Jab Ju Būruwōn

Jān Michelle D. Craig

Rikakpilōklōk eo Kein Kajuon ilo Būreejtōnji eo Eutiej an Doulul eo an Jiron̄ ro

Jab ju būruwōn emaron̄ tōlļo̧k kōj n̄an jerbal kōn tōmak, ļoor kūr eo an Rilo̧mo̧o̧r n̄an kōm̧m̧an em̧m̧an, im leļo̧k mour ko ad n̄an E.

Ke iaar jikuuļ ilo elementary school, kōm̧ ar etetal laļļo̧k n̄an m̧weeo ilo juon iaļ jimeen etal im itok ioon ļo̧k to̧l eo. Ebar wōr juon iaļ, ejjab jimeen, kar ņaetan “iaļ an’ ļaddik.” Iaļ eo an ļaddik eaar juon iaļ epedkatkat me ej kajju lōn̄ļo̧k n̄an to̧ļ eo. Ekar kadu ak e ju. Ke iaar juon leddik edik, iaar jeļā imaron̄ kar etetal ilo iaļ eo an ļaddik ro. Men eo eaorōktata, iaar jeļā bwe ij mour ilo raan ko āliktata im bwe ij aikuj in kōm̧m̧ani men ko reppen, āinwōt kar baineer ro—im ikar kōņaan pojak. Kiiō ilo jet iien, ikijon̄ jenlklik etetal ilikin ro m̧ōtta ilo iaļ eo ejimeen, utik juuj ko aō, im jintōb ilo iaļ eo an ļaddik. Iaar kajjieon̄ in kapen lo̧o̧pidān neeō.

Āinwōt juon leddik Būramere edik, en̄in ej ta eo iaar ļōmņake imaron̄ kar kōm̧m̧ane n̄an kōpooj eō. Kiiō ijeļā oktak eo! Ijjeļļo̧kin jintōb ilo iaļen to̧l ko, ijeļā imaron̄ kōppooj neeō n̄an etetal ilo iaļen bujen eo ilo aō bōk im̧we ko an Jetōb Kwojarjar. Bwe Irooj, kōn rikanaan eo An, ej kūr kōj kajjojo n̄an mour im kea kake ilo “wāween eo eutiejļo̧k im ekwojarjarļo̧k” im n̄an “bōk juon bun̄tōn eutiejļo̧k.”¹

Kanaan in ej kūr n̄an jerbal, kobaik jeļā eo ad bwe jen maron̄ kōm̧m̧ane eļapļo̧k, jet iien ej ejaak ippād ta eo Elder Neal A. Maxwell eaar ņaetan “jab ju būruwōn.”² Jab ju būruwōn ej itok n̄e jej keidi “ta kōj [n̄a] ta kajoor eo ewōr ippād n̄an erom̧.”³ Kōj kajjojo, eļan̄n̄e jej m̧ool, jeen̄jake juon kōtta kōtaan ia im wōn kōj, im ia im wōn eo jej kōņaan erom̧. Jej kōnaan bōk eļapļo̧k maron̄ eo ad make. Epād ippād en̄jake kein kōnke jej jiron̄ ro im likao ro nejin Anij, lo̧tak kōn meram in Kraist bōtaap mour ilo juon laļ eo eankeke. En̄jake kein rej letok in Anij im rej ejaake juon m̧ōkaj in jerbal.

Jej aikuj karuainene en̄jake ko an Jab ju būruwōn ko rej ioon tok kōj n̄an juon jekjek eo eļap, n̄an kile im bōbrae m̧oņ ko an Setan—mennin ebweer. En̄in ej juon en̄jake eļap me Setan ej kajjieon̄ in kakkure. Jemaron̄ kālet n̄an etetal ilo iaļ eo eutiejļo̧k me ej tōl ļo̧k kōj n̄an pukot Anij im An aenōm̧m̧an im jouj, ak jemaron̄ pokake Setan, eo ej kakkure kōj kōn ennaan ko me renaaj ban bwe: m̧weiie, māletlet, em̧m̧an, jabdewōt. Jab ju būruwōn eo ad emaron̄ erom̧ kwojarjar— ak jorrāān.

