“Ko Tangiria ni Kan Ataia Riki?,” Riaona, Tebetembwa 2023.
Bwanaaia Aika Itiaki ni Boong aika Kaitira
Ko tangiria ni Kan Ataia Riki?
Temanna kain au umwa n rianna e nang tei n okoro ibuakoia tautia, ngaia are I a titirakina bwa e kanga n riki anne.
Te tia korokaraki e bwabetitoaki iroun Thomas Salisbury n te Song Be Nei, Vietnam.
Kariaia n te tamnei iroun te tia korokaraki
I kabaea arau n ana taanga n buaka te United States ibukin te maan ae teniua te ririki ao I roko i Vietnam Maiaki n au ka 20 nririki. Imwiin waniua te namwakaina, ao I kateaki n te unite i meangmaeaon Saigon. N menau ikekei, I a tabe n tatara aroaroan temanna kain au umwa n rianna, Thomas Salisbury, ae okoro ibuakoia te koraki.
Te kaokoro aio e bon rangin n rianako ngaia are I a bon titirakinna, “Tom, e aera ngkai ko a bon rangi n okoro ibuakoia te koraki?”
E kaekaai n taku, “Bwa ngai temanna ae Itiaki ni Boong Aika Kaitira,”.
“Tera nanon ae Itiaki ni Boong Aika Kaitira?” I titiraki.
E bairea ana tai ibukiu bwa N na kaitiboo ma ngaia ao Harold Lewis, te mitinare ae e a tibwa bane ana tai ao ae e beku bwa te tia ibuobuoki iroun te tia kairiira ara taromauri n ara unite. N ara moan kaitiboo n te umwa n rianna are e riki bwa ara tabo n taromauri, ao I kariaia bwa ngkana I kakoauai raoi bwaai ake a tuangai, ao N na bwabetitoaki. I karekea naba ana kaobi Ana Boki Moomon, are I kawakinna n buuan au kawaerake ake ibuakon au bwai ao n wawarekia n reken au tai.
Imwiin tabeua riki ara marooro, ao I a kunea bwa reirei ake I anganaki a kaekai raoi titiraki ake I kakakaea koauaia. Ma ngke Tom ao Harold a tuangai bwa I kan bwabwetitoaki, ao I tuangiia ae I aki. I aki ataia bwa N na kanga n kawakinii tuua ake a tia n reiakinai.
Imwiin irakin te maungatabu n te mwakoro i Saigon, I nako Aotiteria n te maan ae teuana te wiiki n motirawa man kamaraua au iango. N menau ikekei, I a moana n karekea ataakin kakawakin reirein te euangkerio irou. N okirikaakiu nako Vietnam, I kabaitiiai n tuanga Tom bwa I a tangiria ni bwabwetitoaki.
Imwiin anne, e a bwabwetitoai Tom n te Song Be Nei, ao Harold e kamatoaai bwa kaain te Ekaretia, ao Timothy Hill, ara tia kairiiri n te Ekaretia, e katabuai bwa te rikan.
Onoua te wiiki imwina ao I a okira mwengau n te United States, I a uota te euangkerio nakon raou te aine, are e a manga bon riki bwa buu. E butimwaea te euangkerio ma ana rongorongo ae uota te kaantaninga.
I nang karabwarabwa n aki toki ngke e titirakinai Tom ngkana arona bwa I kan reiakina riki ae bati. Ana katooto ao ana kakao e kaeka nanou ae ea maan ni kan ataa te koaua ao n kimwareirei n ana kakabwaia te euangkerio.