Bannan te Onimaki

Taan Kan Reiakinaki inanon te Karabuuti

Iroun Jeffrey N. Reed, Beretitenti, Mexico Aguascalientes Mition, 2019-2022

Inanon te oonibure, Titita Llanos e aki mwaniga taekan tabena bwa ana tia tei Iesu Kristo, e reireiniia raona n kabureaki taekan kinaakia mai karawa ao aron te tataro.

Rawetamnei iroun Amelia Lyon

Titira Aketzaly Llanos bon te mitinare ae rianako arona ma ana kakoaua ae matoa. E bon moan weteaki bwa ena mwakuri n te Costa Rica San Jose Mainiku Mition, ma e mwakuri ma buu, ae Janeen, ao ngai n te Mexico Aguascalientes Mition inanon teuana te ririki imwain reken ana beebwa kariaiakaki nako Costa Rica.

Inanon Eberi 2022 ti a kaboo ma Sister Llanos ngke e a toka n te wanikiba nako Mexico City, ike e na manga kaea kibana mai iai nako Costa Rica. E aki reke 24 te aoa imwiin ara kaboo, ike, bureitiman mai Mexico City a tarebooniira naba.

“Ti a tia n kaburea Aketzaly Llanos n te marae n wanikiba bwa iai ibuakon ana bwai kanoan te katii.” a taku. “Te bure aio ae rawawata, ao e na kateaki iai n te boowi.”

N te tai ana anne, I a reitaki nakon ana aobiti te Ekaretia n te aono, ao a karekea aia rooia bwa ena karekea kabwaraan Titita Llanos. Tiaki kain te Ekaretia te rooia aio. E tangiria n kan ibuobuoki ma kanga e tei n bwarannano. E kabwarabwara bwa tauakin kanoan te katii ae bwain te taanga ni buaka irouia aika tiaki kain te taanga ni buaka bon te bure ae rawawata, n aki tabe ma nanon te aomata.

Imwiina, Titita Llanos e tuangiira ae e kunea n te kawai teuana n te tabo are e mwakuri iai mai mwaaina. E taku bwa ana bwai n kauring. Kanoan te katii, n koauana, titeboo teina ma kaon kiing ake a kakabonakoaki n teuana te tabo n ken tirewa n tabo ae e tia n mwakuri iai mai mwaina. Ma taan kakae man te tautaeka a karaoia bwa kanga te tia iowawa temanna. Inanon tabeua te bong, Titita Llanos e a kamwaingaki man ana oonibure n te marae n wanikiba ao e a karinaki n te oonibure ae e a bubura riki ma e tararuaaki raoi riki ae nneia aine ake a kakaraoi mwakuri aika buakaka.

Tataro n Onimaki

Tataro ibukin kaotinakoan Titita Llanos n te tai ae tawe e a waaki. Ngai ma Janeen ti kaoiia 115 mitinare ake a mwakuri n ana mition bwa a na kamwakura aia onimaki bwa ti aonga n kareaka te kakai, ngkana e riai ma ana kantaninga te Uea. I reitaki ma beretitenti n te mition mai Mexico City, te Costa Rica San Jose Mainiku Mition, ao te Mexico Missionary Training Center, ao a bane n kaoiia aia mitinare bwa raoniira n tataro.

Inanon te oonibure, Titita Aketzaly Llanos e aki mwaniga taekan tabena bwa ana tia tei Iesu Kristo.

Inanon te oonibure, Titita Llanos e aki mwaniga taekan tabena bwa ana tia tei Iesu Kristo, e reireiniia raona n kabureaki taekan kinaakia mai karawa ao aron te tataro. E reireiniia ruaman raona ni kabureaki aron te tataro man kakaraoan ana tataro n te moaningabong ao te tairiki n te kurubu ni katoa bong. E reireiniia naba taekan kinaakia mai karawa.

Temanna raona ni kabureaki e taetae. “Ngai raoi te aomata ae buakaka bwa man te bwai are I karaoia are I a rin iai ikai, te Atua e riribaai.” Titita Llanos e tarai matana ao e tuanga, E“aki. Tiaki ngkoe te aomata ae buakaka. Ngkoe te aomata ae ko a tia n karaoa te bwai ae buakaka. Ma ngkoe bon natin te Atua te aine, ao E tangiriko!”

Temanna riki raona n kabureaki e uringa miina ae miia tabeua te wiiki imwain kaburean Titita Llanos. Raona n kabureaki aio e mii bwa iai te mannikiba ae te quetzal ae kiba ietan te karabuuti bwa e na buokia. Imwain ae kaina te Ekaretia Titita Llanos, ao iai tamnein te mannikiba te quetzal ae korotaitaiaki i nuukana. Ngke e noora te taitai raona n kabureaki aio, e ataia bwa e riai n ongora n ana rongorongo n mitinare Titita Llanos.

