2018
Jim̧we in Etan Kabun̄ in
Oktoba 2018

Jim̧we in Etan Kabun̄ in

Jān Būreejtōn Russell M. Nelson

Nelson, Russell M.

Jisōs Kraist ej tōl kōj n̄an kūr Kabun̄ eo kōn Etan kōnke ej Kabun̄ eo An, obrak kōn kajoor eo An.

Ro jeiū im jatū rejitōn bōro, ilo raan in Jabōt in eaiboojoj jej lan̄lōn̄ ippān doon ilo elōn̄ kōjeraam̧m̧an ko ad jān Irooj. Jej lukkuun kam̧m̧oolol kōn naan in kam̧ool ko ami kōn jepļaaktok eo an gospel eo an Jisōs Kraist, kōn kaarmejete ko kom̧ kar kōm̧m̧ani n̄an jutak wōt ak bar rooltok n̄an iaļen bujen eo An, im kōn jipan̄ ko rewūjlepļo̧k ami ilo Kabun̄ in An.

Rainin ij en̄jake kipel n̄an kōnono ippemi kōn juon un eļap an aorōk. Jet wiik remootļo̧k, ikar kadiwōjļo̧k juon ennaan kōn juon un n̄an kajim̧we etan Kabun̄ in.1 Ikar kōm̧m̧ane kōnke Irooj ekar im̧we kōļmenļo̧kjeņ eo aō kōn aorōk in āt eo Ekar kwaļo̧k n̄an Kabun̄ eo An, aaet Kabun̄ eo an Jisōs Kraist im Armej ro Rekwojarjar ilo Raan-ko Āliktata.2

Āinwōt ami naaj kōtmāne, uwaak ko n̄an ennaan in im n̄an style guide eo kar kōkāāle3 em̧ōj kōm̧m̧ane. Elōn̄ membōr ro ekar m̧ōkaj aer kajim̧we etan Kabun̄ in ilo blogs ko aer im peij in social media ko. Ro jet rej bwilōn̄ etke, kōn aolep men ko me rej kōm̧m̧an ilo laļ in, ekar menin aikuj n̄an kwaļo̧k juon men ekanooj in “jab lukkuun aorōk.” Im jet rekar ba eban maron̄ kōm̧m̧an, innām etke jej kajjieon̄? In kōmeļeļeik etke jej lukkuun kea kōn unin kōnono in. Ak m̧oktata in kwaļo̧k ta kijejeto in ej jab:

  • Ejjab juon et ej oktak.

  • Ejjab bar leļo̧k bar juon āt.

  • Ejjab uno n̄an kōkōm̧anm̧anļo̧k.

  • Ejjab juon ļōmņak.

  • Ejjab juon men ejjab aorōk.

Ijjelo̧kin, ej juon kajim̧we. Ej kean̄ eo an Irooj. Josep Smith ekar jab ņaetan Kabun̄ ekar jepļaaktok jān e, barāinwōt Mormon. Ekar Rilo̧mo̧o̧r eo Make Ekar ba, “Bwe āindein naaj etan Kabun̄ eo Aō ilo raan ko āliktata, em̧ool Kabun̄ eo An Jisōs Kraist im Armej Ro Rekwōjarjar ilo Raan Ko Āliktata.”4

Aaet m̧oktaļo̧k, ilo 34 AD, Irooj eo ad ekar jerkakpeje ekar leļo̧k kōmeļeļe in n̄an membōr ro an Kabun̄ eo An ke Ekar loļo̧k er ilo Amedka. Ilo iien in Ekar ba:

“Kom̧ naaj ņa etan kabun̄ eo ilo Eta. …

“Im enaaj ekōjkan kabun̄ eo Aō ijello̧kun wōt n̄e ej etņake Eta? Bwe eļan̄n̄e juon kabun̄ ņa etan ilo etan Moses innām ej an Moses kabun̄; ak eļan̄n̄e enaaj etņake etan armej innām ej kabun̄ eo an armej; ak eļan̄n̄e e ej etņake Eta innām e ej kabun̄ eo Aō.”5

Kōn menin, etan Kabun̄ eo ejjab maron̄ pepe kake. Ke Rilo̧mo̧o̧r eoej kalikkar et ta eo naaj etan Kabun̄ eo An im aaet im kwaļo̧k kadkad in naan in kean̄ eo An ippān, “Kabun̄ eo Aō ijello̧kun wōt n̄e ej etņake Eta,” E ej lukkuun m̧ool. Im eļan̄n̄e jej kōtļo̧k etan kōm̧m̧an kōjak ko n̄an kōjerbali ak ukōti ak bōlen bōk eddo in etan kōm̧m̧an kōjak ko n̄an kōj make, Ej inepata.

