Ad Kijeek in Tōmak
Jān Elder Gerrit W. Gong
Jān Doulul eo an Jon̄oulruo Rijilōk ro
N̄an ro rej kappukōt, kōtļo̧k, im mour n̄an e, jino tōmak, jet iien, enaaj ejaak ak emaron̄ bar kajoorļo̧k.
Ro jeiū im jatū rejitōn bōro, elukkuun ke men in mōņōnō n̄an bōk revelesōn ko jān lan̄ jān Būreejtōn Russell M. Nelson im ritōl ro ad ilo Kabun̄ in me rej karuwaineneik kōj n̄an mour ilo wāween ko rekāāl im rekwojarjar,1 ilo m̧ōko im ilo jikin jar ko, kōn aolepān būruwōd, kōļmenļo̧kijeņ, im kajoor?
Ewōr ke juon iien kwaar kōm̧m̧ane juon men eo kwaar en̄jake ke kwaar jab pojak ak ejjeļo̧k am̧ kar jeļā kake bōtaab kwaar jeraam̧m̧an kōnke kwaar kajjieon̄?
Em̧ōj aō kōm̧m̧ane. En̄in ej juon waanjon̄ak.
Jet iiō remootļo̧k, Elder Richard G. Scott, juon iaan Rijilōk ro ilo Doulul eo an Jon̄oulruo Rijilōk ro, ekar karuwainene. “Gerrit, kwokōnaan ke kōļar kōn wūno ippa?”
Elder Scott ekar ba wūno ekar jipan̄ e lale juon men im ejaake. Em̧ōj an kar je: “An kajjieon̄ bwe en tijemļo̧k ilo ejaaki men ko, men̄e tōprak ko reddik. … Tijemļo̧k ilo ejaaki men ko remaron̄ ejaake juon jetōb in kam̧m̧oolol kōn mour in im kōn ta eo Irooj ekar letok n̄an anbwin. … Eļan̄n̄e kwoj māletlet ilo am̧ kōm̧m̧an kālet, eban aikuj bōk eļap iien.”2
Būreejtōn Henry B. Eyring ekar kōmeļeļeik ilo an jin̄a im kōļmenļo̧kjeņ ej āinwōt juon ikdeleel n̄an “juon en̄jake in io̧kwe” io̧kwe eo an Rikōm̧anm̧an eo Ej kōņaan bwe ajri ro Nejin ren āinwōt E—n̄an kōm̧anm̧an im kālōk.”3 Jerbal ko remājdik an Būreejtōn Eyring ej letok, “jetōb eo ekabūlōn̄lōn kōn naan in kam̧ool im tōmak.”4
Jerbal in jin̄a ko an Būreejtōn Boyd K. Packer ej kōmeļeļeik juon ennaan in pedped in gospel: “Anij ej rikōm̧anm̧an an lan̄ im laļ im aolep men otemjej ilo ie, bwe aolep rej kwaļo̧k aer naan in kamool kōn kōm̧anm̧an eo ekwojarjar, im bwe ewōr [juon] rejtak ededeļo̧k ikōtaan ipeļaakid, science, im gospel eo an Jisōs Kraist.”5
Alma ekar kam̧ool, “Men otemjeļo̧k rej kam̧ool bwe ewōr juon Anij.”6 Ajri in Būraimere ro am rej al, “Aolep iien ko ij rōn an bao ko al ak reilo̧k n̄an lan̄ ebūlu, … Ij mōņoņo bwe ij jokwe ilo laļ in Jemedwōj Ilan̄ ekar kōm̧anm̧an n̄an eō.”7 Rijeje Victor Hugo ej nōbar “kabūlōn̄lōn̄ ko ilo jem̧jerā eo ikōtaan armej im men ko, ilo laļ in, jān aļ n̄an men in mour jidik ko. … Kajjojo bao ko remaron̄ ekāke ewōr jijidikdik in m̧ōttan men ko an Anij ippāer. … Kōdo ko imejatoto rej āinwōt jikin iju ko rellōn̄.”8
Im men in ebar bōklikļo̧k kōj n̄an kūr eo an Elder Scott.
