“Ol Brata mo Sista long Kraes,” Liahona, Septemba 2023.
Ol Brata mo Sista long Lod
“God i lavem tumas ol man long wol nao i givim mi, wan stret pikinini ia nomo blong Hem”—mo Hem i givim long yumi, wanwan long yumi.
Kraes i mekem pikinini boe blong wan wido long siti blong Naen i girap bakegen.
Sevya i aot long Kepaneam i kam long wan siti we oli singaotem Naen. Kolosap long wan get blong siti, Hem i luk wan fenerol i stap gohed. I wan ded we man i no rere from, mo i wan pikinini ia nomo blong wan pua wido we i lego hem mo bae hem i stap hemwan.
“Nao taem Masta blong yumi i luk woman ya, hem i sore tumas long hem, nao i talem long hem se, “Yu no krae.
“Nao hem i go, i holem bed ya we ol man oli stap karem dedman ya long hem, nao ol man ya oli stop. Nao Jisas i talem se, “!Yang man! !Mi mi talem long yu, yu girap!”
Nao dedman ya i girap, i sidaon, mo i stat toktok. Nao Jisas i tekem boe ya, i givim i gobak long mama blong hem” (luk long Luk 7:11–15; oli ademap italik).
Truaot long seves blong Hem, i nomata se 1 o long ol 99,1 Sevya blong yumi i givim wan eksampol we i stret gud evriwan blong gat bigfala lav mo sore, gat fet, hop, jareti, lav, fogivnes, sore mo seves.2 Hem i invaetem wanwan long yumi blong “kam folem mi” (Luk 18:22) mo blong kam “olsem we mi stap” (3 Nifae 27:27).3
“Olsem we Mi Stap”
Blong folem eksampol blong Hem we i stret evriwan mo kam olsem we Hem i stap, yumi akseptem invitesen blong wokbaot wetem hem long rod blong kavenan blong Hem (luk long Moses 6:34). Samtaem yumi luksave rod blong kavenan tru long ol odinens blong fasin blong sevem man mo fasin blong kam olsem wan god we oli soem tru long—baptaes mo presen ia we i Tabu Spirit mo kam wan memba blong Jos Ia blong Jos blong Jisas Kraes blong Ol Lata-dei Sent; odinesen blong Melkesedek Prishud (blong ol brata); endaomen insaed long haos blong Lod (blong yumi wanwan); mo tempol siling.
Wan odinens we i impoten blong fasin blong sevem man mo fasin blong kam olsem wan god i wan tabu aksen we man we i gat prishud atoriti i mekem, we i tijim yumi kavenan we odinens ia i konek long hem. Long samfala wei, yumi save tingting long wan odinens blong fasin blong sevem man mo fasin blong kam olsem wan god, olsem wan aksen we yumi soem aotsaed we i joenem wan rilesensip wetem God mo tabu Pikinini blong Hem i kam long laef blong yumi tru long kavenan.
Wanwan long yumi olsem wan pikinini boe mo gel blong God we Hem i lavem tumas, yumi mekem ol kavenan blong yumiwan wetem God. Yumi mekem olsem wanwan man, long nem blong yumiwan, wan afta narawan. Kavenan ia we i konektem yumi wetem God, i givim long yumi wanwan, paoa, hop mo promes. Ol kavenan ia oli save jenisim ol fasin we yumi gat finis, i mekem i kam tabu, ol tingting mo aksen blong yumi, mo helpem yumi blong karemaot man blong wol ia o woman blong wol ia taem yumi mekem folem ol gudfala toktok blong Tabu Spirit. Tru long kavenan, tru long Atonmen blong Kraes we i Lod, wanwan long yumi i save kam olsem wan pikinini blong God—“we i stap lisin, i no stap flas, i putum tingting blong hem i stap daon, i save wet longtaem, i gat plante lav” (Mosaea 3:19).
