M̧ool im Karōk eo
Jān Būreejtōn Dallin H. Oaks
Rikakpilōklōk eo Kein Kajuon ilo Būreejtōnji eo Kein Kajuon
N̄e jej pukot m̧ool eo kōn kabun̄, jej aikuj kōjerbal kōl ko ilo jetōb rekkar n̄an kappok eo.
Revelesōn ko raan kein rej kōmeļeļeiki m̧ool eo āinwōt juon “jeļāļo̧kjeņ kōn men ko āinwōt aer kiiō, im āinwōt aer kar waļo̧k, im āinwōt aer naaj waļo̧k tokālik” (Katak im Bujen ko 93:24). En̄in ej juon meļeļe ewāppen kōn karōk in lo̧mo̧o̧r eo im “Baam̧le Eo: Juon Naan in Kean̄ n̄an Laļ in.”
Jej mour ilo juon tōre eļap meļeļe im eļap leto letak meļeļe. Bōtaab ejjab aolep meļeļe in ej m̧ool. Jej aikuj in tiljek ilo ad pukot m̧ool eo im kālet jipan̄ ko n̄an kappok in. Jejjab aikuj in ļōmņak kōn men ko an laļ in jej loi ak ritōl eo āinwōt kein jipan̄ ko rekkar kōn m̧ool eo. Jej aikuj mejmej karuo kōn ad pedped ioon meļeļe ko ak naan in kapilōk an juon armej ejjeļo̧k an jeļā kōn meļeļe eo letok jān rikōm̧m̧an pija ro, rikkure ro rebun̄bun̄, ak meļeļe ko ilo intōrnet kōm̧m̧an jān juon armej. Kapāāl eo an ilo juon jerbal ban bōke āinwōt kapāāl ilo m̧ool eo ilo unin kōnono ko jet.
Jej aikuj barāinwōt tiljek kōn kijejeto in jerbal an juon eo ej letok meļeļe. En̄in ej etke jeje ko rekwojarjar rej kakkōļ kōj ņae priestcraft (lale 2 Nipai 26:29). Eļan̄n̄e kein jipan̄ eo ej kōm̧m̧an jān juon armej ak jab jeļā wōn, meļeļe ko remaron̄ barāinwōt riab.
Jokālet ko ad rej aikuj in pedped wōt ioon meļeļe ko jān kein jipan̄ ko me rekkar kōn unin kōnono eo im ejjeļo̧k ippāer jān kijejeto in jerbal ko rekubbon̄.
I.
N̄e jej pukot m̧ool eo kōn kabun̄, jej aikuj kōjerbali jejjet in jerbal ko ilo jetōb im rekkar n̄an etale eo: jar, kam̧ool eo an Jetōb Kwojarjar, im ekkatak jeje ko rekwojarjar im naan ko an rikanaan ro raan kein. Ij būrom̧ōj aolep iien n̄e ij ron̄ kōn juon riboot ej kwaļo̧k juon tōmak ejako kōnke katak ko an laļ in. Ro raar juon kōttan bōk ettōņak in ilo jetōb maron̄ en̄taan jān jorrāān eo aer make jān pilo ilo jetōb. Āinwōt Būreejtōn Henry B. Eyring ekar ba, “Jorrāān eo aer ejjab pedped wōt ilo ta eo rej ļōmņak rej loe; ej pedped wōt ilo ta eo rejjab maron̄ loe.”1
Ļōmņak ko jej būki jān science rej tōlļo̧k kōj n̄an ta eo jej ņaetan scientific truth. Ak “sceintific truth” ejjab unleplep eo an mour in. Ro rejjab maron̄ ekkatak “jān katak im barāinwōt jān tōmak”(Katak im Bujen ko 88:118) ej kalikjab meļeļe eo aer kōn m̧ool eo n̄an ta eo er remaron̄ kam̧oole jān ļōmņak ko jān scientific. Menin ej likūt maron̄ ko reriab n̄an aer jibadōk m̧ool eo.
