“Baptaes long Fraedei Naet,” Liahona, Septemba 2023.
Ol Voes blong Ol Lata–dei Sent
Baptaes long Fraedei Naet
Filing blong hat blong mi we i wantem sakem sin i bin helpem mi blong faenem Sevya mo Jos blong Hem.
Pikja i kam long Katy Dockrill
Afta long glad we mi bin gat blong kam long Yunaeted Stet, aot long Jaena blong stadi from PhD blong mi, mi bin fulap wetem ol akademik pepa we bae i blong mi ridim mo raet. Mi no sua tu long olsem wanem blong konek wetem akademik advaesa blong mi, we i ademap wari blong mi. Mi filim se mi lus mo mi stap miwan, mo mi no save wanem blong mekem.
Mi tingting long en se, ol samting we mi mekem i rong long laef blong mi bifo i bin mekem se mi stap safa mo se mi nidim blong sakem sin. I bin naet, so mi lukaotem onlaen “jos”. Mi faenemaot se Jos Ia blong Jisas Kraes blong Ol Lata-dei Sent, i wan jos ia nomo we i open kasem 9:00pm long naet. Mi tingting plante finis long maen blong mi mo gat strong tingting blong sakem sin long jos, mi stat blong tekem wan aoa blong mekem wan longfala wokbaot.
Taem mi kasem jos samples long 6:00pm, mi luk ol laet mo harem ol laflaf mo miusik i stap kam insaed. Mi lukluk raon long bilding be mi no save fanem doa. Tru long wan windo, mi luk wan papa we i stap pleiplei wetem pikinini boe blong hem insaed long wan long ol rum. Mi noknok long windo blong hem i save luk mi. Hem i soem daereksen long mi i go long doa, i welkamem mi i kam insaed, mo talem se wan i bin kasem baptaes.
Mi folem hem i go insaed long wan rum we wan man i stap givim wan blesing long wan boe we i jes kasem baptaes. Mi stap stanap long doa, stap lisin long blesing, mi filim se God i stap toktok tu long mi. Hat blong mi i kam wom, mo mi filim wanem we afta bae mi kam blong save, we i Tabu Spirit. Mi harem wan voes tu we i stap talem se oli fogivim mi tu.
Afta long baptaes, mi kam tugeta wetem ol narawan mo mitim plante naesfala pipol. Mi nomo stap miwan bakegen. Wan man we i bin introdiusum hemwan long mi fastaem, olsem “branj presiden” i askem blong dropem mi long hom blong mi. Sam manis i pas, afta we mi tekem ol lesen blong ol misinari, mi bin kasem baptaes.
Long dei blong baptaes blong mi long 2018 long Kambrij, Masajusets,wan brata i bin tokbaot olsem wanem Papa blong yumi long Heven i bin arenjem baptaes blong Fraedei ia. Hem i eksplenem se baptaes ia oli blong mekem long Sandei we i stap kam, be from i no posibol, bae oli mas jenisim blong Fraedei naet. Sapos i no bin jenis blong taem ia, bae mi neva save kam blong save Jos, Sevya mo Papa blong yumi long Heven, mo ol brata mo sista blong mi long gospel.