Ana Iteraniba te Aono
Te Tia Nete ae Rangi ni Kinaaki E Karaoa are Iaona man Katukan te Takakaro ao ni Beku ibukiia Aomata
Te tia Takakaro te I-Amerika e “mwakuri mwaaka ibukiia” aomata i Nu Tiran
Te mitinare aei e karaoi ni kabane are e kaantaningaaki—e bwaina te kabaraaki mainaina ao te neketai, e tauraoi ana boki aika a tabu, ao iai irouna ana onimaki iroun te Atua. Ma iai riki te bwai ae karika Elder Gavin Chambers bwa e na tei n okoro ibuakoia aomata.
Abwakin Chambers bon 206 te tientemiita (6 te buuti 9-te inti) te I-Amerika ae te tia nete! Man te tabo ae Corona, California, e katuka oneana n nete nakon te onea ni mitinare.
E makuri ni mitinare Elder Chambers n te aono ae Papatoetoe n te New Zealand Auckland Mition, ike e a tibwa moana kataneiaan toana ni mitinare, ae Elder Bryce Jacobson “I reiakina ae bati iroun Elder Chambers,” e taku Elder Jacobson, n taekina anne ibukina bwa toana ae maan riki nakoina. Ma ibukin abwakina, tarakina bwa te tia kairiiri bon te bwai ae e a bon taneiai iai.
E bon rangi n abwabwaki. “Ngke e koro 13 au ririki I a tia n roko n te abwaki ae 182 te tientemiita (onoua te buuti). Ma rikiraken abwakiu e tuai riki ni karokoa au kauoua n ririki n te kauarinan.” E roko n tokin abwakina ngke e a kaan bane ana tai man te kauarinan, ao, n ai aroia ataei aika a abwabwaki, e taku te aba bwa e na takakaro n te bwatiketibooro. Ma bon tiaki anne.
“I bon aki rangi n tatangira te bwatiketibooro,” e taekinna. “Ataei ake tabeman ao taan kaira te takaakaro a aki toki ni bwabwaningareai, a tuangai bwa I aki kona ni kiba.”
N tokina, e kaumakia tinana, ni ira te waaki n te tiim n nete. “Bon akea te kukurei ae bati irou n taian takakaro mai imwaina, e taku Chambers. “I baeenako iai! E ngae ngke I aki rangi ni bwaati n takakaro iai, I okira mweengau ao n tuanga Tinau bwa te nete bon te takakaro ibukiu!”
Te tia kairiiri ae kinaaki e buokia ni karekea nnena n te takakaro, ao ibukin abwakina ae rianako, a karikia bwa te tia kaoki booro mai nuuka. N tokina, ngareakinana ngkai e “abwaabwaki” e a angana te kukurei. Imwiin takakarona ni kaboo n te kirabu nete, e a ingainga ni kan kaaina te tiim n ana kauarinan ao n tuoa rabakauna. Ma e riki te kangaanga n ana moan tai ni bokakano.
“I kiba ao ni kataia n totokoa te booro, ao mwiin kibau I bwakara waen temanna te mwaane ni iteran te nete are teiterana ao ni maoto toman waeu are i nano,” e karakinna Chambers. N na riai ni kakaunai n te kau are e kamanoa waeu n taabo nako imwiin rikin anne ao n aki manga takakaro n au moan ririki.“
“E rangi ni kamaraki nano karaoan te rikirake n te takakaro ae boou are I rangi n tatangiria, ao mwiina ti konaaki ni boora ake imwiina.”
Ma man te manang ni konakira anne e rikirake te “phoenix” ni kinaaki n ana tokanikai n ana taarena. Teniua te ririki imwiina e riki Chamber bwa te tia kaokibooro ae mamaakaki inanon te tabo n takakaro, ao ni katikii mataia tiim n nete n reirei ni kauarinan ni kabuta te US. E aki butimwaea te mwane nibuoka are e anganaki man reirei aika a rangi ni tanoata—n aron Stanford ao UCLA ibuakoia ake tabeua—ibukin are e rangi n tangiria raoi: n takakaro ibukin ana tiim Brigham Young University I Provo, Utah (USA) ae tanoata n te aba.
