“Woman Kenan we I Gat Fasin blong No Stap Flas” Liahona, Septemba 2023.
Ol Merikel blong Jisas
Woman Kenan we I Gat Fasin blong No Stap Flas
?Wanem nao wok blong fet mo fasin blong no stap flas i stap mekem long yumi, taem yumi stap lukaotem ol merikel we yumi nidim?
Woman long Kenan, i kam long Harold Copping, Bridgeman Images
Long medel blong plante long ol wok blong Jisas Kraes we i tekem ples long taem blong seves blong Hem long wol ia, i gat wan we i isi blong oli no stap luksave from we i sot mo samtaem oli no andastanem: woman long Kenan we oli tokbaot long Matiu 15:21–28.
Be, long sam moa pat blong stori, yumi save lanem ol naesfala trutok abaot fasin blong stap wet longtaem mo lav mo sore blong Jisas Kraes taem we yumi kam blong luksave woman ia we oli no stap tokbaot tumas we i wan eksampol blong fet mo fasin blong no stap flas.
Samfala Pat
Long Matiu 14, yumi lanem se Sevya i bin save abaot ded blong Jon Baptaes we oli bin katem hed blong hem tru long aksen we waef blong Herod i mekem. Taem Hem i harem abaot ded blong kasen blong Hem, Jisas i traem blong kambak tru long sip mo go long wan “ples we i no gat man long hem” blong save serem sore, be plante grup blong ol pipol oli wokbaot long leg blong olgeta, blong folem Hem (luk long Matiu 14:13). Long wan sado blong bigfala lav mo sore, Kraes i spenem dei ia wetem ol pipol mo iven, Hem i mekem wan long ol bigfala merikel blong Hem, blong fidim ol plante taosen man wetem faevfala bred mo faevfala fis (luk long Matiu 14:15–21).
Long semmak naet ia, Sevya i mekem seken bigfala merikel. Hem i bin go long ol maonten blong stap “Hemwan” long ol disaepol blong Hem blong prea. Ol disaepol blong Hem oli go long wan sip, we afta i stap long medel blong Si blong Galili, we ol wef mo strong win i stap sakem bot i go olbaot. “Mo … Jisas i kam long olgeta, i stap wokbaot antap long wota,” we ol disaepol oli kasem insperesen tru long spirit blong talem se, “Tru, yu yu Pikinini blong God.” (luk long Matiu 14:23–25, 33.)
Nekis travel blong Jisas, Hem i go long not blong Galili long lagun blong Taea mo Saedon, we long taem tedei, hem i Lebanon. I tru Hem i stap lukaotem “spel, mo taem blong Hemwan, o inaf janis blong stap givim instraksen long Ol Twelef,” we oli bin ronwe long Hem.1 Hemia long ples ia we “wan woman Kenan Hem i kam, i singaot se, Masta, yu Laen blong King Deved, plis yu sore long mi. Gel blong mi i gat wan devel i stap long hem, we i stap spolem hem tumas” (Matiu 15:22).
Jisas i hilim gel blong woman Kenan ia i tekem ples long samples raon wan pat bitwin Saedon mo Taea, not blong Galili.
Sidon (luk long pikja antap): Oli Save long hem Tu Olsem Saedon. Long ol taem blong bifo, ol samting we oli mekem samting long bisnis plante long hem, i wan long ol nambawan siti blong Fonisia.
Ta (luk long foto antap):Nara impoten siti blong bisnis, i stap samples 22 mael sot blong Saedon. Long taem blong seves blong Hem long wol ia, Aposol Pol i bin visitim ol memba blong Jos long ples ia (luk long Ol Wok 21:3–7).
Pikja drong blong Saedon we i kam long Balage Balogh
Woman Kenan
I wan naesfala samting se woman ia i kam long Jisas long evri samting. Hem i wan woman Kenan, we “i bon olsem wan Muslim o we i no wan kristin woman,” woman Kenan ia, oli bin holem hem olsem wan we i gat rong, we ol Man Jiu oli mekem.”2 Mo yet, fet blong hem long paoa blong Jisas Kraes mo lav blong hem long gel blong hem i muvum hem blong askem wetem hat blong hem blong kasem help blong Sevya. Elda James E. Talmage (1862–1933) blong Kworom blong Olgeta Twelef i eksplenem se, “Poen ia se hem i singaotem Sevya olsem Jisas Pikinini blong Deved, i soem bilif blong hem se Hem i Mesaea blong Isrel.”3
Nomata se yumi save smol nomo abaot mama blong hem, yumi save talem finis se fet blong hem i olsem narafala woman ia we oli tokbaot long Niu Testeman. Olsem wan woman we i gat “wan problem long saed blong blad” (Mak 5:25), Meri mo Mata blong Betani, mo Meri Magdala, woman Kenan ia i putum ful tras blong hem long Sevya. Hem i save gud mo trastem hamas hem i save huia Hem.