Titita Llanos e reiakina taekan Kaokan ana euangkerio Iesu Kristo ao e anganna kaobiin Ana Boki Moomon are e uotia ma ngaia n rin n te oonibure—te kaobi raoi are mitinare aika titita angan naba Titita Llanos nimaua te ririki n nako ngke e tabe naba n ukoukora te Ekaretia.

Te moan kateitei e baireaki taina i Mexico City. Ngai ma Janeen ti nako n kakoaua. Ngke ti kaitiboo ma te tiim itinanikun te tabo ni boowi, te rooia e nang tei n nako n nano, ao e a mwamwakitaaim n te tabo n nakonako.

I kairia nako rarikin te tabo n mwananga ao I tuangnga: “Te bong aio kona namakina te raoi ao te rau nakon riki taai ake mai mwaaina inanon te tabo ni boowi. N na tuangko bwa bukin tera. E riaon 500 mwaitiia mitinare ma utu aika a tataro ibukim ao tokanikaim n te bong aio. A tataro naba ibukin te tia moti bwa e na kamarauaki nanona ao e na kaotinakoa Titita Llanos man te oonibure.”

A ranran matan te rooia aio, ao e kaota ana karabwarabwa n te onimaki ma te tataro are a karaoia man kaotia aomata aika mwaiti ibukina.

N te aoa 10 n te ingabong, e a waaki te boowi, ma I kantaningaaki bwa N na tataninga i tinaniku ni karokoa au tai n kakoaua. E a nako uoua te aoa. Ao e otinako te tia tararuaa te ruu ni boowi ao e tuangai bwa ea aki kainnanoa au kakoaua te tia moti—e a tia ana moti.

Ma te nanobwii, I rin n te ruu ni boowi ao e a taetae te tia moti. E taetae iaon te tua are e urua Titita Llanos ao rarawatan te tuaa are e a kaitaraa ngkai.

“Ma n aki tabe ma anne,” e reitianakoa, “I kakoauai bwaai ni kakoaua ake a tia n kaotaki iaon tamaroan aron Titita Llanos.” Ao e a taekina mwakoron te tua are e angana te kariaiakaki bwa e na kaota te nanoanga, ao n kabwaraa Titita Llanos man te oonibure.

Titita Llanos ma Titita Janeen Redd, inanon baina are Titita Llanos e bwakarii ngke e a kaotinakoaki.

“Te Atua Irarikiu”

Aio bon te kakai are ti bane n uaiakinna! E aki anganaki riki aua kee e nako tmwaitin ana ririki n kabureaki, ma Titita Llanos e a inaomata. Imwiin te ongora, ana rooia e roko ao taekana bwa te bong anne bon te bong ae raka kakanatonna ibuakon nakon ana bong n mwakuri.

E taku, “I bon namakinna raoi bwa te Atua e mena irarikiu,” e taku. “I tangiria n reiakina riki taekan ami koaua.”

I kaoia bwa e na nakon aia tabo iruwa n te Mexico Citty Mexico Tembora. I tuanga, “Ko na noriia mitinare riki aika ti te arona raoiroia ma Titita Llanos”. “Ko na nora raneanean mataia, ao kona titirakiniko i bon iroum bwa e aera e kanganne.”

Tebwii ma uoua te aoa imwiina ao e a kainaomataaki Titita Llanos, ma oneana naba n oneaia buure. E bwakarii bain Janeen. Ngke a toki raoi tangira ao ti a kona n taetae, Titita Llanos e takakua n taku, “Beretitenti, iai au aomata aika kan reiakinaki inanon te karabuuti!”

N te taneiai aio ao e kamatooa nakoira ae “Te Atua e aki toki arona n riki bwa Te Atua n karaoi kakai” (Moomon 9:15). Akea au nanokokoraki bwa te onimaki ma aia tataro aomata aika raraoi a buoka te rooia aio n kauntaekaa ana keiti ao ni kamaraua nanon te tia moti.

Bukina bwa Titita Llanos e kabureaki, tabeman aine ake a kabureaki a karekea te kaantaningaa bwa man ana euangkerio Iesu Kristo, te rooia e bwebwe inanona koraan te onimaki, ao ti kakorakoraki n ara koaua ae te Atua e kona n kabonganaira n kakorakora Ana mwakuri n taabo ake ti mena iai.

Titita Llanos n te Tijuana Mexico Tembora.