An Sister ro Bōk Koņaer ilo Aiintok Israel
Jān Būreejtōn Russell M. Nelson
Ij lewaj juon kajjitōk in kanaan n̄an kom̧, kōrā ro an Kabun̄ in, n̄an kōkōm̧anm̧anļo̧k ilju im jekļaj ilo jipan̄ aiintok Israel jān ejeplōklōk.
Elukkuun aiboojoj bwe imaron̄ pād ippemi, kōrā ro jeiū im jatū rejitōn bōro im aiboojoj. Bōlen juon aō en̄jake kab en̄jake enaaj lewaj n̄an kom̧ juon mejān iruj kōn ewi jon̄an aō en̄jake kōn kom̧ im maron̄ ko reļļap kom̧ kar būki ioomi.
Juon raan ke ij kōnono n̄an juon jarlepju ilo jikin ko iturōk in Amedka, ekar jino ļapļo̧k aō ikdeleel kōn unin kōnono eo aō, im ilo juon iien eaorōk, ikar ba, “Āinwōt m̧am̧a an 10 ajri ro, imaron̄ ba n̄an eok bwe …” Innām ikar wōnm̧aanļo̧k wōt im kam̧ōj ennaan eo aō.
Ikar jab jeļā bwe ikar ba naan eo m̧am̧a. Rukook eo aō, ekar ļōmņak ekar bōd aō kōnono, ukōte naan eo m̧am̧a n̄an baba, kōn menin jarlepju ro rekar jab jeļā bwe ikar kōnono n̄an n̄a make āinwōt m̧am̧a. Ak kōrā eo pāleeō Wendy ekar ron̄, im ekar m̧ōņōņō kōn jirilo̧k eo aō.
Ilo iien in, jan̄uwaade eo em̧wilaļ ilo būruwō n̄an kōm̧m̧ane juon oktak ilo laļ in—āinwōt juon m̧am̧a wōt ej maron̄ kōm̧m̧ane—ekar waļo̧ktok jān būruwō. Ium̧win elōn̄ iiō ko, jabdewōt iien armej ej kajjitōk ippa etke ikar kālet n̄an erom̧ juon taktō, uwaak eo aō ekar aolep iien jab oktak: “Kōnke ikar jab maron̄ kālet n̄an erom̧ juon m̧am̧a.”
Jouj im je bwe jabdewōt iien ij kōjerbal naan in m̧am̧a, ijjab wōt kōnono kōn kōrā ro rekar koļotak ajri ro ak kōkkaajriri ajri ro ilo mour in. Ij kōnono kōn aolep leddik ro rerūtto nejin Jemedwōj im Jinedwōj Ilan̄. Aolep kōrā ej juon m̧am̧a kōn wānōk in mour kwojarjar eo an indeeo.
Kōn menin joteen in, āinwōt jemān 10 ajri ro—ratimjuon leddik ro im juon ļaddik—im āinwōt Būreejtōn eo an Kabun̄ in, ij jar bwe kom̧ naaj en̄jake jon̄an in m̧wilaļ in en̄jake eo aō kōn kom̧—kōn wōn kom̧ im kōn aolep men ko kom̧ij maron̄ kōm̧m̧ani. Ejjeļo̧k juon emaron̄ kōm̧m̧ane ta eo juon kōrā ewāppen emaron̄ kōm̧m̧ane. Ejjeļo̧k juon emaron̄ kapeiki kareel eo ekajoor an juon m̧am̧a.
Em̧m̧aan ro remaron̄ im emakijkij aer kōnono kōn iakwe eo an Jemedwōj Ilan̄ im Rilo̧mo̧o̧r eo n̄an ro jet. Bōtaab kōrā ro ewōr juon aer jolet kōn menin—juon menin letok ekwojarjar. Kom̧ ewōr ami maron̄ n̄an en̄jake ta eo juon armej ej aikuji—im n̄āāt eo ļaddik ak leddik eo ej aikuji. Komaron̄ pukotļo̧k, kaenōm̧m̧an, katakin, im kōkajoor juon armej ilo an lukkuun aikuj jipan̄.
