“Glad blong “Lisin gud long Hem”,’” Liahona, Septemba 2023.
Glad blong “Lisin gud long Hem”
Mi stap fesem hadtaem blong lisin long jos, be stori ia long Niu Testeman i helpem mi blong luk situesen blong mi long wan defren wei.
Mi bin gat wan bigfala problem long saed blong harem samting, kolosap blong ful laef blong mi mo mi andastanem nomo 20 pesen blong wanem we oli stap tokbaot long pulpit long taem blong ol Jos miting. Plante taem filing ia se sora blong mi i nogud i mekem mi stap filim se mi stap miwan mo seperet, olsem long taem we kongregesen oli laf long wanem we spika i talem we i fani, be mi no laf from mi no harem. Mo i no miwan nomo. Ol memba we oli ol olfala oli talemaot long mi se olgeta tu oli fesem hadtaem blong stap lisin.
Samtaem afta we mi traehad blong andastanem wan spika we i toktok sloslo long sakramen miting o taem we wan tija blong Sandei Skul i talemaot se i no gat nid ia blong yusum maek from se evriwan i save harem hem, mi stap tingting se from wanem mi wantem go long jos taem mi save harem smol samting nomo. ?Bae taem blong mi long haos we mi yusum blong stap ridim ol lesen blong Kam folem mi bae i moa gud?
Be yet, mi wantem blong stap obei mo gohed blong kam wetem famli blong mi blong mekem i kam niu bakegen ol kavenan blong baptaes mo tingbaot Sevya taem mi stap tekem sakramen. Oltaem hem i wan blesing blong filim Spirit mo oltaem mi filim Spirit i tijim mi tru long ol samting we mi save harem.
Wan Sandei, hae kaonsela we i bin toktok long sakramen miting i gat wan long ol klia, mo laod voes we i mekem i isi blong harem hem. Hem i tokbaot stori long Niu Testeman abaot woman ia we i safa from wan sik blong blad blong 12 yia mo hem i gat fet se bae i kam oraet bakegen sapos nomo hem i save tajem klos blong Jisas taem Hem i kam pas i go (luk long Luk 8:43–48).
Spika i talem wan niu lukluk we i tajem hat blong mi bigfala, i eksplenem se, from kondisen blong hem, woman ia bae oli tingting long hem olsem wan we i no klin inaf o bae oli no save letem hem nomo i kam insaed long jos. !Blong 12 Yia!
Ol aksen blong hem ia i mekem mi mi glad tumas. Nomata sik, woman ia i no gat wan samting we i nogud long bodi blong hem blong i no go long jos, blong evri wik. Be from sosol kastom blong tetaem ia, i mekem se oli no letem hem blong kam. !I wan rabis fasin blong tritim fet blong eniwan olsem!
Taem mi stap tingting hevi long hamas we hat blong hem i soa blong oli no letem hem blong wosipim God wetem ol narafala man blong God we oli biliv, from situesen blong hem long saed blong bodi—wan samting we hem i no save kontrolem—Spirit i openem ae blong mi blong komperem olsem wanem situesen blong hem i defren long blong mi. Mi kam blong andastanem se nomata mi no save stap tekpat fulwan, be yet, mi gat spesel janis ia blong stap kam long jos mo stap harem wanem nomo we mi save harem. Woman ia i no gat kaen joes ia. Mi filim sem from ol taem we mi bin tingting sot blong stap long haos.
Kwiktaem, God i toktok long hat blong mi, blong letem mi save se Hem i no wantem mi blong filim sem. Hem i wantem mi blong filim glad—glad long spesel janis ia blong stap kam long jos mo blong kam strong taem mi joen wetem ol fetful disaepol blong Kraes. Nomata se mi no save harem evri samting, mi save andastanem sam samting—mo wanwan long ol samting ia i blesem laef blong mi. I gat ol spesel taem tu we Spirit i helpem mi blong andastanem ol samting ia mi save harem.
Mi tangkyu from fridom blong wosipim God mo glad long ol blesing blong stap go long haos blong Hem. Spirit i testifae long mi se i gud, mo i moa gud tumas blong mi blong stap long Jos miting, kakae long sakramen mo lanem wanem we mi save lanem bitim we blong no go nomo long Jos.
Long dei ia, fasin blong mi i jenis. Pis i fulumap hat blong mi bitim blong lukdaon long ol samting we mi save mekem nomo, mo mi stretem mi mo lukluk nomo long ol blesing we i kam taem mi kam long jos. Mi stretem miwan blong mekem wan efot we i kam wetem tru hat blong talem tangkyu long wanem we mi save harem, be i no blong mekem tingting blong mi i kam slak long ol samting we mi no save mekem.
Elda Dieter F. Uchtdorf blong Kworom blong Olgeta Twelef Aposol i talem: “Blong talem tangkyu long ol taem blong soa i no minim se yumi harem gud long ol situesen blong yumi. Hem i minim se tru long ol ae blong fet, yumi lukluk i go bitim ol jalenj blong tedei.”1 Woman ia we i pusum han blong tajem en blong klos blong Jisas, i wan gudfala stori blong stap rimaenem mi blong gat inaf fet long Lod blong lukluk i go moa long ol samting we mi no save mekem mo gat inaf tras long God blong save se Hem bae i blesem mi winim ol tingting we i stap wantem stopem hem blong i save mekem moa gudfala samting.
Laef i kam wetem ol defdefren kaen jalenj we i fasem yumi long saed blong spirit, filing, o long saed blong bodi, be iven long ol taem blong soa, oli leftemap tingting blong yumi blong stap talem tangkyu from ol blesing we yumi stap glad long olgeta. Lod i talem:
“Fren blong mi, no fraet, bae mi mas leftemap tingting blong hat blong yufala; yes, stap glad oltaem naoia i go, mo long evri samting, talem tangkyu.
Mo long saed blong evri samting we yufala i bin gat hadtaem wetem, bae oli wok tugeta blong gud blong yufala, mo blong glori long nem blong mi, Lod i talem” (Doktrin mo Ol Kavenan 98:1, 3).
Hem we i raet i stap long Yuta, YSA.