Aolep Aikuj Bōk Ioer Et eo Letok jān eo Jemed

Jān Elder Paul B. Pieper

Jān Jiljilimjounn̄oul eo

Etan Rilo̧mo̧o̧r emake wōt im ļap kajoor in. Ede in āt emaron̄ letok lo̧mo̧o̧r.

Jet wiik remootļo̧k, Iaar bōk koņaō ilo peptaij an jet ajri rualitōk iiō dettaer. Raar ijjino katak kōn gospel eo an Jisōs Kraist jān ro jineer im jemeer im rūkaki ro aer. Ine in tōmak eo aer ilo E eaar jino an eddōk. Kiiō raar kōņaan ļo̧o̧r E n̄an dānnin peptaij eo n̄an erom̧ membōr ro ilo Kabun̄ eo An em̧ōj an jepļaaktok. Ilo aō lale ļo̧k aer kijerjer, ij ļōmņak kōn ewi jon̄an meļeļe eo aer kōn juōn un eaorōk ilo bujen in peptaij eo aer: kallim̧ur eo aer n̄an bōk ioer etan Jisōs Kraist.

Jen jinoin, Anij eaar kwaļo̧k aorōkin etan Jisōs Kraist ilo karōk eo An n̄an kōj. Juon enjeļ kar katakin eo jemed jinoin tata, Adam, “Kwōn kōm̧m̧an aolep men kwōj kōm̧m̧ani ilo etan Nejin, im kwōn ukeļo̧k im kūr ioon Anij ilo etan Nejin jān kiiō n̄an indeeo.”¹

Rikanaan Kiin̄ Benjamin ilo Bok in Mormon ekar katakin armej ro an, “Bwe ejjeļo̧k naaj bar āt letok ak jabdewōt bar iaļ ak wāween lo̧mo̧o̧r emaron̄ itok n̄an ro nejin armej.”²

Irooj eaar bar ba m̧ool in n̄an Rikanaan eo an Josep Smith: “Lo, Jisōs Kraist ej āt eo letok in Jema, im ejjeļo̧k bar juon āt letok im kōn e armej remaron̄ mour.”³

Ilo raan kein ad, Būreejtōn Dallin H. Oaks ekar katakin kōj bwe “ro rej kōjerbal tōmak eo aer ilo āt eo eaorōk etan Jisōs Kraist … im deļo̧n̄ ilo bujen eo an … remaron̄ wōr wōņāer ilo en̄taan in pinmuur eo an Jisōs Kraist.”⁴

Jemedwōj Ilan̄ ekōņaan lukkuun kameej e ke etan Nejin, Jisōs Kraist, ejjab juon āt bajjōk ilubwiljin elōn̄ āt ko. Etan Rilo̧mo̧o̧r emake wōt im ļap kajoor in. Ede in āt emaron̄ letok lo̧mo̧o̧r. N̄an kwaļo̧k m̧ool in ilo aolep epepen, Jemād eo ej iakwe ej kwaļo̧k ke elōn̄ iaļ n̄an jepļaak n̄an Ippān. Bōtaab ilo an lōn̄ iaļ epeļļo̧k ejjab meļeļein ke jepļaak eo ad ej kajju. Anij ej ba n̄an kōj ta ko jej aikuj bar kōm̧m̧ani: “Kōn menin, aolep em̧m̧aan [im kōrā] reaikuj bōk ioer āt eo letok in Jema.”⁵

N̄an bōk kajoor in lo̧mo̧o̧r eo ej itok wōt jān etan Kraist, jej aikuj “kōttāik [kōj] im̧aan Anij … im wōnm̧aantak kōn bōro ko rerup im jetōb ko rettā … im [m̧ōņōņō] in bōk [iood] etan Jisōs Kraist” im karbab, āinwōt ro m̧ōtta rualitōk iiō dattaer, n̄an “bōk er ilo kabun̄ eo An jān peptaij.”⁶

Aolep ro rej lukkuun kōņaan bōk etan Rilo̧mo̧o̧r ioer rej aikuj karbab n̄an im bōk bujen ko an peptaij bwe en kam̧ool n̄an Anij kōn kālet eo aer.⁷ Bōtaab peptaij ej ijjinoin.

Naan eo bōk ejjab kōjekdoon kālet eo an juon. Ej juon naan kōm̧m̧an kōn elōn̄ meļeļe ko.⁸ Āinļo̧k wōt, kallim̧ur eo ad n̄an bōk iood Etan Jisōs Kraist ej aikuj bwe jen jerbal im elōn̄ļo̧k jen juon wāween ko.