Rikiraken ana takakaro Chamber ngkai te kairake e roko n tamaroana n tokin te tiamwa n 2022, ni moannan ana kirabu n nete ae Orange Coast ae iaan 18 te ririki n te kaboo ae kinaaki n te aba. E aranaki Chambers bwa te tia takakaro ae rianako aron ana takakaro n taian kaboo iaon US man te Bootaki ae Kinaaki iaon Amerika n te Nete. Te ataei are “kabi ni kiba,” e a tia ni kaota kairuaia taan moan bwainingare.
“Imwiin te kaboo anne . . . I a anaa tabeua te wiiki ni motirawa ma te kukurei ibukin anne—I katokaa au metera te koora . . . ao ni kukurei ni kinaaki iai,” E taku Chambers. “Ma imwiina I ataia bwa e a boo au tai ni waaki nako inanon maiu.”
Nanon anne bon butimwaean te wewete nakoina bwa e na beku bwa te mitinare ibukin Ana Ekaretia Iesu Kristo Ibukiia aika Itiaki ni Boong aika Kaitira. Ma rianakon kinaakina ae boou aei, e na kona n taku temanna bwa e kangaanga kitanakin te nete, ma e a tia bairean anne irouna Chambers ngke 12 ana ririki. E tangiria n beku ibukin te Uea man kaoakiia aomata n roko nakon Kristo. Nakona n ana mition bon te bwai ae eti karaoana.
“E koaua, e bon kangaanga katokan takakaronakin te nete . . . ma I a tia n tataroakina au babaire aei, ao I namakinna inanou bwa ana babaire Tamara are i Karawa ibukiu bwa N na beku n te mition ngkana e bane raoi au reirei n te kauarinan.”
E taku bwa iangoana ni moantaai ni maiuna e karika bebeten aron bairean ni kabane bwaai ake a na kona n totoko nakon te mwakuri ni mitinare. “Ko tangiria ni kakoauaa raoi bwa ko tataro ibukin te iango anne, naba, bukina bwa a kona ni iai am iango bwa tera ae ko tangiria ni karaoia ni maium, ma am babaire ao are e katauraoia ibukin Tamara are i Karawa e kona ni kaokoro.”
Ibukin kangaanga tabeua n te beebwa ni kariaia ibukina n roko I Nu Tiran, e moana ana mwakuri ni mitinare Chambers i West Virginia Charleston Mition. Ikekei, e nooria aomata aika a rootaki n te kaainano, ma e noriia Chambers bwa a rangi n nanorinano, ti ni ukori kairiiri n tamnei ni maiuia.
Ana Euangkerio Iesu Kristo bon te kaeka.
Aron te waaki I Nu Tiran e rangi ni kaokoro, ma aomata ikai a ukoukori naba kaeka nakon titiraki ni maiuia. “A reke raoraora n taabo nako ake ti nako iai, marooro nakoia aomata ao n tibwaa ana Babaire ni Kakukurei te Atua ma ngaiia,” e reitia n taekinna. “E matoatoa te mwakuri, ao ti katinanikuaki. . . . Ma iai ara onimaki ae korakora bwa tina kuneia aomata ake a kakaea te bitaki n tamneia,” e taku. “Ngkana a bon tauraoi n ongora ti na bon mena ikekei, ni kaekai aia titiraki ao ni buokia bwa tera ae a na karaoia.”
“Ngkana I tan rikaaki I kona n nora aron te Uea ni kaekai au tataro, ao ni buokai ni kunea te tai ae nakoraoi ibukiu ni beku,” E taku Elder Chambers. “Man karaoan bwaai n ana kawai te Uea, I karekea te tibwanga n takakaro n te reirei are e karekea nakoiu au tai ni beku n te mition, ao ni koro nanon miiu n au takakaro n te nete.”