“Karekean Raoi te Ota Bwa Tera Nanon ae Ko Tangiraki iroun Te Atua,” Riaona, Tebetembwa 2023.
Kairake n Ikawai
Karekean Raoi te Oota Bwa Tera Nanon ae Ko Tangiraki iroun te Atua
E a tia n bua mairou te mwaaka n ataa raoi rikiu mai karawa.
Kamataata n te tamnei iroun Alecia Schubert
Ngke I uarereke, au utu e mwaing mai Hungary nakon Tiaman. I nang kaingaingaa te mwaing nako, ma e otinako mwiina bwa ngaia bon te kabanea ni kangaanga ni waaki inanon maiu ae ruaia te ririki.
E matoa reken te taetae n Tiaman irou, ao are I a bon kan maemaama, ngaia are aikane bwaai aika uoua ake a karikai bwa te takete ibukin te burii. Nanomatoau ea kekerikaaki. Inanon taina ao I a namakina ae I aki tangiraki ao akea te kaantaningaa ae raoiroi ibukin taai aika imwaiu. I tabe n iangoia bwa tao ea raoiroi riki te aonaaba ngkana akea ngai iai ao tabetai I iaiangoa ae nna bakabureai.
Ma n angaa ae I aki ataia, ao rinanon au kangaanga aikane, I ataia ae iai uaan maiu are tia n anganaki, ma ea kangaanga ootau bwa bukin tera. I ataia ae I kona n karekea ootan te Tia Kamaiu n te taai n rotongtong (taraa Ita 12:4). E ngae ngkana te aonaaba e tara n kakaitaraai, I ataia bwa iaa ae nna kona n Kunea iai ao tera E kona n karaoia ibukiu ngkana I ukoria rinanon koroboki aika tabu, te tataro, ao n karaoan au kabanea n tamaroa n riki bwa te tia Iriria. Bon maiuakinan raoi Ana euangerio ae e anganai te rau ao e buokai n kateimatoaa kekeiaki n taai ake a matoa irou.
Te Koaua ae E a Bua Mairou
Tokin te tai, ngai ma au utu tia okirikaaki nako Hungary. I a tia n otinako man te kauarinan, ao engae ngke ea toki buriinakiu, I teimatoa n akea karineakiu i bon irou. I rangi n rootaki n mwiin waaki ake a bubuaka are I rinanonii, ao tabetai I manga nanououa n oin taraakiu bwa i tau ke iaki.
Ngke te kairake n ikawai ngai, I rangi n tangiria bwa nna naomatoa n karaoan rinerine aika bubura inanon maiu ao n rinean te bwai ae kan katiia inanon maiu.
Ngke I tabe n rinanon aio, I namakinna te wirikiriki bwa N na kaea te maungatabu ibukiia kairake n ikawai ake a tuai iein i Eurobe mainiku. I kainnanoa te kairiri mai karawa inanon maiu bwa ena buokai n kanonoa tarakiu irou bwa I tau ao n I tataro bwa N na karekei au kaeka ikekei.
N tairikin te maungatabu teuana, ao e a uti kunin anganibaiu ngke e taetae temanna te tia taetae n te bootaki iaon aron burinakina ngke uarereke. E taetae iaon namakinan ae akea uaana ao e aki kona n nooraki. I moanna naba tangiu.
E kabwarabwarai raoi bwaai ake I a tia n rinanona.
E reitinako te tia taetae aio n tibwauaa te koaua are e tatautau irouna inanon ana tai n aitara ma kangaanga—te koaua ae tia n bua mairou:
“Ngai natin te Atua.”
Butimwaaean Kinaakiu Iroun te Atua
Ngke e bwara te bootaki n taromauri aio, ao e bon tabe nab n bwaro ranin matau. E norai te tia taetae ao e nakoiu naba n rabwatai. E tuangai ae e bon aki kakaraoa ae ena kataetaeia aomata imwiin bootaki n taromauri aekaki aika ma e roko irouna te namakin bwa iai temanna ae kainnanoia n ongo raoi ana rongorongo mairouna.
Bon ngai te aomata anne.
Te taneiai aio e kaota nakoiu tabeaiangan Tamara are i Karawa ibukiia Natina ao E ataa raoi aron buokaia bwa ti na kona n noora mwakoron Ana tangira ae kororaoi ni karo. E ataia ae I kainnanoia n ongo ana marooro te tia taetae aio ao e kairai bwa N na mena ikekei n te tai raoi arei.
I a kaman ataa te taetae, “Ngai Natin Te Atua”inanon maiu, ma koauana e a tibwa booraoi ma tamnei n te tai anne. I a ataa raoi ae nanonaki n ae natin te Atua ae kororaoi ae tangiriira ao E tauraoi n anga Oin Natina bwa ti aonga n maiu ao n karekea kamaiuakira man ara bure. E rangi n tangirai ae ngaia E aki toki n kamanoai ma te maraki, E raonai n taainako ao ni buokai n tokanikai iaon au kangaanga, ao n karekea reireiau mai iai, ao n manga Okiria.
E tangirai ngkai, ao E tangirai naba inanon ririki are I buriinaki iai are I a namakinna bwa ai akea ae tangirai. I ataia ngkai bwa ngaia ataakin te koaua aio inanou ae ngaia I rineia bwa N na teimatoa n kekeiaki.
Beretitenti Russell M. Nelson e reireiniira n te tai ae tibwa nako mwaakan ataakin kinaakira iroun te Atua. E taku: “Raou aika tangiraki, ngkami raoi natin te Atua.… Ma e mwakoro te koaua aio inanomi? …
“Tai kamangaoko iai: Konabwai e roko mai karawa. Ma kakaonimakim n ukoria, te Atua ena anganiko te nonorii iaon te aekan n aomata raa ngkoe ae ko kona n riki.”1
Ngkai ngkana I kunea bwa I a manga nanououa naba n arou, I kakauringai n taainako te koaua ae Ngai natin te Atua ao maiu aio te bwaintangira mai Irouna.
Uringnga bwa ngkoe natin te Atua. Ao n aki mwamwaninga te kakorakora, bitakin maiu, ao te mwaaka n tamnei ae akea kabootauana are e roko man butimwaean te koaua aio.
E maeka te tia korokaraki i Szeged, Hungary.