“Karekean te Kamaiuaki n te Tembora,” Riaona, Tebetembwa 2023.
Bwanaaia Aika Itiaki ni Boong aika Kaitira
Kamaiuaki n te Tembora
Inanon te tembora, I namakina te koaua ae nano bwa te Uea e tangirai ao e atai au kangaanga.
Tamnei ni mwamwannano mairoun te tia korokaraki, tamnein te Durban Aberika Maiaki Tembora iroun Matthew Reier
Ara moan nati e mate ngke e bungiiaki inanon 2017. Ruaia te namwakaina imwiina imwain katabuan te Durban Aberika Maiaki Tembora inanon 2020, natira te kauoman e a manga mate naba ngke e bungiiaki.
N te tai anne, ao I namakinna bwa kanga ai Aana ngai are n te O Tetemanti. I “bati n nanomaraki, ao n tataro nakon Iehova, ao n tang ni korakai” (1 Tamuera 1:10).
I namakina te aki konabwai ao te un, ao I maraki. I aitara ma kangaanga n te iango, te rabwata ao te tamnei. N tau ni kamatoa te kai te biti ai aron tauan te karai ae tabe n bwarabwaranako mai baiu. Ai aron ae I a kabuekakii n te “nne ni kanaiai ae kamaraki” (Itaia 48:10).
I bon rang ni kakaitau n reken te ibuobuoki ao te kamaiuaki mairouia au utu, koroboki aika tabu ao te tataro. E reke naba buokau mairouia kauntira. Ma bwaninin raoi reken kamaiuakiu, e reke n te tembora.
Ngke i karaoa te mwakuri n ibuobuoki n te tembora ao I a kaonrakeaki n te oota. I namakina te mwengaraoi ikekei. I namakina naba te koaua ae nano bwa te Uea e tangirai ao e atai au kangaanga.
E reitinako au mwakuri n ibuobuoki n ana auti te Uea, ao e a moanna n bitaki taraakin araia au bakatibu. Ai tiaaki ti taian ara. I a ataia, te katooto, ae temanna au bakatibu bon te nati te aine, te tina, te tibu te aine, ai te tina, te tari te aine, ao ai te nati te aine. Motirawana e bon bae n rawawata irouia ana koraki ake a tiku imwiina. Ma te kakabwaia are e reke nakon ara bakatibu aio nte tembora man karaon otenanti ibukiia tabeman aika tabu e karekea te kimwareirei ae korakora man karewe ae riaon te maraki are a namakinna ana kona ake a tiku imwiina imwiin motirawana.
Te oota aio e a tia n kakabwaiaai ngkana I tabe n iangoia natiu mwaane akekei ao oin aroia n tamnei ae akea tokina, ao ana babaire ni kamaiu Tamara are i Karawa. Buan natira mwaane aikai a kairoroai bwa N na kabane au kona n maiuakina te euangkerio.
Tabeua boong a matoatoa nakon ake tabeua. Ma kakaonimakiu nakon au berita aika tabu e kabebetei boong akanne.
N tangoi ana taeka Beretitenti Russell M. Nelson, “Ti mitiniia [natira mwaane aika] n taainako. E ngae n anne, ibukin ana euangkerio Iesu Kristo ae kaokaki, akea raraomara [ibukiia]. Ngkai ti reitinako ni karinei ara berita ma te Atua, ti maeka ma te kantaninga ae ti na manga kaitiboaki riki ma [ngaiia].”1