Būreejtōn James E. Faust ekar ba: “Ro em̧ōj aer kar [peptaij] rej likūt jetōb ko aer indeeo ilo kauwōtata kōn aer jab tiljek im jibadōk wōt kein jipan̄ ko an laļ in n̄an ekkatak. Jej tōmak bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata epād ie tarlep in gospel eo an Kraist, eo ej gospel eo ej m̧ōttan eo eaorōk im jeļāļo̧kjeņ an indeeo.”2
Jej loe m̧ool im lan̄lōn̄ eo ejjeļo̧k jem̧ļo̧kin jān jeļā im m̧akūtkūt kōn m̧ool eo kōn wōn kōj, meļeļe eo an mour in, im ia eo jej etal n̄ane n̄e jej mej. M̧ool kein ban maron̄ ekkatak jāni jān scientific ak wāween ļōmņak ko an laļ in.
II.
Kiiō inaaj kōnono kōn m̧ool ko an gospel eo kar kōjepļaakitok bwe rej pedped ko n̄an katak ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Jouj im lukkuun ļōmņak kōn m̧ool kein. Rej kōmeļeļe eļap kōn katak ko ad im kōm̧m̧an ko, bōlen ekitbuuj jet men ko jej jan̄in de meļeļe kaki.
Ewōr juon Anij, eo ej Jemān aolep jetōb ko aolep rekar mour ak renaaj mour eo eļap an iakwe.
M̧aan ak kōrā ej n̄an indeeo. M̧okta jān ad kar ļotak ioon laļ in, kōj aolep kar mour āinwōt m̧aan ak kōrā jetōb ro im̧aan mejān Anij.
Ej kab m̧ōj ad ron̄jake an Tabernacle Choir eo ilo Temple Square al “I Will Follow God’s Plan.”3 En̄in ej karōk eo an Anij kar ejaake bwe aolep ajri in jetōb ro Nejin ren maron̄ eddōkļo̧k n̄an indeeo. Karōk in elukkuun aorōk n̄an kōj kajjojo.
Ium̧win karōn in, Anij ekar kōm̧anm̧an laļ in āinwōt juon jikin ijo jetōb ro Nejin rejitōn bōro remaron̄ ļotaktok ie n̄an mour in n̄an bōk juon ānbwinnin kanniōk im en wōr aer iien n̄an eddōkļo̧k indeeo jān kālet kālet ko rejim̧we.
Bwe en wōr tokjān, kālet ko ilo mour in rekar aikuj in kōm̧m̧an ikōtaan jum̧ae kajoor ko an em̧m̧an im nana. Ekar aikuj in wōr jum̧ae, im kōn menin bwe juon rikapo, eo kar joļo̧k kōn jum̧ae im kar kōtļo̧k bwe en kapo ajri ro nejin Anij bwe ren jum̧ae karōk eo an Anij.
Unleplep in karōk eo an Anij ekar n̄an leļo̧k n̄an ajri ro Nejin iien em̧m̧an n̄an kālet mour indeeo. Menin maron̄ kōttōbrak wōt jān en̄jake ko ilo mour in im, ālkin mej, jān eddōkļo̧k ālkin mour in ilo laļ eo an jetōb.
Ilo iaļ in mour in ad, jenaaj aolep ibwidejdej jān jerawiwi āinwōt ad maron̄ jelm̧ae kapo ko renana an rikapo eo, im jenaaj aolep mej. Jej būki apan̄ kein ilo ad pedped ioon kallim̧ur an karōk eo me Anij Jemād enaaj kar letok juon Rilo̧mo̧o̧r, Nejin Wōt Ejitōn Bōro, eo enaaj lo̧mo̧o̧ren kōj jān juon jerkakpeje an aolep n̄an juon mour ekarbab ālkin mej. Rilo̧mo̧o̧r in enaaj barāinwōt letok juon pinmuur n̄an kōļļāiki wōņāān eo n̄an aolep bwe ren erreeo jān jerawiwi ilo jekjek ko Ekar kōmeļeļeiki. Jekjek kein rekitbuuj tōmak ilo Kraist, Ukweļo̧k, peptaij, mennin letok eo an Jetōb Kwojarjar, im kain̄i ko jet kar kōm̧m̧an jān mālim eo an priesthood.
