“I Tangiria Bwa Ko na Riai n Ururinga,” Riaona, Tebetembwa 2023.
“I Tangiria Bwa Ko na Riai n Ururingnga”
Motiaea 5:12
Ngaira n tatabemaniira nako t ia tia n anganaki kauringaakin Kristo aika onoti. Taraiia ao Ururingnga.
Kabwarabwara man Kristo ao te Ataeinimwaane ae te Kaubwai,, iroun Heinrich Hofmann
Mwakoron ara taneiai n te maiu ae mamate, ti bane n karekea tiaki ti te rabuna n kamwaningaaki ma kabwakara n mwamwaninga. Te rabuna ni kamwaningaaki e karika iroura te mwaninga n bwaai aika riki ao koaua ake ti atai n te maiu imwain te maiu n rabwata. Kabwaraka n mwamwaniga e kairiira bwa tina mwaninga ao man bweenako man koaua ake ti reiakin ke n manga reiakin riki n te maiu aio. Ma ti ngkana ti tokanikai iaon kabwakara n mwamwaniga, ti na teimatoa n “waekoa ni karaoa te buakaka ma ni waeremwe n uringa te Uea ae [Atuara]” (1 Nibwaai 17:45).
Kauringaan Kristo
N raonaki ma Ana tua ni kabane are e anga, e berita te Atua bwa e na “katauraoa te kawai [ibukira] are [tina] kona iai ni kakoroa bukin te bwai ae tua nakoira bwa a na karaoia” (1 Nibwaai 3:7). Bwa tina ongeaba nakon Ana tua n uringa, te Uea ea tia n katauraoi kauring.
Eang, nikabane bwaai ake a karikaki ao man kakoaua ao man kauringiira taekan Kristo (taraa Mote 6:63; taraa naba Aramwa 30:44). E bon tia ni katauaki, te katooto, bwa tina Ururinga “ngkana ti rinanon te buakoako ma te buakonikai [ti] ririaki, ao ti ongo bwanaaia manikia aika bwanaraoi n anene.”1 Atiibu a kona n tang bwa kakoaua ao kauring ibukin Iesu (taraa Ruka 19:40). Ni koauana, te aonaaba ae bwanin, bwanaana ma taraana, a kakoaua ni korakora man anga te kauring aika kamimi bwa Iesu bwa te Tia Karikibwai.
Kauring aika a taraa n aki barongaaki n taian karikibwai nako a kakorakoraki man taian kauring ake a barongaaki ake ti kona n kunei n otenanti aika tabu. Abinataai e reirei bwa Iteraera n boong ake rimoa a anganaki otenanti aika matoa bwa a na karaoi bwa e aonga n “kawakinii n kauringaan te Atua ao tabeia ibukina” (Motiaea 13:30). Buraabeti ni boong aika a reireiniina naba te bwai anne. Beretitenti Spencer W. Kimball (1895-1985) e taetae, “Au katauatau bwa ena akea kitanan te koaua, e na akea karaoan te bure, ngkana aomata a uringa, uringa raoi, bwaai ake a karaoa te berita ae tabu iai n mangeen te ran ke n te taibora n toa n ao n te tembora.”2
Ana Mwakuri ni Kamaiu Kristo ibukin te aonaaba ao temanna ma temanna. Ao raona naba ma Ana kauring. Ngaia are, n ikotaki ma otenanti ake anganaki aomata ni bane, E anganiira naba kauring aika kakaokoro man onoti ibukin Uringa. Te katooto, te bokaboka e na aki karioa uringan Iesu irouia tabeman ke n kaonrakeia ma te kukurei Ibukina. Ma te mmwane are e kaokaki ana taratara iroun Iesu ngke e kabiraki matana ma te bokaboka e na bon bae n ururinga Iesu ma te kukurei ni katoa tai are e noora te -bokaboka! (taraa Ioane 9:6-7). Ke tao ena aki rereke iroun Naaman taraakin te karaanga, moarara riki te Ioretan, n aki iaiangoa te Uea are e kamaiua ikekei (taraa 2 Uea 5:1-15). Ngaira n tatabemaniira nako ti a tia n anganaki kauringaakin Kristo aika onoti. Taraiia ao Ururingnga.
