Dim im Pen kōn Tōmak ilo Kraist

Jān Elder D. Todd Christofferson

Jān Doulul eo an Jon̄oulruo Rijilōk ro

N̄an kattōt dim im Pen kōn tōmak ilo Kraist ebōk n̄an gospel eo an Jisōs Kraist bwen im̧we ilo būruwōn im an.

Ilo bwebwenato in Kallim̧ur Mokta, jej riit kōn iien ko ke ro nejin Israel raar kōjparok bujen eo aer ippān Jeova n̄an kabun̄jar n̄an E im tōre ko jet ke raar kōjekdo̧o̧n bujen in im kar kabun̄jar n̄an ekjab ko ak Baalim.¹

Iien tōl eo an Ehab ekar juon iaan iien ko an bun̄ jen tōmak ilo torear in laļ en ilo Israel. Rikanaan Ilaija ilo juon iien eaar jiron̄ļo̧k Kiin̄ Ahab n̄an aiin armej in Israel barāinwōt rikanaan ro ak pris ro n̄an Beal ilo To̧l Carmel. Ke armej ro raar kuk tok ippān doon, Ilaija eaar ba n̄an er, “Ewi toōn ami ajjukub ikōtan ruo ļōmņak? [ak ilo naan ko jet, “N̄āāt eo kom̧ naaj bar kālet ?”] eļan̄n̄e ej Anij, ļoor e: ak eļan̄n̄e Beal, innām ļoor e. Im armej ro re jab uwaak n̄an jidik.”² Kōn menin Ilaija ekar tōl jim̧or e im rikanaan ro an Beal n̄an m̧an juon kau kom̧aan edik im likūt ioon kane ioon lokatok eo aer ak “jab likūt kijeek ium̧win.”³ Innām, “Kom̧win kūr etan anij ko ami, im n̄a inaaj kūr etan Jeova: im Anij eo ej uwaak kōn kijeek, en̄eo en Anij. Im armej otemjej raar uwaak im ba, em̧m̧an am ron̄.”⁴

Kwonaaj keememej bwe pris ro an Beal eto aer kūr ioon anij eo aer n̄an jilkin laļtak kijeek, ak “ejjeļo̧k ainikien, ak jabdewōt eo ej uwaak, ak jabdewōt.”⁵ Ke ej iien eo an Ilaija, eaar kōkāāl lokatok eo an Irooj eo eaar jorrāān, kar likūt kane ioon menin katok kijeek eo, im kōllaajrake aolepān en etein̄ kōn dān, ejjab juon ak jilu alen. Eaar ejjeļo̧k pere bwe jaab e ak jabdewōt armej ekajoor emaron̄ kauruur juon kijeek eo.

“Im ālkin men kein im ilo iien katok in jota eo, Ilaija rikanaan eo eaar ruwaaktok, im ba, Anij an Ebream, an Aisek, im an Israel, ren jeļā rainin bwe kwe Anij in Israel, im n̄a rikarejerōm̧, im bwe iar kōm̧m̧an men kein otemjej kōn Am̧ in naan. …

“Innām kijeek jān Jeova ear bun̄, im tile men in katok kijeek eo, im kane, im dekā ko, im būn̄al, im jorome dān ilo jikur eo.

“Im ke armej otemjej raar loe, raar bun̄pedo; im re ba, Jeova, ej Anij; Jeova, ej Anij”⁶

Rainin Ilaija emaron̄ ba:

N̄e Anij, Jemedwōj Ilan̄, emour, ak E ejjab, ak eļan̄n̄e Ej mour, kabun̄jar n̄an E.
N̄e Jisōs Kraist ej Nejin Anij, kar jerkakpeje Ripinmuur an aolep armej, ak n̄e ejjab E, ak eļan̄n̄e E eo, ļoor E.
N̄e Bok in Mormon ej naan in Anij, ak ejjab, ak eļan̄n̄e ej, innām “epaakeļo̧k Anij Anij n̄an [ekkatak] ekkar n̄an katak ko ie.”⁷
N̄e Josep Smith eaar lo im kōnono ippān Jemed im Nejin iien māneen eo ilo 1820 eo, ak n̄e ekar jab, ak eļan̄n̄e ekar, innām ļoor kanaan eo, ekoba kii ko an liāp me n̄a, Ilaija, kar likūti ioon.

