Kwokōņaan Bwe Kwōn Mour Ke?
Elder Matthew L. Carpenter
Jān Jiljilimjounn̄oul eo
Kōn Pinmuur eo an Jisōs Kraist, eļan̄n̄e jenaaj kālet n̄an ukweļo̧k m ukōt būruōd n̄an Rilo̧mo̧o̧r eo, E enaaj kōmour kōj ilo jetōb.
Jet allōn̄ ilo mijen eo an, ļaddik eo nejim edik im mijenede eo m̧ōttan kar kam̧ōj iien katak eo aerro ke ļaddik eo nejim kar en̄jake metak ilo bōran. En̄jake eo an ekar kōjak; ilo jinoin ekar jaje kabwijer pein anmiin̄, innām ekar mej loon. Tu anmiin̄ in mejān eaar jino mo̧kun. Eaar pen an kōnono. Eaar jeļā ke elōn̄ men rekar bōd. Ta eo ekar jap jeļā ej ke ekar pād ilo io̧ļap in nan̄inmij in an būļak bōtōktōk ilo jilu jikin ko ilo kamlij eo an. Eaar jino leln̄o̧n̄ ke ekar jaje m̧akūtkūt rājetin. Ewi m̧ōkaj in an juon eo ej stroke bōk jipan̄ maron̄ kajoor kūtien ilo jon̄an an kammoūrūr. Mijenede eo m̧ōttan eļap tōmak ippān kar jerbal ilo kālet. Ālkin ko̧o̧l e 911, kar leļo̧k n̄an e kōjeraam̧m̧an. Ekabūlōn̄ōn̄, ambulance eo ekar ļalem minūt ettoļo̧k.
Ālkin aer kar buuļ kake ļaddik eo nejim n̄an hospital, rilale rinan̄inmij eo kar lale wāween eo im kwaļo̧k ke rej aikuj kar jerbale juon uno1n̄an ļaddik eo nejim bwe en nej maron̄ ukōt kūtien mej rājet in ānbwinnin eo ālkin jet iien. Bōtaap, eļan̄n̄e ļaddik eo nejim ejjab mej rājet in ānbwinnin, uno eo emaron̄ nej kōm̧m̧an ajāllik ko reļļap, āinwot bōtōktōk ilo kamlij. Ļaddik eo nejim kar aikuj in kālet. Ekar kālet n̄an bōk uno eo. Ijo ke kamo̧mo̧ eo elet ekar bōk elōn̄ jerbal in aprejin ko im elōn̄ allōn̄ ko, ļaddik eo nejim ekar tokālik bar rool n̄an kam̧ōj mijen eo an ālkin an kar nan̄inmij in mej turājet in ānbwin eo an kar maron̄ oktak.
Jemedwōj Ilan̄ ej kajoor-pōtata im jeļā-aolep men. E jeļā m̧ōjņo̧ ko ad ilo kaniōk. Ej kile metak ko ad ilo kanniōk tok wōt jān m̧ōjņo̧ an ānbwin, nan̄inmij, ritto ļo̧k, jidilo̧k ko, im kapokpok ko ilo ļotak. E ej kile apan̄ ko an en̄jake ko rej eddāp ippān tarukelel, make iaad, liejļōļ, ak m̧ōjņo̧ ko an kōļmenļo̧kjeņ. E jeļā kajjojo iaan armej ro im kar jorrāān jān kalijōkļo̧k ak ro im kar kakure er. E jeļā mōjņo̧ ko ad im mennin kapo ko jej apan̄ kaki.
Ilo mour in jej etale n̄an lale eļan̄n̄e jenaaj kālet em̧m̧an jān nana. N̄an ro rej kōjpārok kein ko An, renaaj jokwe Ippān “ilo wāween m̧ōņōņō eo ejjeļo̧k jem̧ļo̧kin.”2 N̄an jipan̄ kōj ilo eddōkļo̧k eo ad n̄an erom̧ āinwōt E, Jemād Ilan̄ kar leļo̧k kajoor im jeļāļo̧kjen n̄an Nejin, Jisōs Kraist. Ejjeļo̧k nan̄inmej ko ilo kaniōk, kōļmenļo̧kjeņ, ak ilo jetōb me Kraist ejjab maron̄ kōmour jān.3
Jān an Rilo̧mo̧o̧r eo jerbal in karejar ilo laļ in, jeje ko rekwōjarjar rej kwaļo̧k elōn̄ iien kabūlōn̄lōn̄ me Jisōs Kraist ekar kōjerbal kajoor eo An n̄an kōmour ro raar en̄taan ilo kanņiōk.
