kar ba. Rej kōm̧m̧ani men ko rejjab kar kōņaan kōm̧m̧ani.
Bōtaab ewōr ippāer ejja menin wōt—rej kōņaan em̧m̧anļo̧k im epaakeļo̧k Irooj, ad Rilo̧mo̧o̧r, em̧ool Jisōs Kraist.
Rej kajjieon̄ kōm̧m̧ani men ko rejim̧we.
Rej tōmak. Rej iakwe. Rej kōm̧m̧an.
Rej kōņaan kadikļo̧k aer ļōmņak kōn er make, kōļapļo̧k meanwōd, kōļapļo̧k jouj, kōļapļo̧k āinwōt Jisōs.
M̧ōņakjen eo n̄an Lem̧ōņōņō
Aaet, mour emaron̄ pen jet iien. Em̧ool ewōr ad aolep iien ko ejjeļo̧k kōjatdikdik im ebbwer.
Bōtaab gospel eo an Jisōs Kraist ej letok kōjatdikdik. Im, ilo Kabun̄ eo an Jisōs Kraist, jej koba ippān ro jet rej pukōt juon jikin ijo jemaron̄ in en̄jake kapijuknen—juon jikin eddōkļo̧k ijo jemaron̄ tōmak, iakwe, im kōm̧m̧an.
Jekdo̧o̧n oktak ko ad, jej pukōt n̄an nōbar doon āinwōt m̧aan im kōrā ro nejin ad jitōn bōro Jemedwōj Ilan̄.
Ij kam̧m̧oolol eļap jān jon̄an n̄an erom juon uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata im n̄an jeļā bwe Anij ej iakwe ajri ro Nejin n̄an leļo̧k n̄an er juon m̧ōņakjān n̄an lem̧ōņōņō im meļeļe ilo mour in im juon wāween n̄an en̄jake lan̄lōn̄ indeeo ilo jikin ko raiboojoj ilo mour eo ej itok.
Ij kam̧m̧oolol bwe Anij eaar letok n̄an kōj juon wāween n̄an kemour nan̄inmej in jetōb ko ad imWeltschmerz eo an mour.
Ij kam̧ool im likūt ippemi kōjeraam̧m̧an eo aō bwe ilo ad tōmak ilo Anij, ilo ad iakwe E im iakwe ajri ro Nejin kōn aolepān būruwōd, im kajieon̄ n̄an kōm̧m̧an āinwōt an Anij kar jiron̄ kōj, jenaaj lo kemour im aenōm̧m̧an, lem̧ōņōņō im meļeļe. Ilo āt eo ekwojarjar etan Jisōs Kraist, amen.