Erom̧ juon Rilale Sip
Jān Bonnie H. Cordon
Būreejtōn eo Eutiej an Doulul eo an Jiron̄ ro
Ij kōjatdikdik bwe ro koj kōm̧m̧ane jerbal in karejar eo n̄an er renaaj loe eok āinwōt juon mōttan im jeļā bwe, ilo kwe, ewōr m̧ōkade im lōke.
Juon iiō emootļo̧k, juon ajri Būraimere ekar bōktok ettōndikdik n̄an iturin meja. “Io̧kwe,” ekar ba, “N̄a David. Komaron̄ ke kōnnaan kake n̄a ilo iien kweiļo̧k eo eļap.
Ilo iien ikōn̄, ikar kejōkļo̧kjeņ kake io̧kio̧kwe eo an David ikar jab kōtmāne. Aolepād jekōņaan bwe ren kile kōj. Jekōņaan bwe en wōr tokjād, n̄an keememej, im n̄an en̄jake io̧kwe.
Ro jeiū im jatū, kajjojo iaami ewōr tokjemi. Men̄e rejjab kōnnaan kake eok ilo kweilo̧k ko reļļap, Rilo̧mo̧o̧r ej ejela eok im ej iakwe eok. Eļan̄n̄e kwoj awoļ eļan̄n̄e men in ej m̧ool, kwoj aikuj ļōmņak bwe Ear jeje [etam̧] ioon lo̧piden pā ko [Pein].”1
Ilo ad jeļā bwe Rilo̧mo̧o̧r ej io̧kwe kōj, jemaron̄ lōmnak, elmen ad kwaļo̧k io̧kwe eo ad n̄an E?
Rilo̧mo̧o̧r ekar kajjitōk ippān Piter, “Kwōj yokwe eō ke … ?”
Piter ekar uwaak, “Aaet, Irooj; kwōjeļā bwe Ij iakwe eok. Ekar ba n̄an e, Naajdik ļam̧ ko aō.”
Ke ej kajjitōk kajjitōk in kein karuo im kajilu, “Kwōj yokwe eō ke?” Piter, ekar būrom̧ōj bwe rekar bar kajjitōkini, ekar uwaak, “Aaet, Irooj kwōjeļā men otemjej; kwōjeļā bwe ij io̧kwe eok. Jisōs ekar ba n̄ane, Naajdrik sip ko aō.”2
Āinwōt ke emōj an kar Piter kam̧ool n̄ane make ke ej juon rikaļoor an Kraist? Jān jinoin aer ioone doon ilo kar barijet, ekar “kaju” etal jān kein en̄ōd ko an n̄an ļoor Rilo̧mo̧o̧r eo.3 Piter ekar erom̧ juon rieo̧n̄ōd eo em̧ool an armej. Ekar kōrwaane Rilo̧mo̧o̧r eo ilo iien jerbal in karejar ko an im jipan̄ katakin ro jet kōn gospel eo an Jisōs Kraist.
Ak kiiō Irooj eo emōj an jerkakpeje eo Ekar jeļā bwe eban pād itūrin Piter kar kwaļo̧k n̄ane wāween im nāāt n̄an jerbal. Ilo an jako Rilo̧mo̧o̧r, Piter enaaj aikuj bōk jipan̄ jān Jetōb Kwojarjar, bōk revelesōn ko ippān make, innem ej aikuj lōn peran im tōmak n̄an jerbal. Ļōmņak wōt ioon sip ko An, Rilo̧mo̧o̧r eo ekar aikuji Piter n̄an kōm̧m̧ane ta eo enaaj kar kōm̧m̧ane eļan̄n̄e En kar pād ijin. Ej kajjitōk ippān Piter bwe en erom̧ juon rilale sip.
Eprōļ eo ļo̧k, Būreejtōn Russell M. Nelson ekar barāinwōt karuwainene kōj n̄an naajdik sip ko an Jemedwōj Ilan̄ ilo wāween ko rekwojarjar im n̄an kōm̧m̧ane men in ilo jerbal in karejar.4
N̄an lukkuun bōk karuwainene in, jej aikuj ejaake juon bōro būruon rilale sip im meļeļe kōn aikuj ko an ļam̧ ko an Irooj. Kio elmen ad erom̧ rilale sip ro me Irooj eaikuj bwe jen erom̧?
