“Tibwauakin 72 KaobiinAna Boki Moomon,” Riaona, Tebetembwa. 2023.
Bwanaaia Aika Itiaki ni Boong aika Kaitira
Tibwauakin 72 Kaobiin Ana Boki Moomon
Ni katoa tai I kaurea wiiu n taetaekina Ana Boki Moomon, raou n taainako te Tamnei ae Raoiroi.
Kamataata n te korotamnei iroun Allen Garns
N tain te COVID-19, ti nang kakabwaiaki bwa iai te buoka man te onaoraki ibukin kainabau, Claude, inanon mwengara. Ikai are, ngai ma natira ti ibuobuoki n tararuaia ma te tangira ni karokoa ea motirawa n okira mwengara are i karawa.
Imwain anne, ngai ma Claude ti tataro bwa tina bita ara bwaranta nakon te ruu n bwainaoraki, are tina kona iai n karinii ni kabane ana bwai are e na namakina te mwengaraoi iai. Ti karekea te kaeka bwa tina karaoa nanon are ti iangoia.
N karaoan ara bwaranta, tabeman taan mwakuri a kainnanoia bwa a na rin n mwengara. Tekeraoira bwa, ara bwaranta iai mataroana mai buki, ngaia are a kona n rin taan mwakuri mai iai ao n aki rinnakoa raoi mwengara. Anne bon te kakabwaia ae korakora ni kaineti ma tuan te COVID-19.
Ngke e a tia ana ruu Claude, a kakaoti neeti ni katoa bong. A nang akoi, a tatangira, ao a nang atatai iaon bwaai ake tina kainnanoi n kateimatoaa mwengaraoin Claude.
Ngke I kaina te Ekaretia, I reiakinaki bwa kaain te Ekaretia ni kabane bon mitinare.1 Ngaia are bukina bwa I nang tatangiria n tibwauaa te euangkerio, I a ootani teniua bwaokin Ana Boki Moomon, 24 te boki n teuana te bwaoki. I berita bwa N na anga teuana te boki nakon te aomata are e roko ni mwengara.
I mwakenii mwakoro ake a kakawaki n taian boki n raonaki ma te kaati ni bitineit ae I karaoa ae tamnein te Salt Lake Tembora iaona are I bon raweia. I kanimwa naba au kakoaua iaon baan te boki are e aki kakanoa mai moa raoi. Ngkane, imwain ae I anganako te boki nakon te tia mwakuri ke te neeti, I kabwarabwaraa moa nakoia bwa tera raoi Ana Boki Moomon.
I nang kukubanako ma te kukurei n aia kaeka. Ti temanna ae e karautaeka ao man aki butimwaea te boki. Nikiraia iai nanoia n kan ongora taekana. Iai aika a karabwarabwa, man taku bwa a kan ongongo taekan Ana Boki Moomon ao a tangira aia kaobii. Tabeman a rangi ni kukurei ao a inga ma ngai.
I kakoauaa bwa e riki aio bwa ni katoa tai I kaurea wiiu n taekina Ana Boki Moomon, raou te Tamnei ae Raoiroi. I kakoaua bwa taan mwakuri ao neeti a kona n namakina te Tamnei. I anganako 72 te boki, ao I a manga kanakoa naba au oota ibukin 24 riki te boki.