Kōrā ro rej lo men ko oktakļo̧k jān an em̧m̧aan ro loi, im o, ewi jon̄an ad aikuji loļo̧kjeņ eo ami! Piktokimi ej tōl kom̧ bwe kom̧in ļōmņak kōn ro jet m̧oktata, n̄an ļōmņak kōn wāween ko maron̄ waļo̧k jān jabdewōt m̧akūtkūt naaj waļo̧k ioon ro jet.
Āinwōt an Būreejtōn Eyring kwaļo̧ke, ekar juon ad aiboojoj Jined Iv—kōn ettōņak eo an eaorōktata kōn karōk eo an Jemedwōj Ilan̄—eo ekar jinoe ta eo jej ņaetan “Wōtlo̧k eo.” An māletlet im kālet eo an eaiboojoj im an Adam rie jokālet eo an ekar kōm̧akūt m̧aanļo̧k karōk in m̧ōņōņō eo an Anij. Rekar kapidodoik ad kajjojo itok n̄an laļ in, bōk juon ānbwin, im kam̧ool bwe jenaaj kālet n̄an jutak kōn Jisōs Kraist kiiō, āinwōt ad kar kōm̧m̧ane ilo mour eo m̧okta.
Kōrā ro jeiū im jatū jitōn bōro, epād ippemi jolet ko an jetōb im kōņaan ko rej piktokin. Joteen in ij rōjan̄ kom̧, kōn aolep kōjatdikdik in būruwō, n̄an jar n̄an meļeļe jolet ko an jetōb ippemi—n̄an ejaake, kōjerbale, im kōļapļo̧ki, aaet ļapļo̧k jān jon̄an eo kom̧ ar maron̄ kōm̧m̧ane. Kom̧ naaj ukōt laļ in ilo ami kōm̧m̧an āindein.
Āinwōt kōrā ro, kom̧ij im̧we ro jet im kajutak juon jon̄ak ewānōk n̄an ļoore. In lewaj n̄an kom̧ jidik tarlep in ruo iaan kōjjeļā ko raorōk kar kōm̧m̧an ilo kweilo̧k eo ļo̧k eļap ad. Kom̧, kōrā ro jeiū im jatū rejitōn bōro, rekar kii eo n̄an kajjojo.
Juon, jerbal in karejar. Jon̄an eo eļap n̄an jerbal in karejar eo ej jān ad Rilo̧mo̧o̧r, Jisōs Kraist. Ekkā, kōrā ro rej, im kar aolep iien, epaakeļo̧k jon̄ak eo jān em̧m̧aan ro. N̄e kom̧ij lukkuun jerbal in karejar, kom̧ij ļoori en̄jake ko ami n̄an jipan̄ bar juon armej en̄jake eļapļo̧k iakwe eo an Rilo̧mo̧o̧r eo. Piktokin en̄jake in n̄an jerbal in karejar ej jolet ilo kōrā ro rewāppen. Ijeļā kōrā ro rej jar aolep raan, “Wōn ro: Kom̧ ar kōņaan bwe in jipan̄ er rainin?”
Mokta jān kōjjeļā eo an Eprōļ 2018 kōn wāween eo eutiejļo̧k im kwojarjarļo̧k n̄an kea kake ro jet, imminene eo an jet em̧m̧aan ro ekar n̄an kōkkaļļeikike em̧ōj kōm̧m̧ane jerbal in loļo̧k mōko an em̧m̧aan āinwōt “em̧ōj” im wōnm̧aanļo̧k wōt n̄an jerbal eo juon.
