Ana Iteraniba te Aono
Mano ni Baina
Ngai ma kaainabau ae Eddie Uele iai teniman natira: Indie-Rose, Rollo, ao Kamaukiterangi (Kamau). N Tianuare 12 2022, e bua maiun natira te mwaane ae 2 ana ririki, ae Kamau.
N te bwakantaai anne, ti takakaro ao ni ngarengare ma natira inanon ara ruu ni matu, tia tibwa ataia ae akea Kamau irarikira. Imwiina ao e a kuneaki Kamau n aki namakinaaba ibukin ara auti i tinaniku. E karaoa te moan kamaiu Eddie ni karokoa a roko taan ibuobuoki man te onaoraki ao ngai ma au utu ti bubuti ana ibuobuoki Tamara are i karawa.
E waekoa ni uotaki nakon te onaoraki Kamau ike a kaman tataninga iai taokita ibukina. Ngke ti roko, ngai ma Eddie ti uotaki nakon te ruu ae onoti ike ti kabanea iai tabeua te miniti n tau bai iroura, n teimatoa n tataro mwaaka. E roko nakoira imwiina te taokina, e tekateka ni kaaitaraira ao n moana ana taetae.
Akea ana taeka naba teuana ae I ongo ngkai bwaai ni kabane ni katobibiai a taraa n aki kakamwakuri, akea te kakaroongoa, ao n rau—imwiina, n aron itiakin te ngaina, I noora natiu te mwaane i moau n takakaro ma ana kaa ae uarereke ae te bwai n takakaro, ni ngarengare ao ni kukurei. N te tai anne ao I a ataia bwa e a mate natiu te mwaane. I ataia naba bwa aio ana kawai Tamau are i karawa ni katauraoai imwain te bwai ae nang riki.
Ai tibwa rimwi riki n te tairiki anne ngke I a oota raoi ni koaua ni kakawakin te kaotioti mai ieta.
E koonai tinau ngke I tabe n tang inanon baina, n akean au kona n taonakiu n te rawawata ni buan natiu. E titirakinai, “Ko un iroun Tamara are i Karawa?” I kaeka, “I aki, I aki un, ma, Tinau, E aki ongo irou.”
E taetae ma te tangira nakoiu tinau, “E aki mwaninga taekam Tamara are i Karawa. E ongo iroum. E karaoa te kakai man kaukan rabunan karawa ao ni kariaia bwa ko na Nooria ma Kamau, ao e na bon rau n akea tokina Kamau ni Baina.”
Rimwi riki inanon te ririki anne, ni kaukan neweabaakin te Tembora I Hamilton Nu Tiran, I namakina te ingainga ao te nako n nano. I taku nakon kaainabau “N au iango ao e tataningaai Kamau inanon te tembora. I ataia irou bwa e na bon mena ikekei n raonai.”
Inanon te tembora, te ruu ae I bon rangi n tangiria n nooria bon te Ruu ae te Tiretio. N ara tai n tataningaa te rinnako, e taku ara tia kaneweaba nakon ara kurubu, “I rangi ni karautaeka ma e naaki rangi n abwabwaki ara tai n te Ruu are te Tiretio. Ma I berita nakoimi, Tariu ao Mwaneu, bwa e ngae ngke e na uarereke ami tai, kakabwaia ake kam na karekei e na bon tau ibukimi n akea tokina. Ao ae e kakaawaki riki kam na namakina ana tangira ami tia Kamaiu ae Iesu Kristo.”
Ngke ti nang bon rinnako, e taua baiu natiu te aine ae Indie-Rose ao ma kukureina e taku nakoiu, “Tinau, aio te ruu ae okoro are ko tuangai ngkoa taekana?”
I kaeka, “Eng, bon ngaia.”
Imwiina e titirakinai, “Aio raoi aron te tai arei ngkana ti noora Kamau?”
I kaeka, “Eng, e na bon aron aio ngke ti nakonako inanona ao ngaia e mena n te koona.”
A bwaro ranin matau n ara berita ara tia kaneweaba n ana taeka are e taekinna ngkoa bwa ngkai a koro nanona. I namakina ana tangira ae kororaoi ara tia Kamaiu ae Iesu Kristo ni karaua nanou. I namakina ana taeka ara tia kaneweaba ake e taekinna bwa bon te rongorongo raoi ae koaua nakoiu mairoun Tamau are i Karawa, ae taku nakoiu bwa e ngae ngke e uarereke au tai ma natiu te mwaane, kakabwaia ao au tangira ibukina e na bon tau ibukiu ni karokoa te tai ae akea tokina.
Ni kabane ruu n te tembora—ni kabane taamnei ao rongorongoia—I kona n namakina taamnein natiu ae Kamau. Bon te kamatoa nakoiu bwa I riai n rin inanon te tembora. Tamara are i Karawa ao Iesu Kristo a kauringai karekean te rau mai karawa are I kona ni karekea inanon te tembora man mwaakaia ni konaa n ana Mwakuri ni Kamaiu ara tia Kamaiu, ae Iesu Kristo.
E rangi ni kakawaki ngkai inanon maiu te tembora.