Jerbal kōn Tōmak

Juon iaan wāween eo n̄an ba Jab ju būruwōn jān m̧oņ ko an Setan ej bwe Jab ju būruwōn enaaj tōl ļo̧k kōj n̄an jerbal in tōmak. Jab ju būruwōn ejjab juon kūr n̄an pād ilo jukjukinpād eo ad, barāinwōt ban tōl ļo̧k kōj n̄an būrom̧ōj. Iaar jeļā bwe ke iaar dāpdep wōt ilo ļōmņak ko aō kōn men otemjeļo̧k ijjab, jab wōnm̧aanļo̧k im bwe ekanooj pen n̄an en̄jake im ļoore Jetōb.⁴

Āinwōt juon likao edik, Josep Smith eaar kile m̧ōjņo̧ ko an im kar inepata kōn “mour eo [an].” Ilo naan ko an, “Kōļmenļo̧kjeņ eo aō eaar lukkuun būrom̧ōj, bwe iaar jino en̄jake jerawiwi ko aō, im … kar en̄jake n̄an jan̄ kōn jerawiwi ko aō make im kōn jerawiwi eo an laļ in.”⁵ Menin eaar tōl ļo̧k e n̄an “kanooj kejakļo̧kjeņ im eļap joko̧n.”⁶ Eaar alikkar ke menin? Kwoj ke joko̧n ak būrom̧ōj kōn likjab ko am?

Ekwe, Josep kōm̧m̧ane jet men. Eaar kwaļo̧k, “Ekkā aō ba n̄an n̄a make: Ta eo in kōm̧m̧ane?”⁷ Josep eaar jerbal kōn tōmak. Eaar pukot jeje ko rekwojarjar, riiti karuwainene eo ilo Jemes 1:5, im kar oktak ļo̧k n̄an Anij kōn jipan̄. Uwaakin eaar waļo̧ktok visōn kōn Jepļaaktok eo. Ewi jon̄an aō kam̧m̧oolol bwe kōn Jab ju būruwōn, an joko̧n im tarpok, ekar ļōn̄aj an tōmak n̄an jerbal.

Ļoor Im̧we ko n̄an Kōm̧m̧an Em̧m̧an

Laļ in ekkā an kwaļo̧k juon en̄jake in jam̧ōņōņō āinwōt juon jekpen ņae ļōmņak kōn e make, n̄an ukōt ļōmņak ko ad itulowa im likļo̧k n̄an m̧okta im ļōmņak kōn e make kōn wōn n̄a, im ejjab n̄a, im ta eo ikōņaan. Jab ju būruwōn ej kōmaron̄ kōj n̄an ļoor waanjon̄ok eo an Rilo̧mo̧o̧r, “eo ekar ilo̧k im kōm̧m̧an em̧m̧an.”⁸ Ilo ad etetal ilo iaļen rikaļoor in, jenaaj bōk im̧we ko an jetōb n̄an pukot ļo̧k ro jet.

Juon bwebwenato iaar ron̄ iiō ko ļo̧k eaar jipan̄ eō kile innām jerbale im̧we ko raar itok jen Jetōb Kwojarjar. Sister Bonnie D. Parkin, kar juon Būreejtōn an Doulul eo Kōrā ro, eaar kwaļo̧k menin:

“Susan … eaar juon eo ejeļā keke. Būreejtōn [Spencer W.] Kimball eaar jokwe ilo ward eo [an]. Juon Jabōt, Susan eaar kile bwe ej kōnak juon juut kāāl. Jidik iien emootļo̧k ļo̧k jemen … bōktok jet an eed kāāl. Susan eaar ļōmņak bwe eed eo enaaj kwaļo̧k juon taae em̧m̧an bwe en an jejjet ippān juut kāāl eo an Būreejtōn Kimball. Kōn menin ilo Mande eo eaar kiij taae eo. Eaar nukujji ilo juon to̧o̧l peba im jibadōkļo̧k m̧weeo m̧ōn Būreejtōn Kimball.

“Ilo iaļ eo an ļo̧k n̄an m̧aan kōjem eo, eaar m̧ōkaj in bōjrak im ļōmņak, ‘Wōn n̄a bwe in kiij juon taae n̄an rikanaan eo? Bōlen ekanooj lōn̄ an.’ Ļōmņak bwe ekar likjab, ekar tin ro̧o̧l.