Ak n̄e kom̧ij en̄jake bwe juon sister eo kom̧ kar loļo̧k aikuj jipan̄, emōkaj ami uwaak innām ilo aolepān allōn̄ eo. Wāween in, ekar wāween eo kom̧ kar loļo̧k im katakin ekar im̧we em̧m̧akūt in ad eaorōk n̄an jerbal in karejar.
Ruo, ilo kar kweilo̧k eo eļap ļo̧k, kōm kar barāinwōt ejaake doulul ko an Priesthood eo an Melkisedek. Eo me jekar kobōk kōn wāween jipan̄ em̧m̧aan ro uwaan Kabun̄ in wājabdikļo̧k ilo eddo ko aer, jekar tiljek ļōmņak kōn waanjon̄ak eo an Doulul eo an Kōrā ro.
Ilo Doulul eo an Kōrā ro, kōrā ro ilo elōn̄ iiō im jekjek ko an mour rej kweilo̧k ippān doon. Kajjojo jon̄oul iiō ko in mour ej bōk apan̄ ko rejej uwaer, im jan̄in, ijeņ kom̧ kar pād, wiik ālkin wiik, ajel ippān doon, eddōkļo̧k im katakin gospel eo ippān doon, im kōm̧m̧ane juon oktak eļap ilo laļ in.
Kiiō, ālkin waanjon̄ak eo ami, rikabwijer ro an Priesthood eo an Melkisedek rej uwaan doulul eo an elder ro. Iiō eo an em̧m̧aan rein ej jān 18 n̄an 98 (ak lōn̄ļo̧k), kōn jon̄an wōt juon priesthood eo im imminene ko ilo Kabun̄ in. Em̧m̧aan rein rejitōn bōro remaron̄ kiiō ejaake jem̧doon in iakwe āinwōt būratōr ro, ekkatak ippān doon, im wājabdikļo̧k aer kōjeraam̧m̧an ro jet.
Kom̧ij keememej bwe Juun eo ļo̧k, Sister Nelson im n̄a kōm̧ro kar kōnono n̄an jodikdik ro an Kabun̄ in. Kōm̧ro kar kajjitōk ippāer n̄an kobatok ilo jarin tariņae in jodikdik ro an Irooj n̄an jipan̄ aiintok Israel ilo jim̧or turājet ko ruo an rōn̄ōl eo. Aiintok in ej apan̄ eo eļaptata un eo eļaptata im jerbal eo eļaptata ioon laļ in rainin!1
Ej juon un eo me enej lukkuun aikuji kōrā ro, kōnke kōrā ro rej kōkōm̧anm̧anļo̧k ilju im jekļaj. Kōn menin joteen in ij lewaj juon kajjitōk in kanaan n̄an kom̧, kōrā ro an Kabun̄ in, n̄an kōkōm̧anm̧anļo̧k ilju im jekļaj ilo jipan̄ aiintok Israel jān ejeplōklōk.
Ia eo kom̧ maron̄ jino jene?
Imaron̄ ke lewaj emān kajjitōk ko:
Kein kajuon, ij kajjitōk ippemi bwe kom̧in bōk koņaami ilo 10-raan in jitlo̧k jān social media im jān jabdewōt media ko jet me rej bōktok ļōmņak ko renana im rejjab erreo n̄an ļōmņak eo ami. Jar n̄an jeļā ewi wōt kareel ko n̄an julo̧k ilo iien jitlo̧k eo ami. Tōprak eo jān 10-raan in jitlo̧k eo emaron̄ kabwilōn̄ eok. Ta eo kwoj kile ālkin bōk juon iien bōjrak jān loļo̧kjeņ ko an laļ in me rekar kakinejnej jetōb eo am̧? Ewōr ke juon oktak eo kwoj kiiō kōņaan n̄an joļo̧k am̧ iien im kajoor ie? Jabdewōt kālet ko im̧aantata ami em̧ōj ke aer em̧m̧akūt—men̄e baj jidik wōt? Ij rōjan̄ kom̧ n̄an ami rekooti im m̧akūtkūt im kamōji kajjojo iaer kōn ikdeleel.
