“Kam blong Andastanem, Wanem I Minim blong God I Lavem Yu,” Liahona, Septemba 2023.
Ol Yang Adalt
Andastanem long En, Wanem I Minim blong God I Lavem Yu
Mi bin lusum lukluk ia long saed blong paoa blong save tabu aedentiti blong mi.
Foto i kam long Alecia Schubert
Taem mi bin yangfala, famli blong mi i muvaot long Hangari i go long Jemani. Mi glad tumas blong muv i go long ples ia, be i bin naen yia blong wan had laef.
Mi traehad blong lanem lanwis blong Jemani, mo oltaem mi kwik blong tekem aksen folem filing blong mi, long tugeta we i mekem se, mi kam wan we oli stap jikim mi. Valiu blong mi i foldaon bigwan. Plante taem mi filim olsem se i no gat wan i lavem mi mo mi gat smol hop nomo blong fiuja. Mi stap tingting se maet wol ia bae i moa gud sapos mi no stap mo samtaem mi iven gat ol tingting blong tekemaot laef blong miwan.
Be i nomata ol samting ia, tru long bigfala harem nogud, mi save se oli givim laef long mi from wan risen, iven sapos mi no andastanem fulwan. Mi save se mi save kasem laet blong Sevya, iven long ol taem we i tudak (luk long Ita 12:4). Taem we wol i stat blong kam agensem mi, mi save weaples blong faenem Hem mo wanem Hem i save mekem blong mi sapos mi lukaotem Hem insaed long ol skripja, tru long prea, mo mekem bes blong mi blong stap wan disaepol blong Hem. Hem i tru taem mi laef folem gospel blong Hem we i givim evri kaen pis mo helpem mi blong stap gohed nomata ol trabol taem ia.
Wan Trutok we Mi Bin Lusum Lukluk blong Mi long Hem
Long en, mi mo famli blong mi i muv i gobak long Hangari. Mi graduet long hae skul, mo nomata se ol dei we oli stap jikim mi i pas, mi stil gat filing blong tingdaon long miwan. Ol samting we oli hapen long mi tru long ol aksen blong ol narafala man we oli tritim mi nogud i gat bigfala paoa ova long mi, samtaem mi stap gohed yet blong tingdaon long valiu blong miwan.
Mo olsem wan yang adalt, mi wantem tumas blong trastem ol bigfala desisen long laef we bae mi mekem mo blong stap disaed long wanem blong mekem i kam tru long laef.
Taem mi stap traehad wetem hemia, mi filim spirit i lidim mi blong go long wan konfrens blong ol yang adalt long Is blong Yurop. Mi nidim sam daereksen long saed blong spirit long laef blong mi blong helpem mi andastanem moa valiu blong mi mo prea blong faenem ol ansa long ples ia.
Wan naet long taem blong konfrens, ol hea long skin blong mi oli stanap taem spika i stat blong tokbaot olsem wanem oli jikim hem taem hem i wan pikinini. Hem i tokabaot olsem wanem wan taem hem i filim se hem i no impoten mo i olsem se oli no stap luksave hem. Kwiktaem, mi stat blong krae.
Hem i tokbaot wanem we mi bin gat eksperiens long hem.
Spika ia i gohed mo serem trutok we hem i bin holem strong long taem long ol jalenj blong hem—wan trutok we mi bin lusum lukluk blong mi long hem:
“Mi mi Pikinini blong God.”
Blong Stap Hang Strong long Tabu Aedentiti blong Mi
Taem we faeasaed i finis, wota blong ae blong mi i stap ron plante yet daon long fes blong mi. Spika ia i luksave mo i kam blong putum han blong hem i go raon long mi. Hem i talem long mi se, oltaem mi no stap kam blong toktok long ol faeasaed be hem i filim spirit i toktok strong long hem se i gat wan man we bae i nidim blong harem mesej ia we i stret blong hem.
Mi nao mi man ia.
Eksperiens ia i soem long mi fulwan, hamas Papa long Heven i save gud wanwan long ol pikinini blong Hem mo Hem i save stret olsem wanem blong helpem yumi mekem se bae yumi save filim, iven wan smol laet blong lav olsem wan papa mo mama i gat we i stret evriwan blong Hem. Hem i save se mi nidim blong harem mesej blong spika ia mo i bin lidim mi blong stap long stret ples long stret taem.
Mi bin save sentens ia, “Mi mi Pikinini blong God” blong ful laef blong mi, be trutok ia blong toktok ia i jes kam fulumap gud sol blong mi afta long taem ia. I tru, mi luksave wanem i minim blong stap wan pikinini blong wan God we i stret evriwan we i lavem yumi tumas mekem se Hem i wantem blong Pikinini blong Hem i sakrifaes from yumi, mekem se yumi save laef bakegen mo blong Hem i pemaot yumi long ol sin blong yumi. Hem i lavem mi tumas mo from we oltaem Hem bae i no save protektem mi long ol hadtaem, Hem i stap wetem mi tru long ol samting ia mo i save helpem mi blong kam antap, lanem samting aot long olgeta, mo gobak long Hem.
Hem i lavem mi naoia, mo i lavem truaot long ol yia we oli stap jikim mi mo we i no gat en, taem we mi filim se i no gat wan i stap wetem mi. Mi save naoia se from we mi save gud trutok ia, i mekem se mi jusum blong stap gohed.
I no longtaem i pas, Presiden Russell M. Nelson i tij abaot paoa blong save tabu aedentiti blong yumi. Hem i se: “Ol dia fren blong mi, yufala i ol tru spirit pikinini blong God. ?Be i tru se trutok ia we i no save finis, oli raetem long hat blong yufala?
“I no wan mistek abaot hemia: Yufala i gat tabu paoa ia. Blong lukaotem Hem oltaem, God bae i soem long yu, huia bae yu save kam.”1
Naoia taem mi luk se mi stap gat kwestin long yangfala laef blong mi abaot valiu blong mi, oltaem mi stap rimaenem mi abaot trutok ia se mi mi wan pikinini blong God mo se laef blong mi i wan presen we Hem i givim long mi.
Tingbaot se yu yu wan pikinini blong God. Mo neva fogetem fasin blong sapotem, jenisim laef, mo paoa long saed blong spirit we i naes tumas taem yumi hang strong long trutok ia.
Man we i raet i stap long Szeged, Hangari.