Ol Sista mo Ol Brata we Oli Kam long Kraes

Pikja

ol man mo woman oli kam tugeta long wan kaonsel miting

Ol voes o tingting blong tugeta ol woman mo man oli impoten blong mekem wok blong Lod i hapen. Nomata se yumi spesel, yumi helpem ol narawan blong kam antap, kam wan long stamba tingting ia blong stap ol disaepol blong Kraes.

Yumi samting we i mekem yumi defdefren oli no save tekemaot yumi long stamba tingting ia. Be from we yumi defdefren , ol talen mo ol kontribusen blong yumi, tugeta oli givim paoa long yumi blong mekem jenis raon long wol long wok blong sevem man mo blong kam olsem god. Elda Gerrit W. Gong blong Kworom blong Olgeta Twelef Aposol i raetem long magasin ia, “Yumi kasem ol desisen we oli moa gud mo gat sakses long seves blong Lod taem yumi tekem kontribusen blong wanwan man i impoten mo wok tugeta, ol brata mo sista long long wok blong Hem” (pej 4). ?Olsem wanem nao yumi kasem kaen yuniti ia? Yumi mas gat fet se Lod i save wok wetem ol wiknes blong yumi blong gud blong kingdom blong Hem.

Insaed long stori blong mi long pej 8, mi serem wanem mi bin lanem aot long stori long Niu Testeman abaot woman long Kenan, we i lukaotem Sevya blong hilim pikinini gel blong hem. Woman ia i no blong haos blong Isrel. Be hem i gat fet se paoa blong Lod bae i hilim pikinini blong hem, mo bigfala fet blong hem ia i mekem hem wetem ol kavenan pipol oli kam wan mo i karem merikel i kam.

Letem yumi lukluk long Sevya long evri samting we yumi mekem wetem “hat blong yumi oli joen tugeta blong kam wan long lav” (Mosaea 18:21). Yumi gat spesel janis blong lanem abaot ol defdefren fasin blong wanwan long yumi mo luk hamas oli impoten olsem we Kraes i mekem. Mi talem tangkyu blong save gat wan Man blong lukaot long sipsip we i stap harem ol defdefren voes blong wanwan long sipsip blong Hem.

Wetem tru hat,

Presiden Camille N. Jonson

Rilif Sosaeti Jeneral Presiden