Kōn aolepān kajjitōk kein, jej aikuj reiļo̧k n̄an ad Rilo̧mo̧o̧r, Jisōs Kraist— Rilale sip eo Em̧m̧an Tata. Sip ko an Rilo̧mo̧o̧r ekar jeļā kajeer im jeļa oraer; kar lale im kar aiintok doon ilo worwor an Anij.
Jeļā kajeer im Oraer.
Ilo ad kakkōt n̄an ļoor waanjon̄ak eo an Rilo̧mo̧o̧r eo jej aikuj mokta jeļa im bwini ro sip ko An. Em̧ōj jitōn̄ kajjojo iaad n̄an jerbal ippān kajjojo armej im baam̧le ko bwe jān jeļā aolep ro ilo bwijin Irooj rej lale im ejjeļo̧k juon jej meļo̧kļo̧ke. Bōnbōn ko, ijoke, ejjab lukkuun kōn bōnbōn ko; ej n̄an kajjieon bwe kajojo armej ren en̄jake io̧kwe eo an Rilo̧mo̧o̧r kōn juon eo ej jerbal n̄an E. Kōn wāween in, aolep remaron̄ kile bwe Jemed ilo Ilan ejeļā wōn kōj.
Raan ko ļo̧k ikar ioone e juon jiron̄ eo ekar bōk ijjitōn̄ n̄an jerbal in karejar n̄an juon sister eo me erūttoļo̧k ekar ļalem alen iiō eo an. Ippān doon, rekar jeļā bwe em̧m̧an ippāero kōjan̄jan̄. N̄e jiron̄ eo ej loļo̧k, erro ej al kōn al ko ippān doon, im rej kwaļo̧k n̄an doon al ko em̧m̧an ippāer. Rej ejaake juon mōttā eo enaaj kōjeraam̧m̧an mour ko aer.
Ij kōjatdikdik bwe ro koj kōm̧m̧ane jerbal in karejar eo n̄an er renaaj loe eok āinwōt juon mōttan im jeļā bwe, ilo kwe, ewōr juon m̧ōkade im lōke— juon eo ejeļā kōn ta ko rej waļo̧k ilo mour ko aer im rie kōjatdikdik im ikdeelel ko aer.
Raan ko ļo̧k ikar bōk juon ijjitōn n̄an jerbal in karejar n̄an juon sister eo mōtta im ikar jab jeļā kajieen. Ke ikar ko̧o̧njeļ ippān Jess, jerbal in karejar eo mōtta jonoūl jilijino an iiō, ekar ļōmņak, “Kojro ej aikuj jeļā kajeen.”
Kōm̧ro kar kaju kālet bwe juon pijaam̧ro im kwaļo̧k kajeemro ilo jeje ej m̧oktata. Ikar jibwe taļboon eo, im Jess ekar jibed batin eo n̄an pija. Kar jerbal in karejar eo am̧ro m̧oktata ej jerbal ippān doon.
Ilo kar loļo̧k eo am̧ro jinoin tata, kōm̧ro kar kajjitōk ippān sister in eļan̄n̄e ewōr jabdewōt ekōņaan bwe kōm̧ro en likūt ilo jar ko am̧. Ekar kwaļo̧k juon an bwebwenato em̧m̧an im ba ej lukkun karuwaineneik jar eo am̧ro. Mool im kijenmej eo an ekar bōktok juon io̧kwe. Ej juon iien em̧m̧an n̄an kakeememej e ilo jar ko aō aolep raan.
Ilo am̧ jar, konaaj en̄jake io̧kwe eo an Jisōs Kraist n̄an ro kwoj jerbal in karejar n̄an er. Kwaļo̧k io̧kwe in n̄an er. Ta eo em̧m̧anļo̧k ilo wāween am̧ naajdik sip ko An jān am̧ jipan̄ er en̄jake io̧kwe eo An—kōn kwe?
