Kom̧win Jab Lōļn̄o̧n̄
Jān Elder Ronald A. Rasband
Jān Doulul eo an Jon̄oulruo Rijilōk ro
Peran, ro jeiū im jatū. Aaet, jej mour ilo raan ko rekauwōtata, bōtaab ilo ad pād wōt ilo iaļen bujen eo, jej jab aikuj in mijak.
Ij kwaļo̧k ao kam̧ool kōn ennaan eo jān Būreeejtōn Russell M. Nelson im Elder Quentin L. Cook kar kwaļo̧k kiō ļo̧k kōn juon mejatoto in aenom̧m̧an im ippen doon eo kōn Ko̧o̧njeļ eo an Būreejtōnji eo Kein Kajuon im Doulul eo an Jon̄oulruo Rijilōk ro. Ijelā bwe ennaan in revelesōn kein rej kōlmenļo̧kjeņ im maron̄ eo an Irooj im enaaj kōjeraam̧m̧an im kōkajoor kajojo, baam̧le ko, im Kabun̄ eo an Jisōs Kraist im Armej ro Rekwojarjar ilo Raan-ko Āliktata n̄an epepen eo ej itok.
Jet iiō ko remootļo̧k, juon iaan leddik ro nejimro ekar m̧are im ļeo pāleen ekar kajjitōk ippān Sister Rasband im na juon kajjitok eaorōk, kōn mour: “Ej ke em̧m̧an wōt im māletlet n̄an boktok juon ajri n̄an juon laļ eo jej jokwe ie enana im kamijaak?”
Kiiō, ej juon kajjitok eaorōk n̄an juon m̧am̧a im baba n̄an ļōmņak kake ippān ajri ro nejieer rejitōn bōro emōj aer m̧are. Kōm̧ro kar ron̄ mijak ilo anikieer im en̄jake mijak ilo būrueer. Uwaak eo am̧ro ekar pen kōn “Aaet, ej lukkuun em̧m̧an,” ilo am kwaļo̧k kōn pedped ko kōn katak ko an gospel in im kōn lukkuun būruemro im kōn ta ko kōm̧ro jeļā kōn mour in.
Mijak ejjab kāāl. Rikaļoor ro an Jisōs Kraist. ilo ļōmalo eo an Galili, rekar mijak “kōto, im ņo” ilo marok in bon̄ōn̄ eo.1 Āinwōt rikaļoor ro an rainin, ewōr barāinwōt ad mijak. Ro rem̧m̧an ded rej mijak lokjak ko āinwōt m̧are. Ro reddik rekar m̧are, āinwōt ro nejimro, remaron̄ mijak n̄an bōktok ajri n̄an laļ in me ej ļapļo̧k an nana. Mijenede ro rej mijak elōn̄ men ko, eļaptata ilo aer jibadekļo̧k ro rejaje kajeer. Ro emej pāleer rej mijak in wōnm̧aanļo̧k ilo aer make iaer. Jodikdik ro rej mijak eļan̄n̄e rej jab bōk er; ro rej jino jikuuļ rej mijak raan eo jinoin tata ilo jikuuļ; rijikuuļ ro ilo university rej mijak in loe test ko rekar būki. Jej mijak likjab, jum̧ae, inepata im ko jet jej jab jeļā kaki. Jej mijak ņo ko reļļap, em̧m̧akūtkūt an laļ, im kijeek ko rej ajeeded ilo āne im ilo mour ko ad. Jej mijak eļan̄n̄e rej jab kālet kōj, im ilo bar juon wāween, jej mijak ne rej kālet kōj. Jej mijak bwe jej jab em̧m̧an; jej mijak bwe ejjeļo̧k an Irooj kōjeraam̧m̧an n̄an kōj. Jej mijak oktak, im mijak ko ad remaron̄ ļapļo̧k im kaam̧jak. Emōj ke aō kobaik aolep?
Jān jem̧aan, mijak ej kadikļo̧k ad loe ta ko Anij ej loe n̄an ajri ro Nejin. Elap ao iakwe bwebwenato in Ilaija ilo 2 Kiin̄ ro. Kiin̄ in Syria eo ekar jilkinļo̧k juon jar in tariņae ro rekar “itok ilo bon̄, im kōpooļe jikin kweilo̧k eo.”2 Rekar itōn bōke im m̧ane rikanaan Ilaija. Jej riit:
“Ke ļeo rikarijeran armej an Anij ear jerkak ke e jibbon̄ wōt, im diwōjļo̧k, lo, juon jar in tariņae im kidia ko im jariot ko rej kōpooļ jikin kweilo̧k eo. Im rikarijeran ear ba n̄an e, “Yok, aō Irooj! Jenaaj et?”3
Enin kar mijak ekar kōnono.
