“Mi Wantem se Yufala I Tingbaot,” Liahona, Septemba 2023.
“Mi Wantem se Yufala I Tingbaot”
Mosaea 5:12
Wanwan long yumi i bin kasem ol samting we oli stap rimaenem yumiwan abaot Kraes. Lukluk long olgeta samting ia mo tingbaot Hem.
Moa long storian ia long Kraes mo Yangfala Rij Rula, i kam long Heinrich Hoffman
Olsem pat blong eksperiens blong laef blong yumi long wol ia, yumi evriwan i pas tru long vel blong fogetem samting be tu, wan kondisen blong fogetem samting. Vel blong mekem yumi fogetem samting i mekem yumi fogetem ol samting we i hapen mo ol trutok we yumi bin save long laef blong yumi bifo laef long wol ia. Kondisen blong yumi fogetem samting i lidim yumi blong fogetem mo go longwe long ol trutok we yumi bin lanem o lanem bakegen long laef ia. be sapos nomo yumi winim ples we yumi bin foldaon long hem blong stap fogetem samting bae i isi blong “kwik blong mekem ol rabis fasin, be yumi slo blong tingbaot Lod, God blong [yumi].” (1 Nifae 17:45).
Ol samting blong rimaenem yumi abaot Kraes
Long evri komanmen we Hem i givim, God i promesem [yumi] se bae [yumi] save mekem samting ia we hem i talem long [yumi] ” (1 Nifae 3:7). Mekem se bae yumi save obei ol komanmen blong Hem blong tingbaot se Lod i bin mekem rere ol samting blong stap rimaenem yumi.
I tru, evri samting oli krietem mo mekem blong talem rekod mo rimaenem yumi abaot Kraes (luk long Moses 6:63; luk tu long Alma 30:44). Hem i blong save yusum, eksampol, mekem se yumi tingbaot Hem “taem tru long ol bus mo ol open spes blong dak bus [yumi] sapraes mo harem ol pijin oli singsing swit insaed long ol tri.”1 Ol ston oli save krae olsem wan testemoni mo oli rimaenem yumi abaot Jisas (luk long Luk 19:40). I tru, ful wol, tugeta long toktok mo olsem we yumi save luk, oli talemaot naesfala witnes mo oli givim ol nambawan rimaenda long yumi abaot Man we i krietem olgeta.
Olsem we oli ol defdefren samting blong rimaenem yumi long evri kriesen we oli stap insaed moa long ol samting we oli rimaenem yumi we oli stap insaed long ol odinens. Abinadae i tijim se Isrel blong taem bifo oli bin givim long olgeta ol odinens we oli gat strong rul blong mekem blong save “kipim olgeta blong tingbaot God mo ol wok blong olgeta i go long hem.” (Mosaea 13:30). Ol profet blong tedei oli tijim ol semmak samting. Presiden Spencer W. Kimball (1895–1985) i talemaot, “Mi stap tingting se bae i neva gat wan apostasi, bae i neva gat wan samting we i go agensem loa, sapos ol pipol oli tingbaot, ol samting we oli mekem kavenan long en blong wota o long tebol blong sakramen mo insaed long tempol.”2
Atonmen blong Kraes i blong tugeta, evriwan mo wanwan man mo woman. Semmak Olsem Ol Samting blong Hem we Oli Stap Rimaenem Yumi From hemia, blong ademap long ol odinens we oli semmak we oli givim long evriwan, Hem i givim ol defdefren mo wanwan samting blong oli rimaenem yumi abaot Hem. Eksampol, wan nomol red graon o sofmad bae i no mekem ol pipol oli tingbaot Jisas o solap wetem ol filing mo filing blong talem tangkyu from Hem. Be yet, Jisas i mekem man we i no save lukluk i lukluk bakegen taem Jisas i anoentem ae blong hem wetem red graon ia we i tru bae hem i tingbaot Jisas evri taem hem i luk wan red graon—!sofmad! (luk long Jon 9:6–7). Semmak olsem we Naman bae i eva luk wan reva, speseli hemia Jodan, i no tingting long Lod we i bin hilim hem long ples ia (luk long 2 King 5:1–15). Wanwan long yumi i bin kasem wan samting blong stap rimaenem yumi we i blong yumiwan abaot Kraes. Lukluk long olgeta samting ia mo tingbaot Hem.