“Elder Scott,” ikar uwaak, “Ikōņaan bwe en lapļo̧k ao lale im ejaake. Ij m̧ōņōņō in pijaikļo̧k jin̄a ko an Jemedwōj Ilan̄ kōn kūdo ko mejatoto im mera eo an lan̄ im dān. Bōtaab” —ekar wōr jidik bōjrak— “Elder Scott,” ikar ba, “Ejjeļo̧k aō kapāāl kōn wūno dān. Ij inepata bwe imaron̄ kalluik eok ilo am̧ nej kajjieon̄ in katakin eō.”
Elder Scott ekar ettōn̄ im karōk juon iien am̧ro nej ioon doon. Ilo raan eo ekar karōk e, ekar kōpooji peba ko, wūno ko, im aļaļ in jeje ko. Ekar jeki juon annan̄ im jipan̄ katutu peba eo n̄an n̄a.
Jekar kōjerbale āinwōt waanjon̄ak n̄an wūno dān eo an aiboojoj etan in Kāām in Tuļo̧k in Aļ. Ilo am̧ro kar wūno, kōmro kar kōnnaan kōn tōmak—elmen am kar en̄jake meram im okmānāān in juon kijeek, kōmro kar likūt marok im men ko rej jab jim̧we ilikimro—kōn jet iien ko reitok, bon̄in ajimakeke ko, kijeek in tōmak ko am remāron letok kōjatdikdik im m̧ool. Im ke ej jimarok. Kijeek in tōmak ko am—ememļo̧kjeņ ko, en̄jake ko, im jolet in tōmak kōn em̧m̧an eo an Anij im an tiriamo n̄an mour ko ad—emōj an kōkajoor kōj ilo an bon̄.
Aō naan in kam̧ool—n̄an ro rej kappukōt, kōtļo̧k, im mour n̄an e—jino tōmak, jet iien, enaaj ejaak ak emaron̄ bar kōro̧o̧lļo̧k. Meram eo enej itok eļan̄n̄e ewōr ad ikdeleel im ne jej kapukōte, ne jenaaj kijenmej im pokake kein ko an Anij, eļan̄n̄e jej peļļok n̄an jouj eo an Anij, kōmour, im bujen ko.
Ke komro ej jino wūno, Elder Scott ekar rōjan̄, “Gerrit, men̄e ej juon kōttan am̧ ekkatak kwonaaj jin̄aiki juon men eo kwonaaj bōke im keememej.” Elder Scott ekar jim̧we. Ikar kaorōk jin̄a kōn dān an kijeek in tōmak eo Elder Scott ekar jipan̄ eō wūnoiki. Kōn maron̄ eo aō im ej bwe wōt, bōtaab kakeememej kōn kijeek in tōmak eo am emaron̄ rōjan̄ kōj ilo ļalem wāween ko.
Kein kajuon, kijeek in tōmak eo ad emaron̄ rōjan̄ kōj n̄an pukōte lan̄lōn̄ ilo ad ejaaki men ko.
Ewōr lan̄lōn̄ ilo ettōņak, ekkatak, kōm̧m̧ane men ko ewōr tokjāer im rekāāl. Men in eļapļo̧k an m̧ool ilo ad kōļapļo̧k tōmak im lōke Jemedwōj Ilan̄ im Nejin, Jisōs Kraist. Jejjab maron̄ io̧kwe kōj make n̄an lo̧mo̧o̧ren kōj make. Bōtaab Jemedwōj Ilan̄ eļapļo̧k an io̧kwe kōj im ejeļā wōn kōj jān ad io̧kwe im jeļā kake kōj make. Jemaron̄ lōke Irooj im jab atartar ioon jeļāļo̧kjeņ ko ad make.9
Ewōr ke juon iien kwe wōt kwaar jab rūwainene n̄an juon keemem an juon armej?
Ewōr ke iien rekar kālete kwe āliktata, ak kar jab kālete, ilo iien ko teem ko rej ejaak?
Emōj ke am̧ kar kōpopo n̄an juon teej an jikuuļ, intōrpiu n̄an jerbal, juon iien em̧m̧an kwaar kōnaan—im kwar en̄jake ke kwaar likjab?