“Im [Ilaisha] ekar uwaak, Kwōn jab mijak: bwe ro rej rie kōj relōn̄ jān ro rej rie er.”4
Bōtaab ekar jab bōjrak ijin.
“Ilaisha ekar jar, im ba, Irooj, Ij jar n̄an eok, kwōn kapeļļok mejān ļein bwe en loļo̧kjeņ. Im Irooj ekar kapeļļok mejen likao eo im ear loļo̧kjeņ: im ekar lo: im, kōn menin, toļ eo e obrak kōn kidia ko im jariot kijeek ko rej kōpooļ Ilaisha”5
Emaron̄ lōn̄ ak emaron̄ ejjeļo̧k jariot ko an kijeek rej jilkintok n̄an kōļapļo̧k mijak ko ad im bōk demon ko ad, ak katak in ealikkar. Irooj ej pād ippād, ļōmņak kōn kōj im kōjeraam̧m̧an kōj ilo wāween ko E wōt emaron̄ kōm̧m̧ani. Jar emaron̄ kūr tok kajoor im revelesōn ko me jej aikuj n̄an likūti iolap in ļōmņak ko ilo Jisōs Kraist im katok in pinmuur eo An. Irooj ejeļā bwe ilo jet iien jenaaj en̄jake mijak. Emōj aō pād ijin im barāinwōt kwe, unin an jeje ko rekwojarjar kobaļo̧k ilo kapilōk ko an Irooj:
“Kom̧in m̧ōņōņō, im jab mijak.”6
“Reitok n̄an Eō ilo ļōmņak otemjeļo̧k; jab pere, jab mijak.”7
“Jab mijak, bwij jidikdik in sip.”8 Em̧m̧an ippa mweoeo in “bwij jidikdik in sip.” Ilo Kabun̄ in jemaron̄ dik ilo oran kōn wāween an lal in bōnbōn, bōtaab eļan̄n̄e jenaaj kōppeļļo̧k māj in jetōb ko ad, “bwe ro rej rie kōj relōn̄ jān ro rej rie er.”9 Rilale sip eo em̧m̧an, Jisōs Kraist, ej wōnm̧aanļo̧k, “laļ im hell ren koba ņae kom̧, bwe eļan̄n̄e kom̧ij ekkal ioon Aō ejm̧aan, rej jamin anjo̧.”10
Elmen an mijak bōk jikin? N̄an juon ļaddik, eo ekar jutak tūrin Ilaija, juon rikanaan an Anij. Ij kwaļo̧k ejja kallim̧ur in wōt. N̄e jej ron̄jake Būreejtōn Russell M. Nelson, n̄e jej ron̄jake kapilōk ko an, jej jutak ippān rikanaan an Anij. Keememej naan ko an Josep Smith: “Im kiiō, ālikin elōn̄ naan in kam̧ool ko me kar letok kōn E, en̄in ej naan im kam̧ool eo, āliktata in aolep, eo me kōmij lewōj kōn E: Bwe E emour!”11 Jisōs Kraist emour. Iakwe eo ad n̄an E im kapilōk eo An ej joļo̧k mijak.
Ikdeelel eo ad “bwe Jetōb eo An”12 en maron̄ pād ippād iien otemjej enaaj joļo̧k mijak n̄an kalimjōkļo̧k mour ko ad ilo mour indeeo. Būreejtōn Nelson ej kakōl, “Ak ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”13
Irooj ej ba, kōn nana ko renaaj kajjieon̄ kalibobo āne im naaj kapen būrueen elōn̄, “Ro rikaļoora renaaj jutak ilo jikin ko rekwojarjar, im rej jamin em̧m̧akūt.”14
Innem kapilōk in ekwojarjar: “Kom̧in jab lōļn̄o̧n̄, bwe, n̄e aolep men kein renaaj waļo̧k, kom̧ maron̄ jeļā ke kallim̧ur ko me kar kōm̧m̧ani n̄an kom̧ renaaj kūrm̧ool.”15
Jutak ilo jikin ko rekwojarjar—kom̧in jab lōļn̄o̧n̄—im kallim̧ur ko renaaj kūrm̧ool. Jān lale mok jet iaan mijak kein ippān doon.
