“Stap Wok From mo Mekem I Kam Bigwan Fasin blong Andastanem Narafala Man,” Liahona, Septemba 2023.
Ol Yang Adalt
Stap Wok From mo Mekem I Kam Bigwan Fasin blong Andastanem Narafala Man
Eksampol blong Sevya we i stret evriwan i tijim yumi paoa blong mekem i kam bigwan fasin blong andastanem narafala man mo blesem olgeta.
?Wanem nao yu save kasem taem yumi joen tugeta insaed long smol plen wetem wan mama we i harem nogud from smol boe blong hem we i no save stap kwaet? Wan situesen we i had tumas. Long sam jea we i go biaen, mi wajem wanem we i stap hapen. Hem i wan samting olsem ia:
Smol boe: !Mi hanggri!
Mama: Okei, bae yumitu traem lukluk long basket blong mi mo luk wanem mi gat insaed.
Smol boe: !Nooooo!
Mama: ?Be, yu no hanggri?
Smol boe: !Givim hemia long mi!
Mama: ?Givim wanem long yu?
Smol boe: !Hemia!
Mama: Switat, yu no save karem nekles blong mi.
Smol boe: !Mi wantem!
Yu kasem aedia ia. Blong ova long 20 minit i pas, mama i yusum plante teknik blong traem blong mekem hem i stop: i givim mane, i traem jenisim topik, mekem fani blong hem i laf, iven i traem tok strong wan o tu taem long stret wei. I no gat wan samting i wok. “Hem i wan sot flaet nomo,” miwan mi tingbaot. “Mama ia bae i Oraet.”
Be hem i no Oraet. Harem nogud blong hem i stat blong kam antap, mo ol wota blong ae i stat blong fulap long saedsaed blong tufala ae blong hem. Nomata se mi no save hem, mi filim bigwan long hat blong mi se mi wantem helpem hem. Mi save luksave ol filing blong hem, mi stat blong prea from tufala.
I no miwan nomo mi harem noes blong tufala insaed long plen. Long taem we fos blong ol harem nogud blong hem i kam bigwan, wan narafala pasenja i kam blong help. Hem i wan woman we i moa olfala mo i sidaon narasaed long laen we tufala i stap long hem. Hem i soem kaen fasin, hem i tanem hem i go long yangfala woman ia, i talem sam toktok long kwaet voes, blong givim hop, mo i holem han blong hem. !Hemia nao! Mo hemia i bin inaf.
Tufala woman ia tufala i holem han blong tufala krosem medel blong laen blong ol jea blong hamas taem we plen i gat, afta bae i kamdaon. Nomata se smol boe i gohed blong singaot wetem kros we i go wetem fos, mama blong hem i stap long pis. I bin wan merikel.
Fasin blong Andastanem Narafala Man mo Lav mo Sore: Tufala Fasin we i blong Wan Disaepol
Long toktok blong yumi long taem tedei, merikel ia i gat wan nem: fasin blong andastanem narawan Fasin blong andastanem narawan, mining blong hem, i kwik filing ia blong luksave wanem we i stap hapen mo pikjarem long maen wanem tingting blong hem, filing o wanem we narafala man i stap fesem. Fasin blong andastanem narafala man i wan toktok blong taem tedei; bae yu no save faenem eni ples insaed long ol skripja. Be man we i stadi long hem i mekem not se fasin blong andastanem narafala man i kolosap i joen wetem toktok ia lav mo sore. Mo olsem wan toktok blong ol skripja, lav mo sore i kam wetem bigfala namba.
Fasin blong andastanem narafala man i go wetem soa we narafala man i stap fesem mo lav mo sore i wan aksen blong jareti stamba blong filing ia. Jisas Kraes i soem tugeta, fasin blong andastanem narafala man mo lav mo sore taem Hem i stap givhan, blesem, hilim mo go tru long atonmen. Olsem ol disaepol blong Kraes, yumi mas lanem blong kasem eksperiens long saed blong fasin blong andastanem ol narawan mo givim lav mo sore. Hemia i stap long medel blong ol aksen we bae i talem stret mining blong wan disaepol.