Ta eo ilo juon et ak, ilo jekjek in, juon etan kōm̧m̧an kōjak? N̄e ej itok n̄an etan kōm̧m̧an kōjak ko an Kabun̄ in, āinwōt “Kabun̄ eo an LDS,” “Kabun̄ eo an Mormon,” ak “Kabun̄ eo an Armej ro Rekwojarjar ilo Raan-ko Āliktata,” men eo elukkuun aorōk ej an jako etan Rilo̧mo̧o̧r eo. N̄an joļo̧k etan Irooj jān Kabun̄ eo An ej juon anjo̧ eļap n̄an Setan. N̄e jej joļo̧k etan Rilo̧mo̧o̧r eo, jej lukkuun joļo̧k aolep men ko Jisōs Kraist ekar kōm̧m̧ani n̄an kōj—aaet Pinmuur eo An.

Ļōmņak kōn kōļmenļo̧kjeņ in jān ļōmņak in An: Mour eo Mokta, ekar Jeova, Anij an Kallim̧ur Mokta. Ium̧win tōl eo an Jemān, Ekar Rikōm̧anm̧an eo an laļ in im laļ ko jet.6 Ekar kālet n̄an leļo̧k E Make n̄an ankilaan Jemān im kōm̧m̧ani men ko n̄an aolep ajri ro nejin Anij ko me ejjeļo̧k juon emaron̄ kōm̧m̧ani! Em̧m̧akūt jān aiboojoj eo An n̄an itok n̄an laļ in āinwōt Nejin Wōt Ejitōn Bōro Nejin Jemān ilo kanniōk, kar lukkuun kōnanaiki, kajirere kake, kapiloiki, im kakkure. Ilo Jikin Kallib Gethsemane, Rilo̧mo̧o̧r eo ad ekar bōk Ioon Make aolep metak, aolep jerawiwi, im aolep en̄jake ko rekōmettak im en̄taan eo kwe im n̄a jan̄in iooni im aolep ro me rekar mour ak renaaj mour ilo mour in. Ium̧win eddo eo an eddo in elukkuun kōmettak, bōtōktōk rekar to̧o̧rļo̧k jān aolep ron̄ in menokadu in Ānbwinnin.7 Aolepān metak in ekar ļapļo̧k ke Ekar dōbwāāl ioon dōbwāāl eo ioon Calvary.

Jān en̄jake kein relukkuun kōmetak im Jerkakpeje eo An tokālik—Pinmuur eo An eļap—Ekar letok jab wabanban n̄an aolep, im kanemkwoj kōj kajjojo jān waļo̧k ko an jerawiwi pedped wōt ioon ukweļo̧k eo ad.

Ālkin jerkakpeje eo an Rilo̧mo̧o̧r eo im mej eo an Rijilōk ro An, laļ in ekar wōtlo̧k ilo bun̄ jān tōmak elōn̄ epepen ko. Innām ilo iiō eo 1820, Anij Jemān im Nejin, Jisōs Kraist, rekar waļo̧ktok n̄an Rikanaan Josep Smith n̄an jino Jepļaaktok eo an Kabun̄ eo an Irooj.

Ālkin An kijenmeje aolep men—im āliktata Ekar kōm̧m̧ane n̄an aolep armej, ikar kile kōn eļap būrom̧ōj me jekar bōke ilo ad jab lukkuun kile ta eo ekar kōm̧m̧ane ilo Kabun̄ eo em̧ōj an jepļaaktok an Irooj jān ān̄inn̄ini kōn et ko jet, kajjojo kōm̧m̧akūt et kein an et eo kwojarjar etan Jisōs Kraist!

Aolep Jabōt ilo ad erreeo ilo bōk m̧ōttan kwojkwoj eo, jej kōkāāle kallim̧ur eo ad n̄an Jemedwōj Ilan̄ bwe jej m̧ōņōņō in bōk iood etan Nejin, Jisōs Kraist.8 Jej kallim̧ur n̄an ļoor E, ukweļo̧k, kōjparok kien ko An, im aolep iien keememej E.

N̄e jej jab kobaik etan jān Kabun̄ eo An, jej ke ilo jab ļōmņak kōn kōm̧akūt E āinwōt jibadbad eo eaorōk an mour ko ad.