Stap Givim Seves Tugeta tru long Kavenan
“God i lavem tumas ol man long wol nao i givim mi, wan stret pikinini ia nomo blong Hem” (Jon 3:16)—mo givim long yumi, wanwan long yumi. Blong stap pat long kavenan—blong konek wetem God mo wanwan long yumi tru long kavenan—i invaetem yumi blong mekem i hapen tabu aedentiti mo stamba tingting blong yumi, taem yumi kam kolosap long heven mo taem yumi konek mo krietem wan komuniti blong Ol Sent, taem yumi lavem mo givim seves long wanwan long yumi mo long olgeta we oli stap raon long yumi. Taem yumi givim janis blong komitim yumiwan long kavenan mo stap pat long kavenan, God i mekem i semmak long olgeta man. Hem i invaetem wanwan long yumi, ol woman mo ol man, olgeta we oli mared mo olgeta we oli no mared, nomata ol samting we oli stap raonem yumi o ol situesen blong yumi, i blong kam long Hem mo long wanwan long yumi tru long kavenan.
Taem yumi joen long kavenan wetem Lod, yumi joen tu tru long kavenan wetem wanwan long yumi. Ol gudgudfala samting oli hapen taem yumi lavem Lod mo wok wan, kaonsel tugeta mo givim seves long wanwan long yumi. Blong kavenan tru long seves, i givim paoa taem yumi konek wetem God mo long wanwan long yumi. Hemia i tekem tu, rilesensip blong yumiwan wetem Papa blong yumi long Heven, famli, kongregesen long Jos, komuniti mo ol jeneresen blong famli. Taem yumi laef folem ol kavenan blong yumi, yumi lusum tingting ia blong lukluk nomo long yumi, mo faenem bes blong yumi we Kraes i senta blong yumiwan.
Tabu Plan blong God blong Stap Hapi
Long tabu plan blong stap hapi, Presiden Russell M. Nelson i talem, “ol heven oli open nomo i stap long ol woman we oli bin endao wetem paoa ia blong God we i kamkamaot long prishud kavenan blong olgeta, semmak olsem ol heven oli open long ol man we oli holem prishud.”4
Presiden Camille N. Jonson, Rilif Sosaeti Jeneral Presiden i raetem se, “Yumi gat raet blong kasem prishud paoa tru long klin fasin blong wanwan man i stap klin inaf.”5 Hem i kwotem toktok blong Presiden Nelson, hem i talem, “Yumi nidim ol woman we oli save olsem wanem blong kasem paoa we God i gat i stap blong olgeta we oli stap kipim ol kavenan.”6 Olgeta we oli stap kipim ol kavenan we oli lukaotem mo laef folem fet, fasin blong putum tingting i stap daon, hadwok, Presiden Johnson i tijim se, bae oli kasem spirit blong lidim olgeta, kasem insperesen, mo “help mo paoa blong kam moa olsem Jisas Kraes mo Papa long Heven.”7 Taem yumi evri i givim ol spesel talen blong yumi oli wok wan wetem Lod mo wanwan long ol narawan, yumi krietem “ wan bodi nomo” (1 Korin 12:13).
Insaed long plan blong God, ol mama mo ol papa oli ol kompanion mo ol help patna. Yumi helpem wanwan long yumi olsem ol ikwol patna long lav, mo fasin blong stap stret mo gud blong lukaot mo sapotem wanwan mo ol famli blong yumi. Tingting mo fasin we oli klin, oli ol fas samting blong gat blong mekem i posibol blong ol woman mo man blong kasem revelesen mo insperesen we oli nidim. Insaed long hom blong olgeta, ol papa mo ol hasban oli prisaed wetem kaen fasin, fasin blong no stap flas, mo tru lav—ol man mo ol woman oli nidim ol kwaliti we oli stret mo gud long evri rilesensip blong yumi.8
Heven i krae taem, long eni rilesensip, i gat abius, fasin blong kontrolem narawan, fosem wan blong mekem eni kaen samting we man o woman i mekem. Fasin blong winim tingting blong man, fasin blong gat longfala tingting tru long hadtaem ,fasin blong stap kaen mo save we i klin, oli ol kwaliti olsem hemia blong Kraes, we wanwan long yumi i lukaotem—nomata sapos yumi mared, singgel, wido, o divos (luk long Doktrin mo Ol Kavenan 121:41–42). Hemia i from se wea ples yumi stap long hem long fored blong God mo insaed long Jos blong Hem, bae yumi soem tru long ol fasin we yumi wanwan yumi gat mo fasin blong yumi blong stap stret mo gud taem yumi stap kipim ol kavenan blong Hem.