Oņaake
Eo kein karuo n̄an ejaake būruwōn juon rilale sip eo ej n̄an oņaake sip ko An. Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata, jemarōn emmakūt, kōm̧m̧ane, m̧adm̧ōd, im bar kalek aolep men. Jej m̧ōkaj ilo ad kajjieon̄ lale aikuj ko kōn pā in jipan̄ ko ak juon pileej in kukiij. Ak elōn̄ ke bar jabdewōt?
Sip ko rejeļā ke jej oņaake er kōn io̧kwe im jenaaj em̧m̧akūt n̄an jipan̄?
Ilo Matu 25 jej riit:
“Itok, kom̧ rimōņōņō an Jema, jolōt aelōn̄ eo ear pojak n̄an kom̧ … :
“Bwe I ar kwole im kom̧ ar naajdik Eō: I ar maro, im kom ar kaidaak Eō: I ar ruwamāejet, im kom̧ ar kadeļo̧n̄ Eō:
Innām ro rem̧m̧an renaaj uwaak E im ba, “Irooj, n̄āāt ko̧m ar lo Am̧ kwōle, im naajdik Eok? Ak maro im kaidaak Eok?
“Nāāt kōm̧ ar lo Am ruwamāejet, im kadeļo̧n̄ Eok?”5
Ro jeiu im jatu, naan eo aorōk ej lo Ro rekwojarjar rekar loe ro rej aikuj kōnke rej lukkuun lale im lo. Kōj jemaron̄ bar mejmej karuo n̄an jipan̄ im kaenōm̧m̧an, n̄an kōļo̧k im barāinwōt etōņak. Ilo ad jerbaļ, jemaron̄ jiron̄ kōn kallim̧ur eo ilo Matu: “Emool ilo ami kōm̧anm̧an jabdewōt n̄an juon iaan rein … , kom̧ ar kōm̧anm̧ane n̄an Eō.”6
Juon mōttā—jenaaj kūr etan Jon—kar kwaļo̧k eļan̄n̄e jenaaj loe an juon aikuj ilo ad jab lukkuun lale: “Juon sister ilo ward eo am ekar kajjieon̄ m̧ane make. Ālikin ruo allōn̄, ikar loe bwe ejjeļo̧k ilo doulul eo aō ekar etal ippān loe ippān n̄an kwaļo̧k en̄jake in ewaļo̧k. Būrom̧ōj, ikar jab bar kōm̧m̧ane jabdewōt. Āliktata, ikar kajjitōk ippān ļeo pāleen n̄an juon m̧ōn̄ā in rālep. Juon em̧m̧aan eo ejjeļo̧k an naan, ekkā an jememe. Ak ke ikar ba, “Lio pāleem ekar kajjieon̄ m̧ane e make. Āinwōt ej juon inepata n̄an eok. Kwōj kōņaan ke kōnnaan kake?’ ekar kwaļo̧k an jan̄. Ekar juon bwebwenato eo epen im bwil im kar kalek juon kepaak im lōke ilo jejjo minit ko.”
Jon ekar kakobaba, “Ij lōmņak jerbal eo ad ej n̄an bōkļo̧k brownies ko ijjelļo̧kin pukōte ewi wāween n̄an etetalļo̧k kōn m̧ool im io̧kwe.”7
Sip ko ad remaron̄ metak, jabwābwe, ak emaron̄ jako; āinwōt aer rilale sip, jej aikuj jet ro jinoin tata jej loe aikuj ko aer. Jej rōnjake im io̧kwe ilo ejjeļo̧k ekajet im leļo̧k kōjatdikdik im jipan̄ er kile unoojdikdik ko an Jetōb Kwojarjar eo.
Ro jeiū im jatū, laļ ej ļapļo̧k an kōjatdikdik im lan̄lōn kōn jerbal ko jej kōm̧m̧ani. Ilo am pukōt tōl eo an Irooj n̄an elmen leļo̧k io̧kwe eo An im lale aikuj ko an ro kwoj jerbal in karejar n̄an er, mej ko mejām renaaj peļļo̧k. Jerbal in karejar eo am ekwojarjar ej lewaj n̄an eok juon ikdeleel eo eaorōk. Kwomaron̄ pukote ikdeelel kōn lōke.
Aiintok doon n̄an wōrwōr eo an Anij.