Emōj ke am̧ jar kōn juon jem̧jerā, kōn jabdewōt un ko, im ekar jab tōprak?
Emōj ke am̧ ioone nan̄inmej, eo ippem ekar etal jān eok, metak jān ro ilo baam̧le?
Rilo̧mo̧o̧r eo ejeļā ta ko jej iooni. Ilo ad kaminene kōn anemkwoj in kālet letok jān Anij ekoba aolep jerbal ko ad ilo ettā im tōmak, Rilo̧mo̧o̧r eo ad, Jisōs Kraist, emaron̄ jipan̄ kōj eļļā ioone mālijjon̄ im m̧ōņōņō. Tōmak ej ekitbuuj ikdeleel im kālet n̄an lōke. Tōmak ej barāinwōt itok jān pokake kein ko an Anij, letok n̄an kōjeraam̧m̧an kōj, ilo ad ļoore bujen in iaļ eo An.
N̄e jekar en̄jake, tarpok, ajimakeke, rup in bōro, illu, ebweer, inepata, ak jepelļo̧k jān Anij im Kabun̄ eo An me emōj an jepļaaktok, enaaj bōk eļapļo̧k jerbal in kijejeto im tōmak n̄an bar deļo̧n̄e iaļ in bujen eo An. Ak, ewōr tokjān! Jouj itok, ak bar rool tok, n̄an Irooj Jisōs Kraist. Io̧kwe eo an Anij ekajoorļo̧k jān to ko an mej—mour in kanniok ak ilo jetōb.10 Pinmuur eo an Rilo̧mo̧o̧r eo ad eļap im ej n̄an indeeo. Kajjojo iaad jej jebwābwe im likjab. Jemaron̄, ilo juon iien, jebwābwe jān iaļ eo ad. Io̧kwe eo an Anij ej jiron̄ kōj, jekdoon ia eo jej pād ie ak ta ko jekar kōm̧m̧ani, ejjeļo̧k un bwe jān jab bar jepļaak. Ej kōttar im pojak n̄an atbo̧kwōj kōj.11
Kein karuo, juon kijeek in tōmak am emaron̄ rōjan̄ kōj n̄an jerbal in karejar eo ekāāl, jeļā ejaaki men kōn, lapļo̧k im ekwojarjar ilo wāween ko an Jetōb.
Jerbal in karejar ej bōktok kabūļōn̄ļōn̄ ko im kōjeraam̧m̧an ko jān bujen ko—ijo jej en̄jake io̧kwe eo an Anij im kapukote n̄an jerbal in karejar n̄an ro ilo jetōb.
Ejjab etto, Sister Gong im n̄a kar jino jeļā kake juon jemen im baam̧le kar jeraam̧m̧an kōn tōmak eo an juon priesthood brother eo ekar itok n̄an bisop eo aer im kajjitōk eļan̄n̄e e (priesthood brother eo) emarōn m̧ōttāik baba eo. Baba eo ekar jab kobatok im ejeļo̧k an ikdeelel ilo jerbal in ļo̧ļo̧k. Ak ke buruōn baba in ekar oktak, e im priesthood brother eo rekar jino ļo̧ļo̧k baam̧le ko “aer.” Ālkin juon iien ļo̧ļo̧k, lio pāleen—eo ejjab etal n̄an jikin jar—kar kajjitōk ippān ļeo pāleen ejet men ko rekar waļo̧k. Baba eo ekar kwaļo̧k m̧ool, “Imaron̄ kar en̄jake juon men”—innām ekar etal n̄an jikin kōm̧m̧an m̧ōn̄ā eo im bōk juon piia.12
Bōtaab juon men ekar tōl ļo̧k n̄an bar juon men: en̄jake ko reļļap, jerbal in karejar, oktak ilo bōro ko, kūlaaj in kōpopo n̄an tampeļ eo, itok n̄an jar, liāp āinwōt baam̧le ilo tampeļ ko rekwojarjar. Pijaik ļok ewi jon̄an an ajri ro im ajri ro jibūd m̧ōņōņō kōn ro jemāer im jineer im kōn brother eo ilo jerbal in karejar eo ekar itok āinwōt juon jeran im kōm̧pānien n̄an jerbal in karejar im io̧kwe ro jet.
