Itok, Ron̄jake Ainikien juon Rikanaan

Jān Bisop Dean M. Davies

Rikakpilōklōk eo Kein Kajuon ilo Bisporik eo Eutiej

N̄e jenaaj kapene ilo mour ko ad n̄an kaminene ron̄jake im eoro̧n̄ ainikien rikanaan ro remour, jenaaj bōk kōjeraam̧m̧an ko an mour indeeo.

Kōnono kōn Būreejtōn eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata, Irooj ekar kwaļo̧k:

“Im bar juon alen, jerbal eo an President eo an opij eo an Priesthood eo Eutiej ej n̄an tōl ioon aolepān kabun̄ in, im n̄an āinwōt Moses—

“… Aaet, n̄an juon rilolo, juon rikkwaļo̧k revelesōn, juon riukok, im juon rikanaan, im kabwijer aolep mennin letok ko an Anij ko Ej likūt ioon bōran kabun̄ in”” (Katak im Bujen ko 107:91–92; eoon ko raorōk kar kobaiktok).

Eļap aō jeraam̧m̧an bwe ikar kam̧ool jet iaan menin letok ko an Anij ņa ioon Rikanaan ro An. Imaron̄ ke kwaļo̧k n̄an kom̧ juon en̄jake eo ekwojarjar? Ekkeijelļo̧k ilo kūr eo aō kiiō, ikar jipan̄ n̄an kwaļo̧k kajjien im leļo̧k ļōmņak kōn jikin ekkaļ tampeļ ilju im jekļaj. Ālkin Jetōm̧ba 11, 2001, diwōjļo̧k jān jikin ko an U.S ekar lukkun pen. Kōn menin, ekar bōk ruo ļo̧k n̄an jilu awa ko n̄an an elōn̄ membōr ro diwōjļo̧k jān Vancouver, Canada, bwe ren etal n̄an tampeļ eo ilo Seattle Washington. Būreejtōn Gordon B. Hinckley, Būreejtōn eo an Kabun̄ in ilo iien ņe, ekar kwaļo̧k ļōmņak in bwe juon tampeļ ilo Vancouver enaaj kōjeraam̧m̧an membōr ro an Kabun̄ in. Ekar mālim aer kappok jikin, im ālkin aer kar etali jet iaan jikin ko an Kabun̄ in, rekar bar etale jikin ko jet me ejjab an Kabun̄ in.

Rekar lo juon jikin eaibojooj me emālim an ekkaļ mōn jar ko ie iturin wōt Highway eo etan Trans-Canadian. Jikin eo epidodo tōpare, im kar obrak kōn wōjke pine in Canada, jikin eo em̧m̧an im epidodo loe me enaaj kōm̧m̧an bwe taujin armej ro rej eļļā jān jikin in ren loe.

Jekar kwaļo̧k jikin eo kōn pija ko im māp ko kajjojo allōn̄ ilo iien kweilo̧k ko an Jikin ko ilo Tampeļ eo im kweilo̧k an Kamitii. Būreejtōn Hinckley ekar kōmālim bwe kōm en likūti iumin contract im kadedeikļo̧k jerbal in etale ko raorōk. Ilo Tijem̧ba eo ilo iiō ņe, kōm kar ripootļo̧k n̄an kamiti eo bwe etale ko rededeļo̧k, im kar kōttar mālim eo n̄an jino wia. Ālkin an ron̄jake ripoot eo am, Būreejtōn Hinckley ekar ba, “Ij en̄jake ke ij aikuj lo jikin in.”

Tokālik ilo allōn̄ eo, ruo raan ālkin Kūriijmōj, kōm kar etal n̄an Vancouver ippān Būreejtōn Hinckley; Būreejtōn Thomas S. Monson; im Bill Williams, juon ri jin̄n̄a tampeļ. Kōm kar ioon Paul Christensen, stake būreejtōn eo jen ijeņ, eo me ekar bōkļo̧k kōm n̄an jikin eo. Ekar tutu jidik im ekōdodo̧ kōn mōlo raan eo, ak Būreejtōn Hinckley ekar kajju to jān wa eo im jino etetal ilo aolepān jikin eo.

