Ro Jinen im Jemen im Ajri ro
Jān Būreejtōn Dallin H. Oaks
Rikakpilōklōk eo Kein Kajuon ilo Būreejtōnji eo Kein Kajuon
Karōk in m̧ōņōņō eo eļap an Jemedwōj Ilan̄ ej jiron̄ eok wōn kwe im jibadbad in mour eo am̧.
Ro kōrā ro rejitōn bōro, ewi jon̄an an em̧m̧an n̄an pād ilo m̧wen̄an in ekāāl an kweilo̧k eo eļap an kōrā ro an Kabun̄ in an ralitōk iiō im rūttoļo̧k. Jaar ron̄ ennaan ko reim̧we jān kōrā in tōl ro im jān Būreejtōn Henry B. Eyring. Būreejtōn Eyring im n̄a rej m̧ōņōņō in jerbal ium̧win tōl eo an Būreentōn Russel M. Nelson, im reim̧aanļo̧k n̄an naan in kanaan eo an.
I.
Ajri ro rej menin letok eo eaorōktata jān Anij—n̄an eddōkļo̧k eo ad indeeo. Aaet jej mour ilo juon tōre me elōn̄ kōrā ro rej kōtmāne n̄an jab keotak im kōkaajririik ajri ro. Elōn̄ ro rūm̧m̧an ded rej karum̧wijļo̧k m̧are m̧ae aikuj dikdik ko rejjejet kitieer. Jon̄an iiō in ro em̧ōj aer m̧are ilo Kabun̄ in em̧ōj ad ļapļo̧k ilowaan ruo iiō ko, im oraņ bōnbōn in lo̧tak ilo Kabun̄ in ej dikļo̧k. Ilo Amedka im jet iaan laļ ko rej jelm̧ae juon ilju eo edik n̄an an ajri ro rūttoļo̧k n̄an jipan̄ oraņ rūtto ro rej jako ļo̧k.1 Enan̄in 40 bōjjāān in ro rej lo̧tak ilo Amedka rej m̧am̧a ro ejjeļo̧k pāleer. Ajri rein rem̧ōjņo̧. Kajjojo jerbal in oktak kein kiiō rej jum̧ae karōk in lo̧mo̧o̧r eo ekwojarjar an Jemedwōj Ilan̄.
II.
Kōrā ro Rekwojarjar ilo Raan–ko Āliktata remeļeļe bwe n̄an erom̧ juon m̧am̧a ej jibadbad eo aer eaorōktata, m̧ōņōņō eo aer eļap. Būreejtōn Gordon B. Hinckley eaar ba: “Kōrā ro ilo enan̄in aolep jikin rej lo tōprak eo aer eļap, m̧ōņōņō eo aer eļap ilo kapijuknen im baam̧le. Anij eaar kōjolet n̄an kōrā ro jerbal ko rekabwilōn̄lōn̄ n̄an lo lōke eo aer n̄an kwaļo̧k kake kajoor eo, kōn jouj, kōn aenōm̧m̧an, kōn erreeo, kōn m̧ool, kōn iakwe. Im aolep karbab kein rekabwilōn̄lōn̄ loi ilo lōke eo aer im aolep em̧m̧an ej waļo̧k ippān m̧am̧a ro.”
Eaar bar ba: “Jerbal eo eļaptata me jabdewōt kōrā enaaj kōm̧m̧ane ej n̄an kōkaajririik im katakin im mour kake im rōjan̄ n̄an kea kake ajri ro nejin ilo wānōk im m̧ool. Ejjeļo̧k bar jet men me naaj keidi kake, jekdo̧o̧n ta eo ej kōm̧m̧ane.”2
Mam̧a ro, sister ro rejitōnbōro, kōmij iakwe kom̧ kōn wōn kom̧ im ta eo kom̧ij kōm̧m̧ane n̄an kōjwōj aolep.