N̄an waanjon̄ok, juon naan n̄an kōmeļeļe bōke ej bōk n̄e jej bōke juon men im kadeļo̧n̄e ilowaan ānbwinin juon, āinwōt ad idaak juon kab. Ilo ad bōk iood make etan Kraist, jej kallim̧ur n̄an bōk katak ko An, oktak in Paoktokin, im naaj iakwe eo An eļap, m̧wilaļ in būruwōd bwe ren bar m̧ōttan wōt kōj. Lo aurōkin karuainene eo an Būreejtōn Nelson n̄an rum̧m̧an ded n̄an “jar im lukkuun [pukot] n̄an meļeļe ta kajjojo taitōļ ko rellōn̄ an [Rilo̧mo̧o̧r] im etan meļeļeir make n̄an [er]”⁹ im n̄an kwōjkwōj ioon naan ko an Kraist ilo jeje ko rekwojarjar, eļaptata Bok in Mormon eo.¹⁰

Naan in bōke emaron̄ n̄an kōm̧m̧an jokkin wōt juon armej n̄an juon āt ak un. Enan̄in aolepād em̧ōj ad bōk ippād eddo ilo jerbal ak bōk juon un ak em̧m̧akūt. N̄e jej bōk iood make etan Kraist, jej bōk iood jerbal ko an juon rikaļoor em̧ool, jej errā ilo jibadbad eo An, im jej “jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko [je] maron̄ pād ie.”¹¹ Būreejtōn Nelson ekar kūr n̄an “aolep jiron̄ ro im aolep likao ro … n̄an deļo̧n̄e jar in pata eo an jodikdik ilo Irooj n̄an jipan̄ aintok Israel.”¹² Im aolepād jej m̧ōņōņō in bōk kūr in kanaan eo n̄an kwaļo̧k etan Kabun̄ eo An em̧ōj an jepļaaktok im kar kwaļo̧k jān Rilo̧mo̧o̧r make: Kabun̄ eo an Jisōs Kraist im Armej ro Rekwojarjar ilo Raan-ko Āliktata.¹³

Ilo iien eo jej bōk etan Rilo̧mo̧o̧r eo iood, jej aikuj meļeļe kōn un eo an Kraist im Kabun̄ eo An rej juon wōt im ejjeļo̧k oktak jān doon. Rejjab maron̄ jenolo̧k jān doon. Āinļo̧k wot, kaļoor eo ad make n̄an Rilo̧mo̧o̧r eo im an membōr ro reniknik ilo Kabun̄ in An rejjab jepel jān doon. Eļan̄n̄e jej mōjno ļo̧k ilo kallim̧ur ko ad, kallim̧ur ko ad n̄an doon enaaj dikļo̧k, āinwōt an raan itok ālkin bon̄.

Jet rej m̧akoko n̄an kōtmāne etan Jisōs Kraist im un eo An kōnke rej likūt eļap an jejtokjān, kōm̧m̧an jon̄an, im ej kaļbuuj. Ilo m̧ool, bōk iood etan Kraist ej kanemkwōj im kōļapļo̧k. Ej kairuj kōņaan eo jekar en̄jake ke jaar bōk karōk eo an Anij kōn tōmak ilo Rilo̧mo̧o̧r eo. Kōn ikdeleel in emour ilo būruōd, jemaron̄ lo lukkuun un eo an mennin letok ko ad jān Anij im tōļan ko ad, en̄jake eo kōn iakwe in kōkajoor eo An, eddōkļo̧k ilo kea eo ad kōn em̧m̧an ļo̧k eo an ro jet, Ilo ad bōk etan Rilo̧mo̧o̧r iood, jej lukkuun likūt aolep men ilo em̧m̧an im erom̧ āinwōt E.¹⁴

Ej aorōk n̄an keememej bwe bōk etan Rilo̧mo̧o̧r iood ej juon bujen kallim̧ur—ijjino jān bujen eo kōm̧m̧ane ilo peptaij. Būreejtōn Nelson eaar katakin, “[Ad] kallim̧ur n̄an ļoor Rilo̧mo̧o̧r eo ilo kōm̧m̧ane bujen ko ippān innam kōjpārok bujen kein naaj kōpeļo̧k kōjem eo n̄an aolep kōjeraam̧m̧an ko an jetōb im maron̄ ko repeļo̧k.”¹⁵ Juōn iaan maron̄ ko reuteej ilo bōk etan Rilo̧mo̧o̧r eo iood ilo peptaij ej iaal eo n̄an kōm̧m̧ane kain̄i eo tokelik ilo iaal eo an bujen, kamool eo ad. Ke iaar kajjitōkin juon iaan leddik eo m̧ōtta rualitōk an iiō ta meļeļein bōk etan Kraist n̄an e, eaar ba. “Meļeļein Jetōb Kwojarjar emaron̄ pād ippa.” Ekar jim̧we.

