“Taari Mwaane ao Aine iroun te Uea,” Riaona, Tebetembwa 2023.
Taari Mwaane ao Aine iroun te Uea
““Te Atua e tangira te aonaaba, ao e anga ana Rikitemanna”—ao ai ngaira n tatabemaniira.
Kristo e kauta natin te aine ae akea buuna n te kaawa ae Nain.
Mwanangana mai Kaberenaum, ara Tia Kamaiu e nakon te kaawa ae Nain. Ngke e kaniia te tabo n rin, E noora te bootaki ni mate ae waaki. Maten natin te aine ae akea buuna ae e aki kantaningaaki e a katuka te aine ae kananoanga aio n ti ngaia.
“Ao te Uea ngke E noria, e nanoangaia ao ekangai nako ina, Tai tang.
“Ao e kania ma n ringa te bao: ao a tei uake a uotia. E anga ana taeka, “Te roronga, I tuangko ba ko na uti.”
Ao te teinimwaane arei e teirake ao e taetae, Iesu e angan tinana” (taraa Ruka 7:11-15; kairaki ma katuruturuana).
Inanon Ana mwakuri, tao nakon te 1 kee ake 99,1 ara Tia Kamaiu e kaota te banna ae kororaoi n te nanoanga, te onimaki, te kaantaninga, te tangira ae kororaoi, te tangira, te kabwarabure, te nanoanga, ao te ibuobuoki.2 E kaoira ni kabane “nakomai, iriirai” (Ruka 18:22) ao kam na riki “n ai arou” (3 Nibwaai 27:27).3
“N ai Arou.”
N iriran ana banna n katooto ae kororaoi te Tia Kamaiu ao n riki n ai Arona, ti na butimwaea ana kakao bwa tina riana ma Ngaia ni kawain ana berita ae tabu (taraa Mote 6:34). Ngaira n tabetai ti kona n kinaa kawain te berita ae tabu rinanon otenanti ni kamaiu ao te karietataaki are a mwakenaki—te bwabwetito ao te kamatoaaki ni karekea te bwaintangira ae te Tamnei ae Raoiroi ao n riki bwa kaain Ana Ekaretia Iesu Kristo Ibukiia Aika Itiaki ni Boong aika Kaitira; te katabuaki nakon te Nakoanibonga te Merekitereka (irouia mwaane); ao te entaumente n ana auti te Uea (ibukira n tatabemaniira); ao te kabaeaki n te tembora.
Te otennati ae kakawaki ibukin te kamaiuaki ao te karietataaki bon te mwakuri ae tabu ae karaoaki irouia aika iai te kariaiakaki n te nakoanibong irouia are e reiakiniia te berita ae tabu are irian taian otenanti aikai. N aanga tabeua, ti kona n iangoia bwa te otenanti ibukin te kamaiuaki ao te karietataaki bwa mwakuri ae ti kona n kaotinakoi bwa a na kabaea reitakira ma te Atua ao Natina ae Tabu nakon maiura rinanon te berita ae tabu.
Ngaira n tatabemaniira, ngkai natin te Atua ngaira mwaane ao aine, ti karaoi oin ara berita aika tabu ma te Atua. Ti karaoa aio n tatabemaniira nako, n oin arara, temanna imwiin temanna. Te reitaki ni berita ae tabu ma te Atua e anganiira te mwaaka, te kaantaninga, ao te berita. Berita aika tabu aika a kona n bitii anuara, kaitiakii nanora ao ara mwakuri ao n buokiira n katuka te aro n mwaane ke n aine ao ni katan nanora nakon ana kairiiri te Tamnei ae Raoiroi. Man berita aika tabu, rinanon Ana Mwakuri ni Kamaiu Kristo te Uea, ngaira n tatabemaniira ti kona n riki bwa natin te Atua—“-ongeaba, n nimamannei, n nanorinano, n taotaonakinnano, n onrake n te tangira” (Motiaea 3:19).