Stap Givim Advaes long wan Kaonsel Miting
Long semmak spirit, insaed long Jos blong Lod, yumi givim advaes long kaonsel miting taem yumi givim seves tugeta. Long taem blong ol kaonsel miting blong yumi, ol lida oli lukaotem ol niufala tingting mo ol aedia long evriwan. Mi mi talem tangkyu from wanwan long ol top woman mo man we mi gat spesel janis blong wok wetem olgeta, saed saed, long ol eksekutiv kaonsel blong Jos. Ol gudfala sista mo brata ia oli help karem i kam tugeta Isrel tru misinari seves, mekem yumi rere blong mitim God tru prishud mo famli seves, mekem famli i kam wan blong taem we i no save finis tru long tempol mo famli seves, mo givhan long olgeta we oli stap long nid tru long seves blong gudlaef mo fasin blong stap dipen long yumiwan.
Long wanwan situesen, yumi kasem ol desisen we oli moa gud mo gat sakses long seves blong Lod taem yumi tekem kontribusen blong ol narawan oli impoten mo wok tugeta, ol brata mo sista long wok blong Hem.
Long semmak wei, mi talem tangkyu se, long ol stek blong mifala mo ol wod, ol brata mo sista lida mo ol memba oli wok wan from fasin blong sevem man mo fasin blong kam olsem wan god. Anda long daereksen blong ol misin lida we oli dediketem, we oli stap long Jos raon long wol, ol kaonsel blong misen lidasip, we i tekem tu ol trening elda mo sista lida we oli stap lidim ol misinari blong yumi, we wanwan wok mo ol responsabiliti blong olgeta oli gat valiu mo impoten. Long Yunaeted Stet long ples blong ami, olgeta we oli ripresentem ol pris we oli Ol Lata-dei Sent, ol man mo woman ofisa we Jos i givim raet long olgeta, oli blesem olgeta we ol stap givim seves raon long ol defdefren seves branj.9 Long wok blong givhan, ol yang man mo ol yang woman blong yumi oli gat janis mo oli nid blong givim seves. Long seves blong yumi, yumi evriwan i stanap tugeta.
Wan wei we yumi stanap olsem ol witnes blong God i blong givim seves olsem ol witnes blong ol odinens blong gospel we i bin kambak bakegen. Ol sista mo ol brata we oli stanap olsem ol witnes blong mekem baptaes blong tugeta, olgeta we oli laef mo olgeta we oli ded. Ol brata mo ol sista oli stanap olsem ol witnes insaed long haos blong Lod from ol odinens we oli ademap. Long ples ia, tru long ol ki we presiden blong tempol, ol sista oli mekem ol tabu odinens blong ol sista mo ol brata oli mekem ol tabu odinens blong ol brata.
Presiden Dallin H. Oaks, Fas Kaonsela long Fas Presidensi i talem se insaed long tabu plan blong stap hapi, “prishud paoa i blesem yumi evriwan. Ol ki blong prishud, oli givim daereksen long ol woman mo tu, long ol man mo ol prishud odinens mo prishud atoriti i blong ol woman mo tu, ol man. Wan we i wok insaed long wan ofis o kasem wan koling we i kam tru long wan we i holem ol ki blong prishud atoriti i blong mekem ol wok we oli asaenem long hem.”10
Yu kam antap bitim Wol Ia
Taem yumi traehad blong “stap wan,” iven olsem we Jisas Kraes i wan wetem Papa (Jon 17:21), yumi mas “putum … long Lod, Jisas Kraes” (Rom 13:14).
Yumi save kam tabu olsem, tru long gladhat we i kam tru long gladhat, yumi lanem mo mekem ol fasin olsem hemia blong Jisas Kraes i kam olsem blong yumiwan—blong lavem moa fulwan, blong fogiv isi, no stap jajem narafala man isi, givim seves mo mekem sakrifaes moa tru long hat, stap wan eksampol blong gat lav mo sore moa mo oltaem.
Letem yumi trastem doktrin mo eksampol blong Kraes stap glad long trutok mo stap kam ol man blong folem Hem we tingting blong olgeta i stap daon(luk long 2 Nifae 28:14)—long wanwan long yumi mo olsem ol brata mo sista long Lod.11