Kijeek in tōmak eo kein kajilu ej rōjan̄: m̧ōņōņō im kōjeraam̧m̧an ko an gospel rekabwilōn̄lōn̄ rej itok n̄e jej kapukot n̄an io̧kwe Irooj im ro jet kōn aolepān būrueer im ļōlātāt.
Jeje ko rekwojarjar rej karuwaineneik kōj n̄an likūt aolepān ad im erom̧ loktatok in io̧kwe eo im jerbal in jipan̄. Ilo Kallim̧ur Mokta, Duteronomi ej katakin kōj n̄an “yokwe Irooj am̧ Anij kōn aolepen būruom̧, im kōn aolepān am̧, im kōn aolepn am̧ kajoor.13 Joshua ej kōnono, “Io̧kwe Irooj ami Anij, … etetal ilo ial ko an, … lale kien ko an, … eddāp n̄an E, im … im karejar n̄an E kōn aolep in būruōmi im aolep in ami.”14
Ilo kallim̧ur ekāāl, Rilo̧mo̧o̧r eo ad ekar ba kien ko ruo reļļap: “Kwōn io̧kwe Irooj am̧ Anij kōn aolepen būruom̧, im kōn aolepen am̧, kōn aolepen am̧ kajoor, … im ri turum̧ āinwōt kwe.”15
Ilo Bok in Mormon: Bar juon Kallim̧ur kōn Jisōs Kraist, Kiin̄ Benjamin ekar jerbal kōn “aolep kajoor in ānbwin im maron̄ in aolepān an” im kar kajutak aenōm̧m̧an ilo āneo.16 Ilo Katak im Bujen ko, āinwōt an aolep mijenede jeļā, Irooj ej kajjitok ippād n̄an jerbal n̄an E kōn aolepān “būruer, ļōmņak im kajoor.”17 Ke Armej ro Rekwojarjar rekar deļo̧n̄e Jackson Country, Irooj ekar kakien er n̄an kōjparok raan in Jabōt ilo aer iakwe “Irooj am Anij kōn aolepān būruōm̧, kōn aolepān am maron̄, ļōmņak, im kajoor; im ilo etan Jisōs Kraist kwōn jerbal n̄an E.”18
Jej m̧ōņōņō kōn karuwainene eo n̄an leļo̧k aolepān ad ļo̧ļātāt n̄an pukote wāween ko n̄an iakwe Anij eļapļo̧k im ekwojarjar im ro ipeļaakid im n̄an kōkajoor tōmak eo ad ilo Jemedwōj Ilan̄ im Jisōs Kraist ilo būruwōd im ilo m̧ōko imōd im ilo im̧ōn jar.
Kein kemān, juon kijeek in tōmak am ej rōjan̄ kōj n̄an kalōk iien otemjej n̄an mour erreo eo ej kōļapļo̧k tōmak im jetōb.
Imminene ko rekwojarjar, wāween ko rewānōk, ak jon̄ak ko n̄an jar remaron̄ tōlļo̧k n̄an jar; katak jeje ko rekwojarjar; jitļo̧k, keememej Rilo̧mo̧o̧r eo ad im bujen ko ilo iien kwojkwoj eo; kwaļo̧k kōjeraam̧m̧an eo an gospel eo kōn mijenede, tampeļ im menmenbwij an baam̧le, im jerbal ko jet; jeje ilo jōnōļ ko; im ko jet.
N̄e jon̄ak ko rekwojarjar im jetōb ko rej koba, kiiō im mour indeeo im indeeo rej ippān doon. Jetōb in meram im mour renaaj itok n̄e pokake iien kabun̄ aolep iien ej kepaakļo̧k kōj n̄an Jemedwōj Ilan̄, im ad Rilo̧mo̧o̧r, Jisōs Kraist. N̄e jej io̧kwe jetōb eo im leta an kien eo, men ko an indeeo remaron̄ pād wōt ilo ļōļātāt ko ad āinwōt m̧ōļo̧wi ko jān lan̄.19 Kōn pokake iien otemjej im kōkāāle dān in mour, jemaron̄ lo uwaak ko, tōmak, im kajoor n̄an tōpar apan̄ ko im iien ko rem̧m̧an ko kōn kijenmej an gospel, wāween ad lale, im m̧ōņōņō.
