Ol Stamba Toktok blong Gospel

Stap Kea long Olgeta we Oli Gat Nid

Hem I Hilim Plante long Ol Defdefren Sik, i kam long J. Kirk Richards, oli no save mekem kopi

Olsem ol memba blong Jos Ia blong Jisas Kraes blong Ol Lata-dei Sent, yumi folem tijing blong Lod blong kea long olgeta we oli stap long nid. Yumi kea long wanwan long yumi taem yumi givim seves long olgeta, helpem olgeta blong stap dipen long olgetawan, mo stap serem wanem we yumi gat.

Eksampol blong Jisas Kraes

Jisas Kraes i lavem, kamfotem, mo prea from olgeta we oli stap raon long Hem. Hem i “go olbaot long evri ples, i stap mekem ol gudfala wok” (Ol Wok 10:38). Yumi save folem eksampol blong Hem taem yumi stap lavem, givim kamfot, givim seves mo stap prea from olgeta we oli stap raon long yumi. Oltaem yumi save stap lukaotem ol wei blong helpem ol narawan.

Wok blong Givhan

Toktok ia wok blong givhan oli yusum insaed long ol skripja mo insaed long Jos blong Lod blong tokbaot olsem wanem yumi kea long wanwan long yumi. Olgeta we oli gat prishud oli asaenem olgeta olsem ol givhan brata long wanwan man o famli insaed long wod o branj. Ol givhan sista, oli kasem wok blong lukaot long wanwan adalt woman. Ol givhan brata mo sista oli mekemsua se evri memba blong Jos oli tingbaot olgeta mo oli kea long olgeta.

Stap Helpem Ol Narafala Man blong Save Dipen long Olgetawan

Yumi save helpem ol memba blong famli mo ol fren blong stap dipen long olgetawan taem yumi leftemap tingting blong olgeta blong faenem ol ansa blong ol problem blong olgeta mo we i save stap longtaem. Afta, yumi save sapotem olgeta taem oli wok long ol gol blong olgeta. Faenem moa toksave abaot fasin blong stap dipen long yuwan long Ogis, 2023 Liahona Ol Stamba Toktok blong Gospel.

Givim Seves long Ol Nara Man

I gat plante wei we yumi save givim seves long olgeta we oli raon long yumi mo helpem olgeta blong givhan long olgeta long saed blong samting blong wol ia, long saed blong spirit mo long ol nid blong olgeta long saed blong ol filing blong olgeta. Blong stap lanem abaot ol narafala man i save helpem yumi blong save olsem wanem yumi save givim moa gud seves long olgeta. Yumi save prea tu blong askem daereksen blong save wanem yumi save mekem blong help.

Stap Serem Wanem we Yumi Gat

Yumi save givim seves long ol narawan taem yumi stap serem wanem we God i bin blesem yumi wetem. Eksampol, yumi save givim wan fast ofring we i kam long hat o mekem donesen i go long Jos Yumaniterian Help Basket. Yumi save givim seves tu insaed long ol komuniti blong yumi mo ol Jos koling.

Ol Diuti blong Ol Lida blong Jos

Ol bisop oli lukluk long fasin blong stap kea long olgeta we oli stap long nid long wod blong hem. Hem i save yusum mane we i stap long fast ofring blong helpem ol memba we oli gat nid. Ol narafala lida, we i gat, ol kaonsela blong hem mo presidensi blong Rilif Sosaeti mo kworom blong ol elda, oli helpem ol memba blong faenem ol risos we oli save yusum blong givhan long ol nid blong olgeta.

Ol Wok we Yumaniterian blong Jos I Mekem

Jos i helpem ol pipol long evri ples raon long wol wetem imejensi help, ol projek long komuniti, mo ol narafala program olsem, klin wota mo ol samting blong proteksen. Blong lanem moa, luk long Dallin H. Oaks, “Helpem Ol Pua mo Man we i Fesem Hadtaem,” Liahona, Novemba 2022, 6–8.

I Kam long Ol Skripja

“God i lavem man we i save givim samting long gladhat blong hem” (2 Korin 9:7).

Yumi tijim ol pikinini blong yumi blong givim seves long olgeta we oli stap nid (luk long Mosaea 4:15–16).

Yumi givim kamfot long ol narafala man mo helpem olgeta blong karem ol hevi samting blong olgeta (luk long Mosaea 18:8–9).

Ol Toktok blong Tingbaot

Koling: wan spesel responsabiliti blong givim seves insaed long Jos. Ol lida blong Jos oli lukaotem insperesen blong save huia Lod bae i wantem blong oli singaotem olgeta.

Ol fast ofring: mane we yumi givim long Jos taem yumi livim kaekae, olsem we bae i stret long amaon we bae yumi yusum long ol taem blong kakae, long taem we yumi fast.

Fasin blong stap dipen long yuwan: i minim blong save kea long ol nid blong yumiwan mo ol famli blong yumi.

Faenemaot Moa

Sapos yu gat sam kwestin abaot fasin blong stap kea long olgeta we oli stap nid, yu save toktok wetem ol givhan brata mo sista blong yu, ol wod o branj lida, o ol misinari. Yu save faenem tu ol toktok blong jeneral konfrens long topik ia long Gospel Library (long ChurchofJesusChrist.org o long mobael ap).