Gospel eo an Jon ej kwaļo̧k bwebwenato in juōn em̧m̧aan eo ekar pād im en̄taan ium̧win 38 iiō kōn nan̄inmij in ake.
“Ke Jisos eaar loe an babu, im jeļā bwe to an kar bed ilo wāwein eo, eaar ba n̄an em̧m̧aan eo, Kwō kōnaan bwe kwōn mour ke?”
Em̧m̧aan eo ekar ba ļo̧k ke ejeļo̧k kar pād turin im jipan̄ e ke ekar lukkuun aikuj.
Jisōs eaar jiron̄ ļo̧k em̧m̧aan eo, “Kwōn jerkak, bōk kiniōm̧, im etal.”
‟Im em̧ōkaj an armej eo mour, im bōk kinien, im etal.”4
Jouj im kakeememej jon̄an iien ņe em̧m̧aan in ekar en̄taan ippān make (38 iiō) im jon̄an m̧ōkaj in kōmour eo ke Rilo̧mo̧o̧r ekar jede tok. Kōmour eo ekar “mōkaj.”
Ilo bar juōn iien, kōrā eaar wōr an naninmij in to̧o̧rļo̧k ium̧win 12 iiō, eo mour eo an kar pād iumūn rilale rinan̄inmij ro, … kar itok ippān, im un̄n̄ur tulaļ in nuknuk eo an; im m̧ōkaj an jako an bōtōktōk to̧o̧r ļo̧k [kar bōjrak]. …
“Im Jisōs e ba, Wōn ej un̄n̄ūr Eō:, bwe I ar jeļā kōn an kajoor ilo̧k jān Eō.”
“Im ke kōrā eo kar lo ke e jab tilekek … kwaļo̧k im̧aan mejān armej otemjej … im kōjkan e m̧ōkaj an mour.”5
Kōn jerbal in karejar eo An, Kraist ekar katakin ke E elōn̄ an kajoor ioon ānbwin kaniōk eo. Jejjap maron̄ bōbrae iien eo me Kraist enaaj kōmour nan̄inmij ilo ānbwin n̄e renaaj waļo̧k. Kōmour ej kōm̧m̧an ilo Ankilaan im an māletlet. Ilo jeje ko rekwōjarjar, jet rej en̄taan ium̧win 10 jim̧a iiō, jet, aolepān mour ko aer. Mōjņo̧ ko an mour in kaniōk remaron̄ kōkm̧anm̧an ļo̧k kōj im kam̧ūlaļ ļo̧k lōke ioon Anij. Bōtaap n̄e jej kōtļo̧k bwe jen kutbuuj Kraist, E enaaj kōkajoor kōj ilo jetōb bwe jen marōn kajoorļo̧k n̄an jelm̧ae eddo ko ad.
Ilo jemļo̧kin, jenaaj jeļā aolep nan̄inmij ilo kaniōk, ilipijinjin naaj kōmour ilo Jerkakpije eo. Ej juon menin letok n̄an aolep armej kōn Pinmuur eo an Jisōs Kraist.6
Jisōs Kraist emaron̄ kōmour eļapļo̧k jān anbwin kanniōk ko ad. E emaron̄ bar kōmour jetob ko ad barāinwōt. Jān jeje ko rekwōjarjar jej katak wāween an Kraist kar jipan̄ jetōb ko raar m̧ōjņo̧ im kar kōmour er.7 Ilo ad lin̄ūri en̄jake kein, ad kōjatdikdik im tōmak ilo kajoor eo an Rilo̧mo̧o̧r n̄an kōjeraam̧m̧an mour ko ad naaj ļapļo̧k. Jisōs Kraist emaron̄ ukōt būruōd, kōmour kōj jān men ko rej waļo̧k jān kalijōkļak ak nana ņae kōj me jej en̄jaki, im kōkajoorļo̧k wāween ad jelm̧ae utamwe im metak bōro ko, bōktok n̄an kōj aenōm̧m̧an n̄an jipan̄ kōj jelm̧ae mālijon̄ ko ilo mour ko ad, kōmour kōj im letok en̄jake.
