Jerbal eo an Bok in Mormon ilo Oktak
Jān Elder Shayne M. Bowen
Jān Jiljilimjounn̄oul eo
Jej aiintok Israel bar juon alen im kōm̧m̧ane kōn Bok in Mormon, kein jerbal eo ekajoortata kōn oktak.
Rainin, elōn̄ rej kōļmenļo̧kjeņ n̄e ewōr Anij im kadkad eo ad n̄an E. Elōn̄ jidik wōt aer jeļā ak ejjeļo̧k kōn karōk in m̧ōņōņō eo An eļap. Elōn̄ļo̧k jān 30 iiō ko, Būreejtōn Ezra Taft Benson eaar lo bwe “elōn̄ wōt ilo … laļ in rainin rej kōjekdo̧o̧n kwojarjar eo an Rilo̧mo̧o̧r. Rej kajjitōkin lo̧tal eo An, mour eo An eweppān, im m̧ool in jerkakpej eo An eaiboojoj.”1
Raan kein ad, kajjitōk ko rejjab kōn wōt ad Rilo̧mo̧o̧r ak barāinwōt kōn Kabun̄ in An—Kabun̄ eo an Jisōs Kraist im Armej ro Rekwojarjar ilo Raan-ko Āliktata—eo Ekar kōjepļaaktok kōn Rikanaan Josep Smith. Kajjitōk kein ekkā wōt kōn bwebwenato, katak ko, ak imminene ko an kabun̄ eo an Rilo̧mo̧o̧r.
Bok in Mormon Ej Jipan̄ Kōj Eddōkļo̧k kōn Naan in Kam̧ool
Ilo Preach My Gospel, jej riit: “keememej bwe ad meļeļe [kōn Jemedwōj Ilan̄ im karōk in m̧ōņōņō eo An] ej itok jān rikanaan ro raan kein—Josep Smith eo ro rej bōk jikier—ro raar kajju ebbōk revelesōn jān Anij. Kōn menin, kajjitōk eo jinointata ro jet remaron̄ uwaake ej n̄e Josep Smith ekar juon rikanaan, im emaron̄ uwaake kajjitōk kōn riit im jar kōn Bok in Mormon.”2
Aō naan in kam̧ool kōn kūr eo ekwojarjar an Rikanaan Josep Smith kar kajoorļo̧k jān ekkatak Bok in Mormon: Bar juon Kallim̧ur in Jisōs Kraist. Ikar kōm̧m̧an ekkar n̄an kajjitōk eo an Moronai “kajjitōk ippān Anij, ilo etan Kraist,” n̄an jeļā kōn m̧ool eo an Bok in Mormon.3 Ij kwaļo̧k kam̧ool bwe ijeļā ke ej m̧ool. Jeļāļo̧kjeņ ekar itok, āinwōt emaron̄ iwōj n̄an eok, “kōn kajoor eo an Jetōb Kwojarjar.”4
Kadkadin Bok in Mormon ej kwaļo̧k: “Ro rej bōk kam̧ool in ekwojarjar [kōn Bok in Mormon] jān Jetōb Kwōjarjar renaaj barāinwōt jeļā ejja jān kajoor in wōt bwe Jisōs Kraist ej Rilo̧mo̧o̧r an laļ in, bwe Josep Smith ej rikkwaļo̧k revelesōn im rikanaan ilo raan kein āliktata, im bwe Kabun̄ eo an Jisōs Kraist im Armej ro Rekwōjarjar ilo Raan ko Āliktata ej aelōn̄ eo an Irooj bar kajutake ioon laļ, m̧aanjāppopo n̄an Itok eo Kein Karuo an Messaia eo.”5
Āinwōt juon mijenede ekar etal n̄an Chile, iaar ekkatak juon katak ej ukōt mour ekajoor kōn kajoor in oktak eo kōn Bok in Mormon. Mr. Gonzalez eaar jerbale kūr eutiej ilo Kabun̄ in elōn̄ iiō. Eaar juon eo ewōr an imminene kōn kabun̄, ekoba juon degree in theology. Eaar utiej kōn jeļā eo an kōn baibōļ. N̄an kōm em̧ool eaar juon eo etijōm̧ļo̧k ilo kabun̄.