Ikotaki ni Beku n Berita Aika Tabu
“Ba E tangiria aomata te Atua n te aro are E anga Natina ae te ana rikitemanna” (Ioane 3:16)—ao ai ngaira n tatabemaniira. Rinnakom inanon te berita ae tabu—tomaakim nakon te Atua ao ma aomata n tatabemaniia rinanon berita aika tabut—a kaoira bwa tina kakoroa nanon kinaakira ma ara kantaninga man rereitakira ma karawa ao man katomaan ma karikan te komiunite irouia aika Itiaki ngkana ti tangiriira ao n ibuobuoki imarenara ao nakoia ake irarikiira. N katauraoan aanga ibukin kakoroan nakon berita aika tabu ma rinnakom inanon te berita ae tabu, te Atua E aki inanonano. E kaoira n tatabemaniira, aine ao mwaane, ake a tia n iein ao ake a tuai iein, e ngae ngke aekara aron rikim ke arom, bwa tina Nakoina ao n ikoikotaki man berita aika tabu aikai.
Ngkana ti rinnako n te berita ae tabu ma te Uea, ti rinnako naba n te berita aika tabu nakon temanna ma temanna. A riki bwaai aika kamimi ngkana ti tangira te Uea ao ti ikotaki ni mwakuri, reirei, ao n mwakuri n ibuobuoki nakon temanna ma temanna. Te berita ae tabu n mwakuri n ibuobuoki a kamatoaa ara reitaki ma te Uea ao ma temanna ma temanna. Aio e airi ma oin ara reitaki ma Tamara are i Karawa, ara utu, kain ara Ekaretia, komiunite, ao rikiia ara utu. Ngkana ti maiuakinii ara berita aika tabu, e kona n toki iroura iaiangoara i bon iroura ao n karekea te kabanea n tamaroa n maiu ae boboto iaon Kristo.
Ana Babaire te Atua ni Kakukurei
N ana babaire te Atua ni kakukurei, e taku Beretitenti Russell M. Nelson, “e uki karawa nakoia aine ake a tia n karekea mwaakan te Atua irouia man aia berita aika tabu n te nakoanibonga are a karaoia n ai aroia naba mwaane ake a taua te nakoanibonga.”4
Taraa Beretitenti Camille N. Johnson, Beretitenti ni Kabuta n te Bootaki n Aine, Iai iroura te kariaiakaki nakon mwaakan te nakoanibong man itiakin oin kororaoira”5 N taekina ana taeka Beretitenti Nelson, e taku, “Ti kainannoia aine are ataa aron karekean te mwaaka are te Atua e a ti katauraoia ibukiia ake a kawakin aia berita aika tabu.”6 Taan kawakin aia berita aika tabu a ukoukora man maiuakina te onimaki, te nanorinano, ao te botumwaaka, a kona n karekea te kairiiri, te kairi mai ieta, bwaintangira mairoun te Tamnei, te kaotioti ao te “buoka ao te korakora n riki n ai aron Iesu Kristo ao Tamara are i Karawa.”7 Ngkana ti bane n anga ara bwaintangira ake iroura aika kakaokoro n nakon ara reitaki ma te Uea ao nakon temanna ma temanna, ti karika “te rabwata teuana” (1 I-Korinto 12:13).
N ana kainibaire te Atua, tiina ma kaaro bon rao ao taan ibuobuoki imarenaia. Ti ibuobuoki imarenara n katiteuanaaki bwa rao inanon te tangira ao te kororaoi n tobwaa ao n katauraoi ibukira nakon temanna ma temanna ao n ara utu. Itiakin te iango ao te anua bon bwaai aika riai n iai iroun temanna ibukin karekean te kaotioti ao te kairi mai ieta are a kainanoia aine ao mwaane. N mwengaia, taama ma buumwane a riai n tararua ma te aamarau, te nimamannei, ao te tangira ae ake kewe-anua aika kororaoi irouia mwaane ao aine aika kainanoaki n reitakiira ni bane.8
E tang karawa ngkana, n te reitaki teuana, iai te iowawa, te tautaeka ke te taumatoa ae karaoaki irouia mwaane ke aine. Te kairoro, taotaonannano, te aakoi, ao te atatai ae itiaki n anuan Kristo are ti ukoukorii-ngkana ti tia n mare, ke ti tuai, ke tia n mate buura, ke ti raure (taraa Reirei ao Berita aika Tabu 121:41-42). Aio bukina bwa aroarora imatan te Uea ao Ana Ekaretia e tauaki miina man anuara ao kororaoira n kawakinii ara berita aika tabu.
