“Stap Givhan wetem Fasin blong Save Wet Longtaem,” Liahona, Septemba 2023.
Ol Prinsipol blong Wok blong Givhan
Stap Givhan wetem Fasin blong Save Wet Longtaem
Yumi save developem janis blong gat moa fasin blong save wet longtaem, long laef mo blong save stap givim seves long ol narafala man.
Long 2 Korin 12:7–8, Pol i tokbaot taem we oli prea tri taem from “nil blong aranis, we i stap stikim [hem]” blong oli karemaot. Be ansa blong prea blong hem i no bin kam tru from kwiktaem ol jalenj ia oli go. Be Lod i talem long hem se, “Mi mi save givhan long yu long gladhat blong mi, mo hemia i naf blong holem yu.” Pol i soem fasin blong save wet longtaem mo gat fet long olsem wanem hem i ansa: “From samting ya, mi mi glad moa blong tok flas from ol samting we i soemaot we mi mi no gat paoa. Long fasin ya, mi save harem we Kraes i stap lukaot long mi long paoa blong hem” (ves 9).
Lod i tijim tu Moronae se tru long gladhat blong Jisas Kraes, bae yumi save lanem mo kam antap long paoa: “Mo sapos ol man oli kam long mi, bae mi soem long olgeta, wiknes blong olgeta. Mi givim wiknes long ol man blong mekem se oli save putum tingting blong olgeta i stap daon; mo gladhat blong mi, i naf blong evri man we i putum tingting blong olgeta i stap daon long fored blong mi; from sapos oli putum tingting blong olgeta i stap daon long fored blong mi, mo gat fet long mi, nao ol samting ia we oli no strong long olgeta, bae mi mekem olgeta oli winim mo kam strong long olgeta.” (Ita 12:27).
Stap Givhan wetem Fasin blong Save Wet Longtaem
Olsem Pol, plante long yumi i bin prea from help plante taem long laef blong yumi—samtaem, i moa bitim tri taem. Samtaem i stret taem blong Hem i givim blesing ia, mo ol narafala taem yumi, olsem Pol, oli tijim yumi mo mekem yumi kam strong. Long ol kaen taem ia, yumi save lanem fasin blong save wet longtaem mo lanem blong wet long taem blong Lod.
Yumi nidim ol fasin olsem hemia blong Kraes we i fasin blong save wet longtaem, long taem we yumi givhan tu. Bae yumi save givhan long ol pipol we oli gat ol defdefren jalenj mo level we oli andastanem gospel i defren, mo i nidim blong gat fasin blong save wet longtaem mo lav blong givhan long ol pipol we oli no stap akseptem yumi.
Foto i kam long Getty Images
Developem Fasin blong Save Wet Longtaem
Taem yumi kam blong lanem abaot Sevya mo lanem abaot ol fasin blong Hem, yumi save moa gud wanem Hem bae i mekem blong givhan long ples blong yumi. ?Olsem wanem nao yumi save developem ol fasin olsem hemia blong Kraes ?
-
Luksave se laef long wol ia i fulap long ol situesen we oli stap traem fasin blong yumi blong save wet longtaem mo se i nomol blong filim nogud wanwan taem. Tingbaot se taem yumi praktisim mo gat fet long Lod, yumi save stretem ol situesen blong harem nogud. “!Stap gat tingting blong save wet longtaem wetem ol hadwok blong yu blong gat moa fasin blong save wet longtaem!
-
Askem help long God taem yu filim se yuwan yu stap traehad blong gat fasin blong save wet longtaem. Pulum longfala win mo mekem wan prea, i save helpem yumi blong stap kwaet mo filim pis.
-
Blong stap lisin long ol miusik long saed blong spirit we i stap leftemap yumi mo tekem filing blong pis i kam, i save helpem yu blong kontrolem ol samting we oli stap mekem yumi kroskros hariap.
-
Luksave taem blong Lod insaed long laef blong yu. Ol tingting mo ol filing blong hat blong yumi oli mas jenis folem taemtebol blong Hem.
-
Blong gat fasin blong save wet longtaem, i mas stap oltaem long maen blong yumi. Tingbaot se taem yu filim fraet o stap long situesen blong mas hariap bae i had blong mekem laef blong yumi i kam gud.
Ol Aedia blong Yusum long Taem blong Mekem Wok blong Givhan wetem Fasin blong Save Wet Longtaem
Samtaem pat blong yumi insaed long wok blong givhan i blong helpem ol narafala man blong gat fasin blong save wet longtaem tru long ol hadtaem. Hemia sam long ol wei we yumi save help:
-
Soem long wanwan man o famli se yumi lavem mo kea long olgeta, nomata eni jalenj we oli stap fesem, iven sapos oli tingting se, i hapen olsem from wanem kaen risen, olsem se, oli no lavem olgeta.
-
Serem ol eksperiens wetem olgeta abaot taem we yu lanem blong gat fasin blong save wet longtaem mo yu tokbaot i go wetem hamas i had tumas long yu long tetaem ia. Helpem olgeta blong filim se, oli no stap olgetawan sapos oli filim se oli kros o harem nogud.
-
Prea from olgeta blong oli save gat fasin blong save wet longtaem tru long ol hadtaem mo letem olgeta oli save se Papa long Heven bae i harem ol prea blong olgeta mekem se oli save filim paoa ia.
-
Stap wan sora blong save lisin taem oli nidim wan blong toktok wetem olgeta. Blong gat wan fren we i save andastanem olgeta, i wan bes wei blong stanap strong long ol tes blong laef o situesen.