Ilo 2015 ennaan eo an eaorōk taitōļ “Juon Kajjitōk n̄an Sister ro Aō,” Būreejtōn Russell M. Nelson eaar ba:
“Aelōn̄ in kiin̄ eo an Anij eban im ejjab maron̄ dedeļo̧k n̄e ejjeļo̧k kōrā ro rej kōm̧m̧ani bujen ko rekwojarjar innām kōjparoki, kōrā ro remaron̄ kōnono kōn kajoor im maron̄ eo an Anij!
“Rainin, … jej aikuji kōrā ro rejeļā kūlen kōm̧m̧ani men ko raorōk rej waļo̧k jān tōmak ko aer im ro rej rijojomar ro reperan an mour in im baam̧le ko ilo juon laļ enan̄inmij-kōn jerawiwi. Jej aikuji kōrā ro me rej wūjlepļo̧k aer n̄an tōl ajri ro nejin Anij ilo iaļen bujen in n̄an mour eo eutiejtata; kōrā ro rejeļā bōk revelesōn ko aer make, ro remeļeļe kajoor im aenōm̧m̧an im kakajoor ajri ro im baamle ko; kōrā ro rej katakin ilo ejjeļo̧k mijak.”3
Katak kein reim̧we rej aolep pedped ioon “Baam̧le Eo: Juon Naan Kean̄ n̄an Laļ in,” eo me Kabun̄ in em̧ōj an jepļaaktok bar kapene katak ko im imminene ko io̧lepān karōk in Kōm̧anm̧an eo m̧okta jān An kar kōm̧anm̧an laļ in.
III.
Kiiō inaaj kōnono n̄an kūrup eo edik ilo jarlepju in. Jiron̄ ro jatū rejitōn bōro, kōn jeļā eo ami kōn gospel eo em̧ōj an jepļaaktok an Jisōs Kraist, kom̧ij jenoļo̧k. Ami jeļā enaaj kōmaron̄ kom̧ n̄an niknik n̄an anjo̧ ioon men ko reppen ilo ami eddōkļo̧k. Jān tōre eo rej iddik, kom̧ eaar bōk kūņami ilo būroojāāk ko im būrokraam̧ ko me raar kōļapļo̧k taļōn eo am̧, āinwōt jeje, kōnono, im pepe. Kwaar ekkatak bōk eddo in m̧wil im wāween am̧ anjo̧ jān kapo ko n̄an riab, aņokņak, koot, ak kōjerbal uno ko rekajoor.
Ami jenoļo̧k kar kile ilo juon University of North Carolina ekkatak kōn jodikdik ro ilo Amedka im kabun̄. Juon Charlotte Observer epād ie taitōļ eo “Mormon tens cope best: Study finds they top peers at handling adolescence.” Nuuj in eaar ba bwe “Mormon ro em̧m̧an aer bōbrae m̧wiļ ko renana, em̧m̧an aer kōm̧m̧an ilo jikuuļ im wōr juon m̧wiļ em̧m̧an kōn jekļaj.” Juon iaan ro retijem̧ļo̧k ilo ekkatak in, eo eaar intōrpiuik enan̄in aolep jodikdik ro, eaar ba, “Enan̄in aolep wāween ko kōm eaar lale, ekar wōr juon jon̄ok ealikkar: Mormon ro raar jinoin.”4
Etke kwoj kōm̧m̧ane ijo em̧m̧antata kōn men ko reppen ilo ami rūtto ļo̧k? Jiron̄ ro, kōnke komeļeļe karōk in m̧ōņōņō eo eļap an Jemedwōj Ilan̄. Menin ej jiron̄ eok wōn kwe im jibadbad in mour eo am̧. Kōn meļeļe in ippān jodikdik ro rej ro m̧oktata n̄an mejaļ jorrāān ko im ro m̧oktata n̄an kālet jim̧we eo. Kwojeļā komaron̄ bōk jipan̄ an Irooj n̄an anjo̧ ioon aolep men reppen ilo ami rūtto ļo̧k.