Kein Karuo, ij kajjitōk ippemi n̄an riiti Bok in Mormon eo kiiō im jem̧ļo̧kin iiō in. Āinwōt an pen im jab maron̄ āinwōt maron̄ loe kōn aolep ta ko me kwoj kajjieon̄ kōm̧m̧ani ilo mour eo am̧, eļan̄n̄e kwonaaj bōk kajjitōk in kōn lukkuun jibadbad in būruōm̧, Irooj enaaj jipan̄ eok loe juon iaļ n̄an kōttōbrake. Im, ilo ami lukkuun ekkatak, ij kallim̧ur bwe lan̄ ko renaaj peļļo̧k n̄an kom̧. Irooj enaaj kōjeraam̧m̧an kom̧ kōn eļapļo̧k im̧we im revelesōn.
Ilo ami riit, ij rōjan̄ kom̧ bwe kom̧win kōkkaļļeiki kajjojo eoon ko me rej kōnono ak kōmeļeļe kōn Rilo̧mo̧o̧r eo. Innām, kom̧win ekkejel iien otemjej ilo kōnono kōn Kraist, lan̄lōn̄ ilo Kraist, kwaļo̧k kōn Kraist ippān baam̧le ko ami im ro m̧ōttami.2 Kom̧ im er naaj epaakeļo̧k Rilo̧mo̧o̧r eo kōn wāween in. Im oktak ko, aaet kabwilōn̄lōn̄ ko, naaj jino waļo̧k.
Jibbon̄ in kōjjeļā eo kar kōjjeļļā kake ekar kōn jikejuuļ eo ekāāl an Jabōt im pedped wōt ilo m̧weo, laajrak in kein katakin an Kabun̄ in. Kom̧, kōrā ro jeiū im jatū jitōn bōro, kom̧ij juon un n̄an tōprak in ekāāl, im kōtōbalbale jerbal in kijejeto katakin-gospel eo ilo jokun wōt juon. Jouj katakin ro kom̧ij iakwe er ta eo kom̧ij ekkatak jān jeje ko rekwojarjar. Katakin er wāween oktakļo̧k n̄an Rilo̧mo̧o̧r eo n̄an kōmour im kajoor in karreeo eo An n̄e rej jerawiwi. Im katakin er wāween kōjerbal kajoor in kōkajoorļo̧k eo An aolep raan in mour ko aer.
Kein kajilu, ejaake juon jon̄ak in pād ilo tampeļ eo aolep iien. Menin enej aikuji jidik an ļapļo̧k ami kaarmejete ilo mour eo ami. Elōn̄ļo̧k iien ilo tampeļ eo naaj kōtļo̧k an Irooj katakin kom̧ wāween kōjerbal kajoor in priesthood eo An eo me em̧ōj kar lewaj ioom̧i ilo ami kar bōk mennin letok kwojarjar eo ami ilo tampeļ eo An. N̄an kom̧ ro rejjab jokwe iturin juon tampeļ, ij kajjitōk ippemi n̄an ami tiljek ekkatak kōn tampeļ ilo jeje ko rekwojarjar im ilo naan ko an rikanaan ro remour. Pukot n̄an jeļā eļapļo̧k, n̄an meļeļe eļapļo̧k, n̄an en̄jake eļapļo̧k kōn tampeļ eo jān ami kar jeļā m̧oktaļo̧k.
Ilo nokon in jota eo an jodikdik ilo Juun eo ļo̧k, ikar kōnono kōn juon likao eo mour eo an ekar oktak ke ro jinen im jemān rekar jāniji smartphone eo an n̄an juon taļboon kwoj kilōke kōppeļļo̧ke. Kōrā in jinen likao in ej juon kōrā eo ekajoor tōmak eo an. Ekar loe an ļaddik eo nejin jino peļo̧k ņae kālet ko me rekar maron̄ bōbrae e jān an jerbale juon mijen. Ekar bōk kajjitōk ko an n̄an tampeļ eo n̄an jeļā wāween eo em̧m̧antata n̄an jipan̄ ļaddik eo nejin. Innām liin ekar m̧akūtkūt im kamōje kōn aolep an ikdeleel.