Long fas ples, Jisas i no bin ansa long hem. Ol disaepol oli leftemap tingting blong Hem blong i sendem woman ia i go longwe, from se hem i stap distebem olgeta, mo oli luksave se hem i stap distebem Hem taem Hem i stap lukaotem blong spel.4
Long en, Jisas i ansa. Blong stap eksplenem from wanem Hem i bin stap kwaet Hem i talem long olgeta se, “God i sanem mi blong mi kam long ol laen blong Isrel nomo olgeta ya oli olsem ol sipsip we oli lus” (Matiu 15:24).
Toktok blong Sevya i mekem i kam moa naes se woman Jentael ia i bin kam stap lukaotem wan blesing blong gel blong hem. Hem i no wan woman blong Isrel, be long sam wei, hem i bin save se Jisas Kraes i Mesaea, wan King. Mo nomata se Hem i mekem i klia se misin blong Hem i go long Ol Jiu long Isrel, woman ia i gat fet se bae Hem i save hilim gel blong hem. Long fasin blong no stap flas long leg blong hem, from se hem i luksave wok blong hem olsem king mo paoa blong hem (luk long Mak 7:25), “wosipim hem,”mo bakegen i kam mo talem, “Masta, plis yu givhan long mi” (Matiu 15:25).
Fasin blong No Stap Flas mo Ol Merikel
Long wan , Nao Jisas i talem long hem se,, “I no stret blong man i tekem ol kakae blong pikinini blong hem, i sakem long ol dog.” (Matiu 15:26). Ol man we oli stadi long Baebol oli bin eksplenem se wanem we i defren se “ol pikinini” oli ol Jiu mo ol “dog” oli Ol Jentael.
Long ol narafala toktok, fas wok blong Kraes i go long Ol Jiu. Hem i blong i fidim olgeta—o givim gospel long olgeta faswan—mo afta, bae oli fidim o tijim evriwan long wol. Elda Talmage i eksplenem: “Ol strong toktok we i nogud, olsem we oli saon long yumi, be hem i andastanem olsem we spirit blong Lod i wantem. … I tru se woman ia i no tekem long hemwan fasin we oli komperem hem.”5
Bakegen, ansa blong gudfala woman ia i bin tajem mo i wan sapraes mo i no stap flas: “Masta, i tru, be ol dog tu, oli save kakae ol haf kakae we i folfoldaon andanit long tebol blong masta blong olgeta (Matiu 15:27).
Woman ia we i fulap long fet i no bin gat fraet. Hem i jusum fet bitim blong jusum harem nogud long ol nogud toktok agensem hem. Ansa blong hem i soem filing blong hem blong gat hop iven long ol smosmol samting we yumi ting nating long olgeta. I wan fet we i nambawan tumas blong biliv se ol hafkaekae long tebol blong Sevya bae i naf blong winim wanem we i had tumas long gel blong hem. Mama blong hem we i fetful i soem fasin blong putum tingting i stap daon mo fasin blong no stap flas.
Elda David A. Bednar blong Kworom blong Olgeta Twelef Aposol i eksplenem se fasin blong no stap flas i blong “stap strong, i no blong stap slak; i blong tekem aksen, i no blong stap nating;i blong gat strong paoa long tingting, i no blong stap kwaet.”6 I tru se woman Kenan i strong, i tekem aksen, mo gat strong paoa long tingting blong talemaot fet blong hem iven wan smol paoa blong Sevya bae i inaf.
Woman Kenan i strong, aktiv, mo gat strong paoa long tingting blong talemaot fet blong hem iven wan smol paoa blong Sevya bae i inaf.
Long en, Jisas Kraes i givim wan ansa we i kam tru long paoa blong Hem mo wan we yumi plante i save: “Woman, bilif blong yu i strong tumas. Bambae i kamtru long yu, stret olsem we yu yu bilif.” Wanem we yumi luk we oli soem se Hem i holem yumi wanwan mo luk valiu blong yumi wanwan long ol rod we yumi wokbaot long hem long laef blong kam long Hem, we oli folem insaed long rekod, we oli stap long ol skripja, we i givim hop se “wantaem nomo, gel blong woman ya i kam gud bakegen” (Matiu 15:28).
?Wanem Nao Yumi Save Lanem?
Elda Talmage i mekem komen, “Help we i kam long woman ia we i mas kam from we hem i winim, nomata ol hadtaem blong hem, i folem fet blong hem we i save winim ol samting, we oli blokem yumi blong save luk i klia mo stanap strong iven long taem we i gat ol tingting we oli foldaon.”7
Kaen fet ia we i nogat en long Jisas Kraes i stret samting we profet blong yumi we yumi lavem Presiden Russell M.Nelson, we i bin givim kaonsel long yumi blong developem: “Fet long Jisas Kraes i bigfala paoa ia we i stap long yumi long laef ia. Evri samting i posibol long olgeta we oli stap biliv.”8
Mi selebretem woman Kenan we hem i strong, aktiv, gat strong paoa long tingting mo gohed blong putum fet blong hem long Jisas Kraes olsem Sevya, Mesaea mo King. Hem i wan eksampol blong Niu Testeman blong fet mo blong gat fasin blong no stap flas we evri disaepol blong Jisas Kraes oli nidim. Wetem tras, bae yumi gohed strong nomata ol hadtaem, kaen fet ia long “hae Pris we i tekem ol gudgudfala samting ya oli kamtru” (Hibrus 9:11).