“Bwabetito n Tairikin te Kanimabong,” Riaona, Tebetembwa 2023.
Bwanaaia Aika Itiaki ni Boong aika Kaitira
Bwabetito n Tairikin te Kanimabong
Nanou ni kan raira nanou e buokai n karekea te Tia Kamaiu ao Ana Ekaretia.
Kamataata n te tamnei iroun Katy Dockrill
Imwiin rinanoan te taneiai iaon te kukurei n rokora n te United States mai Tiaina bwa N na kareka au PhD, I a taonakinako n mwaitin au beebwa n reirei ake nna riai n warekii man korei. I aki naba raoi ataa arou n reitaki ma au aetuwaitia ibukin au reirei, ao e a karika riki rawawatau. I namakina te bua ao akean raoraou, ao I a aki ataia bwa tera ae N na karaoia.
I a motikia irou bwa bure ake ngkoa a karika te korakai aio ao I a tangiria n raira nanou. E a bon tairiki, ao I a ukora “te ekaretia” iaon te intanete. I a kunea bwa ngaia Ana Ekaretia Iesu Kristo ibukiia Aika Itiaki ni Boong aika Kaitira e uki nikarokoa te aoa 9 n te tairiki. E moti n au iango bwa nna raina nanou n te tabo n taromauri aio, ao ngaia are I rianna n te maan ae teuana te aoa n kaeia.
Ngke I a roko n te tabo n taromauri aio n tao te aoa 6 n te tairiki, I a norii taura ao n ongo te ngarengare ma te anene ae nako mai nanona. I katobibia te auti aio n kakaea mataroana ma e aki reke. Man te wintoo, ao I a noora te tama ae takakaro ma natina n teuana te ruu. I karebwerebwe n aia wintoo bwa e na taraai. E kairai nakon te mataro ao e butimwaeai n karinai, ao e tuangai bwa iai ae e bwabetitoaki.
I iria ao tia rin n te ruu teuana ae iai te mmwane iai ae kakabwaia te ateinimwaane ae e a tibwa tia n bwabwetitoaki. I teitei irarikin te mataroa, ao I ongora nakon te kakabwaia, I namakina te Atua bwa e wirikirikinai naba kakabwaia akekei. E abuee nanou, ao I ataia imwina bwa ngaia te bwai are I namakinna arei te Tamnei ae Raoiroi. I ongo naba te bwana ae tuangai bwa a kabwaraaki au bure.
Imwiin te bwabetito, ao I a ira buakoia te koraki ao I a kaitiboo ma aomata aika raoiroi. I aki namakina ae akea raoraou. Te mmwane temanna ae e taku bwa te beretitenti n te mwaanga ngkoa e angananona bwa e na nikirai n mwengau. Tabeua te namwakaina imwiina, imwiin au rereirei ma mitinare, ao I a bwabetitoaki.
N bongin au bwabwetiito n 2018 i Cambridge, Massachusetts, temanna te tari e taetae iaon aron Tamara are i Karawa ae tatangira n barongaa te bwabetito n te Kanimabong arei. E kabwarabwara bwa te bwabetito arei e bon tia n baireaki bwa e na boo n te Taabati are imwiina, ma bukin angabuakan taina, ao e a baireaki bwa e na karaoaki n tairikin te Kanimabong. N akea te bitaki anne, ao N na bon aki kona n ataa te Ekaretia, ara Tia Kamaiu ao Tamara are i Karawa, ao tariu ma mwaneu n te euangkerio.