Ekar ba: “Ikar en̄jake an Jetōb eo tōlļo̧k eō n̄an etale taļboon eo an ļaddik eo nejū ilo kajjojo iien n̄an lo kajjojo men. Ijjab jeļā wāween diwōj deļo̧n̄ ilowaan smarphone kein, ak Jetōb eo ekar tōl eō ilo aolep social media ko me ijjab kōjerbali! Ijeļā Jetōb eo ej jipan̄ ro jinen im jemān ro rej pukot tōl eo n̄an kōjparok ajri ro nejier. [Ilo jinoin] ļaddik eo nejū ekar illu ippa. … Ak ālkin jilu wōt raan ko, ekar kam̧m̧oolol eō! Emaron̄ en̄jake oktak eo.”
Mwil eo an ļaddik eo nejin im m̧antin ekar lukkuun oktak. Ekar oktak im ļapļo̧k an jipan̄ ilo m̧weo, ļapļo̧k an ettōn̄, im ekar ļapļo̧k an bōk koņaan ilo mōnjar eo. Ej iakwe jerbal n̄an juon iien ilo juon jikin kōpeptaij an tampeļ eo im m̧aanjabpopo n̄an mijen eo an.
Kein kemān kajjitōk, n̄an kom̧ ro rerūtto, ej n̄an bōk koņaami ilo Doulul eo an Kōrā ro. Ij rōjan̄ kom̧ n̄an ekkatak ennaan in jibadbad eo an Doulul eo an Kōrā ro. Ekabwilōn̄lōn̄. Emaron̄ tōl kom̧ ilo ami ejaake ennaan in jibadbad ko ami make n̄an mour ko ami make. Ij barāinwōt kajjitōk ippemi n̄an lan̄lōn̄ kōn m̧ool ko ilo naan in kean̄ eo an Doulul eo an Kōrā ro ekar jeje enan̄in 20 iiō ko remootļo̧k.3 Juon kape em̧ōj likūt ilo jikin pija an naan in kean̄ in ej etoto itōrerein m̧weo ilo opiij eo an Būreejtōnji eo Kein Kajuon. Ij laudin̄din̄ aolep iien ij riiti. Ej kōmeļeļeiki wōn kom̧ im wōn eo Irooj ej aikuji bwe en pād ilo iien in ejejjet ilo ami kōm̧m̧ani ijo koņaami n̄an jipan̄ aiintok Israel eo ejjeplōklōk.
Kōrā ro jeiū im jatū rejitōn bōro, kōm̧ij aikuji kom̧! Jej “aikuji kajoor eo ami, ami bwebwenato, ami kam̧ool, maron̄ eo ami n̄an tōl, ami māletlet, im ainikiemi.”4 Kōmij jab maron̄ aiintok Israel ilo ami jako.
Ij iakwe im kam̧m̧oolol kom̧ im kiiō kōjeraam̧m̧an kom̧ kōn maron̄ eo n̄an ami likūt laļ in iturājet ilo ami jipan̄ ilo jerbal in eaorōk im ejidimkij. Ippān doon jemaron̄ kōm̧m̧ani aolep ta ko Jemedwōj Ilan̄ eaikuji kōj n̄an kōm̧m̧ani n̄an kōpooji laļ in n̄an Itok eo Kein Karuo an Nejin Jitōn bōro.
Jisōs ej RiKraist eo. En̄in ej Kabun̄ eo An. Jān menin ij kam̧ool ilo etan Jisōs Kraist, amen.