RONGORONGO NI KAIRIIRI MAN TE AONO
Butimwaean Kamatoakiu n Nakoau ni Beku
Bon te moan waaki ae boou nakoiu imwiin 30 te ririki ni beku n te Ekaretia, E bane au tai ni mwakuri, ao I kunea bwa a bati bwaai ae I kona ni karaoia i bon irou. Te mwakuri ibukin Ana Ekaretia Iesu Kristo ibukiia Aika Itiaki ni Boong aika Kaitira e riki bwa au tai ni kakabwaiaki korakora ngkai e rikirake ataakina bwa antai ngai ao man bwaai ake I a tia ni baairei bwa N na karaoi inanon au tai n aki mwkauri.
Au moan iango imwiin banen au tai man te mwakuri bwa N na nooria natiu teniman mwaane ma aia utu i Utah inanon onoua namwakaina. E na manga rimwiai kaainabau ngkai e bon teimatoa ni mwakuri. Inanon Okitobwa 2019, ngke I mena I Utah, I kaea au moan maungatabu ni kabuta. Bon te kabanea n Tamaroa n taneiai n tamnei ae I rinanona ibuakon nako bootaki n te Ekaretia. Bwaai ni kabane ake I noori, ongo, ao n namakinna n te tabo ni maungatabu a kaonai n te kakaitau ao te tangira ibukin te euangkerio ao ibukin bwaai ni kabane are I a tia n reiakinna n te Ekaretia mai imwiin bwabetitoau n te 1977.
I tang ngke I anenea te anene n taromauri ma kaain te bootaki n taromauri. I miimi n taraakia 15 burabeti aika a maiu ao abotooro ake a bane n tekateka iaon te tabo n tekateka mai moa ibuakoia taan tararua ni kabuta ake tabeman ao tamaroan te Kuaea man te Taebenaeko man te Tembora Tikuea. Aia anene kaain te bootaki n taromauri titebo ma e waerake nako karawa, ao I tangira bwanaau bwa e na ongoraeaki ibuakoia aomata aika 23,000 tabun ake a roko. Bon te taneiai ae mimitong ni koaua.
Ngke e a roko kaainabau irarikiu i Utah, ti nako n nooria ara koraki I California ao ikanne are I a karekea te tareboon ae aki kaantaningaaki mairoun Beretitenti Ian Arden, te Bereitenti n te Aono n Tebetebeke. E titirakinaki bwa N na okira Biti ningai ao imwiina e tangiria bwa N na waekoa ni kaitibo ma ngaia. I tuanga bwa N na manga okira Utah te wiiki are imwiina, ma ngaia are e tuangai Beretitenti Arden bwa e na manga reitaki nakoiu imwiina.
I aki matu raoi imwiin rokon te tareboon anne. E aki rau au iango. Arou ni kabane n nikiran boong n au motirawa anne a bitaki.
Bon Unimwaane Carl B Cook man te Beretitentii n te Kaitingaun are e reitaki nakoiu imwiina, ao ngai ma kaainabau ti buti ni kaea atuun kawan te Ekaretia ni kaitibo ma ngaia. Te taneiei ae nanorinano tera ni weteaki ni beku bwa te Kaitingaun n te Aono. E ngae ngke I a bon kakariaia naba wewete ke nakoa ake I a tia n angaanganaki inanon 42 te ririki n riki bwa kaain te Ekaretia, te wewete aio e bon kaokoro. I taonaki n te namakin n aki tau; I namakinna bwa I tuai tauraoi. I tang imatan kaainabau ao Unimwaane Cook. E bon koaua ae riki aei?
Ni maiu ni kabane I tataraia Mataniwii ni Kabuta ao aobitia ni kabuta n te Ekaretia—a tia n rineaki iroun te Atua ao ni karineaki inanon te Ekaretia ni kabutaa. Weteakiu ni kabane bon ibukin te tabo are I mena iai. Bon akea ibuakon miiu ae I a tia ni iangoia bwa e reke irou te wewete ibukin te Aono ae rietata.