Kakouaan Kristo
Rongorongo ao karakin rimoa bon bwaai n raka aika te Uea ea tia n karaoi ibukin katauraoakira ma buokara n ongeaba nakon Ana tua n uringa. Koroboki aika tabu-a kakoauai ana mwakuri te Atua ma Natina-e taetaekina kakoauaan, ke “taetaekinan Koauana,” (taraa 2 I-Korinto 8:3; 1 Ioane 5:7; 1 Nibwaai 10:10; 12:7; Reirei ao Berita aika Tabu 109:31; 112:4).
Rongorongo aika tabu, n ikotaki ma rongorongo aika onoti, a buokiira n taetaekina koauana. Taai aika onoti ma te Tamnei bon bwaintangira aika, n te tai anne, ti kakoauaa bwa ti na aki kona n mwaninga. Ma n kabwakara n mwamwaninga ena karekea kakaongoraan taneiai aika onoti bwa ana bua inanon taina. Te rongorongo n ara boki, te tamnei, ke te rongorongo ana kona n buokiira n aki ti uringii taai aikane ma a kauringiina naba namakin ma te Tamnei are ti namakinna n te tai arei. Akea te kakubanako, ngke, te moan tua imwiin barongaakin te Ekaretia n ara tai bon, “ E na iai te rongorongo ae e na kawakinaki iroumi” (Reirei ao Berita aika Tabu 21:1). Rongorongo aika kawakinaki raoi ana karababa ara ururing ao ana kona n kaotaira n kairuara ao n uotiira n kaniira nakon te Atua (taraa Aramwa 37:8).
N tokin te tai, ao e koaua, ti na kona n kakoauaa bukina bwa ti a tia n karekea te kakoaua n te koaua mairoun te Tamnei ae Raoiroi, are “te rekooti i karawa” (Mote 6:61). N tabena aio, te Tamnei ae Raoiroi e rekootini koaua n te “taiboran rabwatan [nanora]” (2 I-Korinto 3:3). E buokiira n ururinga Kristo ao bwaai ni kabane are E a tia n reiakiniira (taraa Ioane 14:26).
Te reitaki imarenan Iesu, taian rekooti, ao te Tamnei ae Raoiroi, ao ururingana e katamneiaki n Moronaai 10:3-5. E beritanaki nakoira bwa ngkana ti wareka Ana Boki Moomon, te rekooti ae tabu, n tamnein ara ururing ao ngkana ti bubutia te Atua n aran Kristo ma tenano ae koaua, nanomi raoi ao te onimaki iroun Kristo, te Tamnei ae Raoiroi ena kaota raoi koauan te rongorongo aio. Ao ngkana te rongorongo anne e koaua, ngkane Iesu bon te Kristo.
Aramwa Teirake, iroun Walter Rane
Uringa bwa Kona Kamaiuaki
Ururinga ae Iesu e kairiko nakon te kabooaki ao te kamaiuaki. Iangoa taben te ururing are e karaoia n kaboakin Aramwa te teei. Ngke e kaoti te anera nakon Aramwa, e nikira te tua nakon Aramwa bwa ena “katoka ukoran uruakan te ekaretia.” Ma imwain kanakoana ana rongorongo, te anera te taetae, “Uringa aron tautoronakia ami bakatibu … ao uring bwaai aika moan te korakora ake [Kristo] e a tia n karaoi ibukiia; bwa a bon n tautoronaki, ao e … kamaiuia” (Motiaea 27:16; kairaki ma katuruturuana).
