“Serem 72 Kopi blong Buk blong Momon,” Liahona, Septemba 2023.
Ol Voes blong Ol Lata–dei Sent
Serem 72 Kopi blong Buk blong Momon
Evri taem mi openem maot blong mi blong tokbaot Buk blong Momon, Tabu Spirit i stap wetem mi.
Pikja i kam long Allen Garns
Long taem blong KOVID-19 wol sik, mitufala i kasem blesing blong gat olgeta we oli kam blong kea long hasban blong mi, Claude, long hom blong mitufala. Long ples ia, mi mo ol pikinini blong mitufala i help blong lukaot mo kea long hem wetem lav kasem taem we i go kwaet nomo long hom blong yumi long heven.
Bifo long hemia, Mi mo Claude i bin prea se blong bae mitufala i jenisim ples blong sidaon aotsaed i kam rum blong stap kea mo lukaot long hem, long ples ia bae mitufala save putum evri samting we bae stap rere blong hem i yusum taem i nidim blong i mekem hem i harem gud. Mitufala i kasem ansa se bae mitufala i stat blong mekem.
Blong mekem gud ples blong spel ia, bae i nidim sam wokman blong kam long hom blong mitufala. Laki nomo se long ples ia i gat wan doa biaen we i mekem se ol wokman ia oli no nid blong kam insaed mo go aotsaed long mein haos blong mitufala. Hemia i wan bigfala blesing blong gat ol rul blong KOVID-19.
Afta we oli finisim rum blong Claude, ol nes oli kam evri dei. Oli kaen, oli gat lav, mo save gud abaot wanem mifala nidim blong mekem se Claude i stap gud.
Taem mi bin joenem Jos, mi bin lanem se evri memba blong Jos i wan misinari.1 From se mi laekem tumas blong stap serem gospel, mi mekem oda blong tri katen blong Buk blong Momon we i gat 24 buk long wanwan katen. Mi mekem promes blong givim wan buk long evri man o woman we oli kam insaed long hom blong mitufala.
Mi makem ol impoten seksen insaed long wanwan buk wetem wan bisnis kad we mi disaenem we i gat pikja blong Sol Lek Tempol long hem. Mi stikim testemoni blong mi tu long emti spes long fored blong wanwan buk. Afta, bifo mi givim wan buk long wan wokman o wan nes, mi eksplenem long olgeta wanem i Buk blong Momon.
Mi glad mo sapraes long aksen blong olgeta taem oli akseptem. I gat wan man nomo we i no wantem akseptem wan buk. Be ol narawan oli intres blong harem abaot Buk blong Momon. Sam oli talem bigfala tangkyu, mo stap talem se oli bin save abaot Buk blong Momon mo oli bin wantem wan. Sam long olgeta oli glad tumas, mekem se oli haggem mi.
Mi save stret se hemia i hapen evri taem mi openem maot blong mi blong tokbaot Buk blong Momon, Tabu Spirit i stap wetem mi. Mi trastem se ol wokman mo ol nes oli save filim Spirit. Mi givim evri 72 buk, mo i no longtaem i pas mi mekem oda blong 24 moa.