Kam Butimwaeaki Nakon te Beeba ni Kaongora Aei

Katiteuanaakira bwa Taari Aine ao Mwaane iroun Kristo

Bwanaaia aine ao mwaane a kakawaki n kakoroan nanon ana mwakuri te Uea. E ngae ngke a tatannako arora, ti kamoamoa temanna ma temanna n ara taeka aika a raraoi, ni katiteuanaaki n te boto n iango n riki bwa ana reirei Kristo.

Kakaokorora aki riai n katikiira nako man te boto n iango aio. Irarikin anne, kakaokorora n irianaki ma ara taarena ao ara tibwatibwa n ikotaki a na kakorakora ara ibuobuoki nakon te mwakuri n kamaiu ao ni karietataaki ni kabutaa te aonaaba. Unimwaane Gerrit W. Gong man te Kooram n Abotoro n te Tengaun ma Uoman e koreia n te mwakoro aio, “Mwaane ao aine a roko n te babaire ae tamaroa riki ao e mwaiti riki aia tokanikai n ana beku te Uea ngkai a kabonganaia imarenaia n aia tibwatibwa ao n ikotaki ni mwakuri.” (iteraniba 4). Ti na kanga ni karekea te aeka n katiteuanaaki aio? Ti riai n karekea te onimaki ae te Uea e na mwakurii kakaokorora ibukin karaoan te raoiroi n Abanueana.

N au kaongora ae iaon iteraniba 8, I tibauai bwaai ake i reiakinii man te Nu Tetemanti iaon rongorongon te aine are mai Kanaan, are e ukora te Tia Kamaiu bwa ena kamaiua natina te aine. Te aine aio bon tiaki kaain te bata are Iteraera. Ma iai irouna te onimaki bwa mwaakan te Uea ena kona n kamaiua natina, ao te onimaki ae kamimi aio e katiteuanaa neiei ma aomata inanon te berita ae tabu ao n uota nakoina te kakai.

Tia taraa te Tia Kamaiu n bwaai nako ake ti karaoi, ao “a na botaki nanoia n te nano ae ti teuana i nanon te tangira imarenaia” (Motiaea 18:21). Ti rang kakabwaiaaki n karekei reirei man kakaokorora aika korakora iroun temana ma temana ao ni kabonganai n aron Kristo. I rangi ni kakaitau ngkaii iai au Tia kawakin tiibu ae ongongo bwanaaia Ana tiibu n tatabemaniia nako.

Raomi ni Koaua,

Beretitenti Camille N. Johnson

Beretitenti ni Kabuta n te Bootaki n Aine