Eria Lidasip Mesej
Kasem Konfemesen long Kol blong Mi blong Givim Seves
Hem i wan niu stat blong mi afta 30 yia blong wok long Jos, mi spel long wok, mo luksave se naoia mi gat plante taem long ol han blong mi. Blong stap wok long Jos Ia blong Jisas Kraes blong Ol Lata-dei Sent i bin wan spesel janis we i bin helpem mi bigwan blong kam huia mi mo wanem mi bin planem blong mekem long ol dei we bae mi spel blong wok.
Fas disisen blong mi taem mi spel blong wok, i blong visitim trifala boe blong mi mo famli blong olgeta long Yuta blong sikis manis. Waef blong mi bae i joenem mi afta from hem i stap wok yet. Long Oktoba 2019, taem mi stap long Yuta, mi go long fas jeneral konfrens blong mi. I bin wan naesfala eksperiens tumas long saed blong spirit we mi neva bin gat insaed long wan Jos miting. Evri samting we mi luk, harem, mo filim long konfrens senta i fulumap mi wetem bigfala tangkyu mo lav from gospel mo from evri samting we mi bin lanem insaed long Jos stat long taem we mi bin baptaes long 1977.
Mi krae taem mi stap singsing ol hym blong kongregesen. Mi sapraes taem mi luk ol 15 profet mo aposol we oli laef, evriwan oli sidaon tugeta antap long fored long medel blong ol nara jeneral atoriti mo Tabenakol Kwaea blong ol enjel long Tempol Skwea. I olsem se singsing blong kongregesen i stap go antap long heven, mo mi wantem oli harem voes blong mi long medel blong ol nara 23000 we oli bin stap. I tru i bin wan naesfala eksperiens.
Afta long hemia waef blong mi i joenem mi long Yuta, mitufala i go lo Kalefonia blong visitim famli blong hem mo long ples ia nao we mi kasem wan kol we mi no bin tingting long hem we i kam long Presiden Ian Adern, Pasifik Eria Presiden. Hem i askem wetaem bae mi go bak long Fiji mo afta hem i talem se i impoten tumas blong hem i mitim mi. Mi talem long hem bae mi kambak aot long Yuta nekis wik, mekem se Presiden Ardern i talem se bae hem i kontaktem me bakegen.
Mi no slip gud afta long kol ia. Maen blong mi i trabol. Evri fasin blong mi abaot haf blong ol dei blong holidei blong mi i jenis.
Hemi Elda Carl B Cook blong Presidensi blong olgeta Seventi we i kontaktem mi afta, mo mi mo waef blong mi i draev i go long Jos hedkwata blong mitim hem. I wan hambol eksperiens long taem ia blong kol blong givim seves olsem wan Eria Seventi. Mi neva bin no wantem wan koling insaed long 42 yia membasip blong mi long Jos, hemia i difren. Mi bin fulap long filing blong i no inaf; mi filim se mi no rere. Mi krae long fored blong waef blong mi mo Elda Cook. ?I tru? ?Hemia i stap hapen?
Ful laef blong mi, mi bin lukluk antap long ol Jeneral Atoriti mo jeneral ofisa blong Jos—God i bin jusum olgeta mo oli bin respektem olgeta truaot long Jos. Evri koling blong mi bifo hemia oli bin lokol. Neva long wael drim blong mi, mi gat tingting long maen blong stap holem wan Eria eklesiastikol koling.
I had blong mi akseptem wanem we oli askem long mi, be tu tingting long paoa blong mi blong fulfilim koling ia i stat blong go lus mo long hemia mi bin fulap long fasin blong talem tangkyu from Sevya blong mi, from lav mo bigfala sore blong Hem. Mi filim wan stamba tingting we i stret evriwan blong givim seves long Lod long wei ia. Hemia i wan janis blong mi blong soem lav blong mi long Hem mo Jos blong Hem. Skripja we i kam long maen blong mi wetem bifala fos i Doktrin mo Ol Kavenan 82:3, “From we long hem we mi givim plante, mi askem plante.”
Mi bin sasten long taem blong Epril 2020 Jeneral Konfrens, we i bin fas vejual konfrens we Jos i bin mekem. Trening blong mi tu olsem wan niu Eria Seventi i bin stap onlaen taem Kovid pandemik i bin hae long taem ia. Fas yia blong mi long koling i bin wan merikel tru; sapot we mi kasem long Pacifik Eria Presidensi, ol Eria Seventi fren blong mi, mo stap visitim ol Jeneral Atoriti i bin gud tumas. Stap travel i go long ol stek konfrens mo atendem jeneral konfrens long bodi i ol haelaet blong taem ia, i fulap long ol naesfala eksperiens blong stap lanem mo gro.
Nomata long hemia, dip insaed mi stap fesem had taem, speseli long ol taem blong mi blong stap tingting bak miwan. Mi stap gat tu tingting mo filim se mi no inaf yet long seves blong mi olsem wan Eria Seventi.
Be i no kasem las sesen blong Jeneral Atoriti, Eria Seventi mo Jeneral ofisa Lidasip Trening, long Epril 2021 jeneral konfrens, we mi kam blong kasem witnes long saed blong spirit we mi bin stap lukaotem stat long taem blong kol blong mi. Bae mi neva fogetem taem ia.
Sensen blong topik ia i blong ol 15 Aposol mo Profet blong serem ol testemoni mo witnes blong olgeta long Jisas Kraes. Tabu mo sikret taem ia i bin saen tumas. Testemoni blong Elda Andersen nao i jenisim lukluk blong mi mo givim mi strong tingting we mi stap lukaotem.
Elda Andesen i eksplenem olsem wanem hem i filim taem oli singaotem hem i go long Ol Kworum blong Olgeta Twelef Aposol. Hem i talem se fastaem we mi sidaon long jea we naoia Elda Soares i sidaon long hem, hem i lukluk i gobak long laen we ol 11 Aposol mo Fas Presidensi, mo ol filing blong hemwan blong i no inaf i fulmap hem. Taem mi harem Elda Andersen i talem hemia mi sidaon stret long jea blong mi from mi save hemia wanem hem i jes talem—mo wanem bae hem i talem nekis wan—i blong mi stret.
Elda Andersen i talem se hem i fesem had taem wetem isiu ia blong samtaem mo afta i kam: Hem i harem voes blong Lod i talem, “Neil, yu no bin putum yuwan long ples ia. Mi nao mi putum yu, from mi lavem yu mo mi save se yu save jenis, mo mi save se yu save help wetem wok blong mi.”
Taem Elda Andersen i serem tabu eksperiens ia, i kam tabu tu long mi. Hemi konfemesen we mi nidim.
Mi save se Papa long Heven mo Pikinini blong Hem i no singaotem mi from eni samting we mi bin mekem blong kwalifae from wok ia, be i from Tufala i lavem mi. Tufala i save se mi save jenis, mo Tufala i save se mi save helpem Tufala long bigfala wok blong tufala: blong mekem man i nomo save ded mo i kasem laef we i no save finis. (Luk long Moses 1:39.)