Ilo kar kweilo̧k eo eļap ej kab jem̧ļo̧k ļo̧k, Būreejtōn Russell M. Nelson eaar kwaļo̧k: “Kwojjab aikuj in ļōmņak kōn ta eo em̧ool [lale Moronai 10:5]. Kwojjab aikuj in ļōmņak wōn eo komaron̄ lōke e. Jān revelesōn ko am̧ make, komaron̄ bōk am̧ make kam̧ool bwe Bok in Mormon ej naan an Anij, bwe Josep Smith ekar juon rikanaan, im bwe en̄in ej Kabun̄ eo an Irooj. Jekdo̧o̧n ta ro jet remaron̄ ba ak kōm̧m̧ane, ejjeļo̧k juon emaron̄ bōkļo̧k juon naan in kam̧ool lewaj n̄an būruwōm̧ im ļōmņak eo am̧ kōn ta eo ej m̧ool.”⁸

Ke Jemes eaar kallim̧ur bwe Anij “ej wūjlep n̄an armej otemjej” ro rej pukot An māletlet,⁹ eaar bar kakkōl:

“Ak en kajjitōk ilo tōmak, ejjeļo̧k pere. Bwe e eo ej pere ej einwōt juōn ņo in lo̧meto e m̧akūtkūt im lim̧aajņoņo in kōto.

“Bwe armej eo en jab ļōmņak bwe enaaj bōk jabdewōt jān Irooj.

“E armej būruōn ruo e kijon̄ oktak ilo iaļ ko an otemjej.”¹⁰

Ad Rilo̧mo̧o̧r, ilo pā eo turājet, eaar waanjon̄ok eo ekkar. Eaar ba, “Jema ear jab likūt Eō make iaaō; bwe iien otemjej ij kōm̧m̧an men ko rej kabun̄būruōn.”¹¹ Ļōmņak kōn kōmeļeļe kein jān jeje ko rekwojarjar kōn em̧m̧aan im kōrā ro, ro āinwōt Rilo̧mo̧o̧r, raar dim im pen:

Raar “oktak tok n̄an tōmak eo em̧ool, im reban kar ilo̧k jān e, bwe raar pen, im dim, im jamin em̧m̧akūt, m̧ōņōņō ilo aolep niknik n̄an kōjparok kien ko an Irooj.”¹²

“Ļōmņak ko aer reppen, im rej likūt aer lōke ilo Anij iien otemjej.”¹³

“Im lo, kom̧ jeļā kom̧ make, bwe kom̧ ar kam̧ool e, bwe jon̄an wōt an lon̄ier kar bōktok n̄an jeļā kōn m̧ool eo … raar pen im dim ilo tōmak, im ilo men otemjej eo jān ekar kanemkwōj er.”¹⁴

“Im rej pād im pen ilo katak im kōm̧m̧ao ippān doon an ro rū jelōk, im ilo ruji pilawā, im ilo jar.”¹⁵

N̄an kattōt dim im pen kōn Tōmak ilo Kraist ebōk bwe gospel eo an Jisōs Kraist en im̧we būruwōn im an, meļeļein bwe gospel eo ejjab im̧we wōt elōn̄ jekjek ko ilo mour an juon armej ak ej ba kajjien mour im piktokin mour eo an. Irooj ej ba:

“Im Inaaj lewōj n̄an koṃ juon bōro ekāāl, im Inaaj likūt juon jetōb ekāāl ibuļōmi. Im Inaaj joļo̧k bōro dekā jān kanniōkemi, im Inaaj lewōj ñan kom̧ juon bōro kanniōk.

“Im Inaaj likūt Jetōb eo Aō ilo koṃ, im Inaaj kōṃṃan bwe kom̧win etetal ilo naan in jiroñ ko Aō im eọroñ im kōṃṃan ekajet ko Aō.

“Im … kom̧ naaj armej ro doō, im N̄a Inaaj ami Anij.”¹⁶

En̄in ej bujen eo jaar kōm̧m̧ane ilo ad kar peptaij im ilo kain̄i ko ilo tampeļ. Ak jet rejjan̄in de bōk gospel eo an Jisōs Kraist ilo mour ko aer. Mekarta, āinwōt an Paul ba, bwe ṃōj “kalbwin kōj ippān [Kraist] kōn peptaij,” rej m̧ōttan eo ej jako wōt“bwe āinwōt an kajerkakpeje Kraist jān ro re mej … , bwe āindein … barāinwōt kōj jen etal [ilo] mour ekāāl.”¹⁷ Gospel in ejjan̄in der kōmm̧eļeļe kōn er. Rejjan̄in likut mour ko aer ilo Kraist. Rej kālet kōn katak ko im kien ko renaaj ļoori im ia im n̄āāt renaaj jerbal ilo Kabun̄ in. N̄an keidi, ilo kōjparok bujen ko aer kōn jejjet bwe “ro raar kālet ekkar n̄an bujen eo”¹⁸ bōbrae m̧ōņ im dim wōt kōn tōmak ilo Kraist.