Kraist emaron̄ bar kōmour kōj n̄e jej jerawiwi. Jej jerawiwi n̄e jej kakkure juon iaan kien ko an Anij im em̧ōj ad jeļā kake.8 N̄e jej jerawiwi, jetōb eo ad ej ettoon. Ejjeļo̧k juon men ettoon emaron̄ pād ippān Anij.9 “Erreo jān jerawiwi ej n̄e jej bōk kōmour ilo jetōb.”10
Anij Jemād ejeļā ke jenaaj jerawiwi, bōtaap E eaar kōpooj juon iaļ bwe jen maron̄ bōk lo̧mo̧o̧r. Elder Lynn G. Robbins ekar katakin: “Ukweļo̧k ejjab [An Anij] joor toklik ilo iien jej likjab. Ukweļo̧k ej An karōk, ilo an jeļā bwe jenaaj ukweļo̧k.”11 Ne jej jerawiwi, elōn̄ ad kālet n̄an kālet em̧m̧an jān nana. Jej kālet em̧m̧an n̄e jej ukweļo̧k ālkin ad jerawiwi. Kōn Jisōs Kraist im en̄taan in pinmuur eo An, jemaron̄ bōk lo̧mo̧o̧r jān jerawiwi ko ad im bar jepļaakļo̧k n̄an ippān Anij Jemād eļan̄n̄e jej ukweļo̧k. Kōmour ilo jetōb ejjab rājet wōt—ebōk kajoor in lo̧mo̧o̧r eo an Rilo̧mo̧o̧r eo im ukweļo̧k ilo m̧ool ilo rājet eo juon an rijerawiwi eo. N̄an ro rej kālet n̄an jab ukweļo̧k, rej abwin bōk kōmour eo Kraist ej letok. N̄an er, āinwōt n̄e lo̧mo̧o̧r eaar jab kōm̧m̧an.12
Ke em̧ōj aō ko̧o̧njeļ ippān ro jet bwe ren kapukot n̄an ukweļo̧k, ikar būlōn̄ ke armej ro im rej mour ilo jerawiwi ej pen n̄an kōm̧m̧an kālet ko rejjim̧we. Jetōb Kwōjarjar emaron̄ illo̧k jen er, im ekutkut an pen aer kōm̧m̧an kālet ko me naaj kepaakļo̧k er n̄an Anij. Rej kobōk ium̧win allōn̄ ak iiō, jook im mijak kōn ajālik ko an jerawiwi ko aer. Rej en̄jake ke remaron̄ jab oktak ak jeorļo̧k bōd. Ikar kijon̄ ron̄ aer kwaļo̧k kōn aer mijak n̄e ro reiakwe er rejeļā kōn ta eo rekar kōm̧m̧ane, n̄e ren bōjrak aer iakwe er ak etal jen er. N̄e rej ļo̧o̧r wāween ļōmņak rōt in, rej pād wōt im jab keroro im karumuj aer ukweļo̧k. Ebōd aer en̄jake ke em̧m̧anļo̧k n̄an jab ukweļo̧k kiiō bwe ren maron̄ jab kōmetak ro rej iakwe. Ilo ļōmņak ko aer em̧m̧an ļo̧k en̄taan ālkin mour in jān kōm̧m̧ane jerbal in ukweļo̧k eo kiō. Ro jeiū im jatū, ejjamin em̧m̧an n̄an karumuj am̧ ukweļo̧k. Rikapo eo ej bōbrae kōj jān ad m̧ōkaj in jerbal ioon tōmak eo an ilo Jisōs Kraist.
