Lokol Pej
Stap Wet long Ol Blesing We Lod I Promesem
Aulola Mateialona i bin bon i kam long wol, insaed long Jos Ia blong Jisas Kraes blong Ol Lata-dei Sent. Hem i bin groap wetem ol fetful Apu man mo woman long Ha’alaufuli, Vava’u, Tonga mo hem i bin baptaes taem hem i gat eit yia. Aulola i graduet afta long Liahona Hae Skul, wan skul blong Jos.
Taem hem i gat 15, Aulola i kasem patriakel blesing blong hem, we i promes se sapos hem i stap tru long ol kavenan blong hem wetem Lod, bae hem i mared long tempol. Be i no bin hapen kasem sam yia afta, taem hem i stap rere blong go givim seves blong wan ful taem misin, Aulola i andastanem fulwan bigfala promes blesing ia. Taem hem i wokbaot tru long Nu’alofa Tonga Tempol blong fastaem, hem i fulap wetem tingting ia blong wantem go bak wan dei wetem kompanion blong hem blong taem we i no save finis mo sil wetem hem insaed long tabu ples ia.
Tru stori blong laef blong Aulola, i no bin folem plan blong hat blong hem. Afta long misin blong hem, i tekem sam taem bifo mared i kam fas samting long hem, mo from hemia hem i bin lavem wan we i no bin serem sammak fet wetem hem.
“Hem i wan gud man,” Aulola i talem. “Hem i oltaem welkamem ol Jos misinari [blong mi] insaed long hom blong mifala mo oltaem fidim olgeta, be hem i neva intres blong harem mesej blong olgeta.” Famli blong hem oli ol strong memba blong fet blong olgetawan, mo hem i no save brekem tradisen blong olgeta. Difren rilijin blong olgeta i putum wan bigfala wari long mared blong olgeta. Aulola i no save go long ol sakramen miting oltaem olsem we hem i laekem, mo hem i no save mekem ol pikinini blong hem oli bigwan long Jos long wei we hem i bin gro i kam antap. Naoia, raorao insaed long hom blong olgeta i go tumas. Afta 23 yia, tufala kapol i disaed blong seraot.
Aulola i harem nogud. Hem i lusum mared blong hem, mo wetem hemia, hop blong hem blong fiuja wetem famli blong hem, be tu, hem i harem nogud nao ia from helt isiu blong hem i stap kam daon. Long harem nogud blong hem, hem i tanem hem igo long Papa long Heven from gaed. “Mi fast mo prea, mo mi promesem Lod se sapos Hem i akseptem mi bakegen, bae mi neva tanem mi i go we bakegen.”
Prea blong hem i gohed blong lidim hem i go bak long patriakel blesing blong hem, we i givim kamfot mo pis long hem long wan trabol taem olsem. Wan dei, hem i ridim bakegen promes ia se bae hem i save sil insaed long tempol, mo Aulola i save wanem hem i nidim blong mekem. “Mi kam blong luksave se sapos mi no mekem pat blong mi, bae no save wok.” Long taem ia, hem stat blong folem evri komanmen blong Papa long Heven, mo kam kolosap long Hem tru long jos atendens, prea evri dei mo skripja stadi.
Long taem bifo, Aulola i konek bakegen wetem wan fren blong hem blong ol dei bifo long Tonga: Brata Semisi Mounga Mateialona, wan we i holem prishud we nao ia i jes faenem hemwan olsem singkel bakegen, tu. Oli go aot tugeta mo serem ol eksperiens mo semmak lav blong gospel blong Jisas Kraes, mo Aulola i save long hat blong hem se hemia i man blong hem. Tufala kapol i mared long Niu Sila long 2019 mo long en blong Septemba 2022, oli travel i go long Nuku’alofa Tonga Tempol blong sil wetem wanwan long tufala blong taem mo taem we i no save finis.
Long wan tempol faeasaed we i jes pas long Oklan Papatoetoe Stek, Aulola i tingting bak long wanem hem i talem se i merikel. Olsem wan yang woman, hem i bin kasem swit eksperiens blong holi tempol mo save olsem wanem i impoten blong wosip long ples ia. Afta, blong 23 yia, hem i no save sapos hem i save kwalifae from blesing blong tempol we oli promesem hem long patriakel blesing . . . be hem i no bin lusum hop.
I tekem taem, fasin blong save wet long taem mo kaen fet we i jenisim ol laef, be nao ia Aulola i filim olsem se hem i kam hom bakegen. Nao ia, hem i save testifae: “Taem yu stap kolosap long God, bae Hem i blesem yu olsem we Hem i promes . . . sapos yu mekem pat blong yu.”