Holem Rekod blong Kraes
Ol rekod mo ol histri oli ademap long ol samting we Lod i mekem blong oli stap rere blong helpem yumi blong obei long ol komanmen blong Hem blong tingbaot. Ol skripja—ol rekod blong ol wok blong God wetem ol pikinini blong Hem—oltaem i tokbaot blong talemaot witnes o “blong talemaot nem,” blong Hem (luk long 2 Korin 8:3; 1 Jon 5:7; 1 Nifae 10:10; 12:7; Doktrin mo Ol Kavenan 109:31; 112:4).
Ol tabu rekod we i tekem tu ol jenol blong yuwan, oli helpem yumi blong talemaot rekod. Long ol bigfala taem ia wetem Spirit, oli wan presen se, long taem ia, yumi biliv se bae yumi neva fogetem. Be kondisen blong yumi blong fogetem gud samting i mekem se paoa ia blong ol nambawan mo bigfala eksperiens i stat blong go lus. Wan jenol blong raetemdaon, wan foto, o wan rekod i save helpem yumi i no nomo blong tingtingbak long ol gudfala taem be tu, i tekem i kambak ol memori mo Spirit we yumi bin filim. Nogat sapraes, afta, se fas komanmen afta we Jos i oganaes long dispensesen ia i we, “Bae yufala i mas kipim wan histri long medel blong yufala;” (Doktrin mo Ol Kavenan 21:1). I gud blong kipim ol rekod blong mekem ol memori blong yumi i kam bigwan mo oli save mekem yumi luksave ol mistek blong yumi mo tekem yumi i kam long God (luk long Alma 37:8).
Long en, i tru yumi save talemaot rekod blong trutok from se yumi bin kasem wan witnes blong trutok we i kam tru long Tabu Spirit, we hem i “stap talemaot ol samting blong heven” (Moses 6:61). Long wok ia, Tabu Spirit i talemaot trutok long “tingting blong yufala” (2 Korin 3:3). Hem i helpem yumi blong tingbaot Kraes mo evri samting we Hem i bin tijim long yumi (luk long Jon 14:26).
Koneksen bitwin Jisas, ol rekod, Tabu Spirit, mo blong tingbaot oli soem long Moronae 10:3–5. Oli promesem yumi se sapos yumi ridim Buk blong Momon, wan tabu rekod, long wan spirit blong tingbaot mo askem God long nem blong Jisas Kraes wetem wan tru hat, mo tru tingting blong wantem save, wetem fet long Kraes, Tabu Spirit bae i soemaot trutok blong evri samting long yumi we oli rekodemdaon. Mo sapos pat blong rekod ia i tru, yes, Jisas i Kraes ia.
Alma I Wekap, i kam long Walter Rane
Tingbaot se Oli Pemaot Yu
Blong tingbaot Jisas, i lidim yumi i go long fasin blong pemaot man mo blong sevem man. Tingting long wok ia we fasin blong tingbaot samting we i hapen long fasin blong pemaot man long yangfala Alma. Taem enjel i kamkamaot long Alma hem i talemaot toktok we i blong Alma i “nomo lukaotem blong prapa spolem gud jos.” Be bifo hem i mekem oda ia, enjel i talemaot se, “Tingbaot taem we ol bubu blong yu oli bin stap long kalabus … mo tingbaot ol bigfala samting we [Kraes] i bin mekem long olgeta; from oli bin slef mo hem i mekem olgeta oli kam fri” (Mosaea 27:16; oli ademap italik).