Taem fasin blong andastanem narawan i wokem ol bigfala sapraes blong hem, hem i save helpem yumi andastanem mo afta, ansa long hadtaem blong wan narafala wan, nid, fraet mo harem nogud blong hem. Long situesen blong yangfala mama ia, wan mama we i olfala smol long hem we, maet hem i bin gat plante eksperiens long saed blong stap kea long ol pikinini mo ol apupikinini, i save givim kamfot from se hem i bin stanap strong long ol semmak hadtaem olsem blong hem. Tru long gudfala fasin blong hem, hem i kwalifae olsem wan we i save givim kamfot.
?Wanem nao i mekem Jisas Kraes i kwalifae blong givim kamfot long yumi? Elda Neal A. Maxwell (1926–2004) blong Kworom blong Olgeta Twelef Aposol i tijim: “Jisas i save stret olsem wanem blong givhan long yumi long medel blong ol bigfala harem nogud blong yumi mo ol sik from Jisas i bin karem finis ol harem nogud mo ol sik blong yumi [luk long Alma 7:11–12]. Hem i save olgeta faswan; hem i kasem fasin blong andastanem narawan finis.”1
Kraes long Graon Plante, i kam long Simon Dewey
Blong Kasem Fasin blong Andastanem Narafala Man mo Stap Helpem Ol Narafala man
?Wanem ol hadtaem we yu bin go tru long olgeta blong mekem se yu save “winim” fasin ia blong andastanem ol narawan mo givhan wetem lav mo sore long olgeta? ?Yu bin safa long ol paoa blong stap long pua laef, abius, fasin blong gat hae tingting, no kea, sin, o fesem hadtaem long eni wei? Sapos yes, maet yu bin kamaot long ol safaring, mo kam moa waes, moa strong mo kam wan we i moa kwik blong andastanem ol filing blong ol narafala man.
Long sot toktok, yu bin winim fasin blong andastanem narafala man. Yu rere blong mekem samting i defren long laef blong olgeta we oli safa. ?Wea ples blong stat? Mi gat tu tingting blong talem:
Faswan, traehad blong andastanem moa ol safaring blong ol narafala man. Be sore tumas, i posibol blong stap olsem wan kompanion blong wan we i stap harem nogud be i no luksave safaring blong olgeta. ?Olsem wanem nao yumi save andastanem moa, filing blong ol narawan? Eksampol blong Jisas Kraes i save tijim yumi.
Afta long Laef Bakegen long Ded blong Hem, taem Jisas i visitim Ol Man blong Nifae, Hem i eksplenem doktrin blong Hem mo tijim olgeta long gospel blong Hem. Taem Hem i stop smoltaem, Hem i lukluk long ol pipol mo talem, “Mi luk se yufala i slak, i mekem se yufala i no save andastanem evri toktok blong mi” (3 Nifae 17:2). Afta, Jisas i invaetem olgeta blong go hom, spel, tingting hevi long ol tijing blong Hem, mo kambak long nekis dei, rere blong kasem sam moa (luk long 3 Nifae 17:3).
En blong stori, ?i tru? No yet. Wei we Jisas i save andastanem ol narawan i kam moa dip taem Hem i luksave ol fes blong ol man blong Hem we oli stap folem Hem:
“Mo i bin hapen se taem we Jisas i toktok olsem ia nao, hem i sakem ol ae blong hem raonabaot long grup blong pipol ia, mo i luk we oli stap krae, mo i luk stret long hem olsem se bae oli askem hem blong stap wetem olgeta smol taem moa.
“Mo hem i bin talem long olgeta: “Luk, ol insaed blong mi oli fulap wetem lav mo sore long yufala.” (3 Nifae 17:5–6). Mo Hem i lukluk moa kolosap long olgeta, Hem luk olgeta moa fulwan. Mo hemia i mekem i gat ansa long wanwan long olgeta wetem filing blong sore.
Long wan wol we i foldaon we i fulap wetem ol pipol we oli foldaon, yumi no nid blong wok had blong lukluk gud, bifo yumi luk ol wota blong ae insaed long ae blong ol pikinini blong Papa blong yumi long Heven. Be yumi mas lukluk. Olsem Sevya, yumi save jusum blong luk ol pipol tru long ol glas we o save mekem i klia ol nid blong olgeta. Mo taem yumi luk, yumi save givim seves.