Bar juon wūn unin am̧ make wōt bolel ej bwe kwomeļeļe bwe kwoj nejin Jemedwōj Ilan̄ eo ej iakwe eok. Ijeļā kwojeļā kōn al in “Dearest Children, God Is Near You.” En̄in ej eoon eo jinoin eo jaar aolep al kake im kar tōmak:
Iakwe ajri ro, Anij ej epaake eok,
Lale eok raan im bon̄,
Im m̧ōņōņō kake im kōjeraam̧m̧an eok,
Eļan̄n̄e kwoj kajjieon̄ n̄an kōm̧m̧ane ta eo ejim̧we.5
Ewōr ruo katak ko ilo eoon kein: Moktata, Jemedwōj Ilan̄ ej epaaketok kōj n̄an emejrake kōj raan im bon̄. Ļōmņak kake! Anij ej iakwe kōj, E ej epaake kōj, im Ej emejrake kōj. Kein karuo, E m̧ōņōņō in kōjeraam̧m̧an kōj ilo ad “kajjieon̄ in kōm̧m̧ane ta eo ejim̧we.” Ta eo ej kainōm̧m̧an ilubwilijin inepata im eppen ko ad!
Aaet, jiron̄ ro, kom̧ij jeraam̧m̧an im kom̧ij aiboojoj, ak kom̧ij aolep ro nejin Jemedwōj Ilan̄ ilo aikuj eo am̧ “kajjieon̄ kōm̧m̧ane ta eo ejim̧we.”
Ijin imaron̄ kar lewaj elōn̄ kapilōk ko kōn elōn̄ men ko reoktak, ak iaar kālet n̄an kōnono kōn ruo wōt.
Kapilōk eo aō m̧oktata ej cell phone. Juon etale jidik iien emootļo̧k ilo aolepen jukjukinpād in kar loe bwe jimettan in jodikdik ro ilo Amedka kar ba eļap aer joļo̧k aer iien ippān cell phone ko nejier. Elōn̄ ļo̧k jān 40 bōjjāān rej ba ke enana aer mour n̄e rejenoļo̧k jān cell phone ko nejier.6 Menin eļapļo̧k ippān leddik ro jān ļaddik ro. Sister ro aō reddik—bar kōrā ro rōrūtto—enaaj kōjeraam̧m̧an mour ko ami eļan̄n̄e kwoj kōjerbal jon̄an im repeltan kōjerbal cell phone eo.
Kapilōk eo aō kein karuo eo eļapļo̧k an aorōk. Kwon jouj n̄an ro jet. Jouj ej juon men eo elōn̄ iaan jodikkdik ro nejid em̧ōj de aer kōm̧m̧ane. Jet kurup in jodikdik ro ilo jet jukjukinpād ko rekar ba kajjien iaļ eo n̄an kōj kajjojo. Kar im̧we kōj kōn jerbal in jouj ko an armej ro n̄an ro raar pād ilo aikuj in iakwe im jipan̄. Ilo elōn̄ wāween ko, kwoj leļo̧k jipan̄ in im kwaļo̧k iakwe n̄an ro jet. Kōmij kōtmāne aolep renaaj ļoor waanjon̄ok eo am̧.
Ilo ejja iien in wōt, kōmij jeļā bwe rikapo eo enaaj kapo kōj bwe jen jab jouj, im elōn̄ waanjon̄ok ko kōn menin, aaet ilubwiljin ajri ro im jodikdik ro. Jab jouj ej kwaļo̧k elōn̄ āt ko, āinwōt kajjirere kake, kōnanaik ro jet, ak kuk ippān doon n̄an jumae juon, ak kajejtokjen ro jet. Waanjon̄ok kein rej kwaļo̧k metak ippān ro ilo jikin jikuuļ ak ro m̧ōttad. Sister ro aō reddik, ejjab kam̧ōņōņōik Irooj eļan̄n̄e lāj ak jab jouj n̄an ro jet.