Ana kaetieti te anera are a na uringnga e aki ti bebete ma bon te kaetieti ae riai man rababa aron karaoana. Iroun Aramwa, bon te bwai ae kaineti raoi, kaotan te tangira, ibukin tokanikaina iaon te taneiai are e nang riki ae e a kuri ni-mate iai.
Uaabwi ke e nako riki te ririki iwmiina, Aramwae tibauaia nakon natina te mmwane ae Ereman, ma bwanin raoi rongorongon bwaai ake e rinanona ngke ea wene n aki kona n kamwainging man aki kona n taetae inanon teniua te bong, “rairananou ni karokoa kaniian mateu” (Motiaea 27:28). Imwiin nakon te anera, Aramwa e uringa, ni koauana raoi; ma ae ti kona n uringnga bon ana bure.
“I kammarakaki n te karawawataki ae akea tokina,” e ururing Aramwa. “… Eng, I bon uring au bure ni kabane ma buakakau, are I a bon kammarakaki iai ni kammarakin moone” (Aramwa 36:12–13). Iangoan ae e na tei imatan te Atua e kaona Aramwa ma te “maaku ae aki kona ni kabwarabwararaki” are n ana iango ena birinako mai iai, tiaki ti man te mate ma man riki n “akea tamneiu ma rabwatau” (Aramwa 36:14-15).
Ikai ti riai moa n tei man oota raoi: Aramwa e aki ti katuuaeaki inanon teniua te bong are e katauaki bwa te tuua ibukin ana bure ae tau. Tiaki, e a tibwa waaki mai moana raoi-taian bong ake teniua aikai-are e “otabwaniniaki n ana kabaebae te mate ae aki totoki” (Aramwa 36:18; kairaki ma katuruturuana).
Ao ni koauana, e na tikunako n arona ae kananokawaki aio riaon riki teniua te bong—-n aki ataaki tokina—ngke e a uringa naba n te arora teuana, man te tabo teuana, e uringnga ae e a tia n ongo ana taetae ni burabeti tamana “ni kaineti ma rokon Iesu Kristo, Natin te Atua, are e na tiringaki ibukin buren te aonaaba.” Aio naba ana taeka:
“Ao ngkanne, ngke au iango e iangoa raoi te koaua aio, I tang inanou: O Iesu, ngkoe Natin te Atua, nanoangaai, ngkai I mena n te aro ae kananokawaki ae moan te mao, man otabwaniniaki n ana kabaebae te mate ae aki totoki.
Ao ngkai, nooria, ngke I iangoa aio, I aki manga uring marakiu; eng, I a aki manga karawawataki n uringakin au bure” (Aramwa 36:17-19).
Aramwa e a tia n ira ana tua te anera are ena uringnga. E uringa Iesu. Ao n ai aron are Iesu e kamaiuia ana bakatibu Aramwa man te tautoronaki, E kamaiua naba Aramwa man tautoronakina.
Ai maraura te nanoanga ao korakorara te kamaiuaki! Ai kamimira bitakin te nano ma te iango aio! Aramwa, are e iangoa birinakona mai matan te Atua man kabuaan rabwatana, ngkai ea katamneia te Atua ao Ana Anera aika Tabu ao e “tangiria ni kan mena ikekei” (Aramwa 36:22).
Te bitaki ae kamimi aio e riki man te ururing. Ana taneiai Aramwa e anganiira nanon raoi ana kabanea n taeka te uea are Beniamina n ana kabanea n reirei: “O ngke te aomata, ururingnga, ao kam na aki bua” (Motiaea 4:30).
E Uringiira
Ngkai ti kateimatoa ururingan Iesu, e kakawaki bwa tina kakatikua n ara iango ae E ururingiira n taainako. E a tia ni korea arara i nanon baina (taraa Itaia 49:16). Iangoia—Iesu are te nananoanga e na aki, ao e aki kona, n mwaninga taekara, ma E na baiti man tauraoi n kabwarai ara bure are a Kamarakia.
Anne ae riai ururingana.