Instraksen we enjel i givim i no wan waes daereksen blong oli yusum i kam moa bigwan. Blong Alma, hem i wan spesel saen we i kam wetem lav, blong olsem wanem hem i save stap laef yet tru long eksperiens we i kolosap long ded we kolosap bae hem i kasem.
Twante o sam yia afta, Alma i serem wetem pikinini boe blong Hem Hileman, long tru long aksen we i soem long ditel, wanem we hem i bin go tru long olgeta taem hem i ledaon i paralaes mo nomo save toktok blong tri dei, “i stap sakem sin kasem taem we kolosap mi ded,” (Mosaea 27:28). Afta we enjel i gobak, Alma i tingbaot, evri samting; be evri samting we hem i save tingbaot, i ol sin blong hem.
“Mi stap harem nogud ia,” Alma tingtingbak. “… Yes, mi bin tingbaot ol sin mo ol rabis fasin blong mi, mo from hemia, ol soa blong hel oli mekem mi harem nogud tumas” (Alma 36:12–13). Tingting ia blong stanap long fored blong God i fulumap Alma wetem “bigfala fraet we i had blong tokbaot” mekem se hem i tingting blong wantem ronwe, i no long simpol wei ia blong ded, be blong “lus nomo long saed blong sol mo blong bodi” (Alma 36:14–15).
Long ples ia yumi mas stop mo andastanem se: Alma i no stap pem wan panismen blong tri dei ia we oli bin jusum finis blong stap olsem stret risal blong ol sin blong hem. No, hem i stap long fored—ol fas trifala dei—blong oli putum “jen we i no save finis blong ded i raonem mi ” (Alma 36:18; oli ademap italik).
I tru, bae hem i bin stap long rabis ples ova long tri dei—we i nogat en—sapos i no blong oli gat sore, be yet, hem i save mekem, long wan ples, i tingbaot se papa blong hem i bin profesae “long saed blong wan Jisas Kraes, wan Pikinini blong God, we bae i kam blong pem praes blong ol sin blong wol.” Afta, hem i talem:
Nao, taem we tingting blong mi i kasem tingting ia, mi bin prea insaed long hat blong mi: O Jisas, yu yu Boe blong God, gat sore long mi, we mi stap long bigfala rabis ples, mo ol jen we i no save finis blong ded i raonem mi.
Mo nao, luk, taem we mi bin tingbaot samting ia, mi nomo save tingbaot ol soa blong mi; yes, mi nomo bin tingbaot ol sin blong mi we oli bin givim hadtaem long mi” (Alma 36:17–19).
Alma i bin folem toktok blong enjel blong tingbaot samting. Hem i tingbaot Jisas. Mo olsem we Jisas i bin mekem ol papa blong Alma oli kam fri, Hem i karemaot Alma long ol sin blong hem.
!I wan bigfala sore mo wan bigfala samting we Lod i mekem blong karemaot hem! ! I wan bigfala sapraes blong wan hat mo maen we i jenis!. Alma, we i tingting blong hem bifo i blong ronwe mo lus long ples we God i stap hem, naoia hem i luk God mo ol tabu enjel blong Hem mo “wantem tumas blong stap long ples ia.” (Alma 36:22).
Fasin blong jenis ia we i olsem wan bigfala merikel, i bin kam strong tru long wan simpol wei blong tingbaot samting. Eksperiens blong Alma i givim stret mining long faenol toktok blong King Benjamin: “Mo nao, O man, tingbaot, mo no ded” (Mosaea 4:30).
Hem I Stap Tingbaot Yumi
Taem yumi traehad blong oltaem tingbaot Jisas, hem i impoten blong oltaem kipim long maen blong yumi se, oltaem Hem i stap tingbaot yumi. Hem i raetem nem blong yumi long medel blong ol han blong Hem (luk long Aesea 49:16). Tingbaot hemia—i minim se Jisas bae i no, no save, fogetem yumi, be yet, Hem i wantem blong fogetem ol sin blong yumi we oli stap givim ol kil long Hem.
Hemia i impoten blong stap tingbaot.