Karōk in m̧ōņōņō eo eļap an Anij ej letok juon jokun wōt juon eo ewājabdik ikōtaan ekajet an indeeo im tūriamo̧ eo jemaron̄ bōk jān Pinmuur eo an Jisōs Kraist. Ej barāinwōt kōmaron̄ kōj bwe jen maron̄ oktak erom̧ menin kōm̧anm̧an ko rekāāl ilo Kraist.
Juon Anij eo eļap an iakwe ej pukottok kōj kajjojo. Kōmij jeļā bwe jān iakwe eo An im kōnke Pinmuur eo an Nejin Jitōn Bōro Emake Wōt, “aolep armej remaron̄ bōk lo̧mo̧o̧r, jān pokake kien ko im kain̄i ko an Gospel eo” (Laajrak in Tōmak 1:3; eoon eo eaorōk kar kobaiktok).
Kabun̄ eo an Jisōs Kraist im Armej ro Rekwōjarjar ilo Raan ko Āliktata jeļā kake āinwōt Kabun̄ eo ej pedped wōt ioon baam̧le. Ak ta ejjab lukkuun meļeļe ej bwe ad pedped ioon baam̧le ej mije wōt ad ļōmņak eļapļo̧k kōn jem̧jerā ko ad ilo mour in. Jem̧jerā ko an indeeo rej barāinwōt pedped ko n̄an tōmak eo ad. “Baam̧le eo ej ekkapit jān Anij.”4 Ium̧win karōk eo eļap an Rikōm̧anm̧an eo eļap an iakwe, mijen eo an Kabun̄ eo An ekar jepļaaktok ej n̄an jipan̄ ajri ro nejin Anij bōk kōjeraam̧m̧an ko reļļap an ijo ilōn̄tata ilo laļ an celestial, eo maron̄ bōke wōt jān juon m̧are indeeo ikōtaan juon m̧aan im juon kōrā (lale Katak im Bujen ko 131:1–3 Jej rie katak ko an Irooj bwe “armej ej juon kadkad eaorōk an kajjojo armej ilo mour eo m̧okta, mour in, im kadkad im jibadbad eo an indeeo” im bwe “m̧are ikōtaan m̧aan im kōrā ej eaorōk n̄an karōk indeeo eo An.”5
Āliktata, iakwe eo an Anij elukkuun ļap bwe, ijjelo̧kin wōt jejjo ro rekar erom̧ m̧aan ro nejin marok, Ekar kōpooj juon mejān kajjik eaiboojoj n̄an kōj aolep ajri ro Nejin. “Aolep ajri ro Nejin” ekoba aolep ro rekar mej. Jej kōm̧m̧ani kain̄i ko im jerbal kōn er ilo tampeļ ko ad. Jibadbad eo an Kabun̄ eo an Jisōs Kraist ej n̄an kakōrbab ajri ro Nejin n̄an aiboojoj eo ilo ijo eutiejtata, eo ej ijo ilōn̄tata ak mour indeeo. N̄an ro rejjab kōņaan ak jab karbab n̄an menin, Anij ekar kōpooje ro jet, aiboojoj eo edikļo̧k, aiboojoj ko an laļ ko.
Jabdewōt eo ej meļeļe m̧ool kein an indeeo maron̄ meļeļe etke kōj ro uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata rej ļōmņak āinwōt kōm̧ im kōm̧m̧an āinwōt kōm̧.
III.
Inaaj kiiō kwaļo̧k jet jerbal ko an m̧ool kein an indeeo, eo me maron̄ meļeļe kaki wōt ilo meram in karōk eo an Anij.