Mennin letok eo an Jetōb Kwojarjar ej bōk ilo kam̧ool ālkin ad bōke kain̄i eo an peptaij. Mennin letok in ej maron̄ im iiaļ n̄an an Jetōb Kwojarjar pād ippād āinwōt juon mōttad. Eļan̄n̄e jej ron̄jake im pokake Ainikien, ainikien edik, Enaaj dāpij kōj ilo iaļ in bujen eo jaar deļo̧n̄e ilo peptaij, kakkōl kōj jen kapo bwe jen etal jen e, rōjan̄ kōj n̄an ukweļo̧k im ukōte eļan̄n̄e emennin aikuj. Jibadbad eo ad ālkin peptaij ej n̄an dāpij wōt Jetōb Kwojarjar aolep iien ippād bwe jen wōnm̧aanļok im eddōkļōk ilo iaļen bujen in. Jetōb Kwojarjar eo ej pād ippād ilo wōt n̄e jej kōjparok mour ko ad im jab jerawiwi.

Kōn un in, Irooj eaar kōm̧m̧an juon iaļ n̄an ad wōnmaanļo̧k im kōkāāl erreo in peptaij eo ad jān bar juōn kain̄i—kwōjkwōj eo. Jej “kam̧ool n̄an Kwe, O Anij, Jemām Indeeo, bwe [kōmij] m̧ōņōņō in bōk [ioom̧] etan Nejūm̧”¹⁶ Innam, ilo ad kōttōpar n̄an bōk kōkaļļe in ānbwin Irooj im bōtōtōk in ilo peid—pilawe im dān—im bōk n̄an jetōb ko ad. N̄an ukōttok, Rilo̧mo̧o̧r eo ej kōm̧m̧ane karreo eo An ekabwilōn̄lōn̄ im ej karbab e kōj kōn im̧we eo an Jetōb Kwojarjar ippād. Menin ejjab kam̧o̧o̧ļ kōn tūriam̧o̧ eo eļap loe wōt ilo etan Jisōs Kraist ke? Āinwōt ad bōk Etan iood, Ej bōk jerawiwi im būrom̧ōj ko ad Ioon, im jekdoon an Pein “ej erļo̧k e wōt”¹⁷ n̄an kapooļe kōj ilo pein An iakwe.¹⁸

Kwōjkwōj eo ej kakeememej kōj aolep wiik ilo bōk iood etan Jisōs Kraist ej juōn kallim̧ur eo wōnm̧aanļo̧k im kōjparoke toon wot ad mour, ejjab iien rōt kaņ ej kōm̧m̧an wōt ilo iien peptaij eo am̧.¹⁹ Jemaron̄ wōnm̧aanļo̧k im kōman̄ijn̄ij “katok eo ekwojarjar, jān m̧aan jidik meļeļe, ej bōkļo̧k jerawiwi im bōk jetob eo an.”²⁰ Jidik wōt būlōn̄ kar ke jabdewōt iien ajri ro an Anij rej meļeļe kōn kajoor, kōjeraam̧m̧an ko an jetōb me remaron̄ itok jān bōk iood etan Kraist, en̄jake ko aer ej lem̧ōņōņō im ikdeleel eo aer ej n̄an deļo̧n̄ ilo juon bujen ippān Anij.²¹

Ilo ad ļoor iaļ in bujen eo kar kōpooj e ekwojarjar, kallim̧ur im kūjejeto ko ad n̄an bōk iood etan Jisōs Kraist enaaj letok n̄an kōj kajoor “in dāpij [Etan] in jeje iien otemjej ilo [būruōd].”²² Jenaj iakwe Anij im ro ruttūrud im en̄jake ikdeleel n̄an jerbal in karejar n̄an er. Jenaj kōjparok kien ko An im ikdeleel n̄an kepaaktok E ilo ad deļo̧n̄ e juon bujen Ippān. N̄e jej lo ad m̧ōjņo̧ im jab maron̄ n̄an jerbal e ikdeleel ko ad rewāppen, jenaaj akweļap kōn kajoor eo me ej itok wōt jān Etan, im Enaaj itok n̄an aikuj eo ad. Ilo ad niknik im kijenmej. raan eo enaaj itok n̄e jenaaj loe E im pād Ippān, im jenaaj loe ke jaar erom̧ āinwōt E, Āindein ej karbabe kōj n̄an jepļaakļo̧k im̧aan mejān Jemād.

Bwe kallim̧ur eo an Rilo̧mo̧o̧r ej m̧ool “tōmak ioon Etan Jisōs Kraist, im kabun̄jar n̄an Jemān ilo Etan, im niknik ilo tōmak ioon Etan n̄an jem̧ļo̧kin”²³ naaj lo̧mo̧o̧ran ilo aelōn̄ in kiin̄ an Anij. Ippemi, n̄aij m̧ōņōņō bwe jeram̧m̧an kein ejeļo̧k āinwōt repeļo̧k kōn bōk iood āt eo etan Jisōs Kraist, ilo Etan n̄aij kam̧o̧o̧l, amen.