Elda Ulisses Soares blong Kworom blong Olgeta Twelef Aposol i mekem not se “taem yumi minim blong traehad blong putum wan fasin blong lav mo sore insaed long laef blong yumi, folem eksampol blong Sevya, bae yumi kam blong luksave moa ol nid blong ol pipol. Wetem filing ia blong luksave samting, taem i kam antap, ol filing blong intres we i kam wetem bigfala hat mo lav bae i seraot insaed long evri dei aksen blong yumi.”2
Nambatu, givim kaen help ia we i spesel we yuwan yu kwalifae blong givim. Afta we Jisas i luksave ol nid blong Ol Man blong Nifae long graon Plante, Hem i invaetem olgeta blong kam kolosap. Afta, Hem i hilim sik blong olgeta mo blesem ol pikinini blong olgeta. Hem i mekem nomo ol samting we Sevya blong wol i save mekem.
Yu mo mi i save mekem semmak blong putum tugeta ol eksperiens blong yumi o janis blong save givhan long ol nid blong ol narafala man. Yumi no save stretem problem blong evriwan, be yumi save leftemap ol hevi samting blong olgeta we oli stap safa we yumi save go helpem olgeta. Bae yumi no save hilim wan we i nomo save wokbaot, be yumi save givim kamfot long sikman ia. Bae yumi no save karemaot wan long pua laef, be yumi save serem ol prinsipol blong stap rere from wanem we i stap kam long fiuja, kakae tugeta wantaem, mo donetem wan fast ofring we i kam tru long bigfala hat yumi gat. Bae yumi no save fogivim sin, be yumi save fogivim olgeta we oli mekem nogud long yumi.
Stap Putum Fasin blong Andastanem Nara man tru long Aksen
?Wanem nao yu save kasem taem yumi joen tugeta insaed long smol plen wetem wan mama we i harem nogud from smol boe blong hem we i no save stap kwaet? Wan janis blong soem fasin blong andastanem narawan mo lav mo sore.
Plen blong mifala i kasem ples, mo yangfala mama i kamaot, i holem basket long wan han mo smol boe long narafala han. Hem i luk olsem se hem i gat wan narafala flaet we i stap kam mo kolosap bae hem i mestem. Mi wajem fraet we hem i gat long rod blong plen taem ol sutkes blong hem oli kamaot. Mi tekem ol samting we i blong hem; strola, jea blong sidaon, sutkes, basket, basket blong napkin. Hem i nidim help. Fasin blong andastanem narafala man i nid blong kam moa antap i go long fasin blong gat lav mo sore.
Mi no bin introdiusum miwan, mi pusum han i go from ol plante samting blong hem mo talem, “Bae mi tekem olgeta ia. Yu tekem hem. Ron i go long get blong nara flaet blong yu. Bae mi folem yu.” Hem i akseptem wetem bigfala tangkyu, mo mifala i ron i go tru long eapot. Taem mifala i kam kolosap long get blong soem paspot, mi luk wan narafala woman we i stap askem strong long wan wokman blong eapot blong lego plen i stap daon long graon blong smoltaem moa. Mifala i kam tru wetem sot win, be mifala glad. Yangfala mama mo woman ia tufala haggem tufala wetem wota blong ae we i fulap blong glad mo gudfala filing mo stap go insaed long plen.
Smol aksen blong seves ia i no jenisim wol, be wetem plante mining, i bin blesem laef blong wan pikinini blong God we i gat nid. Olsem we i helpem niufala fren blong mi i progres i go long ples we bae hem i wantem kasem , hemia i helpem mi blong progres i go from ples we bae mi go long hem long en, long saed blong spirit. Blong stap jusum fasin blong andastanem narafala man mo lav mo sore i helpem mi blong kam smol moa olsem Jisas Kraes. Mo hemia i mekem mi glad.
Nomata weaples yumi stap—long wok o long skul, long jos o long wan plen—yumi save kam ol man we yumi ripresentem fasin blong andastanem narafala man long bihaf blong Sevya. ?Huia nao Sevya bae i wantem yu blong soem lav mo sore long hem tedei?