Kein Kajuon, jej kautiej anemkwoj in kālet eo an kajjojo armej. Elōn̄ wōt rej kile jerbal in eļap an Kabun̄ in ekar jepļaaktok n̄an kareel anemkwoj in kabun̄ ilo United States im peļaakin laļ in. Jerbal in kijejeto kein rejjab kareel baj itok limo eo ad make ak, ekkar n̄an karōk eo An, ej pukot n̄an jipan̄ aolep ajri ro nejin Anij lan̄lōn̄ kōn anemkwoj in kālet eo.
Kein Karuo, Jej juon jarlepju in armej rej mijenede. Jet iien armej rej kajjitōk ippem etke kōmij jilkinļo̧k mijenede ro n̄an elōn̄ laļ ko, aaet ilubwilijin oran armej in Rikūrijin ro. Jej bōk ejja kajjitōk in wōt kōn etke kōm̧ij leļo̧k elōn̄ taujin taļa ko n̄an jipan̄ ko an humanitarian n̄an armej ro rejjab uwaan Kabun̄ in am im etke kōm̧ij jab kobaik jipan̄ in n̄an jerbal in kijejeto ko an mijenede ko am. Jej kōm̧m̧ani menin kōnke jej aolep aolep āinwōt ajri ro nejin Anij—ro jeim̧ im jatūm̧—im jej kōņaan jake jōbōl eo jeraam̧m̧an ko am ilo jetōb im kanniōk ippān jabdewōt.
Kein Kajilu, mour in kanniōk in ej kwojarjar n̄an kōj. Kallim̧ur eo ad n̄an karōk eo an Anij ej aikuji ad jum̧ae m̧an lo̧je im m̧an armej eo ej en̄taan n̄an kajōm̧ļo̧k an mour.
Kein Kemān, jet rej inepata kōn jet jekjek ko an Kabun̄ in kōn m̧are im ajri ro. Jeļāļo̧kjeņ eo am kōn Anij ekar kwaļo̧k karōk in lo̧mo̧o̧r ej aikuj ad jum̧ae ņae kajoor social im kajoor ko etal jān imminene in m̧are ak n̄an kōm̧m̧an oktak ko me rej kapok ak ukōt m̧aan ak kōrā im kobaik oktak ko ikōtaan em̧m̧aan im kōrā ilo juon m̧ōttan. Jej jeļā bwe jem̧jerā ko, kadkad ko, im jerbal ko an em̧m̧aan im kōrā ro rej aorōk n̄an kōttōbrak karōk eo eļap an Anij.
Kein Kaļalem, barāinwōt ewōr ippād juon reim̧aanļo̧k eo eoktak ioon ajri ro. Jej ļōmņak in keotak im kōkkaajririk ajri ro āinwōt m̧ōttan karōk eo an Anij, im juon eddo ekwojarjar an ro kar kajoor in n̄an kōm̧m̧ane āindein. Ilo ad lale, men ko raorōktata ioon laļ in im ilo lan̄ rej ajri ro nejid im ro bwijjid. Kōn menin, jej aikuj katakin im dāpij wōt pedped ko im kōm̧m̧an ko me rej letok jekjek ko rem̧m̧antata n̄an ejaake im kam̧ōņōņōik ajri ro—aolep ajri ro.