En̄in bar juon waanjon̄ak. Ijeļā juon likao em̧m̧an ded, juon rijibakwe ijin ilo Utah, eo kar kajjirere kōn oktakin, jet iien ekoba kajin eo an. Kar kowaan e jen jodikdik ro m̧ae eaar pād ilo kauwōtata bwe en maron̄ in pād ilo kaļbuuj ium̧win 70 raan ko bwe en maron̄ in ro̧o̧l. Ijjab jeļā ta eo kurup in jodikdik in raar kakitōtō kake, elōn̄ iaer Armej ro Rekwojarjar āinwōt kom̧, ak imaron̄ lo jab jouj eo aer, juon en̄jake eo ekabūrom̧ōjm̧ōj im ļap wōnāān n̄an juon iaan ajri ro nejin Anij. Jidik jerbal in jab jouj emaron̄ kwaļo̧k juon jekjek eļap.
Ke iaar ron̄ bwebwenato in, iaar keidi ippān ta eo rikanaan eo ad, Būreejtōn Nelson, eaar ba ilo juon nokon in jota an jodikdik ro jet raan remootļo̧k. N̄an kajjitōkin kom̧ im aolep jodikdik ro jet n̄an jipan̄ n̄an aiintok Israel, eaar ba: “Jutak; kwon oktak jān laļ in. Kwe im n̄a jejeļā bwe kwoj juon meram in laļ. Kōn menin, Irooj ej aikuji eok n̄an reilo̧k āinwōt, ainikien āinwōt, im nuknuk āinwōt juon rijilōk eo em̧ool an Jisōs Kraist.”7
Tariņae in an jodikdik ro Būreejtōn Nelson eaar kūr kom̧ n̄an kobatok enaaj ban kōnkōm̧m̧an n̄an doon. Renaaj ļoor katak ko an Rilo̧mo̧o̧r n̄an tōpare ilo iakwe im ļōmņak kōn ro jet, em̧ool oktak ļo̧k n̄an jepe eo juon n̄e jej en̄jake ke jet raar bōd ņae kōj.
Ilo juon kōnono illo kweilo̧k eo eļap ilo iien eo elōn̄ iaami eaar lo̧tak, Būreejtōn Gordon B. Hinckley eaar nōbar “jiron̄ ro raiboojoj ro rej kajjieon̄ in mour kake gospel in.” Eaar ba kajjieer, āinwōt aō kōņaan ba kajjiemi:
“Rej jouj n̄an doon. Rej kōkajoor doon. Rej kautiej jineer im jemeer ilo kapijuknen eo rej itok jene. Rej pojen kōrā im renaaj bōk ippāer ilo aolepān mour ko aer kōn jon̄ok in rej lōn̄aj er.”8
Āinwōt juon karejeran Irooj, in ba n̄an jiron̄ ro, laļ in ad eaikuji em̧m̧an im iakwe eo ilo kom̧. Kwon jouj n̄an doon. Jisōs eaar katakin kōj n̄an iakwe doon im n̄an kōm̧m̧an em̧m̧an n̄an doon. Ilo ad kajjieon̄ in jouj, jej epaake E im An iakwe.
Sister ro aō rejitōn bōro, eļan̄n̄e kwoj bōk kuņaam̧ ilo jab jouj ak lāj—n̄an kajjojo ak ippān juon doulul—jerbale kiiō bwe en oktak im rōjan̄ ro jet n̄an oktak. En̄in ej kapilōk eo aō, im ij lewaj n̄an kom̧ āinwōt juon rikarejeran Irooj Jisōs Kraist kōnke An Jetōb eaar im̧we eō bwe in kōnono n̄an kom̧ kōn unin kōnono in eaorōk. Ij kam̧ool bwe Jisōs Kraist, ad Rilo̧mo̧o̧r, eo eaar katakin kōj n̄an iakwe doon āinwōt An kar iakwe kōj. Ij jar bwe jenaaj kōm̧m̧ane men kein, ilo etan Irooj Jisōs Kraist, amen.