Bōk etan Rilo̧mo̧o̧r eo iood ekitbuuj kwaļo̧k im kam̧ool n̄an ro jet—jān m̧akūtkūt ko ad im naan ko ad—bwe Jisōs ej RiKraist eo. Jenan̄in ke lukkuun mijak in kalluik juon armej eo ej kūr kōj “Mormon ro” bwe jekar likjab in jojom̧are Rilo̧mo̧o̧r eo Make, n̄an jutak kōn E aaet ilo et eo ekar ņaetan Kabun̄ eo An?

Eļan̄n̄e kōj āinwōt armej ro im āinwōt kajjojo armej ro ewōr ippāer jim̧we n̄an deļo̧n̄e kajoor eo an Pinmuur eo an Jisōs Kraist—n̄an karreo im kōmour kōj, n̄an kōkajoorļo̧k im kōļapļo̧k kōj, im eļaptata n̄an lelōn̄ļo̧k kōj—jej aikuj in lukkuun kile E āinwōt kein jipan̄ eo me ekajoor. Jemaron̄ jinoe ilo ad kūr Kabun̄ eo An kōn et eo Ekar kōm̧m̧ane.

Bwe en̄in ej jem̧ļo̧k eo, Kabun̄ eo an Irooj kwaļo̧ke im kōnono kake āinwōt “Kabun̄ eo an Mormon.” Ak kōj āinwōt ro uwaan Kabun̄ eo an Irooj jejeļā wōn eo ej pād ijjōbbōran: Jisōs Kraist Make. Jerata eo, elōn̄ rej ron̄ naan in Mormon maron̄ ļōmņak bwe jej kabun̄jar n̄an Mormon. Ejjab m̧ool! Jej nōbar im kautiej rikanaan ro etto im reļļap ilo Amedka.9 Ak jej jab rikaļoor ro an Mormon. Kōj rikaļoor ro an Irooj.

Ilo raan ko im̧aan tata in kar kōjepļaaktok Kabun̄ in, naan kein āinwōt Kabun̄ eo an Mormon im Mormon ro 10 kar ekkā kōjerbali āinwōt kōnanaik juon armej—āinwōt naan ko renana, naan in kōmetak—kar kōm̧m̧ani n̄an kōm̧akūt pein Anij ilo an kōjepļaaktok Kabun̄ eo an Jisōs Kraist ilo raan kein āliktata.11

Ro jeiū im jatū, elōn̄ iakwelel ko ņae kōjepļaakgtok et eo ejim̧we etan Kabun̄ in. Kōnke laļ in jej mour ie eobrak kōn meļeļe, im būrookraam̧ ko ilo kam̧pukōr ko rej etali meļeļe ko rej bōk bun̄tōn ko me rej jipan̄ loe meļeļe ko jej aikuj enan̄in ilo iien eo wōt—ekoba meļeļe ko kōn Kabun̄ eo an Irooj—ro rej kōrraat rej ba bwe juon kajim̧we ilo tōre in ejjab jim̧we. Ro jet rej en̄jake bwe kōnke armej aolep jikin rej jeļā kōn kōj āinwōt “Mormon ro” im āinwōt “Kabun̄ in Mormon,” jej aikuj in ļoore āinwōt men eo em̧m̧antata.

Eļan̄n̄e menin ekar juon ekōnono kōn ņaetan juon doulul kōm̧anm̧an in armej, iakwelel kein ren kar anjo̧. Ilo jekjek in eaorōk, jej reilo̧k n̄an E eo Kabun̄ in ej im kile wāween ko an Irooj rejjab, im rejjamin naaj, wāween ko an armej. Eļan̄n̄e jenaaj kijenmej im eļan̄n̄e jenaaj kōm̧m̧ane ijo koņaad, Irooj enaaj tōlļo̧k kōj kōn jerbal in eaorōk. Ālkin men otemjej, jejeļā bwe Irooj ej jipan̄ ro rej pukot n̄an kōm̧m̧ane Ankilaan, āinwōt an kar jipan̄ Nipai kōttōbrak jerbal eo n̄an kalōk juon wa n̄an kijoone lomaļo.12

Jenaaj kōņaan jouj im kijenmej ilo kijejeto ko ad n̄an kajim̧we bōd kein. Media ko rej bōk eddo renaaj meļeļe in uwaake kajjitōk in ad.