Eaar jeļā kōn mijenede ro ilo Kabun̄ eo an Jisōs Kraist im Raan-ko Āliktata ke raar ilo̧k n̄an kōm̧m̧ane jerbal eo aer ilo jukjukinpād eo an ilo Lima, Peru. Eaar aolep iien kōņaan ioon er bwe en maron̄ katakin er kōn Baibōļ.
Juon raan, enan̄in āinwōt juon menin letok jān lan̄, kōn menin eaar kōļmenļo̧kjeņ, ruo mijenede ro raar kabōjrak e ilo iaļ eo im kar kajjitōk ippān eļan̄n̄e remaron̄ in etal n̄an m̧weeo im̧ōn im kwaļo̧k jān jeje ko rekwojarjar ippān. Ettōņak in an eaar m̧ool! Jar ko an raar uwaak. Āliktata, ekar maron̄ tin tōl piloik ļaddik rein. Eaar jiron̄ļo̧k er ke enaaj lukkuun in m̧ōņōņō bwe ren itok n̄an m̧weeo im̧ōn im kōnono kōn jeje ko rekwojarjar.
Eaar jab kōņaan kōttar n̄an iien eo an. Eaar pojak n̄an kōjerbal Baibōļ n̄an kariab tōmak ko aer. Eaar kōtmene bwe Baibōļ eo enaaj kar kalikkar im kōmeļeļeik bōd ko aer. Iien eo eaar itok, im mijenede ro raar kaļļaļļaļ ilo kōjem e an. Ekar mōņōņō. Iien eo an eaar itok.
Eaar kōpeļļo̧k kōjem eo im kar karuwaineneik mijenede ro n̄an m̧weeo m̧ōņ. Juon iaan mijenede ro eaar leļo̧k juon bok būļu im kar kwaļo̧k naan in kam̧ool eaar jeļā bwe bok eo epād ie naan in Anij. Mijenede eo juon eaar kobaik naan in kam̧ool eo an ekajoor kōn bok eo, kam̧ool bwe ekar ukook jān juon rikanaan an Anij raan kein etan Josep Smith im kar katakin kōn Kraist. Mijenede ro raar joļo̧k aer make bōd im ilo̧k.
Mr. Gonzalez eaar lukkuun kōrraat. Ak eaar kōpeļļo̧k bok eo im kar jino ālōklōki peij ko. Eaar riit peij eo jinoin. Eaar riiti peij im bar peij im bar peij im kar jab bōjrak m̧ae rālepān raan eo juon. Eaar riiti aolepān bok eo im kar jeļā bwe em̧ool. Eaar jeļā ta eo enej kōm̧m̧ane. Eaar kūrļo̧k mijenede, bōk katak ko, im kar letok mour eo an bwe en erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Em̧m̧aan in em̧m̧an eaar aō MTC rūkaki ilo Provo, Utah. Bwebwenato in oktak eo an Būratōr Gonzalez im kōn kajoor eo an Bok in Mormon eaar kwaļo̧k juon oktak eļap n̄an n̄a.
Ke iaar tōkeak ļo̧k ilo Chile, mijen būreejtōn eo aō, Būreejtōn Royden J. Glade, kar karuwaineneik kōm n̄an riiti naan in kam̧ool eo an Rikanaan Josep Smith eo kar je ilo Josep Smith—Bwebwenato kajjojo wiik. Ekar katakin kōm̧ bwe juon naan in kam̧ool kōn Visōn eo Jinoin enaaj tōl naan in kam̧ool eo ad make kōn gospel eo im kōn Bok in Mormon eo.
Iaar m̧ool in eo̧ron̄ kajjitōk in an. Iaar riiti bwebwenato ko kōn Visōn eo Jinoin; Iaar riiti Bok in Mormon. Iaar jar āinwōt an Moronai kean̄ im kajjitōk “Anij, eo Jemed Indeeo, ilo etan Kraist”6 eļan̄n̄e Bok in Mormon ej m̧ool. Ij kwaļo̧k kam̧ool rainin bwe ijeļā Bok in Mormon, āinwōt an Rikanaan Josep Smith kar ba, ej, “bok eo ejim̧we tata iaan bok ko ioon laļ in, im pedped eo ad ilo Kabun̄ eo, im juon armej emaron̄ epaakeļo̧k n̄an Anij jān to an pād kōn kien m̧akūtkūt ko e, jen jabdewōt bok ko jet.”7 Rikanaan Josep eaar bar kwaļo̧k: “Bōk Bok in Mormon im revelesōn ko, im ewi kabun̄ in ad? Ejjeļo̧k ad.”8
Oktak an Juon Armej Make
Ilo ad meļeļe ļo̧k wōn kōj im jibadbad ko an Bok in Mormon, ad oktak em̧wilaļļo̧k im ej penļo̧k. Jej kajoorļo̧k ilo ad kōjparok bujen ko jaar kōm̧m̧ani ippān Anij.