Mokta, jutak ilo jikin ko rekwojarjar. Eļan̄n̄e jenaaj jutak ilo jikin ko rekwojarjar—moko imōd rekwojarjar, imōnjar ko emōj aje, tampeļ ko emōj aje—jej en̄jake Jetōb eo an Irooj ej pād ippād. Jemaron̄ pukote uwaak in kajjitok ko rej kalōļn̄o̧n̄ kōj ak aenōm̧m̧an bwe jen meļo̧kļo̧ki. En̄in ej Jetōb eo ej em̧m̧akūt. Ijoko rekwojarjar ilo aelōn̄ in Anij ilo laļ in ej kūr n̄an ettā, kauteej ro jet, em̧m̧an eo ad make ilo ad mour kōn gospel in, im kōjatdikdik eo ad n̄an likūt mijak im pukōt kajoor eo an Jisōs Kraist ilo Pinmuur eo An.
Ejjeļo̧k ruum̧ n̄an mijak ilo ijoko rekwojarjar jikin Anij ak ilo būruwōn Ajri ro nejin. Etke? Kōnke iakwe. Anij ej iakwe kōj—aolep iien—im jej iakwe E. Iakwe eo an Anij ej joļo̧k aolep mijak, im iakwe eo An ej pād ilo ijoko rekwojarjar. Ļōmņak Kake. N̄e jej bar lōke kallim̧ur ko ad ippān Irooj, n̄e jej eļļo̧k jān iaļ eo An ej tōl kōj n̄an mour indeeo, n̄e jej kajjitōk ak pere ijo ad ilo kōm̧anm̧an eo an eļap, n̄e jej kōtļo̧k bwe mijak en kōppeļļok kōjem ko n̄an aolep ko mōttan—ebbweer, illu, inepata, m̧akoko—Jetōb ej etal jān kōj, im jej pād ilo an jako Irooj. N̄e jej jeļā elmen men in, kwojeļā ejjab juon jikin em̧m̧an n̄an pād ie. N̄an ukōte, eļan̄n̄e jenaaj jutak ilo jikin ko rekwojarjar, jej en̄jake iakwe eo an Anij, im “iakwe eweeppān ej joļo̧k mijak otemjeļo̧k.16
Kallim̧ur eo juon ej :Kom̧in jab lōļn̄o̧n̄.”17 Jekdoon jerawiwi im pok ko rej kobrak laļ in, jej kallim̧ur kōn tōmak eo ad aolep raan ilo Jisōs Kraist bwe “aenōm̧m̧an jān Anij, eo ej eļļā jān jeļā otemjej.”18 Im n̄e Kraist enaaj itok ilo aolep kajoor im aiboojoj, nana, kakurre, ekajet enaaj jemļo̧k.
Etto Rijilōk Paul ekar kanaan kōn iien kein ad, ekar ba n̄an Timote:
“A kwōn jeļā men in, bwe ilo raan ko āliktata, iien ko re nana renaaj waļo̧ktok.
“Bwe armej ro renaaj yokwe er make, im renaaj ri arōk m̧weiuk, im ri juwaļōn̄ļōn̄, im ri kajjirere, im ro rej kipiliia n̄an jemeir im jineir, im ro rej jab kam̧m̧oolol, im ri nana, …
“… ro rej iakwe men in kabun̄būneir eļap jān aer iakwe Anij.”19
Keememej, “ro rej rie ippād” jim̧or ilo laļ in im ran̄ōl eo, ro rej iakwe Irooj kōn aolepān būrueer, maron̄, im kajoor, “ro rej rie kōj relōn̄ jān ro rej rie er.”20 Iien otemjej n̄e jej lōke Irooj im iaļ ko An, n̄e jej niknik ilo jerbal eo An, jeban mijak men ko an laļ in im jeban lōļn̄o̧n̄ kaki. Ij akweļap ippāmi n̄an likūti men ko an laļ im un ko im pukot mour in jetōb ilo kajjojo raan in mour ko ad. Iakwe ta eo Irooj ej iakwe—ekitbuuj kien ko an, imoko Imōn rekwojarjar, bujen ko ad rekwojarjar Ippān, kwojkwoj eo aolep Jabōt, kōnono eo ad ilo jar—innām kwoban lōļn̄o̧n̄.
Eo āliktata: lōke Irooj im kallim̧ur ko An. Ijeļā bwe aolep kallim̧ur ko An renaaj kūrm̧ool. Ijeļā men in ilo aō jutak im̧aami ilo iien kweilo̧k in ekwojarjar.