Jej lo kajjojo kōj make ilo tōre in ilo korak in kōtaan juon jarlepju eļap n̄an jurake gospel in ilo juon pā eo turājet n̄an lukkuun kajedeede, mour āinwōt Kraist n̄an ankilaan Anij ilo turājet eo juon. Jet iien ilo korak in, naan eo em̧m̧an ilo gospel in an Jisōs Kraist ej deļo̧n̄ tok ilo būruwōd im bōkļo̧k ad. Emaron̄ in jab waļo̧k ilo kiiō wōt, ak jej aikuj aolep bun̄m̧aanļo̧k kōn kōjeraam̧m̧an in.

Ej juon apan̄ ak eaorōk n̄an dim im pen wōt n̄e jej lo ad make ebbolool “ilo anjiwiwi ilo iien en̄taan,”¹⁹ jet men remaron̄ waļo̧k kiiō ak tokālik n̄an kōj aolep ilo mour in. N̄e ejako Anij, en̄jake kein rejino eddodo, ebbweer, im aaet būrom̧ōj. Ippān Anij, aenōm̧m̧an ebōk jikin metak, aenōm̧m̧an ebōk jikin būrom̧ōj, im kōjatdikdik ebōk jikin inepata. Dim wōt ilo tōmak eo ilo Kraist enaaj bōktok tiriam̧o im jipan̄ eo An.²⁰ Enaaj ukōt apan̄ n̄an kōjeraam̧m̧an im, ilo naan ko an Aiseia, “letok … aibojoj n̄an upaaj.”²¹

In kwaļo̧k jilu waanjon̄ok ko n̄a make iaar jeļā:

Ewōr juon kōrā eo eaar en̄taan kōn juon nan̄inmej, nan̄inmej eo ej peddo waļo̧k eaikuj bwe en loļo̧k jikin taktō, kōjeraam̧m̧an ko an priesthood, im jitlo̧k im jar. Ijoke, an tōmak ilo kajoor in jar im iakwe eo em̧ool an Anij n̄an e eaar jab bōjrak. Eaar diplo̧ke jān raan n̄an raan (im jet iien awa n̄an awa) jerbal āinwōt kar kūr ilo Kabun̄ in im, kobaļo̧k ļeo pāleen, waate baam̧le eo an, ettōn̄dikdik jon̄an wōt an maron̄. An jouj n̄an ro jet eaar ļap, waļo̧k jen en̄taan eo an make, im ekkā an leļo̧k an n̄an jerbal in karejar n̄an ro jet. Eaar pen wōt, im armej ro raar en̄jake m̧ōņōn̄ō eo ipeļaakin.

Juon likao eo ekar rūtto ļo̧k ilo Kabun̄ in, kar jerbal in mijenede aolep raan, im kar m̧areik juon jiron̄ eo em̧m̧an kar ilbōk ke ro jein im jatin raar jino kōnanaik Kabun̄ in im kōn Rikanaan Josep Smith. Ālkin juon tōre raar ilo̧k jān Kabun̄ in raar kajjieon̄ kareel e bwe en ļoor er. Ilo an ekkā an waļo̧k kain jekjek rot in, raar kareel e kōn naan, podcast, im pija ko kar kōm̧m̧ani jān ro rej kōnana, elōn̄ iaer make raar membōr in Kabun̄ in. Ro jein im jatin raar kajjirere kōn tōmak eo an, jiron̄ ļo̧k e ke ekar e epidodo kabwebwe im bōd tōl e. Eaar jab uwaak n̄an aolep kōnana ko aer, im an tōmak eaar jino ebbweer im jum̧ae. Eaar ļōmņak eļan̄n̄e eaikuj in bōjrak jān an etal in jar. Eaar kōnono ippān kōrā eo pāleen. Eaar kōnono ippān armej ro ej lōke er. Eaar jar. Ke ej kōļmenļo̧kjeņ kōn jekjek in inepata eo an ilo būruwōn, eaar keememej juon iien ear en̄jake Jetōb Kwojarjar im kar bōk juon kam̧ool kōn m̧ool in jān Jetōb. Eaar ba, “Eļan̄n̄e inaaj m̧ool n̄an n̄a make, Ij aikuj kile bwe Jetōb eaar im̧we eō eļapļo̧k jān juon alen im bwe kam̧ool eo kōn Jetōb em̧ool.” Eaar bōk juon lem̧ōņōņō eo ekāāl im aenōm̧m̧an eo eaar kar kwaļo̧k jen kōrā eo pāleen im ro nejin.