Jilu, jekōņaan bwe ļaam̧ ko ad ren aiintok doon ilowaan wōrwōr eo an Anij. N̄an kōm̧m̧ane men in, jej aikuj jeļā ia eo rej pād ie ilo iaļ in kallim̧ur ro im n̄an maron̄ etetal ippāer ilo ial eo aer n̄an tōmak. Ej juon iien em̧m̧an n̄an itok n̄an jeļā būrueer im leļo̧k n̄an Rilo̧mo̧o̧r eo.
Sister Josivini ilo Fiji ekar pen an ļoļo̧k m̧aan ilo iaļ in bujen eo—ilo m̧ool. Eo mōttan ekar loe bwe Josivini ekar pen an loe jeje ko rekwojarjar n̄an an maron̄ riit. Ekar jipan̄ Josivini kōn mej in riit ko im juon pinjeļ iaļo n̄an m̧aak aolep iien rej ba etan Jisōs Kraist ilo Bok in Mormon. Jekar jinoe juon ikdeleel epidodo n̄an jerbal in karejar im n̄an jipan̄ kōn katak jān jeje ko rekwojarjar ekar kōm̧m̧an bwe Josivini en etal n̄an tampeļ ej kab juon alen 28 iiō tokālik ālikin an peptaij.
Men̄e sip ko ad rej kajoor ak m̧ōjņo̧, m̧ōņōņō ak būrom̧ōj, jej aikuj lale bwe en ejjeļo̧k ej etetal make iaan. Jej aikuj io̧kwe er jekdoon ia ko repād ie ilo mour in jetōb im juraake im rōjan̄ er ilo bun̄tōn eo tokālik. Ilo ad jar im kappukot n̄an meļeļe kōn būrueer, ij kam̧ool bwe Jemedwōj Ilan̄ enaaj tōl kōj im Jetōb eo An enaaj itok ippād tok. Enaaj juon iien em̧m̧an n̄an “enjel ro Aō [peļaakimi]” ilo An etal im̧aan mejāer.8
Irooj ej karuwainene kōj n̄an naajdik sip ko An, emakūtkūt ippen ro bujin āinwōt an nej kōm̧m̧ane. Ej karwainene kōj n̄an rilale sip ro ilo aolep laļ im aelōn̄. (Im aet, Elder Uchtdorf, jej iakwe im aikuj rilale sip ro jān Jāmne. Im Ej reilo̧k n̄an ro rem̧m̧an ded n̄an kobatok ilo jerbal in.
Jodikdik ro remaron̄ erom̧ jet iaan rilale sip ro rekajoor. Er ro, āinwōt an Būreejtōn Russell M. Nelson kar ba, “jet iaan ro rem̧m̧an tata Irooj ekar jilkintok n̄an laļ in.” Rej “jetōb ko raorōk,” ad “Rikurre ro rem̧m̧an tata: ro rej ļoor Rilo̧mo̧o̧r eo.9 Baj mōk pijaik ļo̧k jon̄an kajoor an rilale sip ro renaaj bōktok n̄e renaaj lale sip ko An? Jerbal in karejar ej atartar ippen jodikdik rein, jej loe kabwilōn̄lōn̄ ko.
Jiron̄ ro im Likao ro, jej aikuji kom̧! Ne ejjeļo̧k am̧ jerbal in karejar, kōnnaan ippān Doulul eo an Kōrā ro ak būreejtōn eo an doulul an em̧m̧aan ro. Renaaj m̧ōņōņō kōn am̧ maron̄ kōm̧m̧an bwe sip ko An ren jeļā kajeen im bōnbōn, oņaake, im aiintok er n̄an wōrwōr eo an Anij.
N̄e iien eo enaaj itok n̄an bukwelōlō ilo neen Rilo̧mo̧o̧r ejitōnboro, ilo ad naajdik sip ko An, ij jar bwe jān uwaak āinwōt Piter: “Aaet, Irooj; kwōjeļā bwe Ij io̧kwe eok.10 Rein, Am̧ sip, rej io̧kwe, er rej jokne, im er rej pād kapijuknen. Ilo etan Jisōs Kraist, amen.