Irooj emōj an kwaļo̧k: “Bwe ro remālōtlōt im rekar bōk m̧ool eo, im rekar bōk Jetōb Kwōjarjar bwe en aer ritōl, im rekar jab po ilo m̧oņ—em̧ool Ij ba n̄an kom̧, rejamin naaj juoklaļļo̧k er im joļo̧k er ilo kijeek eo, ak renaaj mour ilo raan eo.”21
En̄in bwe jān jab lōļn̄o̧n̄ kōn nana ko rainin, kōn ro rej pād ilo mweo eļap im nana, ro rej kajjieon̄ kapojrak m̧ool in jerbal im kijetoto in jerbal eo n̄an Irooj Jisōs Kraist. Kijenmej, lōke, im iakwe eo ej itok jān juon bōro eo ejjab eddo kōn lōļn̄o̧n̄ ak nana ko. Būreejtōn Nelson, eo ej “kijenmej n̄an ilju im jekļaj,” ej kakeememej koj: “Eļan̄n̄e jekōņaan bwe en wōr ippād jabdewōt kōjatdikdik ej etale juon men n̄an lale aorōk in elōn̄ meļeļe ko im katak ko an armej rej jum̧aeik m̧ool eo, jej aikuj in ekkatak n̄an bōk revelesōn.”22
N̄an bok revelesōn, jej aikuj likūt gospel eo ilo mour ko ad jinoin tata im jipan̄ kōn tōmak im jetōb ippān ro jet āinwōt n̄an kōj make.
Spencer W. Kimball ekar juon rikanaan iien ko ke ij jodikdik wōt. Ilo jet iiō remootļo̧k, ālikin aer kūr n̄a āinwōt juon Rijilōk, ij bōk aenōm̧m̧an ilo enaan eo an jinoin tata ilo kweilo̧k eo aorōk ilo Oktoba 1943 eo. Ekar lukkuun m̧ōņōņō kōn kūr eo an; ijeļā elmen en̄jake in. Elder Kimball ekar ba: “Ekar ļap aō kōļmenļo̧kjeņ im jar, im jitļo̧k im jar. Ekar lōn̄ bōk in kōļmenļo̧kjeņ ko ilo ļōmņak eo aō—ainikien ko rej ba: ‘Koj jab maron̄ kōm̧m̧ane jerbal in. Kwoj jab wānōk. Ejjeļo̧k am̧ maron̄’—im aolep ejjab to jān iien eo juon ļōmņak ekar itok n̄an kōļmenļo̧kjeņ eo: ‘Kwoj aikuj kōm̧m̧ane jerbal eo emōj lewaj—kwoj aikuj kōm̧m̧an bwe kwon maron̄, wānōk im karbob.’ Im ej wōnm̧aanļo̧k wōt tariņae in.”23
Ij bōk jān bōroerreo in naan in kam̧ool eo an Rijilōk in eo ekar erōm kein kajon̄oulruo Būreejtōn an Kabun̄ in ekajoor. Ekar loe bwe ej aikuj in kar likūt mijak ko an n̄an “kōm̧m̧ane jerbal eo emōj leļo̧k” im bwe ej aikuj in kar pedped ioon Irooj kōn kajoor n̄an kōm̧m̧an bwe en “maron̄, wānōk im karbōb.” Kom̧ maron̄ barāinwōt. Tariņae in ej wōnm̧aanļo̧k, bōtaab jenaaj jelm̧aeiki kōn Jetōb eo an Irooj. Jeban “lōļn̄o̧n̄” kōnke jej jutak ippān Irooj im jutak kōn katak ko An im karōk eo An indeeo, jej jutak ilo jikin ko rekwojarjar.
Kiiō, kōn leddik eo nejimro im ļaddik eo pāleen ro rekar m̧ool in kajjitōk juon kajjitōk ekaamijak iiō ko remootļo̧k. Rekar lukkuun m̧ool ilo aer bōk naan ko am bon̄ōn eo; rekar jar im jitļo̧k im itok kōn an aer make uwaak. Mōņōņō im lanlōn n̄an er im n̄an kōm̧, ro libūeer im jim̧aer, rekar jeraam̧m̧an kōn jilimjuon ajri ro raiboojoj ilo aer wōnm̧aanļo̧k ilo tōmak im iakwe.
Peran, ro jeiū im jatū. Aaet, jej mour ilo raan ko aliktata, bōtaab ilo ad pād wōt ilo iaļen bujen eo, jej jab aikuj in mijak. Ij kōjeraam̧m̧an kom̧ bwe ilo ami kōm̧m̧ane, kom̧ jāmin lōļn̄o̧n̄ ilo iien ko im jej mour ie im lōļn̄o̧n̄ kōn ta ko imaan. Ij kōjeraam̧m̧an kom̧ n̄an kālet n̄an jutak ilo jikin ko rekwojarjar, im jab m̧akūtkūt. Ij kōjeraam̧m̧an kom̧ n̄an tōmak ilo kallim̧ur ko an Jisōs Kraist, bwe Emour im bwe Ej lale kōj, kea kake kōj im jutak iturid. Ilo etan ad Irooj im Rilo̧mo̧o̧r, Jisōs Kraist, amen.