“Innām Sister Kimball eaar kōpeļļo̧ke kōjem eo im̧an im ba, ‘O, Susan!’

“Jaje ta eo en kōm̧m̧an, Susan eaar ba, ‘Iaar lo Būreejtōn Kimbaal kōn juut eo an ekāāl Jabōt eo. Baba ejkab bōk jet eed jān New York … kōn menin iaar kiij juon an taae.’

“Mokta jen an Susan kōnono, Sister Kimball eaar kōbōjrak e, jibwe aeran, im ba: ‘Susan, jab kōjekdo̧o̧n juon ļōmņak em̧m̧an.’”⁹

Em̧m̧an ippa! “Jab kōjekdo̧o̧n juon ļōmņak ejouj.” Jet iien n̄e ij bōk juon im̧we n̄an kōm̧m̧an jet men n̄an eo juon, Ij kōļmenļo̧kjeņ eļan̄n̄e ekar juon im̧we ak ekar baj aō ļōmņak. Ak iaar keememej bwe “men eo jān Anij ej karuwainene im karreel n̄an kōm̧m̧an em̧m̧an iien otemjej; kōn menin, jabdewōt men ej karuwainene im karreel n̄an kōm̧m̧an em̧m̧an, im n̄an iakwe Anij, im n̄an jerbal n̄an E, ej kōketak in Anij.”¹⁰

Men̄e im̧we ko rej kajju waļo̧k ak baj kōnaan n̄an jipan̄, juon jerbal em̧m̧an ejjamin ejjeļo̧k tokjen, bwe “iakwe-em̧ool ejamin jako”¹¹—innām ejjamin juon uwaak eo ebōd.

Iien ekkā an jab jejjet, im jej lukkuun jeļā ta tōprakin jerbal iddik ko ad kōn jerbal in jipan̄. Ak kajjojo kiiō im tokālik, jenaaj kile bwe jej kein jerbal ko ilo pein Anij im jenaaj m̧ōņōņō in jeļā bwe Jetōb Kwojarjar ej jerbal ilo kōj n̄an kwaļo̧k ankilaan Anij.

Sister ro, kwe im n̄a maron̄ akweļap bwe Jetōb Kwojarjar en kwaļo̧k n̄an kōj “aolep men ko [jej] aikuj kōm̧m̧an,”¹² em̧ool n̄e laajrak in jerbal ko ad rekadede obrak. N̄e naaj im̧we, jemaron̄ likūt kōnno ko ilo jiin̄ eo ak juon bo̧o̧k eo eobrak kōn apan̄ ko ļōmņak n̄an jipan̄ riit ļo̧k n̄an ajri eo, loļo̧k juon eo m̧ōttad, kōkaajririik nejin ro rituruur, ak jerbal ilo tampeļ eo. Jab kabwōd eō—Ij juon rikōm̧m̧an elaajrak; em̧m̧an ippa kōpooj ellaajrak eo. Ak aenōm̧m̧an ej itok n̄an jeļā n̄e emaron̄ ban ļapļo̧k kōm̧m̧an men eo ļapļo̧k tokjen. Uwaak n̄an Jab ju būruwōn emijaļ n̄an ļoor im̧we ko reoktak ilo wāween eo ij ļōmņake kōn, “tōre eo aō, im ij lo armej ro ejjab āinwōt ukoktak ak āinwōt juon jibadbad ilo mour e aō.

Jab Ju Būruwōn ej Tōlļo̧k Kōj n̄an Kraist.

Jab ju būruwōn ej tōlļo̧k n̄an ettā, jab ļōmņak kōn e make ak ebweer ko rej itok n̄an kōm̧m̧an oktak ko jej aolep iien likjab kaki. Kōrā ro rej kōjparok bujen ko rej itok ilo elōn̄ jekjek ko im wāweeier; ilo baam̧le ko aer, mour in imminene ko aer, im jekjek ko iooni.