Reirei inanon te Kauntira
N te tamnei naba anne, n ana Ekaretia te Uea ti reirei n te kauntira bwa ti na ikotaki ni beku. N ara kauntira, taan kairiiri a ukorii nonori ma iango mairouia kain te kauntira ni kabane. I karabwarabwa ibukiia ni kabanea aine ma mwaane ake a rianako aroia ae e reke au tai ni beku ibuakoia, n ana kauntira ni babaire te Ekaretia. Tarira aine ao mwane aika kakannato aika a buoka bobotan Iteraera rinanon te mwakuri ni mitinare, man katauraoira bwa tina kaitibooaki ma te Atua rinanon te nakoanibonga ao te beku n te utu, bootakiia utu n akea tokina rinanon te tembora ao te mwakuri iaon rongorongon te utu, ao te mwakuri n ibuobuoki nakoia ake a kainanona rinanon te buoka ao te mwakuri n toronibwai.
N waaki ni bane, tina karekei babaire aika tamaroa ao ti na karekea te tokanikai ae korakora n ana beku te Uea ngkai ti kabonganaira imarena n ara tibwatibwa ao n ikotaki ni mwakuri, bwa taari mwaane ao aine n Ana mwakuri.
N irekereke ma anne, I karabwarabwa bwa, n ara titeiki ao ara uoote, tarira ma mwaanera aika taan kairiiri ao membwa a nano teuana n te mwakuri ni kamaiu ao ni karietataaki. Ni kabutaa te Ekaretia, iaan aia kairiiri taan kairiiri n te mition, bootaki ni kauntira irouia taan kairiiri n te mition a kaainaki irouia mitinare mwaane ao titita aika taan kairiiri are ana kairiia aia mitinare, aia mwakuri ma tabeia aikai a kakawaki man kakannato. N te taanga ni buaka n te United States, taan tararua te taromauri Aika Itiaki ni Boong aika Kaitira, mwaane ao aine ake tautia aika kariaiakaki man te Ekaretia, a kakabwaiaia ake a beku ma ngaia ni mwaangan nako tabeia aika kakaokoro.9 N ara mwakuri n ibuobuoki, ataeinimwaane ao ataeinaine e reke aia tai ao a kainannoaki bwa a na beku. N ara mwakuri n ibuobuoki, ti tei n katiteuanaaki.
Te anga teuana ae tina tei iai bwa taan kakoauaa te Atua bon ara beku n riki bwa taan kakoauai otenanti n te euangkerio ake a kaokaki. Tarira ma mwaanera a tei bwa taan kakoaua n bwabetiito, ibukiia aika maiu ao aika a mate. Tarira ma mwaanera a tei bwa taan kakoaua n otenanti aika raka n ana auti te Uea. Ikane, iaan ana kiing te beretitenti n te tembora, aine a karaoi otenati aika tabu ibukiia tariia ao mwaane a karaoi otenati aika tabu ibukiia tariia.
N ana kainibaire ni kakukurei te Atua, e taku Beretitenti Dallin H. Oaks, Moan Kauntira n te Moan Beretitentii, “mwaakan te nakoanibonga e kakabwaiaira ni kabane. Kiingin te Nakoanibonga e kairiia naba aine n ai aroia mwaane, ao otenanti n te nakoanibonga ao te kariaia n te nakoanibonga e kaineti naba nakoia aine n aroia naba mwaane. … Antai are e mwakuri n te aobiti ke te nakoa ae karekea mairoun ae taua kiingin te nakoanibonga e kamwakura te kariaia n te nakoanibonga n karaoa tabena are e katabeaki iai.”10
Karietako iaon te Aonaaba
Ngkana ti kakorakoraira n “katiteuanaaki,” n aron Iesu ae katiteuanaaki ma te Tama (Ioane 17:21), ti riai “ni karina … te Uea are Iesu Kristo” (I-Rom 13:14).
Ti kona n katabuaki n, ana akoi teutana mwiin teuana, ti reiakina ao n karaoi bwa oin anuara ake anuan Iesu Kristo n tangira n ae onrake, kabwarai buure n baiti, n aki tatauraoi n motiki taeka, beku man angannano ma nanora ni koaua, ao ni kaota te nanoanga ae nano n taainako.
Tia onimakina te reirei ao ana katooto Kristo, ni kimwareirei n te koaua ao n arora n riki bwa Ana taan iriiria aika mangori (taraa 2 Nibwaai 28:14)—ngaira n tatabemaniira ao bwa taari mwaane ao aine iroun te Uea.11