Ālkin am kar joļo̧k iien ko am ilo jikin eo, ikar kajjitōk ippān Būreejtōn Hinckley eļan̄n̄e ekōņaan bar lo jet iaan jikin ko jet me kōm kar ļōmņak kaki. Ekar ba aaet, em̧ōņōņō. Kwoj loe wōt, bwe ilo am kar etali jikin ko jet, kōm kar maron̄ keidi em̧m̧an ko aer.

Kōm kar ettōr im alooje aolepān Vancouver im alooje jikin ko jet, āliktata kōm kar bar rool n̄an ijo jekar jino ie. Būreejtōn Hinckley ekar ba, “En̄in ej juon jikin eaibojooj.” Innem ekar kajjitōk, “Jemaron̄ ke etal n̄an mōn jar eo an Kabun̄ in emaron̄ juon-m̧ōttan emān maeļ (0.4 km) ettoļo̧kin?”

“Aaet, Būreejtōn,” kōm kar uwaake.

Kōm kar ro̧o̧l ļo̧k n̄an wa eo im bar ettōrļo̧k n̄an mōn jar eo epaaketata. Ke kōm ej tōpar ilo mōn jar eo, Būreejtōn Hinckley ekar ba, “Jeer tuanmiin̄ ijin.” Kōm kar jeer im ļoor iaļ eo ekar kwaļo̧k. Iaļ in ekar wanlōn̄ļo̧k jidik.

Ke wa eo ej tōpar jikin eo eutiej, Būreejtōn Hinckley ekar ba, “Bōjrak, Bōjrak.” Innem ekar jitōn̄ tuanmooņ in jikin eo im ekar ba, “Akko jikin in? En̄in ijo tampeļ eo ej aikuj ekkaļ ie. En̄in ijo Irooj ekōņaan bwe tampeļ eo en jutak ie. Kom̧ maron̄ ke wiaiki jikin in? Kom̧ maron̄ ke wiaiki jikin in?”

Kōm ejjan̄in kar etale jikin in. Ekar lukkuun ettoļo̧k im pād lik tata jān iaļ leplep eo, im ekar jab pād ilo laajrak in jikin ko rej wiakaki. Ke kōm ej uwaake kōm kar jaje, Būreejtōn Hinckley ekar jitōn̄ļo̧k jikin eo im bar ba, “En̄in ej ijo tampeļ eo ej aikuj ekkaļ ie. Kōm kar pād jejjo minit innem ro̧o̧l n̄an airport eo n̄an jepļaak n̄an kapijuknen.

Raan eo tok juon, kar kūr Būratōr Williams im n̄a n̄an opiij eo an Būreejtōn Hinckley. Em̧ōj an jin̄n̄aiki juon pepe ioon juon peba: iaļ ko, mōn jar eo, jeer anmiin̄ ijin, X kōkaļļein jikin tampeļ eo. Ekar kajjitōk ta alikkar eo ikkijeen jikin eo. Kōm kar ba n̄an e ke ekar kālete juon jikin eo elukkuun pen kōttōprake. An jilu armej: juon ri Canada, juon riIndia, im juon riChina! Im ekar jab juon jikin ekkaļ mōn jar ko.

“Ekwe, kōm̧m̧ane jon̄an wōt ami maron̄,” ekar ba.

Innem juon kabwilōn̄lōn̄ ekar waļo̧k. Ilowaan jejjo allōn̄ ko kōm kar bōke jikin eo, im tokālik jikin eo Langley, British Columbia, ekar kōmālim kōm n̄an kalōk tampeļ eo ie.

N̄an kejōkļo̧kijen kōn en̄jake in, ij ettā ilo aō kile bwe ke Būratōr William im n̄a kom̧ro kar bōk katak ko rekkar im iiō in kaminene ko ikkijeen wia jikin im ļōme tampeļ, Būreejtōn Hinckley ekar ejjeļo̧k an iminene ilo men in, ak ewōr ippān juon men eo eļapļo̧k—menin letok in kanaan im lolo. Ekar maron̄ lo ilo visōn ijo tampeļ eo ej aikuj jutak ie.

N̄e Irooj ej kakien Armej ro Rekwojarjar etto ilo epepen in n̄an kalōk juon tampeļ, Ekar ba:

“A kōtļo̧k bwe juon em̧ en ekkal n̄an Eta ekkar n̄an jon̄ok eo me I naaj kwaļo̧k n̄an er.