N̄e ro rej iakwe kōj rej jeļā kōn mo̧o̧ļ in m̧wil in jerawiwi, ijo ke renaaj lukkuun kinejnej, rekōņaan jipan̄ kōj ukweļo̧k ilo m̧ool n̄an oktak im juon wōt ippān Anij. Ilo m̧ool, kōmour ilo jetōb em̧ōkaj an waļo̧k n̄e rijerawiwi ej kwaļo̧k ruwōn im ej jepooļ jen ro rej iakwe er im jipan̄ er n̄an meļo̧kļo̧k jerawiwi ko aer. Jouj im keememej bwe Jisōs Kraist ekajoor ilo wāween in An kōmour ro ejjeļo̧k aer jerawiwi im ro̧o̧ļļo̧k Ippān.13
Būreejtōn Boyd K. Packer eaar kwaļo̧k: “Jetōb ko ad rej jorrāān n̄e jej kōm̧m̧an bōd im jerawiwi. Bōtaap ejjab āinwōt in kōn ānbwin kaniōk in ad, n̄e bun̄tōn eo an ukweļo̧k ej dedeļo̧k, ejjeļo̧k jenkwōn kinej ej waļo̧k kōn Pinmuur eo an Jisōs Kraist. Kallim̧ur eo in:‘Lo, e eo em̧ōj an ukeļo̧k jen jero̧wiwi ko an, ejja in wōt ej bōk jeorļo̧k bōd, im N̄a, Irooj, ij jab bar keememeji’ [Katak im Bujen ko 58:42].”14
N̄e jej ukweļo̧k “kōn aolepen būruōd,”15 “m̧ōkajin an naaj karōk eo eļap n̄an lo̧mo̧o̧r” itok n̄an mour ko ad.16 Rilo̧mo̧o̧r eo enaaj kōmour kōj.
Mijen companion im eo etijōm̧ļo̧k ilo lale rinaninmij im rekar jipan̄ ļaddik eo nejim kōn nan̄inmij in mej rājet in ānbwin eo an ilo mijen eo rekar m̧ōkaj n̄an jerbal. Ļaddik eo nejin ekar kālet n̄an bōk uno in ukōt mej rājet in ānbwin eo. Mej rājet in ānbwin eo an eaar jarjar wōt kōn an kūrro me ekar pād wōt ilo mour eo an ekar jako. Āinwōt in, toon wōt ad m̧ōkaj n̄an ukweļo̧k im bōktok Pinmuur eo an Jisōs Kraist n̄an mour ko ad, iien eo wōt jenaaj maron̄ mour jān jekjek ko an jerawiwi.
Būreejtōn Russell M. Nelson eaar letok karuwainene in: “Eļan̄n̄e em̧ōj am̧ etal jen iial eo, … N̄aij karuainene eok … jouj im ro̧o̧ltok. Jekdo̧o̧n ta inepata ko ami, jekdo̧o̧n ta apan̄ ko ami, ewōr juon jikin n̄an kom̧ ilo menin, Kabun̄ eo an Irooj. Kom̧ im epepen ko rejjan̄in de ļotak naaj jeraam̧m̧an jān m̧akūtkūt ko ami kiiō n̄an bar ro̧o̧ltok n̄an iaļ in bujen eo.”17
Kōmour eo an ilo jetob ebōk kōj n̄an leļo̧k ankilaad n̄an Rilomoor eo. Jejjab aikuj in karum̧uji! Jej aikuj jerbal rainin! Jerbal kiiō bwe kauwōtata ko an jakļaj ren jab bōbrae em̧m̧anļo̧k ad indeeo. Ilo aō kar kōnnaan, eļan̄n̄e kwaar en̄jake n̄an kajitōk jeorļo̧k bōd ippān juon kwaar bōd ņae, n̄aij karuwainene eok n̄an jerbal. Kwaļo̧k n̄an er ta eo kwaar kōm̧m̧ane. Kajjitōk kōn jeorļo̧k bōd. Eļan̄n̄e kwaar kōm̧m̧an jerawiwi n̄an bobrae eok jen karbob n̄an tampeļ, n̄aij karuainene eok n̄an ko̧o̧njeļ ippān bisop eo am—rainin. Jab rum̧uj.
Ro jeiū im jatū, Anij ej Jemād Ilan̄ eo ej iakwe. Em̧ōj An leļo̧k aolep kajoor im jeļāļo̧kjen n̄an Nejin Jitōnbōro, Jisōs Kraist. Kōn E, aolep armej naaj juōn raan mour jān nan̄inmij ko an kaniōk indeeo. Kōn Pinmuur eo an Jisōs Kraist, eļan̄n̄e jenaaj kālet n̄an ukweļo̧k im ukot būruōd n̄an Rilomor eo, E enaaj kōmour kōj ilo jetōb. Kōmour eo emaron̄ m̧ōkaj an ijjino. Kālet eo ej ad. Kōj jenaaj ke bōk kōmour?
Ij kam̧ool bwe Jisōs Kraist ekar kōļļā wōņeņ eo bwe jān bōk kōmour. Bōtaab jej aikuj kālet n̄an bōk uno in kōmour eo E ej letok. Kōm̧m̧ane rainin. Jab rum̧uj. Ilo etan Jisōs Kraist, amen.