Kein kōļalem, eļan̄n̄e jej kōjparok ta ko rekar katakin im barāinwōt kapukot wāween ko rekāāl im ekwojarjar n̄an io̧kwe Anij im jipan̄ im ro jet m̧aanjabpopo n̄an ioon E, kijeek in tōmak am enaaj rōjan̄ kōj n̄an keememej bwe weppān ej ilo Kraist, ejjab ilo kōj make ak weppān ko an laļ in.
Karuwainene ko an Anij eobrak kōn io̧kwe im maron̄ ko kōnke Jisōs Kraist ej “ial eo, m̧ool eo, im mour eo.”20 N̄an ro rej en̄jake eddodo, Ej karuwainene, “Itok n̄an Ippa,” im n̄an ro rej itok n̄an E, Ej kallim̧ur, “Inaaj kakkijeik kom̧.”21 “Itok n̄an Kraist, im weeppān ilo E, … io̧kwe Anij kōn aolep am̧ maron̄, ļōmņak im kajoor, innām An jouj enaaj bwe n̄an kom̧, bwe jān An jouj kom̧ maron̄ weeppān ilo Kraist.”22
Kon tomak in, “kōn jouj eo an emaron̄ weeppān ilo Kraist” ej barāinwōt jipan̄, aenōm̧m̧an, im kallim̧ur jemaron̄ wōnm̧aanļo̧k ilo tōmak im lōke ilo Irooj men̄e men ko rej jab n̄an ta ko jej kōņaan, bōtaab, ak jej aikuji, kōn ejjeļo̧k bōd ilo kōj make, alkin ad kar kate kōj jon̄an wōt ad maron̄.
Ilo iien ko im wāween ko, jej en̄jake ejjeļo̧k jeļā, jab meļeļe, im bōlen jab wanōk. Ilo iien ko tōmak eo ad ej jerbal n̄an io̧kwe Anij im n̄an jerbal in karejar n̄an ro itūrid, jenaaj en̄jake io̧kwe eo an im aikuj ikdeleel n̄an mour ko ad im aer ilo wāween ko rekāāl im rekwojarjar.
Kōn tūriamo̧, Rilo̧mo̧o̧r eo ad ej rōjan̄ im kallim̧uri kōj ke jemaron̄ “bun̄ m̧aanļo̧k kōn dim ilo Kraist, kōn juon kōjatdikdik emeram, im juon io̧kwe n̄an Anij im armej otemjeļo̧k.”23 Katak ko an Kraist, Pinmuur eo an Rilo̧mo̧o̧r eo, im aolepen ad lōļātāt tōl ilo ial in bujen eo an emaron̄ jipan̄ jeļā kōn mool eo An im kōm̧m̧an bwe jān anemkwoj.24
Ij kam̧o̧o̧l bwe tarlep in gospel eo An im karōk in m̧ōņōņō eo An emōj an jepļaaktok im katakin ilo Kabun̄ eo an Jisōs Kraist im Armej ro Rekwojarjar ilo Raan-ko Aliktata, ilo jeje ko rekwojarjar, im kōn rikanaan ro jān Rikanaan Josep Smith n̄an Būreejtōn Russell M. Nelson rainin. Ij kam̧ool bwe iaļ in bujen eo An ej tōl ļo̧k koj n̄an menin letok eo eļaptata Jemedwoj Ilan̄ ekar kallim̧ur: “Kom̧ naaj bōk mour indeeo.”25
Kōtļo̧k bwe kōjeraam̧m̧an ko An im lem̧ōņōņō ejjeļo̧k jemļo̧kin bwe en ad ilo an būruer im kōjatdikdik ko an māņāān im tiljek n̄an kijeek in tōmak eo ad, Ij jar ilo et eo erreo im ekwojarjarj etan Jisōs Kraist, amen.