Aaet, kōj aolep naaj likjab kōn kwojjarjar eo ad eaorōk, im ewōr jet m̧ool ko rej make kwaļo̧k ke jejjab aorōk. Ak nuuj eo em̧m̧an kōn gospel in ej bwe kōn jouj an Anij, jej aorōk. Kōn jipan̄ an Kraist, jemaron̄ kōm̧m̧an aolep men otemjeļo̧k.¹³ Jeje ko rej kallim̧ur bwe jenaaj “lo jouj n̄an jipan̄ ilo iien aikuj.”¹⁴

Mool eo ekailbōkbōk ej bwe m̧ōjņo̧ ko ad remaron̄ in juon jeraam̧m̧an n̄e rej kōttāik kōj im oktak n̄an Kraist.¹⁵ Jab ju būruwōn ej itok n̄e jej ettā n̄an pukot Jisōs Kraist kōn kōnaan eo ad, ijeļļo̧kin dāpij kōj make.

Ilo m̧ool, kabwilōn̄lōn̄ ko an Jisōs ekkā aer jino n̄an kile juon kōņaan, aikuj, likjab, ak jab jejjet. Keememej ke pilawā ko im ek ko? Rijeje ro ilo gospel eo rej jiron̄ kōn kwabwilōn̄lōn̄ eo Jisōs eaar naajdik taujin ro raar ļoor E.¹⁶ Ak bwebwenato in eaar jino ke rijilōk ro raar kile likjab eo aer; raar kile ke ewōr ippāer wōt “ļalem pilawā, im ruo ek jiddik: ak ta ilubwiljin elōn̄?”¹⁷ Em̧ool rijilōk ro raar jim̧we: eaar jabwe m̧ōn̄ā, ak raar leļo̧k ta eo ewōr ippāer n̄an Jisōs, im Eaar leļo̧k kabwilōn̄lōn̄ in.

Kwoj ke en̄jake tōļan ko am̧ im menin letok ko raar dik n̄an jerbal ko im̧aan? Em̧ōj aō kōm̧m̧ane. Ak kwe im n̄a maron̄ leļo̧k ta eo ewōr ippād n̄an Kraist, im An kilaan enaaj kōļapļo̧k kijejeto ko ad. Ta eo ewōr ippam̧ n̄an leļo̧k ebwe jen ejjeļo̧k—men̄e jān nan̄inmej ak m̧ōjņo ko am̧—eļan̄n̄e kwoj pedped ioon jouj eo an Anij.

Mool in ej bwe kōj kajjojo iaad ej juon epepen ettoļo̧k jān Anij—juon nejin Anij.¹⁸ Im Eaar kōm̧m̧an jim̧or ippān rikanaan ro im em̧m̧aan im kōrā ro rejenoļo̧k kōn tōre in, Jemedwōj Ilan̄ ej kōnaan ukōt kōj.

C. S. Lewis eaar kwaļo̧k oktak in kajoor in an Anij ilo jekjek in: “Antoone kwe make āinwōt juon em̧. Anij ej itok n̄an bar kalek m̧weeo. Ilo jinoin, bōlen, kwomaron̄ meļeļe ta eo Ej tin kōm̧m̧ane. Ej kajjieon̄ pinej ļo̧k n̄an kabōjrak an ettaļ bōrooj eo im ko jet; kwaar jeļā bwe jerbal kein kar aikuji im bwe kwaar jab ilbōk kaki. Ak kiiō Ej kōļļaļaļ im̧weeo̧ ilo wāwein eo me ekōmetak. … [Kwoj loe,] Ej kalōke ilo juon wāween eoktak jān eo kwoj kōtmene. … Kwaar kōtmene kwon [kar] ekkal n̄an juon em̧ jidikdik: ak Eaar kalōk juon em̧ kileplep. Eaar kōnaan itok im jokwe Make ie.”¹⁹

Kōn pinmuur in en̄taan eo an Rilo̧mo̧o̧r, jej maron̄ juon wōt n̄an jerbal ko repād im̧aan. Rikanaan ro raar kwaļo̧k bwe ilo ad tallōn̄ ilo iaļen rikaļoor, jemaron̄ in kwojarjar kōn jouj eo an Kraist. Jab ju būruwōn emaron̄ tōlļo̧k kōj n̄an jerbal kōn tōmak, ļoor kūr eo an Rilo̧mo̧o̧r n̄an kōm̧m̧an em̧m̧an, im leļo̧k mour ko ad n̄an E. Ilo etan Jisōs Kraist, amen.