“Te Mwakuri n ibuobuoki ma te Taotaonakinnano,” Riaona, Tebetembwa 2023.
Reirei n te Mwakuri n Ibuobuoki
Te Mwakuri n ibuobuoki ma te Taotaonakinnano
Ti kona n karikirakea te konabwai n taotaonakinnano, n maiura ao n beku ibukiia aomata.
N te 2 I-Korinto 12:7–8: E kabwarabwara Bauro teniua te tai “te bwai ni kateketeke n irikou” are riai ni kanakoaki. Ma ana tataro e aki kaekaaki n kanakoan te kangaanga aio. Ma, te Uea e tuanga, “Au akoi e tau i bukim.” Bauro e kaota te taotaonakinnano ao te onimaki n aron ana kaeka: “Mangaia ae moan te kukurei Ngai ni kamoamoai ni mamarau, ba e aonga ni memena m’akani Kristo i aou” (kibu 9).
Te Uea e reireina naba Moronaai ae man ana akoi Iesu Kristo, ti kona n reiakinna man rikirake n korakorara: “Ao ngkana a roko aomata nakoiu N na kaota nakoia mamaaraia. I anganiia aomata mamaaraia bwa aonga n nanorinano; ao e tau au akoi nakoia aomata ni kabane ake a kananorinanoia i matau, ma n onimakinai, ao ngkanne N na karaoi baika mamaara bwa a na riki bwa korakoraia.” (Ita 12:27).
Te Mwakuri n ibuobuoki ma te Taotaonakinnano
N aron Bauro, ngaira aikai ti a tia n tataro n taai aika mwaiti inanon maiura aio ibukin te rau n nano—n tabetai e a riaon teniua te tai. Tabetai e bon riai tain te kakabwaia anne bwa tina karekea, ao taai tabetai ngaira, n aron Bauro, ti reiakinaki ao ti kakorakoraaki. N taai aikai, ti kona n reiakina te taotaonakinnano ao n reiakinna n tataninga ana tai te Uea.
Ti kainnanoa anuan Kristo are te taotaonakinnano ngkana ti mwakuri n ibuobuoki naba. Ti kona n mwakuri n ibuobuoki nakoia aomata aika bati rinanin nako kataakia ao rababan ootaia n te euangkerio, ma e kainanoa te taotaonakinnano ao te tangira te mwakuri n ibuobuoki nakoia aomata ake aki kan butimwaira raoi.
Tamnei man Getty Images
Karikirakean te Taotaonakinnano
Ngkai ti ataa te Tia Kamaiu, tina kona n ataa raoi Arona n mwakuri n ibuobuoki rinanora. Ti na kanga n karikirakea anuan maiun Iesu ae te taotaonakinnano?
-
Kiina raoi bwa te maiu n rabwata aio e onrake n waaki aika a na kataa ara taotaonakinnano ao anne e bon ririiki ae kona ni maraki nanom n tabetai. Uringa bwa ngkana ko kataneiaiko ma te onimaki iroun te Uea, ti kona n katamaroa riki arora ngkana tia reke n aekaki n kangaanga aika ana kaminoi atuura. Bwaina te taotaonakinnano n am waaki n karekea te taotaonakinnano!
-
Bubutiia te Atua buokam ngkana koa namakinna bwa ea matoa te taotaonakinnano. Te ikerake ae nano ao te tataro ena kona n anganiko te rau n nano ma te rau.
-
Te ongongora n katangitang aika a tabekirakea tamneim a kona n anganiko te rau ao n buokiko n mwakurii am namakin n aki kan taotaonakinnano.
-
Kariaia ana tai te Uea n maium. Nanomwaakam ma nanom e riai n kaineti ma Ana kainibaire.
-
Karekea iroun te iango n taotaonakinnano. Uringa bwa ngkana ko namakinna te takaka ke te katawe eaki katamaroa maium.
Iango tabeua iaon Te Mwakuri n ibuobuoki ma te Taotaonakinnano
Tabetai ara mwakuri n ibuobuoki e boboto iaon buokaia aomata bwa ana taotaonakin nano n aia tai n kataaki. Aikai tabeua kawai aika ko kona n ibuobuoki iai:
-
Kaoti nakon te aomata anne ke te utu anne bwa ti tangiriia ao ti tabeakiniia e ngae ngkana iai te kangaanga aika a aitara ma ngaia, e ngae ngkana n aia iango, ae tao tera bukina, ae aikoa tangiraki.
-
Tibauai am taneiai ma ngaia ngke ko reiakina te taotaonakinnano iai ao n kaotia bwa ko oota n kangaangan te bwai ae a rinanona. Buokiia bwa a na aki namakina ae akea raoraoia ngkana a aikoa kona n taotaona nanoia ke ngkana a ebu.
-
Tataro ibukiia bwa a na kona n bwaina te taotaonakinnano inanon aia tai n rinanon aia kangaanga ma katakiia ao n kaotaia bwa a na ataia bwa Tamaia are i Karawa e ongo aia tataro bwa aonga n kakorakoraaki.
-
Riki bwa te tia ongo ngkana a kainnanoa raoia n maroro. Ngkana e reke raoraom ae e oota bon te teuana mai ibuakon kawai aika tamaroa ngkana ko rinanon te kangaaanga.