“Karabwarabwa bwa ti ‘Ongo Irouna,’” Liahona, Sept. 2023.
Karabwarabwa bwa ti “Ongo Irouna”
E nang matoa irou te ongongora n te ekaretia, ma te karaki man te Nu Tetemanti aio e buokai n taraa au kangaanga aio man te itera teuana.
Iai irou te bonotaninga ae I rootaki iai inanon te tai ae maan ao ti kona n oota n tao 20 te katebubua man te bwai are taekinaki n te tabo n taetae n tain te bootaki n taromauri. Angiin te tai, bonotaningau e karika namakinan akean raoraou ao te katinanikuaki moarara riki ngkana a ngare kaain te bootaki n taromauri n te bwai are taekina te tia taetae ae kamanga ma are I aki ngare bwa I aki ongo. Au tiaki ti ngai n au kangaanga anne. Kaain te uoote ake a kara a tuangai bwa ngaiia naba iai aia kangaanga n aia kakauongo.
Tabetai, imwiin korakai n kan oota iroun te tia taetae ae bwanaa marau n te bootaki n toa kee ngkana te Tia reirei n Taabati e taetae bwa akea kainnanoan te bwai n taetae bwa a bon kona n bane n ongo aomata, I iaiangoia bwa e aera ngkai I roroko n taromauri ngkana e a bon akea te bwai ae I kona n ongo. E aki riki bongana au tai ngkana I tiku n mwengau n wareware n te Nakomai, Iriirai ke ni kamatebwaia koroboki aika tabu?
Ma ngae n anne, I tangiria n ongotaeka man teimatoa n iriiri ma au utu n kaboowii ara berita ae tabu ngke ti bwabetito ao n ururinga te Tia Kamaiu man kanakin ao nimakin te toa. Bon te kakabwaia namakinan te Tamnei, ao I aki toki n namakina uotakirakeau n bwaai ake I kona n ongo.
Teuana te Taabati te ibonga ae rietaata ae taetae n ara bootaki n toa iai irouna te bwaana ae marara man bubura are ea kabebete te ongora. E maroroakina te karaki n te Nu Tetemanti iaon te aine ae aorakina te nrara inanon 12 te ririki ao iai ana onimaki bwa e na kona n kamaiuaki ngkana arona bwa e kona n riinga tabon ana kunnikai Iesu ngkana E rirarikina (taraa Ruka 8:43-48).
Te tia taetae e anga te atatai ae nano ae riinga nanou, ni kabwarabwara bwa ibukin aorakina, te aine aio e kona n aranaki bwa e aki itiaki ao ena aki kona n karinaki n te tabo n taromauri. Inanon 12 te ririki!
Te rekenikai ibukin aio e anaa ikeu. E ngae ngke e aoraki, te aine aio e bon bae n aki rangi n aoraki n te aro are e aki kona n kaea te taromauri, tao n taai tabetai naba. Ma ibukin koaua n aomata n taai akekei, ae ngaia e aki kona n kaea te taromauri iai. Ai buakakara te aeka ni kataaki aio ibukin te aomata ae onimaki!
Ngke I tabe n iangoia i nanou te maraki n nano are e bon bae n namakinna ngke e tuukaki man neboakin te Atua irouia raona n kakoaua ibukin aorakin rabwatana-—te bwai ae akea ana koona n katokia—te Tamnei e kaukii matau n aron ae titebo ara kangaanga. I oota bwa e ngae ngkana I aki kona n ira buakon te waaki ni kabane, e na bwakara ae iai irou te tibwanga bwa N na kaekaea te taromauri man ongo ake I kona n ongo. Te aine aio akea te bwai ae kona ni karaoia. I namakina te maema n taai ake I iangoa te kan tiku n mwengau.
N te tai naba anne, te Atua e taetae i nanou, ao e kaotaai bwa E aki tangiria bwa N na namakina te rawawata. E tangiria bwa nna namakina te karabwarabwa-karabwarabwa ibukin te tibwanga n iriira te taromauri ao ibukin kakorakoraakira n reitakira ma taan irira Kristo aika kakaonimaki. E ngae ngke I aki kona n ongo bwaai ni kabane, I kona n oota n tabeua bwaai—ao aikane a tia n kakabwaia maiu. Iai taai aika onoti ngke te Te Tamnei e buokai n kaotaai n bwaai ake I aki ongo.
I namakina te karabwarabwa ibukin te inaomata n neboa te Atua ao ni karekei kakabwaia man kakawaran Ana auti. Te Tamnei e kakoauaa nakoiu bwa e rangi n tamaroa riki ibukiu bwa nna kaei bootaki n Taromauri, kana man nima te toa, ao n reiakinii bwaai ake I kona nakon ae nna aki taromauri.
N te bong anne e bitaki anuau. N aki tabe ma katikikiu rikaaki n toaraau, e onrake nanou n te rau, ao I kateia irou baraakinan kakabwaia ake a kona n reke man iriran te taromauri. I kateia irou bwa nna nanona raoi au mwakuri n kaota au karabwarabwa ibukin ake I kona n ongo n aki karawawataai n ake i aki ongo.
Unimwaane Dieter F. Uchtdorf man te Kooram n Abotoro n te Tengaun ma Uoman e taku: “Te karabwarabwa n taai n korakai tiaki nanona bwa ti kukurei n aroarora. E nanonaki n ae kona taratara ma maata n onimaki n taraa are imwiin ara kangaanga ake ti aitara ma ngaia n te tai aio.”1 Te aine are e riinga tabon ana kunnikai Iesu bon te kauring ae tamaroa nakoiu bwa N na karekea au onimaki ae tau iroun te Uea n taratara riaon kabwakau ao te onimaki ae tau iroun te Atua bwa N na ataia bwa E na kakabwaiaai bwa N na tokanikai riaon kabwakan rabwatau.
Te maiu aio e roko ma aekaki n kataaki are a katai tamneira, nanora ao rabwatara, ma n taai naba n rawawata, ti kaungaaki bwa tina karabwarabwa n kakabwaia ake ti karekei. E taku te Uea:
“I tuangkami raou, tai maaku, e na kabebeteaki nanomi; eng, kimwareirei n aki toki, ao ni bwaai ni kabane anga ami kakaitau. …
“… Ao bwaai ni kabane ake kam a tia ni karawawataaki iai a na mwakuri ni kabane ibukin ae raoiroi ibukimi, ao nakon mimitongin arau” (Reirei ao Berita aika Tabu 98:1, 3).
E maeka te tia korokaraki i Utah, USA.