“Afta long wan Bigfala Hadtaem: Bildimap Fasin blong Save Stanap Agensem Ol Hadtaem mo Akseptem Hiling,” Liahona, Septemba 2023.
Afta long wan Bigfala Hadtaem: Bildimap Fasin blong Save Stanap Agensem Ol Hadtaem mo Akseptem Hiling
Hiling i kam taem yumi lukaotem help blong Sevya mo bildimap filing blong dipen long yuwan.
Plante pipol bae kolosap oli fesem wan hadtaem we i hapen long laef blong olgeta. Yumi bin luk hemia long laef blong yumi wanwan mo long wanem wok we yumi stap mekem. ?Wanem nao i mekem bigfala hadtaem i hapen? Wan eksperiens we i had tumas olsem wan trak we i aksiden, oli sakemaot yu long wok, wo, abius long saed blong bodi, fosem yu long saed blong seks, buli we i strong tumas, lusum wan we yu lavem, mo plante moa.
Bigfala hadtaem olsem i soa bigwan, mo samtaem, yu save filim se yu no save save kam oraet. Be, yet hem i impoten blong save se soa ia bae i godaon, mo bae yu faenem pis bakegen taem yu dipen long Papa blong yu long Heven mo Sevya blong yu, Jisas Kraes.
Papa long Heven i letem ol hadtaem i kam blong yumi gat eksperiens long hem. Iven sapos Hem i no bin jusum bifo, krietem o givim raet, “evri samting … oli wok tugeta blong gud blong [yumi]”, sapos yumi trastem Hem (Doktrin mo Ol Kavenan 90:24; luk tu long 2 Nifae 32:9).
Mifala i faenem se taem yumi stap tanem yumi i go long Sevya olsem wan stamba sapot long proses blong hiling. Pis blong Tufala i hilim yumi long saed blong ol filing mo long saed blong spirit. Mifala i save se tru long lav mo sore blong Tufala, yu save faenem paoa mo hiling. Mifala i faenem tu sam teknik we bae i letem yu blong bildimap paoa we yu gat blong yuwan mo muv i go from hiling.
Evri wan i gat eksperiens blong kasem wan bigfala hadtaem we i hapen, long ol defdefren wei. I tru, sam bae oli save kasem eksperiens blong kasem wan bigfala hadtaem we i hapen, be ol narafala wan bae oli save filim nomo se i no gud. From risen ia, tingbaot blong no komperem eksperiens blong yu wetem blong ol narawan wan o yusum eksperiens blong yu olsem se hem i semmak long ol nara eksperiens.
Blong Stap Ansa long Ol Samting we I Stap Hapen long Ol Defdefren Wei
Sam mo Lucy tufala i stap travel tugeta long wan trip, mo draeva blong trak we oli stap hem i slip mo trak i jenisim daereksen. Hemia i mekem se trak blong olgeta i tantanem olgeta plante taem. Sam i no harem nogud tumas mo no gat bigfala wari from ol samting we oli hapen. Hem i stap long ples ia blong givim kamfot long Lucy.
Sam wik i pas, taem janis ia blong Sam i kam bakegen blong hem i travel, hem i filim wan filing blong wari i kam, jes blong tingbaot ol longfala aoa ia long rod.
Sam i gat eksperiens ia blong stap tingting yet long wanem we i hapen long wan nogud aksiden. Hem i no wantem blong stap tokbaot hemia long eniwan. Be taem hem i toktok long Lucy, hem i faenemaot se hem, i bin stap long wan aksiden blong trak finis mo i save wanem Sam i bin filim. Oli toktok raon long wanem Lucy i bin lanem aot long eksperiens blong hem we hem i bin eksasaesem fet blong hem long Jisas Kraes, i prea blong kasem daereksen, mo i bin harem gud tru long ol kaonsel we oli kam long hem long taem we hem i bin stap traehad.
Hop mo Hiling we i kam tru long Jisas Kraes
Nomata long ol kil we yumi kasem tru long aksiden, hiling i save kam tru long Sevya. Be tru long Atonmen blong Sevya we i no gat en, mo lav mo sore mo bigfala sore blong Hem, Hem i save mekem i kam oraet, ol kil we yumi stap kasem taem yumi stap laef long wol ia, nomata sapos se hiling ia i kam long laef ia o long nekis laef. Long sam taem, i tekem moa taem bitim wanem we yumi tingting long hem o wantem blong yumi—iven wetem tabu sapot we i kam long Sevya. Be Hem bae i save mekem olgeta i oraet, (luk long 3 Nifae 17:7).