Juon jibadbad an Bok in Mormon ej n̄an aiintok ejjeplōklōk eo an Israel. Aiintok in ej leļo̧k n̄an aolep ajri ro nejin Anij iien em̧m̧an n̄an deļo̧n̄e juon iaļen bujen im, n̄an kōjparok bujen kein, naaj jepļaakļo̧k n̄an im̧aan mejān Jemed. Ilo ad kwaļo̧k ukwelo̧k im peptaiji rioktak ro, jej aiintok ejjeplōklōk eo an Israel.
Bok in Mormon ewōr ie 108 eoon ko kōn m̧ōn Israel. Ilo Jinoin Bok in Mormon, Nipai eaar kwaļo̧k, “Bwe unleplep in kōttōpar in aō ej n̄an karreel armej n̄an itok n̄an Anij an Ebream, im Anij an Aisak, im Anij an Jekab, im mour.”9 Anij an Ebream, Aisak, im Jekab ej Jisōs Kraist, Anij eo an Kallim̧ur Mokta. Jej bōk lo̧mo̧o̧r ilo ad itok n̄an Kraist n̄an mour kake gospel eo An.
Tokālik, Nipai eaar je:
“Aaet, em̧ool jema eaar kōnono eļap kōn riAelōn̄ ko, im kōn m̧weo im̧ōn Israel, bwe naaj aikuj keidi er āinwōt juon wōjke olive, ko ra ko raan naaj bwilo̧k im naaj ejjeplōklōk ioon aolep mejān laļ. …
“Im ālikin m̧weo im̧ōn Israel naaj ejjeplōklōk renaaj bar koba ippān doon; ak, ilo jet naan, ālikin riAelōn̄ ko raar bōk tarlep in gospel eo, ra ko lukkuun raan wōjke olive eo, ak bwe ko an m̧weo im̧ōn Israel, naaj graft er, ak itok n̄an jeļā kōn Messaia eo em̧ool; aer Irooj im aer Ripinmuur.”10
Ejjeļo̧k oktak, ilo jem̧ļo̧kin Bok in Mormon, rikanaan Moronai eaar kakeememej kōj kōn bujen ko ad, eaar ba, “Bwe kwōn maron̄ jab bar pok, bwe bujen ko an Jemān Indeeo ko Eaar kōm̧m̧ani n̄an kom̧, O m̧weo imōn Israel, rej kūrm̧ool.”11
Bujen ko an Jemān Indeeo
Ta “bujen ko an Jemān Indeeo” kwaļo̧k jen Moronai? Jej riit ilo Bok in Ebream:
“Eta ej Jeova, im Ij jeļā jem̧ļo̧kin eo jān jinoin; kōn menin Peiū enaaj pād ioom.
“Im Inaaj kōm̧m̧ane jān eok juon laļ eļap, im I naaj kōjeraam̧m̧an eok eļap jān jon̄an, im kōm̧m̧an bwe etam̧ en ļap ilubwiljin aolep laļ, im kwo naaj juon kōjeraam̧m̧an n̄an ineem ālikūm, bwe ilo peier renaaj kotak jerbal in im Priesthood in n̄an aolep laļ.”12
Būreejtōn Russell M. Nelson eaar kwaļo̧k ilo juon kweilo̧k kadiwōjļo̧k ilo mejatoto an peļaakin laļ in jet iien rem̧ootļo̧k bwe “en̄in rej raan ko āliktata, im bwe Irooj ej kōm̧ōkajļo̧k jerbal in An n̄an Aiin Israel. Aiin in ej men eo eļap an aorōk n̄an bōk jikin ilo laļ in rainin. Ejjeļo̧k men maron̄ keidi kake, ejjeļo̧k men eaorōk keidi kake, ejjeļo̧k bar jabdwōt men eaorōkļo̧k jene. Im eļan̄n̄e kwoj kālet kake, eļan̄n̄e kwoj kōņaan, kwomaron̄ in juon eo eļap kūņaan ie. Kwomaron̄ in juon eo eļap kūņaan n̄an juon men eļap, men eo n̄an bōke, men eo ekwabwilōn̄lōn̄!