I keiaki ni kariaia are e roko ibukiu, ma au nanououa n au konabwai ni kakoroa nanon te wewete e moanna ni keerikaaki, I kaonaki n te kakaitau ibukin au tia Kamaiu, ibukin Ana tangira ao ana nanoanga ae beebete. I namakina te nano matoa ae Tamaroa ni beku ibukin te Uea n au kabanea ni konaa. Aio bon au tai ni kaota au tangira Ibukina ao Ana Ekaretia. Te kibu man te boki ae tabu are e roko n au iango ma nanona ae korakora bon Reirei ao Berita aika a Tabu 82:3, “Bwa nakon are e mwaiti ae e anganaki e mwaiti ae na kainanoaki . . .”
I katabuaki n tain te Maungatabu ni Kabuta n Eberi 2020, te moan tai ni karaoaki n te maungatabu ae karaoaki iaonrain man te Ekaretia. Au kataneiai ngkai te Kaitingaun n te Aono ae boou e karaoaki naba iaonrain ngke e roko ni korakorana butinakon te aoraki man te Covid. Au moan ririki ni weteau e bon rangi ni kamiimi; te boutoka are I karekea man te Beretitentii n te Aono n Tebetebeke, raou n Kaitingaun n Aono, ao noorakia Mataniwii ni Kabuta e bon rangi ni rianako tamaroana. Mwamwananga nakon maungatabu n titeiki ao kaean maungatabu ni kabuta irou bon ake a waakinaki ibukin te tai aei, ae kaonaki ma reiakinau ae Tamaroa ao rikiraken au taneiei.
E ngae n anne, I bon teimatoa ni aki rau inanou, riki n taai ake I tirobaea arou. I bon teimatoa n namakina te aki matoa ao n aki tau n au mwakuri n riki bwa te Kaitingaun n te Aono.
Anne arona ni karokoa te kabanea n tetere n aia kataneiai ni Kairiiri Mataniwii ni Kabuta, Kaitingaun n Aono ao Aobitia ni Kabuta, inanon te maungatabu ni kabuta n Eberi 2021, ngke I a karekea te kakoaua n tamnei are I a tia ni kakakaea man moan weteakiu. N na bon aki kona ni mwaninga te tai anne.
Kanoan te tetere aei bon ibukia ni kabane 15 Abotoro ao Burabeti are a na anga iai aia koaua ao kakoaua ibukin Iesu Kristo. Waakinana ao tabun te tai aei e mimitong. Bon ana koaua Unimwaane Neil L. Andersen are e bita au noonori ao n anganai te kakoaua are I ukoukoria.
E kabwarabwara Unimwaane Anderson arona n namakin ngke e weteaki nakon te Koorom n Abotoro n te Tengaun ma Uoman. E taku bwa ngke e moan tekateka n te kaintekateka n te nakoa are e mena iai ngkai Unimwaane Soares, e tararake n tara te rinan irouia Abotoro ake 11 ao te Moan Beretitentii, ao namakinan te aki tau e roko irouna. Ngke I ongo are e taekinna Unimwaane Andersen I kaetai iaon au kaintekateka ibukina bwa I ata te bwai are e a tibwa tia n taekinna—ao are E na manga taekinna imwiina—e bon kaineti nakoiu.
E taku Unimwaane Andersen bwa e aki rau n te bwai are e riki irouna n te tai ae aki rangi ni maan ao imwiina e roko: E ongo bwanaan te Uea ae kangai, “Neil, ko aki karokoko ikanne. Boni ngai, ibukina bwa I tangiriko, ao I ataia bwa ko konaa ni bitaki, ao I ataia bwa ko konaa ni buoka au mwakuri.”
Ngke e tibwaa te taneiei ae tabu aei Unimwaane Andersen, e riki naba bwa te bwai ae tabu irou. Bon te kamatoa are I kainnanoia.
I ataia bwa Tamau are i Karawa ao Natina A aki weteai ibukin te bwai teuana are I a tia ni karaoia ae tau ibukin te tibwanga aei, ma bon ibukina bwa a tangirai. A ataia bwa I konaa ni bitaki, ao A ataia bwa I konaa ni buokiia n aia mwakuri ae mimitong: ni karekea te aki mamate ao te maiu are akea tokina nakoia natina ni kabaneia. (Taraa Mote 1:39.)