Ilo juon kweilo̧k eļap m̧oktaļo̧k, Elder Benjamín De Hoyos ekar kōnono kōn kain m̧akūtkūt in. Eaar ba:

“Jet iiō remootļo̧k ke ikar jerbal ilo opiij eo an public affair an Kabun̄ in ilo Mexico, [juon aō kōm̧pānien im n̄a] kar kajjitōk ippāmro n̄an bōk koņaam̧ro ilo juon show ilo retio. … [Juon iaan būrookraam̧ tōreektōr ro] rekar kajjitōk [ippem], “Etke etan Kabun̄ eo elukkuun aitok? …’

“Kōm̧pānien eo m̧ōtta im n̄a kōm̧ro kar ettōn̄dikdik kōn juon kajjitōk elukkuun em̧m̧an innām wōnm̧aanļo̧k wōt im kōmeļeļeiki etan Kabun̄ eo ke ekar jab kālet jān armej. Ekar letok jān Rilo̧mo̧o̧r eo. … Tōreektōr eo an būrookraam̧ eo ekar m̧ōkaj im kautiej ilo an uwaak, “Kōn menin kōm naaj bar āliji kōn m̧ōņōņō eļap.’”13

Riboot in ej bōktok juon jon̄ak. Juon ilo̧k juon, kijejeto ko ad rem̧m̧antata āinwōt kajjojo armej renaaj aikuj in kajim̧we bōd ko me rekar būki ium̧win elōn̄ iiō ko.14 Jimettan in laļ in remaron̄ ak remaron̄ jab ļoor tōl eo ad ilo kūr kōj kōn et eo ejim̧we. Ak ejjab tarlepin m̧ool eo n̄an kōj bwe jen illu eļan̄n̄e enan̄in aolepān laļ in ej kūr Kabun̄ eo im ro uwaan kōn et ko rebōd eļan̄n̄e jenej kōm̧m̧an ejja wāween in wōt.

Style guide eo ad ekāāl elukkuun in jipan̄. Ej kwaļo̧k: “Ilo meļeļe eo kein kajuon, likio in etan Kabun̄ in ej aikuj in: ‘Kabun̄ eo an Jisōs Kraist im Armej ro Rekwojarjar ilo Raan-ko Āliktata.’ N̄e kōkaduduiki [kein karuo] meļeļe eo ej aikuj in ‘Kabun̄ eo’ ak ‘Kabun̄ eo an Jisōs Kraist’ kar kōņaan. ‘Jepļaaktok eo an Kabun̄ eo an Jisōs Kraist’ ej barāinwōt jejjet im kōņaan.”15

Eļan̄n̄e juon armej ej kajjitōk, “Kwe ke juon Mormon?” komaron̄ uwaak, “Eļan̄n̄e kwoj kajjitōk eļan̄n̄e ij juon uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata, aaet, n̄aij!”

Eļan̄n̄e juon armej ej kajjitōk, “Kwoj ke juon Armej eo Ekwojarjar ilo Raan-ko Āliktata?”16 komaron̄ uwaak, “Aaet, ij. Ij tōmak ilo Jisōs Kraist im ij juon uwaan Kabun̄ eo An ekar jepļaaktok.”

Ro jeiū im jatū, ij kallim̧uri kom̧ bwe eļan̄n̄e jenaaj kōm̧m̧ane ijo em̧m̧antata n̄an kajim̧we et eo ejim̧we an Kabun̄ eo an Irooj, E eo me an Kabun̄ in naaj lelaļtak kajoor im kōjeraam̧m̧an ko n̄an ioon bōran Armej ro Rekwojarjar ilo Raan-ko Āliktata,17 kōņaan ko me jej jan̄in kar loi. Enaaj wōr ippād jeļāļo̧kjeņ im kajoor eo an Anij n̄an jipan̄ kōj bōk kōjeraam̧m̧an ko an jepļaaktok eo an gospel eo an Jisōs Kraist n̄an aolep laļ ko, kil, lo, im armej im n̄an kōpooje laļ in n̄an Itok eo an Kein Karuo an Irooj.

Kōn menin, ta eo ilo juon et? N̄e ej itok n̄an et eo etan Kabun̄ eo an Irooj, uwaak eo ej “Aolep Men!” Jisōs Kraist ej tōl kōj n̄an kūr Kabun̄ eo kōn Etan kōnke ej Kabun̄ eo An, obrak kōn kajoor eo An.

Ijeļā bwe Anij emour. Jisōs ej RiKraist eo. E ej tōl Kabun̄ eo An rainin. Ij kam̧ool ilo etan ekwojarjar Jisōs Kraist, amen.

Kakeememej ko

  1. “Irooj ekar im̧we kōļmenļo̧kjeņ eo aō kōn aorōk in āt eo Ekar kwaļo̧k n̄an Kabun̄ eo An, aaet Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ewōr ad jerbal im̧aan n̄an boktok n̄an kōj make n̄an ippān Ankilaan Anij. Ilo wiik ko kiiō, elōn̄ ritōl ro an Kabun̄ in im radik ko rekar jino bun̄tōn in eaorōk n̄an kōm̧m̧ane. Meļeļe ko jet kōn unin kōnono in eaorōk naaj kōpooje n̄an kom̧ ilo allōn̄ kane rej pedo tok” (Russell M. Nelson, ilo “The Name of the Church” [official statement, Aug. 16, 2018], mormonnewsroom.org).