Elda Dieter F Uchtdorf blong Kworom blong Olgeta Twelef Aposol i tijim: “Laet blong God i tru. !I stap blong evriwan! I givim laet long evri samting. Hem i gat paoa blong mekem i kam gud posen we i go dip insaed long wan kil.”1
I nogat wan i save wanem we yumi stap safa from bitim hamas we Papa long Heven mo Sevya, Tufala i save, we i moa bigwan. Lod i “go daon, daon bitim evri samting, mekem se hem i andastanem gud evri samting, blong mekem se, long evri samting mo tru long evri samting” (Doktrin mo Ol Kavenan 88:6). —Sista Amy A. Wright, Fas Kaonsela long Praemeri Jeneral Presidensi i tijim:
“Yumi evriwan i gat samting long laef blong yumi we oli brokbrok mo i nid blong joenembak, fiksim, o mekem i kam gud bakegen. Taem yumi tanem yumi i go long Sevya, taem yumi stretem hat mo maen blong yumi wetem Hem, taem yumi sakem sin, Hem i kam long ples we yumi stap long hem ‘wetem paoa blong hiling long ol wing blong Hem’ [2 Nifae 25:13], i putum ol han blong lav blong Hem raon long yumi, mo talem se, hem i ORAET. !Yumi save fiksim hemia tugeta!”
“Mi testifae se i no gat samting long laef blong yufala we i brokbrok we i go bitim mak blong mekem i kam gud bakegen, fasin blong pemaot man, we i bigfala paoa we i kam long Jisas Kraes.”2
Ol eksampol blong hiling mo ol wei blong kam oraet oli stap insaed long ol skripja—mi long laef blong ol famli, ol fren mo ol bubu long taem bifo. ?Long wanem wei nao i mekem ol laen blong yu bifo oli wantem gohed?3
Aedentiti blong Yumi we I No Save Finis
Taem Julio i gat 13 yia, hem i fesem abius tru long angkel blong hem. Sam taem i pas, hem i stat blong kamaot long famli blong hem mo stap stap hemwan. Samtaem hem i mekem olsem se i nogat samting i hapen, be wanwan taem hem i fulap long ol defren kaen filing. Oltaem hem i save gohed long laef nomata wanem—iven taem hem i filim bigfala glad ia long taem we pikinini boe blong hem i bon i kam long wol. Mo tu, hem i gat wari. Pikinini boe blong hem i stap kam kolosap nao long semmak yia olsem taem we hem i bin fesem abius, mo taem we Julio i stap tingting longtaem from wanem we boe blong hem i save kasem eksperiens long hem, ol tingting oli kam fulap long hem abaot hamas impoten i valiu blong wan man mo aedentiti we i no save finis.
From se filing blong harem nogud i pat blong eksperiens blong yumi long wol ia, hem i no aedentiti blong yumi we i no save finis. Aedentiti blong yumi we i no save finis i we yumi stap olsem wan pikinini blong God. Presiden Russell M. Nelson i tijim:
“?Huia yu?
“Fas mo moa impoten, yu, yu wan pikinini blong God.
“Nambatu, olsem wan memba blong Jos, yu, yu wan pikinini blong kavenan. Mo nambatri, yu, yu wan disaepol blong Jisas Kraes.”4
Blong ademap, filing blong harem nogud i neva talem valiu blong yumi o hamas yumi klin inaf. Sista Joy D. Jones, foma Praemeri Jeneral Presiden,i mekem tufala aedia ia i klia taem hem i tijim:
“Long valiu blong yumi long saed blong spirit i stap minim blong mekem yumiwan i filim hamas yumi impoten long wei we Papa long Heven bae i luk long yumi. …
“… Fasin blong klin inaf i kam tru long fasin blong stap obei. Sapos yumi mekem sin, yumi no klin inaf, be neva valiu blong yumi i foldaon.”5
Abius we Julio i bin go tru long hem tru long ol han blong angkel blong hem i no jenisim valiu mo hamas Julio i klin inaf. Hem i neva mekem sin, be wan i mekem sin agensem hem. Samtaem i had blong tingbaot valiu mo hamas yu klin inaf long taem we yu stap fesem abius. Tingbaot se yu, yu no mekem sin, valiu blong yu i neva godaon, mo yu klin inaf blong gohed long rod blong kavenan blong yu.