Ļeo im lieo pālele ro raar kije im m̧ōņōņō in ļoor kapilōk eo an Em̧m̧aan ro n̄an mour ko ad raar būrom̧ōj kōn en̄jake ko reppen raar iooni bween wōr nejier. Raar jerbal n̄an kwaļo̧k eļap jāān n̄an leļo̧k n̄an jikin taktō ko rem̧m̧anļo̧k, im, ālkin jidik iien, raar jeraam̧m̧an kōn juon nejier ļaddik. Ejerata, ijoke, ālkin wōt juon iiō, nin̄nin̄ eo ekar nan̄inmej me ejjab ruon bar juon ak eaar make waļo̧k, kōn jorrāān in kōmālij. Eaar bōk kōm̧adm̧ad ko rem̧m̧antata, ak taktō ro raar jab kwaļo̧k elmen an men ko naaj jerbal m̧aanļo̧k. Ajri in eo jinen im jemān kar lukkuun jerbal im jar kake n̄an boktok n̄an laļ in emōj bōke, im raar jab jeļā eļan̄n̄e enaaj bar ro̧o̧l ļo̧k n̄an er. Raar jaje kiiō n̄an kake aikuj ko an nin̄nin̄ eo ilo aer jerbali eddo ko jet aer. Ilo iien in epen, raar oktakļo̧k n̄an Irooj. Raar pedped ioon “bread in mour kajjojo raan” raar būki jen E. Kar bōk jipan̄ jen m̧ōttaer rejouj im baam̧le im kar kajoor jen kōjeraam̧m̧an ko an priesthood. Raar epaakeļo̧k doon, aer ippān doon bōlen kiiō em̧wilaļ ļo̧k im eaar maron̄ em̧m̧anļo̧k.

Ilo Juļae 23, 1837, Irooj eaar kwaļo̧k juon revelesōn n̄an ilo iien eo-Būreejtōn eo an Doulul eo an Jon̄oulruo Rijilōk ro, Thomas B. Marsh. Ekoba naan kein:

“Im jar kōn ro jeiūm̧ im jatūm Jon̄oulruo ro. Kwōn ekkan̄ am kauwe er kōn wōt Eta, im ren bōk kauwe kōn aolep jero̧wiwi ko aer, im kwōn tiljek Im̧aō n̄an Eta.

“Im ālikin kapo ko aer, im eļap kaen̄tanaan, lo, N̄a, Irooj, I naaj būrom̧ōjļo̧k ilo̧kaer, im eļan̄n̄e rej jab kapen burueer, im kakijn̄en̄e kōnwaer ņae Eō, renaaj oktaktok, im I naaj kōmour er.”²²

Ij tōmak bwe pedped in katak in ej waļo̧k ilo eoon kein ej jerbal n̄an kōj aolep. Kapo im kaen̄tanaan ko jej en̄jaki, ekoba jabdewōt mālijjon̄ ko me Irooj ej loi ekkar n̄an lito̧k, emaron̄ tōl n̄an ad lukkuun oktak im kōmour. Ak menin ej waļo̧k eļan̄n̄e, im n̄e, jeban kapen būruwōd ak kaankekeik būruwōd ņae E. Eļan̄n̄e jenaaj dim im pen wōt, n̄e ta eo ewaļo̧k, jej bōk oktak eo an Rilo̧mo̧o̧r ke Eaar ba n̄an Piter, “N̄e em̧ōj am̧ bar oktak, kwōn kakajoor ro jeiōm̧ im jatōm̧,”²³ juon oktak eo me ejamin bar oktak. Kallim̧ur in kōmour in ej karreoik im kakkwojarjar lippijinjin in jerawiwi ko ad, kōm̧m̧an bwe jen kwojarjar.

Ij ememļo̧kjeņ kōn naan in kapilōk eo an jinōm̧: “Kan̄n̄i leen wōjke ko kijōm̧; em̧m̧an n̄an kwe.” Em̧ool ro jined, im ilo kobban dim im pen ilo tōmak,“kan̄n̄i leen wōjke ko kijōm̧” ej n̄an jar emakijkij, n̄an kwojkwoj ioon jeje ko rekwojarjar kajjojo raan, n̄an jerbal im kabun̄jar ilo Kabun̄ in, n̄an erreeo n̄an bōk m̧ōttan kwojkwoj eo, n̄an iakwe ro riturum̧, im n̄an bōk am̧ debwāāl n̄an pokake Anij kajjojo raan.²⁴

Iien otemjej keememej kallim̧ur eo an aolep men rem̧m̧an rej itok, jim̧or kiiō ak tokālik, n̄an ro me rej dim im Pen kōn Tōmak ilo Kraist. Kememej “mour indeeo, im kōn lan̄lōn̄ an ro doon.”²⁵ “O aolep kom̧ ro rej erreo ilo bōro, kom̧in kotak bōrami im bōk naan in jouj an Anij, im kwōjkwōj ioon iakwe eo An; bwe kom̧ maron̄, eļan̄n̄e ļōmņak ko ami redim, indeeo.”²⁶ Ilo etan Jisōs Kraist, amen.