“Im eļan̄n̄e armej ro Aō reban kalōke ekkar n̄an jon̄ok eo me I naaj kwaļo̧k n̄an … , I ban bōke ilo peier” (Katak im Bujen Ko 115:14–15).

Āinwōt Armej ro Rekwojarjar etto, ej barāinwōt kōj rainin: Irooj ekar kwaļo̧k im wōnm̧aanļo̧k wōt im kwaļo̧k n̄an Būreejtōn eo an Kabun̄ in jon̄ak ko me aelōn̄ in kiin̄ eo an Anij ej ļoor e ilo raan kein. Im, ilo juon lābōļ an juon make, ekar letōk tōl n̄an wāween ad kajjojo aikuj tōl mour ko ad, bwe m̧wil ko ad rej kabun̄ buruōn Irooj.

Ilo Eprōļ 2013 ikar kōnono kōn kijejeto ko me rekitbuuj kōpopo im ejaak ko an pedped in aolep tampeļ n̄an etale bwe en maron̄ jelm̧ae ļan̄ im nana in mejatoto. Ak pedped eo ej kab jinoin tak. Juon tampeļ ej kobaik aolep kein ekkaļ ko, me rejejjet n̄an doon ekkar n̄an jon̄ak eo an em̧ōj ļōme. Eļan̄n̄e mour ko ad rej erom̧ tampeļ kōj kajjojo jej kajjieon̄ n̄an mour āinwōt an Irooj kar katakin, (lale 1 Korint 3:16–17), emaron̄ kar wōr unin ad kajjitōkin kōj make, “Ta kein jipan̄ ko n̄an kaļōk me jej aikuj in kajejjete bwe en kōm̧m̧an bwe mour ko ad ren aibojooj, kabwilōn̄lōn̄, im pen ņae lan̄ ko an laļ in?”

Jemaron̄ lo uwaak ko n̄an kajjitōk in ilo Bok in Mormon. Ikkijeen Bok in Mormon, Josep Smith ekar ba: “Iaar jiron̄ em̧m̧aan ro jeiū im jatū bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet.” (kadkad in Bok in Mormon). Ilo kadkadin Bok in Mormon, em̧ōj katakin kōj bwe “ro me em̧ōj aer bōk j[uon] kam̧ool ekwojarjar jān Jetōb Kwojarjar [bwe Bok in Mormon ej naan an Anij] jenaaj barāinwōt jeļā kōn ejja kajoor in wōt bwe Jisōs Kraist ej Rilo̧mo̧o̧r eo an laļ in, bwe Josep Smith ej An ribōk revelesōn im [rikanaan eo an Jepļaaktok eo], im bwe Kabun̄ eo an Jisōs Kraist im Armej ro Rekwojarjar ilo Raan ko Āliktata ej aelōn̄ in kiin̄ eo an Irooj bar juon alen kar ejaak ioon laļ in.”

Men kein rej jet iaan kein jipan̄ ko raorōk n̄an tōmak im naan in kam̧ool ko ad make.

1. Jisōs Kraist ej Rilo̧mo̧o̧r an Laļ in.

2. Bok in Mormon ej naan an Anij.

3. Kabun̄ eo an Jisōs Kraist im Armej ro Rekwojarjar ilo Raan–ko Āliktata ej aelōn̄ in kiin̄ eo an Anij ioon laļ in.

4. Josep Smith ej juon rikanaan, im ewōr juon ad rikanaan eo emour ilo laļ in rainin.

Ilo allōn̄ ko ļo̧k, ikar ron̄jake ekōnono ko ilo aolep iien kweilo̧k ko ko me Būreejtōn Nelson ekar kwaļo̧k jān ke ekar jinoin kūr āinwōt juon rijilōk. Ilo aō riiti ekōnono kein ekar ukōt mour eo aō. Ilo aō kar ekkatak im kōlmenļo̧kjeņ ium̧win 34 iiō kōn katak ko an Būreejtōn Nelson, ealikkar im ejjejet unin kōnono ko me rej itok jān katak ko an. Kajjojo unin kōnono kein n̄an men ko me renaaj kalōk kōj rekar waļo̧k ak ej bar juon kii n̄an kaļōk mour ko ad me rekwojarjar. Rekitbuuj tōmak ilo Jisōs Kraist, ukweļo̧k, peptaij n̄an jeorļo̧k jerawiwi, im menin letok eo an Jetōb Kwojarjar, lo̧mo̧o̧ren ro remej im jerbal in tampeļ, kōjparok im kōkwojarjar raan in Jabōt, jino kōn juon jerbal eo me kojeļā kake, dāpdep wōt ilo iaļan bujen eo. Būreejtōn Nelson ekar kōnono kōn aolepāer kōn iakwe im wūjlepļo̧k.