Taem we Julio i stat blong trastem Lod, Hem i helpem Julio blong luksave ol eksperiens blong wol oli no jenisim lav we Papa blong yumi long Heven i gat long yumi. Naoia hem i stap lanem blong luk olsem wanem mo nomata ol rabis trabol i hapen, oli no jenisim stamba tingting blong valiu blong hem, aedentiti we i no save finis o fasin blong hem blong stap klin inaf.
Ol Filing blong Stap Dipen long Yuwan
Blong stap developem ol filing blong save dipen long yuwan, bae i helpem yu blong yusum ol helti risos blong yuwan blong save go tru long ol jalenj mo ol had filing. Yu save developem filing blong wantem gohed, janis blong stretem mo save gohed nomata ol tes blong laef—we i tekem tu, ol harem nogud.
Filing blong wantem gohed i tekem tu, fasin blong lukaotem sapot mo daereksen we i kam long Papa long Heven mo Jisas Kraes, blong stap givim seves long ol narawan olsem we i gat nid mo we i stret.
Ol aksen we i stap ia, ol profesonol kaonsela we bae i helpem yu blong developem ol filing blong wantem gohed:
-
Bildimap ol koneksen wetem ol narawan
-
Kam antap long filing blong kam strong bakegen long saed blong bodi
-
Stap faenem stamba tingting long laef
-
Stap putum gud ol tingting we oli helti
-
Stap lukaotem help taem yu nidim6
1. Konek wetem Ol Narawan
Oltaem ol helti rilesensip oli sapotem filing blong kam oraet. Blong stap konek wetem olgeta we oli mekem yu kam strong, mo leftemap tingting blong yu blong tanem yu i go long Sevya mo Papa blong yumi long Heven bae i save mekem jenis long wanem we yu nidim blong kam oraet fulwan long hem.
Sam i go givhan long Lucy, mo stap serem ol fraet mo ol filing blong hem we hem i no laekem blong gat. Rilesensip ia i helpem hem blong save moa wanem blong mekem mo kasem filing blong wantem gohed nomata wanem i hapen. Hem i helpem Sam blong luksave ol wei we hem i save kam oraet long saed blong filing mo long saed blong spirit.
Tingting blong putum ol gol blong developem wan koneksen we i moa strong wetem ol narawan we yu trastem olgeta. Wok blong givhan i wan wei we yumi konek wetem ol narawan insaed long Jos.
2. Tekem Kea long Bodi blong Yu blong Kam Gud Bakegen
Filing blong harem nogud i no kam tru long filing nomo be tu, long saed blong bodi. Yumi save gat eksperiens long saed blong bodi we i taet, wan hat we i stap resis, ol hed i so, o ol problem blong bel we i soa o we i tantanem. Ol saen blong bodi ia oli letem yumi save se wan samting i rong mo we yumi nidim blong lukluk long helt blong yumi. Semmak olsem we yumi save mekem helt long saed blong ol filing blong yumi i kam oraet, yumi save tingting tu long ol wei blong tekem gud kea long yumiwan long saed blong bodi afta long wan aksiden o harem nogud.
Faswan, luksave ol saen long bodi blong yu we yu i eksperiensem. Afta, traem blong mekem bodi blong yu i spel, taem yu stap lukluk nomo long wei we yu stap pulum win mo pulum win sloslo. Traem blong luksave olsem wanem yu filim taem yu stap pulum win sapos i hariap tumas mo i seksek, mo komperem taem we yu stap pulum i slo mo long stret level.
Samtaem yumi kasem ol kil we oli stopem yumi blong mekem sam samting, so, mekem wanem we i gud blong bodi blong yu. Be blong muvmuv, speseli blong mekem eksasaes blong bodi, bae i help bigwan. Sam oli laekem blong stap wokbaot o ronron, be sam oli luk se taem oli wokhad long wan projek bae i helpem olgeta bigwan.
Tingbaot Tok blong Waes (luk long Doktrin mo Ol Kavenan 89). Blong stap traem blong mekem harem nogud i kam oraet tru long ol fasin we oli no save help o ol samting, i simpol nomo mo i olsem se yu “stap plasta long wan bigfala soa we i go dip insaed.”7 Helpem bodi blong yu blong kamaot long filing blong taet mo soa bodi, bitim blong kavremap.