Āliktata, jej ajri ro rejitōn bōro nejin juon Jemedwōj Ilan̄, eo ekar katakin kōj bwe m̧aan im kōrā, m̧are ikōtaan juon m̧aan im juon kōrā, im keotak im kōkkaajririik ajri ro rej aolep aorōk n̄an karōk in m̧ōņōņō eo An. Ļōmņak ko ad kōn pedped in katak kein emakijkij aer kwi ņae jum̧ae ko n̄an Kabun̄ in. Jej kile menin em̧ool. Jum̧ae ej m̧ōttan wōt karōk eo, im kajoor in jum̧ae eo an Setan ej tōl ilo jabdewōt men elukkuun aorōk n̄an karōk eo an Anij. Ej kappukot n̄an kakkure jerbal eo an Anij. Wāween jerbal ko reļļap an rej n̄an kabōjrak Rilo̧mo̧o̧r eo im mālim eo An ekwojarjar, n̄an kakkure waļo̧k ko jān Pinmuur eo an Jisōs Kraist, n̄an kabbweer ukweļo̧k, n̄an anōke revelesōn, im n̄an jum̧ae maron̄ an kajjojo armej. Ej barāinwōt kappukot n̄an pukoj m̧aan ak kōrā, n̄an ukōt m̧are, im n̄an kabbweer keotak eļaptata jān ro jinen im jemān ro renaaj karūttoļo̧k ajri ro ilo m̧ool.
IV.
Jerbal eo an Irooj ej wōnm̧aanļo̧k wōt mekarta kar ejaak im jum̧ae eo emakijkij me ej itok im̧aad ilo ad kajjieon̄ mour kaki katak ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata. N̄an ro rekar wōtlo̧k ium̧win jum̧ae, ij lewaj ļōmņak kein.
Keememej pedped eo an ukweļo̧k kar kōmaron̄e jān kajoor an Pinmuur eo an Jisōs Kraist. Āinwōt an Elder Neal A. Maxwell kar rōjan̄, jab pād ilubwilijin ro otemjej “ro renaaj kajjieon̄ n̄an ukōte Kabun̄ eo jān aer ukōt er make.”6
Āinwōt an Elder Jeffrey R. Holland kar katakin:
“Jirōk likattōtōt ilo ijo em̧ōj am de jeļā im jutak kajoor m̧ae ebar itok juon jeļāļo̧kjeņ. …
“… Ilo Kabun̄ in, ta eo jejeļā enaaj aolep iien em̧m̧anļo̧k jān ta eo jejjab jeļā.”7
Kōjerbal tōmak ilo Irooj Jisōs Kraist, eo ej pedped eo kein kajuon an gospel eo.
Āliktata, pukot jipan̄. Ritōl ro ad rej iakwe im rej pukot tōl an jetōb n̄an kom̧. Jej kōpooj elōn̄ jipan̄ ko āinwōt ami naaj loi ilo LDS.org im jipan̄ ko jet n̄an ekkatak gospel eo ilo m̧weo. Jej barāinwōt wōr ippād rikarejar jeiūd ak jatūd m̧aan ak kōrā kar kūr er n̄an leļo̧k jipan̄ ilo iakwe.
Jemedwōj Ilan̄ eo eļap an iakwe ekōņaan bwe ajri ro Nejin ren bōk lan̄lōn̄ in eo ej unleplep in kōm̧anm̧an eo ad. Mejān kajjik eo ad elan̄lōn̄ ej mour indeeo, eo me jemaron̄ bōke jān bun̄ m̧aanļo̧k ippān ta eo ad rikanaan, Būreejtōn Russell M. Nelson, emakijkij an ba “iaļen bujen eo.” En̄in ej ta eo ekar ba ilo ennaan eo an kein kajuon āinwōt juon Būreejtōn an Kabun̄ in: “Pād wōt ilo Iaļ in Bujen eo. Ami kallim̧ur n̄an ļoor Rilo̧mo̧o̧r eo n̄an kōm̧m̧ani bujen ko Ippān innām kōjparoki bujen ko renaaj kōpeļļo̧k kōjām n̄an kajjojo jetōb in kōjeraam̧m̧an im iien ko rem̧m̧an renaaj waļo̧k n̄an em̧m̧aan ro, kōrā ro, im ajri ro aolep jikin.”8
Ij lukkuun kam̧ool bwe men kein ikar ba rej m̧ool, im er rej maron̄ tōprak jān katak ko im Pinmuur eo an Jisōs Kraist, eo ej kapidodoiki ium̧win karōk eo eļap an Anij, Jemed Indeeo. Ilo etan Jisōs Kraist, amen.