“N̄e jej kōnono kōn aiintok, jej mour kake pedped in em̧ool: kajjojo ro nejin Jemedwōj Ilan̄, jim̧or ilo ron̄ōļ nuknuk eo juon, maron̄ in ron̄ ennaan eo an gospel eo an Jisōs Kraist em̧ōj an kar jepeļaaktok. Rej kālet n̄an er make eļan̄n̄e rej kōņaan jeļā eļapļo̧k.”13
En̄in ta eo jej kōm̧m̧ane āinwōt membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata: jej kappukot n̄an bōktok n̄an laļ in n̄an juon meļeļe kōn—im juon oktak— gospel eo an Jisōs Kraist. Jej “riaiin ro ilo raan ko āliktata.”14 Mijen eo ad ealikkar. Ro jeiū im jatū, jen ro jeļā kajjieer āinwōt ro raar bōk kallim̧ur eo an Moronai n̄an bōro, kar jar im kar bōk juon uwaak n̄an jeļā bwe Bok in Mormon ej m̧ool, innām kwaļo̧k jeļā in n̄an ro jet ilo naan im, men eo eaorōktata, ilo jerbal.
Jerbal eo an Bok in Mormon ilo Oktak
Bok in Mormon epād ie tarllep in ko̧jpeļ eo an Jisōs Kraist.15 Ej tōl ļo̧k kōj n̄an bujen ko n̄an Jemed, eo eļan̄n̄e kōjparoke enaaj letok n̄an kōj menin letok ko An reļaptata—an mour indeeo.16 Bok in Mormon ej kii in jabōn em̧ n̄an oktak eo an aolep likao im jiron̄ ro nejin Jemedwōj Ilan̄.
Bar kout jān Būreejtōn Nelson: “Ilo am̧ … riit kajjojo iien jān Bok in Mormon, kwonaaj jeļā katak eo kōn aiin, m̧ool ko kōn Jisōs Kraist, Pinmuur eo An, im tarlep in gospel eo An ejjab waļo̧k ilo Baibōļ eo. Bok in Mormon ej io̧lepen n̄an aiin Israel. Ilo m̧ool, eļan̄n̄e ekar ejjeļo̧k Bok in Mormon, kallim̧ur eo kar n̄an aiin im̧ōn Israel eban kar waļo̧k.”17
In kōjem̧ļo̧ke kōn naan ko an Rilo̧mo̧o̧r ke Eaar katakin Rinipai ro kōn kōjeraam̧m̧an in kallim̧ur ko: “Lo kom̧ij ro nejin rikanaan ro; im kom̧ij jān m̧weo im̧ōn Israel; im kom̧ij jān bujen eo Jema eaar kōm̧m̧ane ippān ro jemāmi, im ba n̄an Ebream: Im ilo ineem naaj aolep nukwin ko ilaļ renaaj jeraam̧m̧an.”18
Ij kam̧ool bwe jej likao im jiron̄ ro nejin Anij, ro ineen Ebream, jān im̧ōn Israel. Jej aiintok Israel bar juon alen im jej kōm̧m̧an āindein kōn Bok in Mormon—juon bok me, ekar koba ippān Jetōb in Irooj, ej kein jerbal eo ekajoor kōn oktak. Jej tōl jen juon rikanaan an Anij, Būreejtōn Russell M. Nelson, eo ej tōl aiin Israel ilo tōre in ad. Bok in Mormon ej m̧ool. Ekar ukōt mour eo aō. Ij kallim̧uri kom̧, āinwōt kar Moronai im elōn̄ rikanaan ro ilo elōn̄ tōre ko, ke emaron̄ ukōt eok.19 Ilo etan Jisōs Kraist, amen.