3. Faenem Stamba Tingting mo Mining
Stamba tingting blong yumi long laef ia i blong rere blong gobak mo laef wetem Papa blong yumi long Heven (luk long Alma 12:24). Ol samting we i mekem yumi harem nogud i save blokem stamba tingting ia mo stopem yumi blong luksave huia yumi. Stap faenem wan stamba tingting we i spesel long ol evri dei aksen blong yumi i save helpem yumi blong muv i go fored mo iven tingbaot stamba tingting blong yumi. Julio i stat blong muv i go fored mo faenem stamba tingting long ol evri dei aksen blong hem mo luksave se hem i wantem blong helpem pikinini boe blong hem.
Blong stap faenem mining afta long ol harem nogud we yumi stap fesem, i save helpem yumi luksave wan rod we i go fored, luksave se ol eksperiens blong yumi se oli givim ol janis blong yumi kam antap mo kam moa olsem Kraes. Eksampol, i moa isi blong save gat sore mo wantem helpem wan narawan we i stap fesem wan harem nogud taem we yumiwan i bin go tru long ol eksperiens we oli had tumas.
Ol man we oli stadi, oli faenemaot se afta long harem nogud, oltaem ol pipol oli stap fesem wan samting we oli makem se “kam moa gud tru ol hadtaem we i hapen.” Kam moa gud tru ol hadtaem we i hapen, oli soem taem wan i faenem strong paoa afta long wan eksperiens, olsem blong mekem ol rilesensip i kam antap, talem tangkyu moa long wanem we i stap hapen long laef, o sam kwaliti blong laef, o blong save moa long ol gudfala samting we i kam nomata ol hadtaem, bae i kam antap. Afta we yu fesem wan had samting we i hapen long laef, luksave ol wei we yu bin kam antap, o save kam antap from eksperiens we yu bin go tru bitim blong stap lukluk nomo long hadtaem ia hemwan.
4. Stap Putum Gud Ol Tingting we Oli Helti
Wan hadtaem we yumi fesem bae i save gat paoa long wei we yumi tingting long yumiwan mo we wol we i stap raon long yumi. Afta we yumi fesem wan hadtaem, bae yumi save gat ol tingting we i fasfas. Ol tingting olsem “Mi, mi no strong inaf,” “Papa long Heven i no lavem mi,” mo “Mi, mi no klin inaf” i katemdaon filing blong yumi ia blong wantem gohed nomata wanem i hapen . Ol tingting ia, plante taem, bae oli afektem filing blong yumi (luk long Proveb 23:7; Doktrin mo Ol Kavenan 6:36).
Afta we yu save poenemaot ol tingting blong yu we oli no stret, tingting long sam, helti, ol tru tingting we i save tekem ples blong olgeta mo raetemdaon olgeta. Rimaenem yuwan long ol helti tingting ia taem we yu luksave se i gat ol nogud tingting long maen blong yu.
Blong lanem moa long olsem wanem blong mekem hemia, luklukbak long japta 2 blong Faenem Paoa long Lod: Filing blong Kasem Hop blong Wantem Gohed (2021).
Bae yu save tanem yu i go long prea, raetemdaon, tingting hevi long ol skripja o wan toktok blong jeneral konfrens (luk long Josua 1:8), o ol narafala samting blong yusum blong tingting long olgeta.
5. Go Givhan blong Sapot
Wanwan taem, i gud blong tingting blong kasem help i go moa bitim wanem ol risos we yu gat blong yuwan. Lucy i lukaotem help, we i mekem se i letem hem blong helpem Sam. Tingting long ol pipol—olsem ol memba blong famli—we oli save help bigwan. Blong kam oraet bakegen afta long ol hadtaem we bae yu save yusum evri samting we i stap long ol risos long laef blong yu.
Jeneral Hanbuk i givim daereksen long wetaem i stret blong faenem sapot we i kam long ol profesonol kaonsela.8
Hem i had blong no lukluk long ol hadtaem we i hapen long laef blong yumi, be taem yumi folem ol kaonsel blong profet blong mekem gud bakegen wei we mi lukluk nomo long Sevya mo gospel blong Hem, “ol tu tingting mo ol fraet blong yumi oli ronwe.”9 Tingbaot se, yu, yu wan pikinini boe o gel blong wan Papa long Heven we i lavem yu. Taem yu lukluk nomo blong kam kolosap long Hem mo yusum ol risos we oli save help bigwan we oli gat blong yu, Lod bae i helpem yu long eni hadtaem we yu stap fesem blong i kam gud blong yu.