“Kasem Hiling insaed long Tempol,” Liahona, Septemba 2023.
Ol Voes blong Ol Lata–dei Sent
Kasem Hiling insaed long Tempol
Insaed long tempol, mi filim wan dip filing blong hop se Lod i lavem mi mo i save gud ol hadtaem blong mi.
Hem we i raet i glad blong givim pikja ia; bakgraon foto blong Durban Saot Afrika Tempol i kam long Matthew Reier
Fas pikinini boe blong mitufala i ded taem i bon long 2017. Naen manis bifo oli dediketem Durban Saot Afrika Tempol, namba tu pikinini blong mitufala i ded taem i bon.
Long taem ia mi filim olsem Hana long OlTesteman. Mi “stap harem nogud yet, [mi] stap krae, nao [mi] girap, [mi] go prea long Hae God” (1 Samuel 1:10).
Mi filim se mi no gat paoa mo kros, mo mi filim soa ia blong sem we i bigwan tumas. Mi traehad long saed blong filing, blong bodi, mo long saed blong spirit. Blong stap holem aean rel ia i olsem se mi stap holem wan tred we sloslo han blong mi i glis aot long tred ia. I tru, mi stap bon insaed long “faea we i hot tumas blong ol harem nogud” (Aesea 48:10).
Mi talem tangkyu from help we mi kasem mo hiling we i kam tru long famli blong mi, ol skripja mo prea. Mi kasem help tu long ol kaonsela. Be en blong hiling blong mi i kam insaed long tempol.
Taem mi stat blong stap givim seves insaed long tempol, laet i stat blong fulumap mi mo kam antap. Long ples ia, mi filim se mi stap long hom. Mi filim tu wan dip hop se Lod i lavem mi mo i save gud ol hadtaem blong mi.
Taem mi stap gohed blong givim seves insaed long haos blong Lod, mi stat blong lukluk long ol nem blong bubu blong mi we oli ded finis long wan spesel wei. Oli no jes ol nem nomo. Mi luksave, eksampol, wan bubu i wan gel, wan mama, wan bubuwoman, wan anti wan sista, wan pikinini gel blong brata. Ded blong hem bin had tumas long ol famli we oli stap laef yet. Be ol blesing we oli givim long ol bubu blong bifo ia insaed blong tempol tru long ol defdefren tabu odinens oli soem wan bigfala mo swit glad we i moa gud bitim eni soa we ol famli blong hem oli bin filim long taem we hem i ded.
Andastaning ia i blesem mi taem mi bin stap tingting abaot tufala naesfala boe blong mitufala, fasin blong ol spirit blong yumi we i no save finis, mo plan blong Papa long Heven. Blong lusum ol boe blong mitufala i lidim mi blong mekem evri bes blong mi blong laef folem gospel.
Sam dei oli stil had bitim ol narawan. Be blong holemtaet ol promes kavenan blong mi i mekem se ol dei ia oli kam moa isi.
Blong karem fastaem ol toktok blong Presiden Russell M, “Mifala i misim bigwan ol [boe] blong mitufala. Be, from gospel ia we i kambak blong Jisas Kraes, mifala i no stap wari long [tufala]. Taem yumi stap gohed blong ona long ol kavenan blong yumi wetem God, yumi stap laef wetem hop ia blong stap wetem [tufala] bakegen.”1