Ejm̧aan in dem̧an em̧ im pedped an Kabun̄ in im mour ko ad ej Jisōs Kraist. En̄in ej Kabun̄ eo An. Būreejtōn Nelson ej An rikanaan. Katak ko an Būreejtōn Nelson ej kam̧ool im kwaļo̧k n̄an ad bōk jeraam̧m̧an kōn mour im m̧wilin Jisōs Kraist. Ej kōnono ilo iakwe im an jeļā kōn lukkuun piktokin im mijen eo an Rilo̧mo̧o̧r. Em̧ōj an barāinwōt kwaļo̧k ilo makijkij im itok limo kōn naan in kam̧ool kōn kūr eo ekwojarjar an rikanaan ro remour—Būreejtōn eo an Kabun̄ in—ium̧win ro ekar jerbal ippāer.

Kiiō, rainin, ej ad eddo n̄an rejtake e āinwōt rikanaan eo emour an Irooj ioon laļ in. Jeminene ilo ad rejtake ritōl ro ilo Kabun̄ in kōn jon̄an eo ekwojarjar ilo ad kajutak peid n̄an kwaļo̧k ad m̧ōņōņō im rie. Jekar kōm̧m̧ane menin jejjo minit rem̧ootļo̧k. Ak m̧ool in rejtak eļapļo̧k an aorōk jān ad kajutak wōt peid. Ilo an waļo̧k ilo K&B 107:22 Būreejtōnji eo Kein Kajuon ej n̄an “rie er jān lōke, tōmak, im jar an kabun̄ in.” Jej itok n̄an ad lukkuun m̧ool in rejtake rikanaan eo emour ilo ad kōļapļo̧k jon̄ak in lōke ilo naan ko an, bōk tōmak n̄an mour ekkar n̄an naan ko, innem jar kōn kōjeraam̧m̧an ko an Irooj ņa ioon.

N̄e ij ļōmņak kōn Būreejtōn Russell M. Nelson, Ij bōk kaenōm̧m̧an ilo naan ko an Rilo̧mo̧o̧r ke Ekar ba, “Im eļan̄n̄e armej ro Aō renaaj eo̧ron̄ Ainikiō, im ainikien ro karejera ro im iaar jitōn̄ er n̄an tōl armej ro Aō, lo, em̧ool Ij ba n̄an kom̧, er rej jamin em̧m̧akūt jān ijo jikier” (Katak im Bujen ko 124:45).

Ron̄jake im eoro̧n̄ rikanaan ro remour enaaj m̧wilaļļo̧k an oktak mour ko ad. Jej kajoorļo̧k. Jej lukkuun jeļā im lōke ilo Irooj. Jej ron̄jake naan ko an Irooj. Jej en̄jake iakwe eo an Anij. Jenaaj jeļā kilen ad tōl mour ko ad kōn jibadbad.

Ij iakwe im rejtake Būreejtōn Russell M. Nelson im ro jet ro me em̧ōj kūr er āinwōt rikanaan ro, rilolo ro, im ribōk revelesōn. Ij kam̧ool bwe ewōr ippān menin letok ko Irooj em̧ōj an do̧o̧r ņa ioon bōran, im Ij kam̧ool bwe n̄e jenaaj ejaake ilo mour ko ad n̄an kaminene ron̄jake im eo̧ron̄ ainikien rikanaan ro remour, mour ko ad renaaj ekkaļ ekkar n̄an jon̄ak eo ekwojarjar an Irooj n̄an kōj, im jenaaj bōk kōjeraam̧m̧an ko an mour indeeo. Kūr in ej n̄an aolep. Itok, ron̄jake ainikien juon rikanaan; aeet, itok n̄an Kraist im mour. Ilo etan Jisōs Kraist, Amen.