  2. Būreejtōn ro m̧okta an Kabun̄ in kar kōm̧m̧ane ejja kajjitōk in wōt. N̄an waanjon̄ak, Būreejtōn George Albert Smith ekar ba: “Jab leļaļļo̧k Irooj ilo kūr Kabun̄ in Kabun̄ inMormon. Ekar jab kūri Kabun̄ eo an Mormon” (in Conference Report, Apr. 1948, 160).

  3. Lale “Style Guide—The Name of the Church,” mormonnewsroom.org.

  4. Katak im Bujen ko 115:4.

  5. 3 Nipai 27:7–8.

  6. Lale Moses 1:33.

  7. Lale Katak im Bujen ko 19:18.

  8. Lale Moronai 4:3; Katak im Bujen ko 20:37, 77.

  9. Mormon ekar juon rijeje ro emān reļļap an Bok in Mormon eo, ro jet rej Nipai, Jekab, im moronai. Aolep rikam̧ool ro an Irooj, āinwōt kar rūkook eo kar im̧we, Rikanaan Josep Smith.

  10. Aaet naan ko Mormonites rekar naan ko ilubwilijin kar kajirere kaki kar kōjerbali (lale History of the Church, 2:62–63, 126).

  11. Naan in kōnana ko jet rekar waļo̧k ilo tōre ko ilo Kallim̧ur Ekāāl. Ilo tōre in mālijjon̄ eo an Rijilōk Paul im̧aan Felix, Paul ekar ba bwe en erom̧ “juon ritōl an kūrub an kabun̄ ko an Nazarenes” (Jerbal 24:5). Kōn kōjerbal naan eo “of the Nazarenes,” juon rikōnono ekar je: “Menin ekar et eo ekkā letok n̄an Rikūrijin ro ilo wāween kakkure. Er kar ņaetaer kōnke Jisōs ekar RiNazareth” (Albert Barnes, Notes, Explanatory and Practical, on the Acts of the Apostles1862], 313).

    Āinļo̧kwōt, bar juon naan in kōnono: “As our Lord was contemptuously called ‘The Nazarene’ (Matu xxvi. 71kōn menin Riju ro rekar en̄inen̄in rikaļoor ro An ‘Nazarenes.’ Rekar jab kōņaan kwaļo̧k m̧ool ke er rekar Rikūrijin, i.e. rikaļoor ro an Messaia eo” (The Pulpit Commentary: The Acts of the Apostles, ed. H. D. M. Spence and Joseph S. Exell [1884], 2:231).

    Ilo juon naan einļo̧k wōt, Elder Neal A. Maxwell ba: “Throughout scriptural history, we see recurring efforts to demean prophets in order to dismiss them—to label them in order to diminish them. Enan̄in aolep, ijoke, er rej meļo̧kļo̧k er jān bwebwenato aer ej waļo̧k kiiō im jān bwebwenato eo aer ejjab ekkejļo̧k ilo kabun̄. Āliktata, Rikūrijin ro m̧okta rekar make ņaetaer ‘ kabun̄ eo an Nazaren.’ (Jerbal 24:5.)” (“Out of Obscurity,” Ensign, Nov. 1984, 10).

  12. Lale 1 Nipai 18:1–2.

  13. Benjamín De Hoyos, “Called to Be Saints,” Liahona, May 2011, 106.

  14. Ilo an ejjeļo̧k ad kajoor ioon ta armej ro jet remaron̄ kūr kōj kaki, ewōr ad kajoor ioon wāween ad kōnono kōn kōj make. Ewi wāween jemaron̄ kautiej ro jet n̄an nōbar et eo ejim̧we an Kabun̄ in eļan̄n̄e kōj āinwōt membōr ro jej likjab in kōm̧m̧ane menin?

  15. “Style Guide—The Name of the Church,” mormonnewsroom.org.

  16. Naan eo armej eo ekwojarjar ekkā kōjerbale ilo Baibōl eo Ekwojarjar. Ilo Bok eo a Paul n̄an Riepesōs, n̄an waanjon̄ak ekar kōjerbal naan in armej eo ekwojarjar diktata juon kōttan ilo juon jebta. Juon armej ekwojarjar ej juon armej ej tōmak ilo Jisōs Kraist im ej kajjieon̄ ļoor E.

  17. Lale Katak im Bujen ko 121:33.